一葉家 (太古)

打開餐牌真係無咩可以揀架，小食就好多，主菜就好少，我地只係揀左：粉皮、回鍋牛柳同埋麻油口水雞半隻。兩個人少少地就咁算啦～講真，上菜既速度就真係好快架，ｄ野食就唔太正宗，不過亦唔太難食，亦無咩野可以推介，而家真係明白點解囍點可以咁吋，星期六／日唔開工啦，因為成個地方都真係無好野食呀。

粉皮本身真係好滑，個汁就好濃，味道夠，不過味道好一般，好似係少少甜麵醬加其他醬整成既；係好食，不過唔係我期望個種囉～麻油口水雞就好啦，夠嫩滑；個汁好襯，如果唔蘸汁係好食，不過好似欠左少少咁！至於個回鍋牛柳，我都唔多知佢想點，叫得回鍋就梗係要辣架啦，唔辣就唔係啦，我見到佢有落辣架，不過一ｄ都唔辣既，完全無晒意思～

如果想食一個真正既晚飯就唔好黎呢間食，食碗麵加個小食都仲可以既～

樂宴 (銅鑼灣)

因為我鐘意食苦瓜，所以我都好鐘意食沖繩菜。呢間既好處係可以係室內又食煙又飲酒而唔需要行出去室外，啱晒所有煙剷同酒鬼，亦都啱晒放左工唔想再咁拘謹既人。呢到有既日本酒多到你唔信。

我呢晚同朋友兩個人，只係想食ｄ野，然後join埋朋友落酒吧睇奧運開幕禮！我地叫左：半生熟吞拿魚、煙豬手、花生豆腐、苦瓜炒豬肉、沖繩炒麵。朋友就飲啤酒，我就飲可樂。

個吞拿魚好彩係無筋而且都好好味。個花生豆腐好正，有花生味，但係又好煙”ｕｎ”，好得意架，下次去都會再叫。唔好睇佢ｄ炒麵細細碟，因為係多料所以都幾飽架。

沖繩最出名就係海葡萄、豬肉同苦瓜；我今次未食海葡萄，下次一定再去食。個煙豬手好”淋”好好味而且又唔膩，食多ｄ都唔驚。苦瓜炒豬肉好似食緊廣東餸咁，其實都可以係屋企試整下，我試左就再post出黎俾大家睇下。

據我所知以前佢地有得入會架，生日月仲有幾百蚊coupon 會送俾你，如果你打算做長期客仔（尤其是你愛上左佢地既蟹／和牛放題的話），最抵就係做會員啦～

清亭．燕萍 (銅鑼灣)

好耐都無食過呢間越南菜啦。而家開到周街都係，但係呢間就好少人提起；佢係十幾年前已經好出名架啦，係總統戲院個頭，成日都要排長龍，而家搬左黎呢間大間ｄ既，就唔駛等位啦。
我地大食３人組今次係食左：番茄牛腩湯河、蒜蓉西蘭花、粉卷、雞肉沙嗲、牛油雞亦同埋咖哩鴨肉檬，原來佢地揼完骨係可以食咁多野架。番茄牛腩河好濃味，好多番茄，個湯好杰身。我就好鐘意食粉卷，因為好清，一ｄ都唔膩。雞肉沙嗲無尖沙咀個ｄ咁嫩，人地個汁就仲香ｄ。牛油雞亦係最出名架，不過又好肥，只可以同朋友分享而不能個人獨吞。咖哩鴨就咖哩搶晒ｄ鴨味，有ｄ可惜。
其實佢都係算多菜式既越南舖頭，不過就舊式左少少，又唔似rice paper咁，其實佢ｄ野食真係幾得架，應該多ｄ去支持下佢～

皇轎印度餐廳 (西灣河)

因為大家都肚餓，所以都叫左好多野食。雖然我好多時都係印度人做老闆，之前果個其實已經好國際化，好少食印度菜，又好少慶祝佢地既節日，所以我都唔係好認識既。而家有同事係，老闆都係印度人而且佢地都依然好傳統，所以而家就有ｄ認識啦～
我地今次叫左串燒（雞同牛）、燒魚、marsala羊膝、Chicken Tikka同埋２個味既Naan，當然仲每人黎多一杯Mango Lassi，食印度菜就唔少得佢！
申燒都仲係尖沙咀個邊最好食，不過呢間都應該係排第二啦，燒魚我麻麻地，所以無食到，不過都見有得剩，段估都唔好太好食！Marsala 羊膝係店主推介，當然好食啦，個汁配埋Naan Bread就真係無得彈！Chicken Tikka其實都係燒雞既一種，同Tandoori 差唔多，無汁不過醃得好入好味，我好鐘意！當然最喜愛係個Mango Lassi，我覺得應該多ｄ地方有得飲就好啦～

不過唔講唔知，我公司個印度女同事話，其實印度菜都係肥架，因為有時會落好多椰漿啦，又會用好果仁啦，呢ｄ都係含油份／糖都比較多，印度女人係肥就係咁解啦。就算身型唔肥呢，脂肪比例都係高架，所以鐘意食都唔好亂黎啦～

魚 (西灣河)

我地又一行３人黎食飯，又叫左一大堆野黎食：有三文魚壽司、三文魚籽手卷、劍魚腩壽司、廣島燒餅、滑蛋雞肉飯、滑蛋豬扒飯，仲有一個海鮮鍋烏冬添！

我已經餓左一排無食三文魚籽啦，今次個手卷好新鮮呀，又圓又大粒，咬落去仲識彈走既，都係$３０一件，正！朋友既手卷都好得，見ｄ魚都係好彈牙啵！三文魚唔係頂級，不過都係抵食既；ｄ滑蛋飯就乾左ｄ，唔可以同”吉”去比既，價錢都相差好遠啦～我個烏冬就唔係手打既，所以就唔係太彈牙，不過ｄ料都好足，乜都齊晒架！

食完就乖乖地返屋企啦，真係爽！