petite Amanda (中環)

美女廚神選址中環開餅店,近水樓台的我本應一早該試盡其麵包西餅,只是此店之營業時間跟我的工作時間相若,lunch hour行去又遠了一點, 星期三晚提早放工便過IFC潮聖.

7點了, 蛋糕仍有數款可挑,顏色有淡素有鮮豔, 經有禮店員介紹下, 挑了法式李子蛋糕(唔sure倘名了,反正係李子造就是了)作為餐前小甜點. 李子滿滿的蓋在頂層, 水潤光澤, 下一層是蛋白cream,再下層便是海棉蛋糕. 李子肉腍甜,未有太多的糖水浸泡, 甜味天然, 蛋白及海棉蛋糕部份帶出creamy及鬆軟2種口感, 整體感覺係甜得舒服的蛋糕, 為接下來的late dinner撐一撐個胃.

一個好既開始會帶人良好的印象, 我對女神既其他蛋糕都滿有信心,一定會再試其他款式.

HABITŪ table (銅鑼灣)

暴風剛過的星期二晚上, 一早與女友們約定之飯局未受影響, 開開心心地開餐去.

由於致電訂座時已經額滿, 服務員着我walk-in便可,晚上7點45分我第一個到達, 仍有空座, 幸運地不用罰企輪候

4人點下之美食有: cream mushroom soup, classic ceasar salad, black truffles pizza, classic egg benedict, seafood pasta w tomato sauce, pan fried salmon w mashed potatos, etc.

-個湯好多菇蓉, 好香, mushroom lovers一定愛死!
-沙津一般啦, 冇烤麵包粒及芝士粉令人有d失望
-經典斑尼迪蛋, 其實係all day breakfast, 蛋黃煮得8成熟,未有流出蛋黃,有d失望. 流心蛋才美味呢,為何蛋形不穩似未熟,原來已流不出黃來? 薯粒太腍,脆口的薯仔才是本人最愛,這碟要扣分!
-黑森林薄餅好crispy,芝士唔會太厚,野菌加上淡淡松露香, 好完美既配搭,讚! 不過食開pizza一定要有蓄茄醬既人來講可能若有所失, 個人而言pizza無需太多topping,用料之配搭重要過大堆頭呢~
-鮮茄海鮮燴扁意粉個汁未有如相象般酸,是偏甜的蕃茄醬,怕酸的我非常受落. 海鮮配料有大大隻中蝦, 大青口, 幾隻大蜆等, 1-2人食剛好,4位女士每人分得一少注意粉,略嫌未夠, 最終last order時多叫一個主菜.
-香煎三文魚扒伴菠菜薯蓉, 魚扒大件, 煎得面層微焦,內裡魚肉依然滑,唔錯.此時如有一片檸檬給我更好, 魚扒若添些少酸味,肥膩感大減,更開胃!不消幾分鐘此主菜已被清得乾乾淨淨, 大家都好滿意.

由於當晚是為一朋友補祝生日, 全單$803只除3人, 每人$270, 食物分量,質素,價格都算合理, 若去outback/ fat angel 等等可能更貴, habitu會是另一個意菜好選擇.

9點已經last order, 10點開哂燈,仲有staff來提示要關門了. 銅鑼灣區乃香島區之最旺地段,竟然10點就催客離開,做餐廳的也未免太早吧!

Wonderland Too (尖沙咀)

聞說已久的wonderland too,終於由朋友提議一試, 我當然一口答應.餐廳有分室內/室外, 當日天氣炎熱,歎冷氣是最好的選擇.

餐牌有個2人套餐,有朋友喜歡的牛扒及我喜歡的risotto,就點套餐吧.
有湯,appetizer,2個main course+coffee or tea, 是日餐湯是白湯, 女士一般都喜愛,但朋友似有點猶豫, 只見我冇異議只有say yes.前菜4選1,當中只有焗蠔係熟食,朋友抗拒生食,只好揀焗蠔. 蠔有4隻,size都算大, 面層有麵包碎粒同焗,仲有淡淡香草/olive oil既味, 幾match.我既主菜係oysters risotto , 上卓時半隻生蠔未見,我跟朋友用匙左舀右翻都找不到原整一隻的蠔, 深感奇怪,再翻閱menu睇清楚是否[生蠔"汁"意大利飯], 的確冇個"汁"字,suppose生蠔意大利飯應該有原隻生蠔吧,批發價一隻生蠔低至$8都有啦,點會只有蠔汁,蠔碎而冇原隻生蠔蹤影???太小家吧,講番個味,蠔未係濃郁既,飯有嚼勁,唔會過生,係食到尾時開始有點膩, 可知油份唔少.朋友愛到此用餐全因牛扒的水準穩定, 佢份牛扒珊珊來遲, 我以超慢速食完個risotto仲要過多最少8分鐘後才上卓. 但賣相及其份量令等候時間變相係值得既! 牛扒用木板上, 面層有明顯交叉網燒紋, 肉香撲鼻.朋友切邊位較熟位置我試(我怕太生既紅肉), 肉味濃而鬆化,脂肪唔太多, 適當的調味己好好食,不愧為餐廳主打,朋友食得滋味,仲連叫幾杯cocktail伴食,應該大感滿足.

for oyster & steak lovers來講,係值得來既,但pasta/risotto就比較遜色, 一間餐廳要做到餐牌內所有食品都達average水平才可例作心水餐廳, wonderland too在某方面仍需努力.

餐廳樓底唔高,遇上左右大班人談天說地甚至慶祝生日之聲浪, 可以嘈得如置身街市,真係幾掃興! 如想2人世界偶偶細雨, 訂座前講明要角落位置或露台位會好些少.

小澤日本料理 (中環)

同一位置, 一個月前仍是西式cafe,現已被新開的日本料理取代. 睇過食評後似乎一面倒的讚, 引得我要親臨一試龍與鳳!

1:40分,午餐之人流高峰期減退了, 未有訂座都立即有位,午餐menu唔多選擇, 我跟朋友也喜歡選最好的, 所以點了比較貴既魚生定食及壽司定食.

魚生定食有牡丹蝦,三文魚,鮮帶子,吞拿魚,玉子等等. 魚生件均為厚切, 魚肉鮮.油花適中;吞拿魚是淺粉紅色的, 本人一向唔愛吞拿魚, 尤其是紅丹丹的那種,未食已感覺"鞋口",此吞拿應屬近魚腩位置, 未至於入口即溶,但口感軟滑,油脂較多, 魚味餘韻悠長,讚!
蝦,帶子亦冇失望,食得出的鮮,爽,甜, 再來一口日本珍珠米, 飯跟醋的比例非常恰當, 唔會太酸, 好! 連wasabi都係上等貨, 淺綠色鮮磨的wasabi溶食得出的鮮及微微攻鼻, 聽聞最天然的wasabi就是這樣.

套餐連麵豉湯及雪糕, 湯正常,冇咩特別, 雪糕我選了豆腐味, 豆味濃,甜度適中, 只是未算幼滑.如果再大球些少就perfect了.

日本料理該是這樣吧, 新鮮之食材, 師傅之手藝, 慢慢地享受........日本人的飲食文化該是如此吧, 食厭了放題式之日本餐, 那小家的份量, 欠佳的服務(太忙吧), 大大隻[珍惜食物,切勿浪費]的字報. 日本人絕對唔會是此等店之坐上客.

Le Coin Cafe (中環)

睇某報紙介紹皇后大道中118號有2間新cafe介紹, 便相約女友人同試其中一間.

晚飯時間人客唔多, 我們walk-in都立即有位. 晚餐menu有十數款選擇, 有湯/沙津/主菜/餐飲及租品. 部份chef special係每日限量供應, 於是朋友點左其中一個chef special,我就點穩陣既雞扒set.

是日餐湯係忌廉湯, 湯好creamy,香且滑,唔錯; 沙津真係冇乜特別,幾塊生菜加2粒車厘茄, 汁亦唔太吸引.
主菜分別係[芝士拿破倫烤雞扒]及[香草烤大西洋鱈鱸魚扒],前者既汁有d杰, 加左芝士後都幾heavy, 而且個汁未夠融合到,有些少一pat pat.雞扒幾大件, 肉厚但烤得剛好, 唔會鞋口,雞皮微脆,忍唔住食左2口, 如果雞皮再烤耐d令油份逼出更多,應該更完美;後者鱈鱸魚扒係chef special, 老闆介紹此魚屬混種魚, 有來自智利及大西洋,此貨屬大西洋較優質的, 魚咪濃,肉質結實, 用欖油香草烤香以保魚肉原本鮮味. 朋友俾左d我試, 魚肉質地似鱸魚, 魚扒亦厚, 汁帶淡淡香草味, 朋友食得滋味, 個人偏愛鱈魚既滑, 所以唔算太喜愛此混種魚.

甜品係奶凍, 大家都揀左朱古力味. 係古力漿蓋於奶凍上, 餐牌寫係homemade dessert,但用上矮身玻璃小瓶,激似milk top既奶凍,味道嗎?朱古力漿比奶凍好, 奶凍雪得唔夠實, 好淋, texture唔係太好.

飲品大家都選花茶, 茶香比茶味出色, 都冇咩好講了.

餐廳環境優雅舒適, 有幾幅畫及牆上疑似手畫既的比薩斜塔點綴,吊橙也色彩繽紛, 可以的話, 下次搵個下晝來hea下.

早餐都有供應, 另有私房菜menu,要預訂!