LOF10 Bistro (灣仔)

今次喺灣仔想搵個舒適嘅環境下午茶，所以再次嚟到呢間辦館Lof10 Bistro，環境夠chill ，旺中帶靜，呢度裝潢用咗英式風格，有古典深綠色作為主調嘅大酒櫃，燈光柔和，甚有格調，喺度可以享受一個寧靜嘅下午，另外餐廳嘅服務幾好，食物方面亦唔錯。

Egg Benedict
煙三文魚帶有煙熏香，班尼迪蛋嘅英式鬆餅口感煙韌，上面流心蛋非常流心，令到整個鬆餅沾有蛋香，食落非常惹味，層次豐富。旁邊配有新鮮爽脆嘅沙律，好健康。

All Day Breakfast
全日早餐材料豐富，有德國白肉腸、茄汁豆、火腿、炒蛋、薯餅、粟米同埋沙律菜，份量都幾多，食完之後大滿足。炒蛋嫩滑，薯餅口感香脆，沙律菜清新配埋醋食幾開胃，另外蕃茄仔味道爽脆清甜。

意式黑椒牛肉班尼尼配薯餅
Panini上枱嘅時候熱辣辣，外層烘得香脆，意式黑椒牛肉味道鹹鹹地好惹味，中間有半溶芝士和鮮蕃茄夾喺panini入邊，令到味道豐富啲，芝士味香濃，加埋蕃茄嚟食味道好fresh，另外個set配有香脆薯餅。

煙三文魚蛋沙律牛角包配薯餅
牛角包嘅份量幾大份，外層香脆內軟，食落富有牛油香味，中間嘅煙三文魚同埋雞蛋沙律份量好足，好豐富，煙三文魚帶有煙熏香，味道帶有鹹香，蛋沙律夠嫩滑，另外同樣配有即炸嘅薯餅。

雙拼出前一丁公仔麵配牛油吐司
翻查資料辦館一直係出前一丁嘅合作夥伴，所以呢度嘅特別之處，係可以一邊飲咖啡，仲可以一邊食到公仔麵。雙拼嘅材料有午餐肉同埋太陽蛋，午餐肉好厚身，煎得好香口，太陽蛋煎得幾靚，中間係流心嘅，出前一丁麵煮得啱啱好，麵質唔會過淋或過硬，食落好爽口。跟餐仲配有牛油吐司，烘得脆口，搽埋牛油食一流。

Rose Latte
Latte上面有幾片玫瑰花瓣，有時位花，有時用上店舖名辦館作為裝飾，賣相精緻。咖啡入口香濃幼滑，帶有清幽嘅玫瑰芳香，飲落順滑好舒服。

Mocha
朱古力味道香醇濃郁，亦都飲到微微嘅咖啡香味，飲起嚟口感幾滑溜。

凍檸檬茶
凍檸茶賣相唔錯，有大大片嘅檸檬，好足料，味道唔會太甜，甜度啱啱好，最近天氣開始熱熱地，飲杯凍檸茶有種透心涼感覺。

Supreme Steak & Grill (深水埗)

今次去咗深水埗開業兩年嘅扒房Supreme Steak & Grill ，性價比高，牛扒高質。餐廳走簡約工業風，用上水泥牆身及天花，樓底好高，簡潔明亮，空間感好強。聽聞扒房老闆係退咗休嘅工程師，利用自己烹飪及工程嘅知識自創出一個燒爐去整各種肉類，令到物類受熱更為均勻，更容易鎖住肉汁。今次同朋友點咗以下菜式。

安格斯級封門柳
平時去据扒多數都係西冷同埋肉眼牛扒，今次店員推薦我哋食封門柳，選擇咗五成熟，一上枱見到封門柳份量都幾厚身，足足有200g，封門柳外層燒至焦香，切落去中間呈現紅潤嘅顏色，食落肉質軟腍，肉味濃郁有肉汁，如果想口味再濃郁啲可以配隔離嘅黑椒醬汁。Steak set 可配白飯、意粉、薯條或者沙律，呢個set 揀咗沙律，沙律菜好爽脆，可以中和油膩感。

西班牙黑毛豬鞍
黑毛豬鞍肉味濃郁，火喉控制得唔錯，肉質鬆軟唔會過老，最鍾意食近住豬肋骨側邊嘅肉，味道帶有油脂香，同埋好有咬口。今次個Set 揀咗薯條，值得一提嘅係薯條任食，薯條係幼身嘅，即點即炸，熱辣辣好香脆，令人忍唔住不停咁食，點埋蕃茄醬嚟食唔錯。

龍眼茶
以原壼及茶包送上，深啡色嘅茶帶住龍眼嘅清甜，另外飲龍眼茶有開胃健脾、養血安神嘅功效，相當養生。
隨餐附送嘅可樂同埋任食嘅薯條

午市套餐嘅Menu

반찬앤쿡 Banchan and Cook (東涌)

週末行吓開咗三年嘅東薈城二期 ，之後去Banchan and Cook午餐，試吓佢哋嘅韓國菜，同埋賣相唔錯嘅蛋包飯。環境方面，餐廳以灰色同淺木色調，另外仲有乾花佈置，感覺休閒，好有韓系Cafe嘅風格。當日點咗以下食物：

泡菜炒五花肉蛋包飯
上枱見到脹卜卜嘅蛋包飯， 店員會等食客影完相，再用餐刀將蛋包飯輕輕一𠝹，睇住半熟蛋漿慢慢流落去好治癒，雞蛋口感嫩滑，蛋香味十足，蕃茄汁炒飯嘅飯粒粒分明，味道層次豐富，旁邊嘅泡菜清脆爽口，味道酸酸甜甜，辣辣地，五花肉肥瘦適中，同泡菜一齊食好夾好惹味。

炸芝士千層豬扒
厚切豬扒有四件，豬扒炸至金黃色，口感脆卜卜，中間嘅芝士味濃郁，旁邊嘅沙律菜材料豐富，清新開胃，可以有解膩作用。

韓式炸雞
炸雞、年糕加埋薯條砌成咗一個小山丘，好有心機。炸雞有無骨選擇，味道方面揀咗醬油蒜香味，入口充滿香濃嘅蒜香味，外表炸得香脆，內裏鎖住肉汁，肉質嫩滑，另外配上脆口嘅粗薯條同埋煙韌嘅年糕，好有韓式風味。

南瓜拉提米蘇
拉提米蘇帶清甜南瓜味，甜度適中，夾心層蛋糕口感軟棉，兩個人一齊share啱啱好。

溶化朱古力
好香濃嘅朱古力 ，口感幼滑，上層有忌廉、朱古力碎粒同埋朱古力粉，造成漸變效果，朱古力碎粒令到成杯朱古力味道更香濃出眾。

紅豆鮮奶
鮮奶口感順滑，底部有味道微甜嘅紅豆，好吸引，加上玫瑰花瓣點綴，賣相唔錯

Flames (紅磡)

黃埔天地向來旺中帶靜，屬於舒適嘅生活圈，除咗係居住及購物地點外，仲係美食集中地，當晚去咗黃埔一間西餐叫Flames度晚餐。呢間餐廳環境簡潔闊落，以黑白灰色調為主，燈光柔和，好有格調，餐枱用咗大理石，今次坐喺窗邊用餐，環境帶有氛圍感。

葡式香辣燒春雞配薯條
燒春雞外皮微辣辛香，幾惹味，撕開後juicy嫩滑有肉汁，如果想濃味啲可以再沾吓葡式紅椒醬，令味道多種層次，此外燒春雞份量十足，啖啖肉，兩個人食都十分足夠。薯條屬於粗薯條，即點即炸，熱辣辣，好香脆。

燒大蝦三文魚籽龍蝦汁扁意粉
燒大蝦夠大隻，燒至焦香，肉質爽口彈牙，味道鮮甜，此外三文魚籽賣相晶瑩通透，粒粒飽滿，咬落卜卜脆，味道帶鹹香。扁意粉口感煙韌，而且扁意粉容易掛汁，龍蝦汁係今次嘅精華，濃厚嘅龍蝦汁掛滿每條意粉好惹味，食落口感creamy。

Butterfly Dreams
飲品紫色到黃色漸變造型吸引，上面仲有菠蘿葉做點綴，呢杯係無酒精飲品，用上蝶豆花、菠蘿汁為主調，再加啲檸檬汁，清新解渴，酸甜開胃，而且整體味道唔會太甜；此外蝶豆帶有花青素，可以抗氧化同對人體提高免疫力。

Latte
咖啡拉花精亮，入口香濃幼滑，飲落順滑好舒服，另外杯上有粒方糖，好細心，嫌唔夠甜可以自己調教下

樂天皇朝 (銅鑼灣)

之前一直都想試樂天皇朝嘅八色小籠包，今次終於親自一嚐，樂天皇朝係專門食上海菜嘅中菜館，由新加坡著名嘅樂天餐飲集團創辦，分店遍布世界多地唔同角落，香港亦有五間分店，今次去咗位於銅鑼灣利舞臺6樓嘅樂天皇朝，夠方便就腳。中菜館好有格調，古色古香，中間有一個仿荷花池嘅中國宮廷風庭園設計，場內播住中樂，環境盡顯中式氣派。近門口有個半開放式廚房可以見到一班師傅包緊小籠包，證明小籠包時刻新鮮製作，貨如輪轉。另外座位好闊落，坐得好舒服，好適合一家大細去聚餐。上菜之前，會先壺普洱茶，同埋花生栗子作為前菜。

特色皇朝小籠包-八色
小籠包係中菜館嘅得獎名菜，見到唔同枱嘅客人都會點小籠包。八色小籠包賣相色彩繽紛，每隻小籠包都有唔同嘅味道，分別有招牌原味、糟溜絲瓜、鵝肝、黑松露、芝士、蟹粉、蒜香、川味。枱上有餐牌介紹食客由原味小籠包開始按順序食，最後食到四川嘅麻辣味，由淡味至濃味，全部都皮薄多汁，咬落湯汁飽滿，豬肉味濃，好特別。最特別同濃味嘅小籠包係鵝肝味，帶有鵝油香，同豬肉鹹香幾夾；黑松露味嘅松露菌香隨着湯汁喺口入邊徘徊，令人齒頰留香；川味辣辣地，帶有椒麻味道，另外小籠包加埋薑絲同醋一齊食，更加提鮮，令到味道更豐富。

揚州炒飯
揚州炒飯呈現金黃色澤，飯粒粒粒分明，蛋白蛋黃夾雜喺米粒之間，入口軟嫩，蛋香味十足，上面嘅鮮蝦味道鮮美，口感彈牙，配上叉燒火腿，味道豐富，加上翠綠嘅青蔥同埋菜作點綴，食落幾爽脆，食到碟底炒飯都唔會油膩，感覺健康。

鮮蝦豬肉雲吞豬骨湯拉麵
拉麵用上白色上海幼麵，麵質爽口彈牙，雲吞大大粒，內裏鮮蝦肉質鮮美彈牙。湯底奶白色，全無味精，用咗豬骨湯熬製而成，飲落有香濃嘅豬骨湯味。