昨天晚上跟老公在這裡吃飯，前身也是一間滬食店，但燈光較暗，我們沒有試過，轉手後裝修過反而燈火通明，用餐時不會受倦意來襲。(恕我不夠浪漫) 因為我是蟹粉小籠包的粉絲，所以第一樣就點這個。然後再點了糖醋排骨、排骨擔擔麵、上海粗炒，老公喜歡吃酸辣湯，所以又加點了以位上的份。看到飲品有香蕉奶昔，香蕉控的我又點了。由於當時覺得肚餓，所以不禁多點了食物，(但我們全數KO的)，新張期內滿$200送小籠包，所以真的飽到不行。 第一樣上桌是香蕉奶昔，香蕉味濃而沒有香精味，雖然略甜但好味。 接著是送的招牌小籠包，一上桌便知是佳品，原因是看到皮薄但外型飽滿，一吃湯汁滿滿，肉汁鮮甜，不愛滬食的老公也大讚好吃，我倆都覺得比名店的更好吃呢！ 這裡的糖醋排骨跟我平時食的大不同，先不說用料部位，平時吃的是用黑醋及(冰)糖調較的汁，所以色澤偏暗。這裡的無論賣相及味道根本就是京都肉排 排骨擔擔麵賣相絕對Ok，湯頭濃郁，花生味香又帶少少辣，入口不會嗆喉，麵很滑但同時過腍，不知本身是這樣還是因我拍照而影響口感呢！排骨色澤金黃，但不算鬆化，味道正常。 蟹粉小籠包賣相都可以，由於招牌小籠包味道太驚艷，讓人對蟹粉小籠包期望高了，同樣皮薄多汁，但彷彿沒有蟹粉在內，只有少少腥味，沒有蟹粉的鮮味，完全被招牌小籠包比下去，可以不試呢！ 酸辣湯味道可以，夠辣。(轉述老公食評) 最後來的是上海粗炒，色澤均勻，味道不錯。 整體而言，食物質素是不錯的，定價也合理，不過冷氣滴水嚴重，需要盡快改善呢！

雖然位於大角咀(最近深水埗方向港灣豪庭對面)，但熟路既話都唔難搵。火鍋配料選擇都幾多，差不多過百款，刺身都接近二十款，仲有即炸小吃，約多幾個朋友嚟就啱了，可以試多幾款。而且冇限時，可以邊食邊傾，唔駛趕住埋單，正!! 胡椒豬骨湯：比坊間的多料，胡椒味夠但又唔會太嗆喉。 椰子雞湯：一上枱已聞到好香椰子味，邊滾椰香味更出，增加食慾。雞件都唔錯，可以encore。 即炸小食及火鍋配料：最愛炸雲吞，勁香口。響鈴同餐肉放湯食好啲。 牛肉拼盤(大)：有齊手切牛、牛頸脊、牛𦟌、牛粒、牛胸油等，牛味夠，下次可以重點食手切牛同牛頸脊 黑豚肉 Wasabi 墨魚丸：呢個超驚喜，一吃已食到墨魚粒既鮮味，彈牙，之後Wasabi 爆出嚟好夾，但太過睇少佢成粒啪入口，即攻鼻到標眼水，大家食既時候小心啲啊 其他唔細講了，大家去試吓啦！

話說臨時跟朋友吃午飯，誤打誤撞來到1960，見店內企理又有位，就入去試吓啦，估唔到有驚喜。午餐有6個選擇，見同食評既相一樣，我諗每日都係食呢啲。 見到西冷牛扒只需$88，雖然唔包飲品，但已是同區相似既西餐廳中最抵，且加$5就有冷/熱檸茶，其他飲品就半價，都算係咁。份西冷一上枱未至於好驚艷，外表看有點厚度，聞落好香，切開(唔難切)就嘩左一聲，好靚既粉紅色啊！馬上放入口一試，肉質鬆軟，肉汁豐盈，牛味夠，好耐冇食過咁好味既牛扒，仲要價錢咁經濟，所以即介紹同事嚟食啊！不過可能牛扒最好味同性價比最高，今日(2:30pm)再去時已售罄，下次食牛扒的話要早啲去至得。 因為冇牛扒，所以同事就試其他食物，分別係麻辣鴨胸意粉，卡邦尼意粉及鴨髀肉意大利飯。三款嚟講相信麻辣鴨胸意粉算是最好後備選擇，好香好惹味，但真係有點辣。 卡邦尼意粉賣相平實，冇話有流心溫泉蛋來提升吸睛效果，味道一般但又唔會話為佢而來囉！ 鴨髀肉意大利飯我就冇試，因為我唔太好risotto，但賣相就真係一般了。 另外，第一次嚟食時朋友點了雞扒薯菜，才$58，好抵食啊！ 每款午餐都包是日餐湯同甜品，仲有一片好味/坊間(呢個級數餐廳計)少用既麵包送湯，所以餐飯由頭食到尾都讓人好滿意，用餐環境算舒適，為左西冷牛扒一定會再嚟幫襯啊！

冰室新開張左一陣，今日終於可以去幫襯，見下午茶有乾炒牛河，咁咪點嚟食囉！因為偏食，所以一般我都會叫配菜全走。店員擾攘完一輪，單都出埋，轉頭同我講冇河粉，要我轉第二款，但同桌朋友點豉椒排骨炒河就有，即分明唔肯custom made個牛河俾我啦！我去咁多間茶餐廳/冰室，都冇遇過咁既情況，其後仲陸續見到其他顧客點既牛河出現，即唔老實講大話啦!!!我寧願你直接同我講廚房唔想客製、唔可以走配菜，都好過講大話你耍個客囉！我唔會再嚟呢間食店，幾平都唔嚟啊！

每日都要諗去邊開餐，今日都唔例外，朋友上網搵到呢間泰式粉麵店，雖然新開張，又冇乜食評，冇餐牌，但懶得再搵其他地方，就膽粗粗嚟試。 此店位於觀塘工廈，沒有特別裝修，簡簡單單，餐牌同樣簡單，只有三款粉麵、兩款飯，同數款小食。 我們點左雜錦船粉($62)同牛肉船粉($48)，另外加點一份雞翼及兩串豬頸肉，跟餐飲品選了泰式奶茶及柚子蜜。等左一陣兩碗船粉上桌，湯頭顏色好濃，飲落都係，同喺泰國食到既一樣，麵底揀左金邊粉，份量正常，但配料好足，我食既牛肉船粉有兩粒牛丸，肉汁濃、肉質爽，三粉肥牛(同個湯好搭)及兩三件牛腩，仲有少量香口炸豬皮，係近期喺香港食過最好味、最有家鄉味道既船粉。(未哈韓前曼谷是我家鄉🤣) 店家忘了給我們煮小食，追單後等多一陣都有得食，雞中翼($14)香茅味不算重，但炸得香脆，咬落仍有肉汁，雞肉嫩滑，好吃。燒豬頸肉($12一串，圖片是2串份量)相對一般。 整體而言，食物質素很不錯，主角船粉沒有讓人失望，且定價合理，讚。遲啲晚市更有烤魚、雞煲，有機會約朋友再嚟先。

去之前看了食評，竟然有差不多10個負評標題都係話食店服務差，外出用膳食物質素固然重要，但我都好怕服務唔好，平時如見到呢啲負評，我一定唔敢搏，但因為想不到喺呢個商場食乜好，所以膽粗粗照去。好彩我地冇遇到同類情況，大部分既店員都冇問題，冇黑面冇態度唔好，整體不錯。 講番食物，我地點了牛肉套餐同豬肉套餐，前者可以跟一份炸雞或生牛肉他他，我地就點左炸雞；豬肉套餐就跟一份主食，我們選了辣海鮮豆腐鍋。另外點了一客醬油蟹，見食評多人點藥膳鮑魚雜菌釡飯，所以又點一份，薯仔控既我追加一客薯仔煎餅。 等左一陣兩客燒肉套餐先上桌，賣相好得，看得出肉很新鮮，份量亦好夠，比預期多。牛肉套餐中有一塊係菲力牛扒，店員幫忙切開及稍為燒一下，再拿給我們自己燒，呢件菲力牛好正，鬆軟、牛味濃，好好味。其餘兩款牛肉其中一款應是牛肋肉，另一款唔清楚，唔點醬料都好味。伴碟有雞脾菇、冬菇及好鮮甜既菠蘿，如果可單點菠蘿我一定追加。 豬肉套餐有兩大件厚切五花腩(最愛)、油花均勻既豬頸肉及脢頭肉，五花腩肥瘦相間，燒得香口一啲都唔膩，亦冇豬既臊味，好吃。其餘兩款豬肉就正常，伴碟只有冬菇及雞脾菇。跟兩個套餐既炸雞同辣海鮮豆腐鍋味道正常，勝在夠熱。 醬油蟹是同枱長輩點既，由佢一人獨享，佢話好好味，睇佢食得津津有味就知。反而後續追加既薯仔煎餅有點讓人失望，雖然好香，但吃落只有麵粉，沒有薯仔/薯絲口感，我家主子整得好吃多了。藥膳鮑魚釡飯偏淡，用來拌飯的麻油雖香，但成個飯都好一般，可以不點。 整體而言，我覺得熟食質素可以但沒有太大驚喜，反而燒肉質素相當不錯，不但較其他連鎖韓式燒肉店佳，比名家更好，唯一美中不足是用餐時間只有90分鐘，都有少許趕，不過大部份餐廳都有用餐時限，除非你想慢慢食，同朋友慢慢吹水，否則都冇乜所謂既。

除了炸雞，還有牛骨湯、鮑魚蔘雞湯、部隊鍋、冷麵、辣海鮮湯麵等韓食，還有數款薄餅，炸雞及薄餅可以選半半，前後幫襯兩次都有點半半薄餅，第一次吃時就覺得薄餅太濕，第二次吃就剛剛好，餅底夠脆，兩次都是點古岡拉芝士拼芝士蕃茄薄餅，個人覺得前者好味啲。(註：怕臭芝士味就不要點前者) 至於炸雞，兩次都點無骨，但第一次嚟錯左有骨，我地冇退照要，點原味炸雞；第二次食原味拼香蒜，冇骨。比較過兩次既味道，覺得帶骨既炸雞口感好啲，不過皮/炸漿偏厚/多。而冇骨既炸雞肉質偏腍，同埋越食越膩。人多一齊分享好啲。 另外還試了招牌沙律、辣芝士年糕拉麵及牛排骨湯。沙律菜不算新鮮，細份，可以不試。辣芝士年糕拉麵及牛排骨湯同樣細份，不過味道好好。芝士年糕拉麵甜甜辣辣好好味，如拉麵份量多啲更佳。牛排骨湯雖然細份，但內有6大件牛排骨，另有少少冬菇、金菇同韓國粉絲，調味適中，不會過鹹或過淡，像韓國食堂任飲既牛骨湯味道。 飲品方面，有Yogurt Smoothie、奶昔、汽水/梳打、茶、酒等，我就試過芒果同柚子Yogurt Smoothie，兩杯味道都ok，但我偏愛芒果味多啲。新張期內，下午茶時間有65折，晚餐有75折，所以都叫抵食。不過如果正價呢，就可能覺得有啲唔抵食了。

對上一次到御家爐端燒已是兩年前的事，食物款式大致差不多，但有些食物可能來貨自日本，故定價高了，不過如是本地食材，價錢好像沒有(太大)調整。 我們三人點了不少食物，包括燒白鱔($58/1串)、日式炸豆腐、御家燒一夜干($128)、燒翠玉瓜($28/2串)、豚肉荔枝串(每客2串)、鹽燒五花腩(每客2串)、燒牛肩脥(每客2串)、燒蒜芯($28/2串)、燒雞翼($28/1串兩隻)、燒羊架($58一件)、汁燒原隻日本魷魚筒($158)及三款燒飯團($28一款)。 偏食的我最喜愛豚肉荔枝串，薄薄的腩片包著荔枝來燒，腩片香脆但仍保留肉汁，連同荔枝入口更Juicy。鹽燒五花腩及燒牛肩脥依舊美味，前者肥瘦適中，趁熱吃口感最佳，下次會改試汁燒來增加肉汁。後者肉質軟韌適中，鹽燒不會搶了牛味。汁燒原隻魷魚的魷魚有鮮味，調味及口感俱佳，物有所值。三款燒飯團包括梅子、明太子、鰻魚，飯團燒得焦脆，賣相吸引又香口，外子及媽媽說明太子及鰻魚口味最佳，梅子偏酸就不合我們口味。 老闆娘勁好客，除了跟每枱食客舉杯暢談，更給我們折扣優惠(全單齊頭$1,000)，難怪小店即使只有數張枱，在疫情影響的食肆管制措施下，小店依然屹立不倒，全場爆滿啦！

是日沒外出用膳，在外賣平台搵食時看到這家的午餐定價合理，除了主食，還有足料靚湯、一份小食及糖水或沙律可選，所以就買嚟試吓。 等左十五至二十分鐘左右，外賣到了，真係又湯又甜品，小食就放入主餐度。湯是龍眼豬肉燉湯既味道，除了這兩款湯料，還有冬菇同好似猴頭菇既料，湯好清，冇味精。 小食從滷水雞翼、蝦餅等3-4款中選一款，我就揀左雞翼，醃得夠味，肉好腍，唔錯。主食我就揀了香茅豬扒，雖然好淺色，但夠味、有香茅既香味，肉質軟得嚟有咬口，不過腍，又可揀咖哩汁、黑椒汁或洋蔥汁，不過飯量不多，勝在有湯同甜品，一定夠飽。 是日糖水是杏仁糊，聞到杏仁味，偏甜，我平時唔食呢個甜品，不過今日都食左一大半。除了香茅豬扒，還有照燒雞扒、牛扒、魚等選擇。價錢由$55-65左右，成個套餐嚟講真係抵食，亦因為覺得味道不錯，所以冇喺呢度出食評好一段時間既我都忍唔住要撐吓，希望大家去試吓啦！

早前看韓國綜藝節目，主持人跟節目家賓吃忌廉烏冬，當時覺得很奇怪，怎麼忌廉跟鹹食可搭得上，心中充滿疑問。直至近日，老闆跟家人到耀華街這吉列牛忌廉烏冬專門店吃飯，對忌廉咖哩烏冬讚口不絕，由於外子對這兩款招牌食物興趣欠奉，故是晚跟朋友吃飯便決定來這店一試。 早一晚致電訂位，預7:30pm用餐，由於遲了下班，故我到達食廈已是7:37pm，馬上排隊等電梯，事前老闆已提到我們須有心理準備，但沒想到我們足足等了差不多半小時，約8時才抵達食店門口，店員說我們遲到，還好跟她解釋後也盡快安排我們入座，下次再來的話必須預多30分鐘等電梯才行。 翻看餐牌，食物選擇不多不少，但看每枱食客多是點吉列牛定食及忌廉烏冬，亦是我倆一早計劃要吃的食物，所以不用多想就決定點這兩款招牌菜了。朋友提議加點一客單骨雞翼作小食，三款口味中我們點了招牌那款。飲品選擇不多，除了汽水，只有奶昔、熱飲及凍飲各三款(不記得有沒有酒品)，腸胃不好的我本來怕肚痛是不該點凍飲的，但為了拍照效果佳，還是點了柚子凍飲，朋友則點了玫瑰凍飲。(其實有名的，但我完全忘了😅) 食物很快上桌，先來的是忌廉咖哩烏冬，份量較我想像的少，忌廉也沒電視看到的厚，試了一口，其實沒有特別吃到忌廉的味道，忌廉很快便跟咖哩融和一體，讓咖哩汁變得順滑，配烏冬吃很夾，由於我們點了吉列牛，故這烏冬就選了雞肉作配料，雞肉沒有雪味，所以整體很好。 沒多久吉列牛定食也來了，賣相沒特別，跟平時吃的差不多，但牛肉用料卻不錯，有少少牛味，我們燒到五成熟左右，入口軟腍得來有少少嚼勁，不用點燒肉汁或沙律醬已很好吃，喜歡食肉的朋友可多付$98(須加10%)追加一份。 反而小吃雞翼最遲上桌，5隻雞中翼的份量看上去很多，味道像韓國芝士即食麵的芝士味粉，香口但不算出色。忘了我們兩杯凍飲，柚子款是藍色的，味道像柚子梳打，好喝但沒有驚喜，朋友說很開胃。玫瑰特飲粉紅色，以少少花瓣碎點綴，很美，如再多一點更吸睛。呷了一口，味道清新，有玫瑰幽香，沒有像坊間的玫瑰飲品只加香精帶藥味，大推！ 這店食物真的不錯，但想到要耗半小時等電梯，個人就未必再來，畢竟銅鑼灣食肆選擇多的是啊！旺角也有分店，也是在食廈的17樓，如不怕等電梯，仍是一個很不錯的飯聚地點。