Greyhound Café (中環)

本身對泰國過江龍 Greyhound Cafe 不太熟悉，因為我之前都係歐遊為主，東南亞諗住年紀大啲先去都未遲，哈哈，所以暫時都未去過泰國。早前出席飯局，有朋友提及剛剛試咗去年十二月先開張嘅又一城分店，對食物都讚不絕口，我先開始留意呢間餐廳，睇吓食評先知原來係泰國好出名嘅，攪到我都好想試吓。

朋友對嗰甜品念念不忘，於是我就有機會一齊去食，哈哈，住港島區嘅我 IFC 分店比較方便，朋友打電話訂星期五，估唔度又訂到位。收工後和朋友匯合，再出發去 IFC。
　
雖然係第一次嚟，不過原來我之前都成日經過，因為餐廳位置係 IFC 二期一樓，係中庭隔離，平時 IFC 有什麼主題活動也在中庭擺設，我真係有眼不識泰山，哈哈。

由於星期五嘅關係，餐廳已經坐得八九成，而且還有客人在排隊。餐廳係半開放式，進餐嘅客人，逛商場嘅人，裡裡內內嘅聲音，氣氛很熱鬧。我們被安排坐窗邊嘅位置，餐廳設計時尚，特別係黑色皮餐牌同餐檯墊，同我印象中嘅泰國餐廳好不同。今晚客人很多，亦很國際化，我們拿著相機，反而更似遊客，有點不好意思，哈哈。　 由於剛巧大家都有點抱恙，點單時盡量避免煎炸同太辣嘅食物，最後點了兩個頭盤，兩個主菜，兩個甜品同埋飲品。

藍蘭豆甜菊茶 (Bufferfly Pea & Stevia Tea) $28
因為病未好番，唔適宜飲生冷嘢，最後揀咗玩味十足嘅藍蘭豆甜菊茶。餐廳職員奉上茶壺和糖漿後，細心提示加了糖漿之後，茶會變成紫色。我先試未加糖漿嘅藍蘭豆甜菊茶，味甘，再加糖漿，茶果然係變成紫色，再試飲，味道變甜，反而少了一份茶味。秘製辣肉醬手包粉卷 (Complicated Noodle) $88
餐牌內寫明 'You need to do a bit of work here but it's worth every bite'，因為係要自己包嘅。餐廳職員奉上生菜，粉皮，辣肉醬同羅勒醬。我哋自由發揮，先用生菜放底，之後放上粉皮，再加一點辣肉醬同羅勒醬。由於生菜太爽脆，要包住唔係咁容易，食食吓又掉吓，有點狼狽，哈哈。粉皮仍然暖身，食落都很滑，辣肉醬很香口，越食越開胃，再加一點羅勒醬，又有另一種味道。意大利肉腸芝士餡餅 (Pita Pizza with Italian Sausage) $98
睇番餐牌嘅英文先知原來係 Pita Pizza，餅皮烘至金黃，厚度適中，而且尚算鬆脆，內裡餡料豐富，有意大利辣腸，洋蔥，蕃茄，芝士，甜椒，吃起來很惹味，是一個不錯的小食。泰式河蝦冬蔭公湯河粉 (Noodle in Tom Yum Koong) $108
起初怕辣，所以叫了小辣。大大隻河蝦差唔多佔咗碗嘅一半，食落尚算爽口。河粉係一塊塊，好軟身，真係第一次見同食一塊塊嘅河粉，真係孤陋寡聞，哈哈。原來冬蔭公湯係唔辣，唔知係咪我們叫了小辣，酸味變咗更突出。鮮蝦場炒金邊粉 (Phad Thai Prawn) $108
嘩！好大隻蝦！碟邊有蔥，有芽菜，有花生同辣椒粉，隨自己喜好再添加。鮮蝦爽口彈牙，而乾蝦都唔細隻，帶少少鹹香味，金邊粉炒得夠乾身，我食完冬蔭公湯河粉再食呢個鮮蝦場炒金邊，食落多咗一份甜味。新鮮椰子千層蛋糕 (Coconut Crepe Cake) $68
招牌甜品先出場，千層蛋糕都算第一次食，係一個花功夫又花時間嘅甜品。試咗一啖，忌廉蛋糕很滑，不太甜，配上新鮮椰子肉，好清新，真係好好食，好想買件攞番屋企食。野莓千層蛋糕 (Mix Berry Crepe Cake) $58
愛莓嘅我梗係叫野莓千層蛋糕，嘩嘩嘩！好靚呀！紅色醬汁，同白色嘅千層蛋糕，對比強烈，再加上紅莓和藍莓粒點綴，賣相真係唔錯。千層蛋糕忌廉一樣好幼滑，班戟皮厚度和軟硬度適中，中間夾著紅莓和藍莓肉，酸酸甜甜，係好好嘅配搭，大大件嘅野莓千層蛋糕轉眼間已經被我食晒，嘻嘻。總括而言，食物質素不錯，餐廳人流絡繹不絕，相信有一定嘅吸引力。下次有機會去泰國，我要試吓先得，哈哈。

Cafe MILANA (上環)

早前見到新店打算去，不過嗰晚見佢又關咗門以為咁早收，今日見佢開咗，真係好喇，可以試新餐廳。餐廳位於新紀元廣場低座二樓，前身係一間韓國餐廳。落地玻璃嘅設計，餐廳內嘅情況一目了然。門外擺放咗大餐牌，有 Brunch，Pasta 同 All Day Breakfast，賣相都唔錯，相信都可以吸引唔少食客。我先進餐廳內找個位置，窗邊位已經被佔據了，只好坐係背著門口落地玻璃嘅位置，避得行過嘅路人見到我嘅食相，嘻嘻！餐廳嘅另一邊以鏡面為裝飾，與窗邊反射，增加空間感。以黑白棕色為主色，設計簡約又令人舒服。餐廳職員奉上餐牌，並提示揀完去出面落單。這裡是半自助形式，客人先在酒吧位落單，之後會有號碼牌，職員就會將食物奉到你面前。落完單之後，店員會奉上餐具。餐廳嘅鏡位後面原來係廚房，大廚煮好食物之後就會按鈴，職員就會將食物取出給客人。餐廳亦擺放各式各樣嘅醬汁，調味料，餐具同埋可以自己去斟水飲。可能剛開張，有客人問職員取芝士粉同牙籤時，都未能提供。

餐牌上嘅選擇也很多，All Day Breakfast 嘅配搭更加係樣樣都好吸引，仲可以加 $10 或 $12 嘅配料。最後揀咗 All Day Breakfast A5 餐 ($68)，有特濃班尼迪蛋，脆香煙肉，烤蕃茄，茄汁焗豆，炒磨菇，沙律菜。因為想食特濃班尼迪蛋，不過又覺得呢個餐可能唔飽，最後加了一塊薯餅 ($12)，嘻嘻。跟餐嘅飲品，有免費嘅熱奶茶，熱紅茶同熱綠茶，而凍飲或轉即磨咖啡就要加 $4，如果唔想飲呢啲都無問題，揀餐牌上嘅其他飲品，可以減 $8。唔飲咖啡嘅我又想試啲特式飲品，最後就係 'The best chocolate flavor in Cafe Milana' 嘅比利時朱古力餐牌內揀咗烤榛子朱古力 (原價 $36)。係我等待食物嘅時間，細看餐廳嘅卡片，原來 Cafe Milana 係 Origin from Italy，再上卡片內提供嘅 Facebook 資料，就即刻上網睇睇，原來係一月二十一日先試業。而 Cafe Milana 係 Coffee，Restaurant，Bar，唔怪得係餐廳內有 Poster 寫住 Happy Hour 啦。轉眼間，我嘅 All Day Breakfast 餐就係面前，賣相很精美。有兩個特濃班尼迪蛋 (Egg Benedict Muffin)，很可愛嘅樣子，英式鬆餅上放了火腿，蛋，切開蛋之後，蛋汁流出，蛋味香濃，火腿厚度和鹹度適中，配上鬆餅一齊食，好味道。 脆香煙肉 (Crispy Bacon) 卷成花狀，有別於平時一條一條放係碟上，煙肉煎得很香，邊位好脆，由於鹹味也幾濃，建議同其他配料一齊食。烤蕃茄 (Roasted Tomato) 係我鍾意食嘅食物之一，蕃茄輕烤一來可以令營養更易被人體吸收，而且烤過嘅蕃茄，更軟腍易入口。如果可以大件啲就更好。茄汁焗豆 (Baked Bean) 係好多英式早餐嘅配料之一，茄味不濃不淡，中規中矩。炒磨菇 (Sauteed Mushroom) 味道比較濃，其實平時對罐頭磨菇有點擔心，因為曾經在一間餐廳食得我腸胃炎要入急症，所以每次都食得戰戰競競。

沙律菜 (Salad) 份量剛剛好，以紅色菜為主，而且好新鮮，配上醬汁，確係唔錯。而薯餅 (Hash Browns) 就比我想像中薄，炸出來比較深色，薯餅餡嘅薯仔唔多，有點失色。

最後就嘆杯烤榛子朱古力，好大杯朱古力，以呢個價錢來說都算合理。烤榛子朱古力，朱古力味香濃，會有淡淡嘅烤榛子味，只是飲落有點甜，感覺較膩。總括而言，都係一間不錯嘅 Cafe，而 All Day Breakfast 就啱晒成日食 Brunch 嘅我，下次有機會再試吓意粉餐。

當吉日式吉列豬排專門店 (屯門)

今日又去屯門市廣場食午餐，今次揀咗新開嘅紅葉庭 (MOMI JI TEI)。上網找資料時見未有食評，於是去看看商場嘅 Facebook 專頁，只見有人提到這裡有午市套餐。由於屯門市廣場成日都有新店，於是我就打電話去餐廳確定位置所在，餐廳職員說在一樓某化妝品店行前啲，又說有間麵包店。其實我都唔係好知嗰位置，因為這間餐廳嘅地址同我早兩日去的拉麵店係同一個地址嚟，有點疑惑，於是我問職員是否拉麵店附近，他說就係隔離。真係勁攪笑，我上次去拉麵店時，完全睇唔到呢間餐廳，職員話係拉麵店嘅左邊，嚟到就會見到架喇。之後我再問他有沒有午市套餐，大概是什麼價錢，他回覆由 $78 至 $108。就係咁樣，我哋就決定去試下呢間新開嘅餐廳。

紅葉庭 (MOMI JI TEI) 其實都係 Pokka 集團旗下嘅新品牌，同隔離嘅拉麵店係同一集團，而且都係一月十五日開張，而紅葉庭標榜嘅係日本正宗上品吉列炸物。似乎是同旗下另一品牌店一樣，提供相同嘅吉列烤物，只是轉了名。

今日去到拉麵店門口再望向隔離，終於見到紅葉庭嘅餐廳門口，真係唔知點解上次會睇漏眼。餐廳門口擺放了餐牌同埋一個應該係牛肉鍋嘅食物樣本，由於時間太趕，未能看得清楚。餐廳設計優雅高尚，有不同嘅插花擺設，感覺就像一間很高級嘅日本餐廳。內裡的格局好似迷宮，一格格的。印象最深刻嘅就是私隱度極高嘅卡位，有幸我們被安排在卡位內進餐。卡位掛上布簾，客人進食時就唔怕被其他人睇到食相，真係好特別嘅設計。卡位內有一銀線繞成嘅吊燈，燈光柔和，座位寬敞，確是一個閒聊食飯嘅好地方。由於第一次嚟，對於我來說，樣樣都好新奇咁，不停拍照。檯上面原本有一個好似小型嘅餐牌，而前面就有一個好似電腦 mouse 嘅半球體，原來係呼喚職員到來嘅按鐘。初頭以為係固定在檯上的，點知因為要影相嘅關係，我不停搬檯上嘅物件，竟然俾我搬得郁個 '鐘'，哈哈，於是諗吓佢係咪用 Wifi 連接，點知反轉個牌時發現有店舖嘅 Wifi 密碼提供，不過就沒有時間試。如果係度睇住日劇，再嘆杯茶，真係幾悠閒。長長嘅餐牌上看到紅葉嘅圖案，午市套餐選擇以吉列為主，有吉列大蝦拼豬扒，吉列生蠔豬柳，又有照燒牛肉，牛肉鐵板鍋等等， 共有 8 款套餐可選擇。最後我哋叫咗 $98 吉列生蠔豬柳定食伴三文魚刺身，因為可以試食出名嘅吉列炸物，又可以食我至愛嘅三文魚刺身，一次過滿足晒我嘅慾望。

餐廳職員奉上食刺身時用的豉油，同埋一碗用來製作伴食豬柳嘅芝麻和小木椿。 然後向我們解釋要自己用木椿壓碎啲芝麻七八成，之後再加上醬汁。由於時間嘅關係，我哋叫咗餐廳職員代勞。餐廳提供嘅係熱茶，再放下一個茶壺，茶飲起來很甘甜，向職員查詢才知是煎過嘅綠茶，我仲以為同隔離店一樣用烏龍茶添。可惜我們沒有時間在嘆茶，浪費咗壺茶。之後我們嘅三文魚刺身好快就到咗，三文魚有三小片厚切，食落好新鮮肥美，確是不錯，如果可以大件啲就好喇！哈哈！轉眼間，吉列生蠔豬柳定食就好快出現係我哋面前，嘩嘩嘩！好大份定食呀，而且有好多碗碗碟碟，好正宗嘅日本定食！麵豉湯，麵豉味適中，內裡有蔥，海帶和豆腐，不過不失。前菜是蓮藕片，食落好爽口，加上芝麻嘅調味，很清新開胃嘅前菜。估唔到連漬物都唔簡單，有三款咁多，紫紅色，粉紅色和綠色嘅漬物，配搭得宜。沙律菜以椰菜絲為主，菜絲真係好幼，遠看就似平時用來墊禮物嘅紙碎，食落感覺好乾爽，可能太幼太乾，好似食緊紙條咁，哈哈，建議大家用餐廳提供嘅沙律醬伴住嚟食，會好食好多。而蕃茄就有一件，食落都幾新鮮。

跟住就到今日嘅主角出場，吉列生蠔同埋吉列豬柳，吉列豬柳有四大件，而吉列生蠔就有一件。吉列面炸得好香，厚度適中，食落又好鬆脆，而且不覺得油膩，真是不錯。豬柳仍然保留住肉汁，食落都算腍，配上之前拌勻嘅芝麻醬，特別好味。而珍珠飯濕潤得來又恰到好處，一啖肉，一啖飯，是好好嘅配搭。另外餐廳在炸物嘅碟上亦提供了芥末醬，可以迎合不同口味嘅客人。至於吉列生蠔，食起來好鮮味，蠔味很濃，蠔很軟滑，外脆內軟，質感對比強烈。由於趕時間，我們仲食緊就已經叫埋單，於是第一次按鐘，職員果然好快來到，當我們話要埋單時，佢話仲有果物！果物，原來係生果，三片紅紅嘅西瓜，又綿又甜，今日食完呢個定食真係覺得好滿足。總括而言，是有驚喜嘅一餐，食物和服務質素都好好。以 $98 定食套餐，再加一服務費，每人約 $110 真是不便宜嘅午餐，不過相比起差不多 $100 嘅一碗麵，我又覺得呢個套餐已經物有所值。

黑福多拉麵 (屯門)

屯門市廣場真係開咗好多新食肆，我哋今次就去咗黑福多拉麵。黑福多拉麵原來是 Pokka Cafe 旗下嘅新品牌，睇個中文名可能唔知咩係黑福多，再睇 Kuro Bu Ta Ramen 先知道原來係黑豚，唔怪得有隻黑豬做 Logo，黑豚在日本鹿兒島很出名的，早幾年去鹿兒島旅行買手信時都係以黑豚為主。嘩！一去到門口已經見到入面好多人，相信是因為新開張嘅效應，而且仲要等位，對於非常趕時間嘅我哋猶豫咗一陣，不過最後決定照等啦，因為餐廳職員話已經有幾檯埋緊單。我哋係門口嘅餐牌睇定食咩款式拉麵，拉麵由 $54 至 $88 不等，另加一服務費。以午餐來說真係唔便宜。拉麵店沒有提供午市套餐，驟眼看客人以家庭或工作人士為主，沒有學生嘅蹤影，和附近日式食肆嘅客路不太相同。等待嘅時間也差不多十五分鐘，期間我就周圍望下，餐廳以棕色為主，有四種座位，有卡座，有單邊 '面壁'，有單邊 '梳化位'，有面向門口的吧檯位。從座位的設計來看，似乎有一半嘅座位好適合一個人來食。而我對於門口櫥櫃的拉麵模型更感興趣，有細到大都覺得呢啲模型好靚好想擁有。　由於已想好食什麼，當有位嘅時候，一坐得就已經同餐廳職員講要 2 個 17 號，1 個 19 號。不過原來餐牌上的號碼不是用作落單用的，職員不知道是什麼，不過同一時間攞咗部掌上電腦出來為我哋落單。

於是我打開餐牌指著 17 號嘅 '自家製叉燒，自家製厚切豚肉'，同埋 19 號嘅 '自家製叉燒，特式豬軟骨' 再落單。由於我哋叫嘅都係赤吉豚王湯底，有三種辣度 (大，中，小)，我們三個也叫了小辣。遠望職員落單用的掌上電腦始乎是預設了材料的名稱，只需分開點擊材料和辣度就可以。職員提醒我們製作需時 15 分鐘，聽完心中一沉，因為可能趕唔切返公司，不過沒有辦法啦都要照等。

另外可以加 $15 有特飲，不過我們沒有叫。於是職員問我們要水定茶，我叫了茶，茶的顏色比較深，茶味都幾濃，向職員查詢，原來是烏龍茶。幸好我叫嘅'自家製叉燒，自家製厚切豚肉' 拉麵不用等足 15 分鐘就出場喇！職員小心翼翼奉上，拉麵碗是另有一個托盤盛上，相信都幾重。橙色嘅赤吉豚王湯底，看來也十分吸引。先嚐一口，果然不錯，湯甜中帶辣，又不失鮮味，同平時飲的不同。細看介紹，原來赤吉豚王湯底係採用極上豬骨，雞肉，瘦肉，鯊魚骨同埋新鮮蔬菜待材料，再配合沖繩的唐辛子肉碎和獨特嘅香料，以超過十多個小時時間熬制，之後再混和味吉極濃豬骨湯。咁又再睇下極濃豬骨湯底係用咩材料，原來係以大量嘅極上豬骨，配合獨特火候熬煮多日，令骨頭嘅精華完全融入湯中，煮成鐘乳白色的濃湯。嘩！估唔到一個湯底背後要咁多功夫，一碗拉麵嘅價值其實就是來自湯底。

'自家製叉燒，自家製厚切豚肉' 拉麵，主角厚切豚肉係我至愛嘅肥豬肉，食落好腍，肥膏部份又肥又滑，好正！如果可以多幾件我都食得落，哈哈。加多幾件係可以，不過要加錢，厚切豚肉每件要加 $12。相對厚切豚肉，叉燒就係薄切，好軟身，攪兩攪碗麵時，叉燒容易斷開。叉燒肉的紋好細緻，係瘦肉為主，食起來好乾身，不過我都係鍾意食肥豬肉多啲。而拉麵嘅配料有香脆嘅紫菜，鮮嫩嘅竹荀，新鮮嘅日本大蔥，甜甜嘅糖心蛋半隻。只是糖心蛋嘅蛋醬已經流到湯入面，有點可惜。至於拉麵比我想像中好食，可能之前食的拉麵都不太好，所以平時在有選擇之下我都唔會揀拉麵。這裡嘅拉麵不太軟又不太硬，麵質彈牙，有蛋味，都算不錯。總括而言，這裡的拉麵湯底甚為出色，以 $78 再加一服務費嘅午餐來說並不便宜，真是一分錢一分貨。

樂雅軒中菜廳 (油麻地)

早前參加咗酒店 Facebook 專頁嘅「理想綠色酒店之期望」遊戲，向酒店提出一些環保和節能嘅意見，好幸運地被選為得獎者，獲贈樂雅軒中菜廳嘅花龍蝦鮑魚宴 2 位。餐廳是法國藍帶美食協會會員，相信食物質素也有一定的保證。而餐廳十二月和一月都推出鮑魚宴，官方介紹係用肉質鮮嫩的印尼花龍蝦及矜貴澳洲鮑魚，配以時令食材及即場烹調技巧，睇到都已經覺得好想食，真係好期待。

約咗老友食家係地鐵站等，酒店位於油麻地近地鐵站 A 出口，步行不用五分鐘就到達酒店大堂。樂雅軒中菜廳在酒店的一樓，客人可以由酒吧位隔離的電梯而上，就已經見到樂雅軒，彩色的燈光和紅燈籠互相映照。樂雅軒玻璃外牆的設計，令餐廳的透明度提高，客人多少真係一目了然。中菜廳以為紅色主，簡約的設計又不失優雅，亦添加咗一些新年的裝飾佈置。我們被安排坐窗邊位，當餐廳職員問我哋要什麼茶時，由於我夜晚避免飲茶，所以由老友食家揸主意叫了龍井。當餐廳職員為我們倒茶時，很細心地只倒了一杯水給我。

由於已預先訂了食花龍蝦鮑魚宴，好快食物就奉到我哋嘅面前喇！

金錢鳳肝帶子 (Sea Scallop Layered with Chicken Liver Pate and BBQ Pork)
我曾經食過一個由金錢雞懷舊菜演變而做出來的菜式，由叉燒，雞肝和肥肉串起來烤製而成。而這個金錢鳳肝帶子就是由帶子，雞肝醬和叉燒夾在一起燒焗而成。我的帶子比老友食家嗰碟細件，變得無咁吸引。夾在中間的雞肝醬味道不錯，不喜愛雞肝的我，都可以接受到佢嘅質感和味道。而叉燒就好腍好肥美，啱晒我合味。三層配搭，吃起來有不同的質感。由於三種比較油份重的食物放在一起，建議大家連最底的餅皮一齊食，可以中和一番。值得一提的是蜜糖叉燒醬確係幾香濃可口。不過伴碟的醃子薑，太腍身，原本應該是想擺設出花朵，但未能成形，有待改善。花龍蝦鮑魚金必多湯(半隻) (Half Coral Lobster in Cream of Abalone Soup)
根據介紹湯底係用鮑魚餚製，加入新鮮花龍蝦、素翅和鮑螺絲。不過我們食的那隻似乎不是花龍蝦，身上沒有花紋的。龍蝦肉不太爽口彈牙，可能烹調的時間長咗。金必多湯看上去像周打湯，湯底是奶油忌廉濃湯，配上素翅和鮑螺絲。食起來有不同的質感。由於加了薑粒，飲起來感覺又怪怪的，因為啲薑粒都幾大，要咀嚼下。由於我本身又不好忌廉湯，對這個揉合中西特色的金必多湯不太欣賞。天白花菇伴七頭鮑魚 (Braised Whole Abalone with Black Mushroom)
今日的重點推介出場喇！鮑魚先煲後燜，好腍好入口，確是不錯。由於老友食家不吃菇菇，我就一個人食兩大隻天白花菇，兩隻花菇不論外形，厚度和軟度也不同，一隻較厚身，連菇蒂也未剪晒，不能食，而且菇身食起來好硬身。另一隻比較軟身，食落夠腍又入味，最重要是可以全隻食晒。伴碟的皇帝菜，很翠綠，吃起來有點青草味，很新鮮。
豆酥焗鱈魚球 (Baked Cod Fillet served with Soya Bean Paste)
相信是經過改良由鱈魚球變成鱈魚塊，煎炸鱈魚塊很香，表面很脆，特別是魚皮部份。鱈魚油份重，吃起來確是很滑。不過大大件魚塊，配上豆酥，吃起來有點膩。略嫌伴碟的西蘭花份量太少，未能中和肥膩的感覺。仙骨湯燉天津大白菜 (Simmered Tianjin Cabbage in Supreme Broth)
天津大白菜的綠葉部份被煎得不太齊整，賣相怪怪的。天津大白菜果然很大，吃起來比較爽口。而仙骨湯就很香濃，不過味道太重，有點鹹，有待改善。珍味糯米包 (Assorted Dried Seafood Stick Rice Wrap)
以蒸籠裝住嘅糯米包，賣相尚算別緻。大大個糯米包以燒賣皮包住餡料蒸，糯米飯味不太濃，合我口味。原來珍味就是指花膠、瑤柱、鮑螺和冬菇，真是材料十足。這個糯米包沒有平時糯米飯的油膩和飽濟感，估不到是我今晚喜愛的菜式之一。
生磨合桃露小丸子 (Walnut Sweet Soup with Plain Dumplings)
嘩！好多小丸子呀！搶晒合桃露的風頭。小丸子好腍又煙韌，不過我覺得份量不用咁多，一邊食小丸子一邊飲合桃露，令合桃露變得有點淡，可以考慮用另一隻有芝麻餡小丸子，可能會更好。合時鮮果碟 (Seasonal Fruits Plate)
這個合時鮮果碟，共有三款不同的生果，而每一款鮮果有件，因為之前都食過其他的中式宴，今次的生果碟真係我見過最少的一次。賣相真係扣晒分，唯有自我製作人臉來玩下。火龍果，西瓜和菠蘿也很新鮮，如果份量或款式多些會更好。總括而言，餐廳人流不多，連我們在內，有五檯客人。環境比較靜，適宜和朋友聚舊暢談。餐廳職員的服務有水準，食物質素尚算不錯，然而在賣相和食材大小一致性這兩方面有進步的空間。