再興燒臘飯店

營業中

休息中

大大話話，在這裡開餐都有廿年光景，食來食去都係果句，這裡的叉燒不錯，但靚叉燒又真係度度都有，視乎食果個識唔識揀。但佢價錢平又大碟，經濟抵食，就是鐵一般的事實。是日又要落灣仔做野，有少少雨粉，都係唔行咁遠。行過這裡，見排晒長龍，貪口爽問老闆娘有無一人位，佢話即有，就穿過人潮坐下來了。都好耐無食過這裡的叉燒，所以人未坐低，已經叫左「叉飯少肥少汁扣底」。碟叉飯唔使兩分鐘已有得食，效率確是驚人。叉燒不少，有說這裡是全用枚頭叉燒，但我這碟就不是，有半數以上都是韌韌的廋叉﹝圖中右邊那埋﹞。咁唔使問阿貴枚頭的幾舊好食又腍，廋的幾舊唔好食又韌。一路都咁覺得，今日亦加強這個感覺，就係呢度唔係唔掂，但唔係特別好。同街頭巷尾的燒臘舖一模一樣，叉燒亦要睇佢俾邊度，有好有唔好。埋單19蚊，大碟夾抵食，飯扣了底仍然食唔晒，仍然是普羅大眾的飯堂。題外話：望見門外的人龍，少說也有成廿人在等，也不禁配服現在飲食雜誌的渲染力，究竟有幾多人是慕名而來的呢？路經此地，可以一試，但要排隊的話，就真無必要。