銀座藏人 (中環)

AUG 20,2009 (THUR) LUNCH $206.8

好耐無嚟呢度食野，去到發覺餐牌唔同哂！
無咗西餐食，而家只係有日本嘢食！

特選三色飯定食 $118
分別有一碗鰻魚飯、一碗魚生飯、一碗燒牛肉飯 & 一碗麵豉湯
厚身鰻魚一件，但舖滿一個碗面！
魚生飯分別有三文魚、吞拿魚、油甘魚、鮮魷魚 & 青瓜、甘筍絕不稀場！
燒牛肉4件，燒成半生熟，不錯嘅選擇！
雖然飯只係三小碗，但份量絕對係唔少！
麵豉湯味濃！

鰻魚飯定食 $70
鰻魚肉兩塊好厚身，啲鰻魚汁甜甜哋、杰杰哋好夾！
仲有個手打烏冬細細碗，幾滑身仲有少少彈牙！
一細小碗茄子，水汪汪好鹹腍過頭，唔係太欣賞！

另加一服務費

Green Mouse Restaurant (中環)

AUG 19,2009 (WED) LUNCH $524
EXCUTIVE LUNCH SET
Soup of the day
今日係自家製嘅金筍忌廉湯，金筍味濃郁，夠香滑！
配上香脆嘅法包，蠻不錯喔！
&
Pan Fried Foie Gras and Apple Caramel Sauce
煎鵝肝非常出色，外面煎得好香，裡面入口即溶，再配上一個蘋果焦糖做嘅汁，帶有一絲絲清甜，感覺得到廚師嘅心思！
Dices Atlantic Hake Fish Poached Minute & Foie Gras Ravioli in Veloute
其實係一個魚湯嚟！湯裡面有一些切粒嘅海鱈魚 & 法式小雲吞，雲吞裡的餡料非常珍貴，係鵝肝嚟架，但皮太厚且咬落感覺好硬，整體味道亦頗怪！雖珍貴可惜唔係太適合我！飲了兩口不得不放棄！
&
Pan Fried Kobe Beef Flank Steak, in Creamy Saint Nectaire Cheese Sauce
大家都選了這款 main course
日本本州神戶牛柳嘅一種，屬於脅腹位置嘅部份，所以肉質非常鮮嫩，肉味濃郁！
牛柳係切開一條條牛柳條上的，medium 火喉處理恰如其分！
還有廚師花了唔少心思做出各種配菜作點綴：
甘筍加忌廉打成甘筍蓉，細滑香甜，好清新嘅味道！
薯仔切絲加薯蓉，混合起來薯蓉香滑得嚟別有一種口感！
粟米蘑成粟米蓉亦係一種新鮮嘅口味！
食法國菜就有呢種別具一格嘅享受！細緻嘅點滴，顏色豐富，絕對係一種無限驚喜！
Pan Seared Unilateral Fresh Salmon Steak Green Pepper Sauce
因為上面款 main course太吸引，所以呢款今次無緣品嚐，嘻嘻！
&
Dessert of the day
今日係一個朱古力慕絲，唔係幾夠滑，只有些少朱古力香，但唔夠濃！上面加了半顆士多啤梨作點綴，令這個味道較失色嘅甜品得回些少外觀嘅分數！
Hot Tea or Hot Coffee Included
熱咖啡不是此店之佳作，普通之選！
所以我只選了普通過普通嘅熱檸水，穩穩當當了吧！
4 Courses $238
10% Service Charge
值得一讚嘅係個好似經理嘅服務員，好細心介紹菜式，態度熱誠亦非常有禮貌，令人食得好舒服！
但另一個 waitress 就加一點笑容會親切好多，因為唔知佢有咩心事，成個人目口目面，好冷漠嘅感覺，咁樣好似令人有一種無咩禮貌嘅感覺就唔係幾好喇！

金稻苑粉麵餐廳 (屯門)

AUG 13, 2009 (THUR) TEA
干炒牛河 $26 配凍檸茶 (凍飲 +$2)
剛帶媽媽覆診回來，嚟嘆個下午茶先！
見到人地好大份，所以兩個人只叫咗一個餐！
哇！好香噴噴呀！真係好夠鑊氣呀！仲好多牛肉呀！
加上一陣蔥的香味，真係要即刻試一試先！
牛肉好入味好腍，連蔥食幾夠香，河粉味道剛好，唔算好油，仲炒到一條條分開嘅，呢個師傅幾好手勢喎！
不過杯凍檸茶好鬼酸呀！真係酸到做咗一日都醒神哂呀！真係唔該哂！嘻嘻！

euro go go (屯門)

AUG 6, 2009 (THUR) LUNCH $77
屬於半自助形式嘅西式快餐店
首先選好食物，後去收銀處買單，然後會俾一個 Number Stand 在座位等，最後會有Waitress 將食物送上！
買單時個收銀會問有無自備餐具，如果無，就會問需要幾多份，好似好環保！
但兩個焗意粉都係用上一次即棄嗰種鍚紙盤，咁即係點？？？
蘑菇肉醬意粉 $29 配 忌廉湯 (+$5)
辣肉腸、火腿、煙肉意粉 $34配 蒜蓉包 (+$5) & 凍檸茶 (+$4)
蘑菇肉醬意粉 ~ 簡單嚟講係蘑菇配上肉醬意粉，肉醬焗得幾夠香！略嫌蘑菇少咗D ！( 配角通常都比較少出場，嘻嘻！)
辣肉腸、火腿、煙肉意粉 ~ 上面舖滿芝士，一絲一絲嘅芝士食起嚟味很濃，辣肉腸雖少，但味道很好！相比下火腿跟煙肉就用料十足！
忌廉湯 ~ 跟一般罐頭忌廉湯相似，但好滑，味道仲有驚喜！
蒜蓉包 ~ 焗得好靚！香噴噴嘅蒜蓉味濃厚！一片真係唔係好夠！
凍檸茶 ~ 茶味太清，檸檬太酸！
唯獨太失色嘅係，檯與檯之間太近，好有壓迫感！有人行過要好小心，左閃右避，如果唔係恐怕整跌人哋D嘢就唔係咁好喇！

新星海鮮酒家 (長沙灣)

AUG 18,2009 (TUE) LUNCH
套餐 $93 （一碟炒粉、麵或飯、一碟菜、3碟點心）
炸菜火鴨絲炆米
炸菜少到差D搵唔到，仲好淡，火鴨絲就好多，整碟都好淡口，淡到無人吼，剩餘半碟有多！
馬拉炒什菜
幾有鹹香味，菜還鮮嫩！
蝦餃 ~ 皮透薄，一眼見到內裡蝦好大隻且滿是蝦，一口放入口好滿足！
腐皮卷 ~ 皮脆還是熱，餡料味道剛好，唔會太鹹！
蝦腸 ~ 略嫌皮太濕，嗯！都唔算厚，還算OK！仍可隱約見到蝦仁！
另加 ：
叉燒餐包 ~ 好軟好香甜甜哋，滿是叉燒係家姐嘅最愛！
炸魷魚鬚 ~ 好似好幼身，應該話係魷魚BB鬚，但還是很鬆脆，加上喼汁更好味！
咸水角 ~ 細細個，熱辣辣，餡料少咗D，不過熱食都好好味！