Pokka Cafe (旺角)

叫咗兩個TEA SET, 蘋果CHEESE CAKE 同荔枝凍餅.

蘋果CHEESE CAKE 冇芝士味, 舊士多卑梨雪糕既味假到好似藥水咁

荔枝凍餅就用維記雪糕加塊餅夾住，把鬼!!!!

杯凍coffee就一杯上，以前係會係你面前由個玻璃瓶倒出黎，冇晒啲風味......

仲有[的小昆蟲飛飛吓!

埋單價$126, 超唔抵!!!!!!!!

真係差差差差!!!!

銀龍粉麵茶餐廳 (天水圍)

為咗近近地睇場世界盃，方便聽日早起，特登打電話訂位睇波，可以話係第一次。
場波緊張而唔精彩，D野食就更加難搞!
2人前，樣樣都超濃超咸，大馬站煲咸, 咖哩雞又干又咸, 炸蓮藕又咸, 只有杯凍奶茶叫做唔咸，因為超甜!
但咁大個仔，第一次係茶廳睇世界波，仲同大王一齊輸錢，難忘難忘。

安娜餐廳 (元朗)

不知不覺，同大王一齊兩年喇，大王推介要搵啲(特別)啲既食店黎記念一吓。

平時路過總會見佢有人等位，網上既食評都係咁講。安娜係元朗老字號，係元朗既傳奇，但大王既評語係麻麻，唔知點改會咁多人等，覺得同花園餐廳差唔多，平時都唔會提起勁黎試，但小弟今曰就處女下海，同大王試一試呢個傳奇！

七點幾黎到，唔使等，搭枱就有位。裝修係屬於懷舊一族，跟花園同金鳳一樣既感覺，鈎起童年中學既記憶。
大王要豬手餐，小弟就要咗黑椒西冷七成熟。多士同紅湯好快就到咗，多士夠熱，紅湯唔係味精水，仲好多菜，比意料既好！
牛排好快就到咗，熱氣騰騰，淋上黑汁，渣咗一聲，久違了既中學鋸扒感覺，又湧上心頭。試一口，有牛既少少穌味，足七成熟，正是往時熟悉既味道。被黑汁浸淋既薯條，亦都照樣可口。食到一半，大王既豬手都上枱喇。份量十足既豬手，用汁煮，食落冇焗既咁咸，味道清啲，啱大王口味！

總括而言，安娜屬於大件夾抵食，冇銅鑼灣金雀既古雅精緻，但抽氣比金鳳好，食物同美而廉、金鳳等不相百仲，比大家樂好，係童年鋸扒既味道。但以咁既價錢味道而吸引到咁多人排隊，真係元朗既傳奇。

同大王呢一餐，當然味道係其次，可以係記念曰留下一個回憶，先係難得。

南大門1號 (尖沙咀)

係Openrice見過呢道啲食評，同大王想試好耐，今日終於有機會。煎海鮮蔥餅 – 係食評中得分最高，所以即叫。食落幾香脆，有蔥、八爪魚、蠔仔、蝦粒，比其他既韓國餐廳既出品薄，如果配上辣汁會更好味，70蚊係抵食，但有其他地方既海鮮蔥餅比佢好食。紫菜包飯定食 – 評價又很好高，大王都叫咗。睇落好似冇醋既太卷，食落都冇特別，不過碟頭夠大，幾飽肚。泡菜豬肉鍋 – 幾好味，再配上隨鍋付送既白飯，撈湯一流。炒螺肉 – 碟頭好大，有好多青瓜、紅蘿蔔、雪梨同肉絲，開頭食落甜甜地，跟住啲辣味就慢慢滲出黎，食得辣既大王都話辣。

總括黎講，碟頭大，價錢偏貴，可以一試，但唔會特登黎，大王又中咗計。

Bang Bang Pan Pan (銅鑼灣)

知道呢間鋪都開咗一段時間，見今晚大王係銅鑼灣出現，就試試佢既大阪燒。

睇過食評，知道價錢偏貴，不過如果好食又好玩都唔錯。

好肚餓，研究咗menu好一陣，終於決定食乜野。

大王要辣味﹐配料要八爪魚, 芝士, 洋蔥, 粟米。小弟要原味，配料就要海螺頭, 帶子, 芝士, 洋蔥, 日本本菇。

跟住伙記就略略講解吓，等我地搞好搞暈啲材料就開火準備落鑊煎。一倒落去，已經要追加個泡菜豚肉立即食，因為實在太肚餓喇。泡菜豚肉微辣，幾開胃，頂肚唔錯。

煎吓
、轉吓、再反吓，最尾加隻蛋係底，禮成，食得!!!!

先食大王既作品，冇乜辣味，啲洋蔥幾好味，但就食唔出其他既味道。再試小弟既原味﹐好過辣味少少，似多啲日本既味道，但都係偏淡。

食咗兩塊，戰士已經投降，剩低我繼續努力，但因為太”溜”，最後都係食唔晒。

叫咗杯巨峰提子紅茶，但黎錯咗巨峰提子梳打，咁老闆就將錯就錯，再送多杯紅

茶比我地，多謝老闆。

叫做試過，幾有趣，但味道就好普通，啱年青人同情侶黎玩吓、開心吓，但就唔

好期望有乜味道。