Mochi Cream (銅鑼灣)

二月六日, 今晚要幫老公去 Sogo 買朱古力畀未來奶奶做生日禮物,
見到呢間《MOCHI CREAM》, 啱啱朝早班同事先講完,
其實好耐之前見佢開喺 Sogo Supermarket 位都知佢出名,
但亦都知佢好貴, 所以一直都冇買嚟試, 不過今日聽完班同事講, 又心郁郁想試吓!
由於想同老公分享, 佢又要六個先有盒, 於是買咗六個唔同味返屋企,
但如果即時諗住食既話, 就要得十至十五分鐘溶一溶先好食喎~

買既時候已經係每一個獨立有個紙袋仔袋住, 仲寫明係咩味添!

呢個係咖啡味, 個皮口感幾好, 軟軟哋, 煙煙靱靱, 味道就冇乜, 只係靠啲餡既味道,
食落確係有咖啡味, 但唔算好特出特別。

朱古力, 甜品裡面必試既味道,

裡面其實有啲 cream 架, 不過對呢個有少少失望, 冇乜朱古力味呀!

芒果味, 個人覺得一定要試吓啲酸酸哋既味道, 但呢個又係失望, 冇乜芒果味。

香桃乳酪, 個樣好似芒果味,

但呢個好食過芒果少少, 夏天食, 配埋杯綠茶, 應該幾正!

蘋果批味, 呢個聽個名已經覺得怪, 所以特登買嚟試吓! 睇吓點"蘋果批"味法!!

可惜都係失望囉, 唔係難食, 都唔知食緊啲乜, 唔講真係唔知食緊"蘋果批"味喎!

最愛既綠茶味, 呢款味又係必試架啦! 啲咁日式既甜品點可以唔試噃綠茶味?

佢裡面仲有啲餡都幾多幾有層次感, 算係幾好食,
但可能比較鍾意食好濃既綠茶味, 所以對我嚟講都係淡咗啲呢~~

佢仲有啲冇得散賣既禮盒裝, 不過勁貴呀! 上面嗰款要 $128, 下面嗰款要 $210............

總結, 一個要成 $16 - $22, 個皮係食得出好靚,
但成日食既感覺又唔係好值十幾蚊個囉~
半打加埋買咗八十幾蚊, 食落又似乎冇乜特別, 好似雪糕糯米滋仲好食咁,
Anyway, 買既時候我已經預咗只此一次啦!

更詳細資料及圖片請看 : http://hk.myblog.yahoo.com/joycewai616/article?mid=12458

炙爐端燒 (土瓜灣)

一月十四日, 放咗學後, 由於老公出咗花紅,
所以請咗我嚟呢間一直好想試又覺得佢好貴既日式串燒店食宵夜。

一入到去就勁有居酒屋 feel, 同埋可能已經成十點幾, 所以得我哋兩個客咋!

呢度雖然話係做爐端燒, 但其實都有好多選擇架!

最後全部由老公拍板, 首先係一碟幾貴既「霜燒牛肉」($58),
雖然只有八片, 但入口外燒內冷既感覺好得意, 仲食到有啲霜係牛肉裡面架!
唔怪得之叫「霜燒」啦! 而亦因為咁, 記得一上檯就要食, 唔係溶咗就冇嗰種效果啦!
不過可能啲牛肉唔係最靚既, 所以有少少肉因為生而咬唔開, 但都好好味, 正!

呢個係「網燒牛扒定食」($58), 份量都幾大喎, 啲牛扒同啲汁都好味,
麵豉湯 OK, 白飯正常, 白飯旁邊嗰碗唔係雪糕嚟架, 係薯蓉嚟架! 都幾好味, 好滑呢~

我指定要食既「冬菇燒」($10), 只得兩隻, 真係有少少貴, 但味道都 OK 既!

仲有呢個「什綿串燒咖喱鍋」($68),
個咖喱鍋係煲住咁上, 少辣既日式咖喱, 裡面仲有啲蘿蔔薯仔, 勁好味,
有冬菇燒、雞肉串、牛柳串、大葱串、豚肉串 (勁似豬腩肉) 及 黑豚肉大葱串,
呢個什綿鍋真係唔錯, 將啲串燒再點啲熱辣辣既咖喱, 好味!

雖然埋單成 $223, 但啲食物質素都 OK, 服務又幾好 (可能冇乜人),
我諗我哋間唔中都會再幫襯吓既!

更詳細資料及圖片請看 : http://hk.myblog.yahoo.com/joycewai616/article?mid=12203

紫荊海鮮酒家 (土瓜灣)

一月十一日, 今日係 DCArea 周年晚宴, 嚟咗呢間酒家開咗幾圍食飯,
睇過呢度既價錢都幾平, 平均一位都係 $160 左右,
但啲食物質素又比預期中好, 所以都算抵食喎~
係唯一個翅爭少少, 不過算啦, 收咁既價錢, 又包飲品, 又有房坐, 仲想點?!

最後個套餐既甜品係壽包仔呀! 應該一人有兩個,
我冇食到, 但睇嚟應該幾好味, 因為班友好快就搶晒嚟食啦!!

如果唔想洗太多錢又想包幾圍食吓飯, 呢度都係個唔錯既選擇呢~

更詳細資料及圖片請看 : http://hk.myblog.yahoo.com/joycewai616/article?mid=12290

東江食家 (大埔)

一月十一日, 今日我同老公去咗大埔外影, 所以晏就嚟咗大埔廣場呢度食晏,
我哋一行七人選擇咗入嚟呢間《東江食家》試吓佢個招牌鹽焗雞飯 ($30),
個樣都算 OK, 食落都唔錯, 夠鹹有啲雞味, 份量都算適中啦! 係啲飯唔夠熱!

老公就叫咗個咸魚雞粒炒飯, 我冇試, 不過睇個樣都幾靚仔喎~
呢度既郊外油菜只有唐生菜, 同埋呢碟要成 $12, 貴咗少少...

個飯仲送杯豆漿, 不過係凍既, 只係飲咗一啖, 算係咁啦!

估唔到呢間嘢都算幾好食, 只係啲小菜貴咗啲啫!

更詳細資料及圖片請看 : http://hk.myblog.yahoo.com/joycewai616/article?mid=12309

滬揚川上海料理 (銅鑼灣)

十二月三十日, 冇諗住出街食飯架, 所以相機都唔記得帶... 唯有借同事部電話影住先!
同班同事落到街諗咗好耐都唔知食乜,
最後行過呢間上海菜就入去試吓, 不過一坐底就已經有少少後悔,
因為啲位好迫好窄, 但已經浪費咗好多食飯時間, 所以冇得再揀。

我哋四個人都叫咗唔同配菜既担担麵, 有辣有唔辣,
我當然要辣既担担麵, 配肴肉, 估唔到有成八件, 都幾好味,
但個担担麵............... 色水就似足料足味, 但食落口, 唔好話唔辣, 直頭係淡而無味!!
我同個食得辣既同事都頂唔順即刻叫人畀碟辣醬我哋加落去, 但結果都係冇乜味...

另一個同事既配菜係炒鱔糊, 試過一啖, 味道都叫做有, 但唔夠濃, 同埋係凍架...

呢個同事配炸排骨, 其實似豬扒多啲喎, 唔知點解叫佢做排骨?
又係試咗一件, 都算係咁, 但我都係比較鍾意食《杏花樓》嗰啲糖醋排骨囉~

呢個同事就係叫咗唔辣既担担麵, 個色都差好遠, 同事仲話勁冇味...

至於個高力豆沙, 都算係呢餐最好食既嘢, 其實比起其他上海菜館, 佢只係好普通咋!

我哋四個一路食一路鬧個担担麵既湯底真係差得好緊要, 未食過咁冇味既上海菜,
仲要呢度可能地方細, 感覺好嘈, 食都食得唔舒服, 啲嘢又大部份都唔好食,
我哋仲睇到隔離檯個酸辣湯, 就咁睇都覺得又係冇乜味, 啲料又少,
唉! 呢間嘢真係估佢唔到啲食物咁差, 職員服務都係好普通, 以後都唔會再幫襯喇!

更詳細資料及圖片請看 : http://hk.myblog.yahoo.com/joycewai616/article?mid=12194