大班樓 (已搬遷) 新店位置

喺Open Rice搵到大班樓，見到d相都流哂口水，知難有位，即時打電話訂，六點打已經滿，所以訂下一日，用一日時間去期待，實在殘忍。準時到達，我哋坐門口隔離，其實有位坐，無乜所謂。一坐低，就好鍾意waiter嘅招待，好親切，又細心，同佢講我哋兩個人，樣樣都想食，唔知點好。個waiter好好人，介紹幾度菜，安排細份量比我哋，感人嘅體貼。 咸魚煎肉餅，好食香口。咸魚好野味，熱烘烘，外脆內軟。正。 檸檬葉蝦餅，彈牙香脆。檸檬葉香味濃，好食。唔記得叫咩咩炒蜆，但好好食，有辣味，有蜆味，送飯一流。食到依個時候，見到蘇永康入嚟，原來坐門口亦有好處，同佢合過照，再食。Mustard Squid，中文唔知點寫，總之好食。紅油牛腩，牛腩肉質鬆軟，味道濃郁，蘿蔔十分入昧味又唔太軟，好。干炒牛肉陳村粉，絕非墨筆能形容，陳村粉好香口，牛肉有肉味，有幸食過，真係感恩。一餐十分享受嘅晚飯，服務一流，菜式出眾，味道可口，難怪如此難有位。大班樓係真正嘅大班。