ABC餅屋 (中環)

之前喺度買過個朱古力撻之後就對 ABC餅屋念念不忘，今日去開上環，都專登行番去中環揾呢間老餅鋪><
上次去已經喺朱古力撻同棗蓉合桃撻之間掙扎咗好耐，但係因為嗰朝喺蓮香樓買咗個棗泥棋子餅，所以都係食咗朱古力撻。其實今次都一樣有掙扎，但最後都揀咗棗蓉合桃撻。
講咗 朱古力撻($4.5)先啦，其實佢個撻嘅filling係 brownies, 好甜不過好好味。
至於 棗蓉合桃撻($6.5)，就係有極少量合桃(~半粒)撈埋喺啲棗泥入面(好似係南棗), 上面仲有啲crumble 。呢個撻一樣好甜，不過鍾意食棗嘅人應該會鍾意嘅。而且佢個撻皮有少少腍，我已經焗番熱嚟食都係唔脆。我都知棗同合桃都唔平，不過佢賣$6.5又真係貴咗啲。唔好俾幅相誤導以為個撻好大個，其實佢仲細過啲迷你鮮果撻。
相比起朱古力撻，今次呢個撻就令我有少少失望。不過我對呢啲老餅始終有種情意結，如果下次有機會經過嘅話我應該都會去試吓個棗蓉合桃蛋糕嘅

Natural Chiffon (灣仔)

老豆生日年年都係食傳統蛋糕，今年想搞搞新意思試吓食cupcake。雖然跟據以往經驗，cupcake都係好睇唔好食，但係見前面咁多好評，一於試吓啦！點知結果都係令人失望。
買咗4件，total $72,cupcake嚟講唔算貴。
4隻味分別係芝麻，開心果，荔枝，朱古力蜂蜜。芝麻: 本身好鍾意芝麻味嘅嘢，佢芝麻味都算濃嘅，不過就唔夠香。
開心果: 呢隻味最好，好香好濃，好似真係食緊開心果咁。
荔枝: 冇試，但其他人話"好荔枝"。
朱古力蜂蜜: 朱古力味正常，但唔覺有蜂蜜味。
間嘢係標榜少甜，冇色素, 冇香精。
冇色素冇香精我都信嘅，因為啲味好真，啲色都唔會好假。
但係少甜就真係...見仁見智喇。我個人認為無論係啲butter cream (除咗開心果味) 定係件cake都幾甜。
而且啲cream太過實，唔夠軟滑，好似雪過落冰箱咁。個蛋糕底都唔好味，間嘢叫natural chiffon, 諗住個蛋糕係好鬆軟啦，點知又唔係，但係又唔似butter cake咁香咁"實鄭"。總之感覺上好似落咗好多面粉咁。
無可否認，啲cupcake係整得好靚嘅，不過就真係得個樣囉，試過一次就夠了。呢個價錢我下次都係寧願買個mini蛋糕。

翡翠一品 (觀塘)

星期日兩點幾鐘落左街搵食，見呢間野光光猛猛，企企理理，而且系食南洋野，就入去試下。

下午茶有唔少選擇， 飽肚d既有炒粉面飯，價錢都系大約三十頭。另外都有多士，沙律呢類比較似tea 既野食。雖然系食南洋野，間鋪感覺上就偏向港式少少。最後叫左個 紐西蘭青口海鮮喇沙米粉($33), 馬來炒貴刁($31), 南洋咖哩三文魚頭帆立貝焗飯($36), 全部包野飲。

紐西蘭青口海鮮喇沙米粉： 味道ok, 分量偏少，不過見佢其他時段賣$5x, 所以算系甘啦。青口得一隻，另外有蟹柳粒，墨魚仔，兩舊豆卜，少少芽菜同蔥。海鮮都系急凍貨色啦，湯底椰味頗足，唔會太辣，$33算ok, 如果正價時段$5x就唔會食佢。

馬來炒貴刁: 顏色偏淺，但系食落夠味，ok的，不過感覺上都系港式少少。

南洋咖哩三文魚頭帆立貝焗飯：炒飯底， 咖哩汁幾好味又夠多，帆立貝得一粒， 三文魚有幾舊仔，本身就無咩味， 不過撈埋d咖哩汁幾好食， $36都幾抵。

至於餐飲都系普通茶餐廳野飲啦。

見到間野仲有其他小菜類，好似珍珠蠔煲，南洋咖哩雞俾煲等等好似都唔錯，下次夜晚黎試下先

天樂烘焙 (灣仔)

之前試過佢啲薯蓉，上面啲料算多同濃味，不過就咁食啲薯蓉已經好夠味，又香又滑。

嗰日經過見到有個黑芝麻包$7，好鐘意食芝麻嘅我就忍唔住買咗個啦。點知...個芝麻包令我對呢間鋪嘅好感完全冇晒！個包聞落去已經好大陣怪味，完全冇芝麻嘅香味。

撕開佢都見到個包有好多黑芝麻粉嘅，以為食落去會好啲啦，點知都係冇芝麻味，仲有少少怪味。

呢間嘢啲包其實都唔平，應該唔會再去。

泰式食 (銅鑼灣)

食過呢度嘅下午茶覺得ok但係喺下午茶嚟講有啲貴($4x)。

聽人講set lunch同tea差唔多價錢仲有自助salad bar同餐湯任飲所以再嚟試吓。嗰日好多人等咗大半個鐘。餐湯有雞肉冬陰公同冬瓜湯。

冬陰公唔辣不過都幾香，而且都幾多雞肉。

Salad 有水晶粉青瓜雞絲沙律:
普通，有啲辣

仲有雜果沙律，就係平時嗰啲蘋果雪梨薯仔沙律醬撈埋一堆嘅沙律，不過食完啲熱嘢辣嘢之後食都幾舒服。

餐就嗌咗海南雞飯同泰式炒金邊粉。

海南雞飯:唔掂！雞有少少'玫',啲油飯先係最大問題，唔夠香不特止，仲要係未熟，煮得好腍但係仲係生米！金邊粉:個味ok,夠香，不過甜咗少少同唔夠乾身，不過整體算唔錯。

之後salad bar岀咗炸蝦片,即刻好多人排隊攞，其實味都ok，不過又好似炸唔透咁有啲硬。

最驚喜反而係杯餐飲，試咗杯泰式熱奶茶。未加奶之前試咗啖，覺得隻味怪怪哋同甜咗啲，落咗奶之後陣味又好香好夾wo。

服務方面就普通，多數都係啲中年阿姐冇乜表情，不過有個後生女就好好笑容又有禮貌好主動幫人加水，喺咁忙嘅時間仲keep到咁好，俾個like你！