潮人飯堂 (將軍澳)

唔知係我唔好彩, 定係飯堂本身的問題, 兩次飲茶既經歷都係一肚氣咁離開.

第一次大約係三月尾, 星期五, 係公眾假期, 我同老公二人大約十時到達, 唔駛等位. 咁佢枱上有幾張紙, 正常地我係睇有圖畫果張, 仲點了有圖的xo醬炒腸粉, 我都再三地睇清楚張紙係咪公眾假期都有供應, 右上角的確係寫星期六, 日及假期 上午9:00-下午6:00. 另外再叫了其他點心. 坐到差不多10:30, 其他點心都嚟晒, 但xo醬炒腸粉仲未嚟, 我便追了一次, 第一個侍應並沒說什麼. 再等到10:45, 都未到, 就再搵侍應跟進, 怎知個待應一望張點菜紙就好惡咁一句, "痴線, 未有架! 廚師都未返, 11:00先有." 我呆咗.....佢仲攞咗另一張點心紙話呢個11:00先有.
問題一, 我點菜既時候, 係無人同我講過11:00先有. 我10:00入座, 佢哋應該唔會覺得我會想等呢碟嘢等一個鐘, 點可以唔同客人講聲呢樣點心要11:00先有?
問題二, 好明顯兩張點心紙既資料唔一致, 引至問題, 但啲待應都唔留意到, 引起呢啲誤會
問題三, 第一個幫我跟進既待應好明顯係無理過我, 所以無說出原因, 而第二個侍應既態度真係奇差, 有乜理有鬧個客"痴線", 即使唔係鬧個客, 都唔應該有咁既反應. 我果刻真係覺得好難受囉.到今日4月7日, 又再同老公去飲茶, 老實說, 佢既食物真係唔差, 我尤其欣賞佢有一籠點心係一籠有三款"牛肉一粒, 鳳爪兩隻, 同排骨", 等我哋呢啲兩公婆撐枱腳既, 可以食到三款點心, 又唔會要叫三籠. 另外有一款係三個不同的包點. 因為咁, 所以先會再幫襯. 怎知...又係受到不禮貌既待遇.

第一, 傳送侍應攞住個圓托盤, 完全無理過客人既位置就塞入來, 那圓托盤就好似"血滴子"咁一下就介到客人的頸, 甚至我覺得她似乎想將托盤放在客人的膊頭上.
第二, 侍應係會在客人後面大聲呼叫. 這個, 我可以接受到在舊式屋村酒樓出現, 但潮人飯堂給人的感覺是高級一點, 可是侍應卻是一班沒有受過訓練的.
第三, 因為潮人飯堂標榜的是潮, 所以點心都是頗為另類的, 有時候單憑名字未必可以知道是什麼食物, 於是我都會看一看英文, 了解多些. 今日叫了一個叫"千絲鵝肝卷", 英文的確是有鵝肝呢個字, 亦有芋頭. 後來點心來到, 咬第一口...怎麼會是海鮮卷? 即是入面係有蝦, 青瓜, 桃/芒果, 同白色果啲沙律醬/海鮮醬, 當然都有鵝肝, 一細細粒. 我叫了個侍應來問這是什麼, 第一個話係千絲鵝肝卷, 後來我再叫另一個看似高級啲既, 都說係鵝肝卷, 話"係咁架, 入面有少少鵝肝醬, 有啲芋蓉咁囉". 我話點解會係海鮮醬, 佢話"係咁架啦!" 即係好似我唔識嘢咁, 鵝肝係應該配沙律醬的. 我覺得, 佢入面係咩醬都無緊要, 雖然我覺得鵝肝加海鮮醬真係好鬼異, 但佢既然叫得潮人, 我算. 但我想講係, 潮還潮, 有啲食物佢真係要列明裡面有咩物質, 蝦, 同海鮮醬(有奶的成份)都係屬於易令人敏感的食物, 萬一客人真係對蝦有敏感, 真係可大可小.呢兩次飲茶既經歷, 真係飲到我心驚胆跳, 係咁比人用好差既態度回應我, 甚至比人鬧, 兼有種比人質疑我唔識字咁. 食物味道點好, 都真係令我卻步, 唔想再去了.

Schnurrbart (尖沙咀)

在openrice發現這間comment很好的德國餐廳, 便來試試.
大約2-3點打去book位, 已經得番high table chair了, 好彩book了位, 否則只能坐bar table.

間餐廳都幾細, 一入門係一個bar table, 大約可坐十多人, 旁邊有兩張high table, 再入啲就有3張四人枱, 最後有一張6-8人枱. 係咁多

bar table圍滿晒人, 7點鐘, 大家都已經傾得好開心了, 更見到佢哋同啲waiter都傾得好開心, 便知道係一班熟客, 有warm的感覺.

因為老公仲未放得工, 我又無理由白坐, 便叫了一杯德國啤. 好有趣, 要等5mins先有, 原來係要慢慢斟, 斟到黃色的部份meet到條線, 就可以上台.我唔咪好識品酒, 但呢杯叫做入到口, 都有麥味.

因為我唔可以空肚飲酒, 所以便叫了個小食. 係一個醃魚卷住條酸瓜. 勁好食, 勁鍾意. 我係美國時成日都食呢啲, 返香港後就無機會食, 一食就好懷念. 超鍾意. 下次來要叫兩件. 個名係咩就唔記得, 因為我記得我係要查字典先知佢係魚...haha老公來了, 佢就叫了另一隻味的德國啤, 都好飲.然後就叫埋主菜, 德國豬手, 同Saurage Platter.
豬手夠熱夠香口, 好味. saurage platter共有五款不同的腸, 每款都各有特色, 我比較喜歡咸少少的.兩條友兩碟肉, 最後要打包走. 佢哋會幫你包得好好. service不錯!!

同尖沙咀另一間好出名的德國餐廳(赤柱都有果間哩) compare, 我會perfer再嚟呢間. 因為呢間cozy啲, warm啲, 食得開心啲! 果間, somehow我覺得太嘈.

Ocio (旺角)

經過幾次, 都好想試下, 但30幾蚊一個waffle+雪糕, 我覺得偏貴囉!
後來見團購有得$16換到waffle + 雪糕, 便買來當試食.
團購只可以揀五款waffle味(白朱古力, 藍莓等等), 同兩款雪糕味(朱古力, vanilla, 香蕉...其他唔記得). 最後我揀藍苺 + 朱古力. 我買團購時係寫有綠茶揀的, 去到又無喎!
最後出來個look都有點失望.
首先我以為個waffle係真係有藍苺味, 結果個餅就只係一個餅, 然後放幾粒藍苺係上面囉! 咁唔知綠茶的話, 會唔會只是放些綠茶粉响上面便算呢?(或者係我食唔出藍苺味的餅??)
果幾粒藍苺都算新鮮, 幾甜.
到個雪糕...正常的waffle加雪糕, 係應該直接放個雪糕球係個waffle上面, 而唔咪搵個杯載住囉.
雪糕既味道, 普通雪糕囉, 無咩特別.

今次係用團購, 所以試一試都算抵. 但如果要我下次以正價買來食, 真係未必會囉.

八王子拉麵館 (油麻地)

其實我都幾鍾意食拉麵, 有日去隔離的上海麵, 發現八王子, 後來係團購見到有優惠, $22可以食一碗麵, 便買了四張. 其實買的時候, 我係以為是八八八, 但原來唔係, 不過都唔緊要. 照食.

佢主力介紹的是牛骨湯麵, 豬骨湯麵就試得多, 真係好期待牛骨湯麵. 但結果都幾令我失望, 碗麵係一點味都沒有. 一放上枱, 我只係覺得好油.麵質都ok, 肉的份量亦很好, 老公果碗直頭係多到食唔晒. 但真係好可惜湯無味. 我一向食任何麵, 都會夾一注麵, 再浸匙湯一齊食, 但對住呢碗無味的湯同油, 真係無心機.糖心蛋都幾好, 真係幾糖心, 幾好味最後食晒碗麵, 剩番果半cm厚的油.

仲有兩張coupons, 下次試番豬骨湯.

Noren (尖沙咀)

情人節, 唔想逼, 諗來諗去都諗唔到去邊, 最後便決定到noren試試. 去到赫德道, 對面的萬豚超多人排到, 見到都無心機. 隔離的餐廳又另一條龍. 跟著便看到noren. 門一推開, 有位! 真好! 實在不想因排隊而掃了情人節的心情!

menu的選擇真的不多. 主吃大約是7-8款, 另外再有3-4款小吃. 看見隔離枱的豚肉飯, 同咖哩豚肉飯, 便記起在這裡看過的介紹, 又想試咖哩, 又想試豚肉飯. 最後決定試最basic的豚肉飯.豚肉很腍, 比起之前去尖東近上火車站橋的那間, 真係好得多. 我老公可能因為試過那間的"鞋"口豚肉, 所以今次唔敢叫, 但佢就錯過了. noren的豚肉夠腍亦好入味! 個汁亦好好味. 和藹可親的待應更問我需不需要多一點汁. 可以加汁又幾好喎!老公叫了烏冬. 呢度的烏冬屬於幼身, 我試了一條, 好鍾意. 因為我一向幾怕粗粗的烏冬.
老公話個side dish 薯仔沙律超正! 小吃都可以叫呢個薯蓉, 要成30蚊, 份量同跟餐的差不多, 跟餐好抵!

講埋個面豉湯. 超得! 好濃郁好好味!我哋另外再叫了個凍豆腐. 我好鍾意. 以我估計, 個醬應該係面豉醬, 另外綠色的是好辣的醬, 但好好味. 我就好鍾意呢個豆腐. 但我對老就一般. 因為佢唔咪好鍾意食雪凍咗的食物!

小小一間日本小店, 好溫暖. 老板的樣子很和善, 令人覺得好溫暖! 下次再去要試那個咖哩漢堡先.