喫茶ちょうぼ (尖沙咀)

尖沙咀K11 Art Mall 最近新開喫茶店-喫茶ちょうぼ，店內裝潢充滿懷舊昭和風情調，燈光柔和溫暖，用上深啡色嘅木系作主調，環境充滿日本復古氛圍，旁邊仲放有大型櫻花樹裝飾，打卡一流。喫茶店店主打和洋料理，菜式包括蛋包飯/意粉、漢堡、炸物、飲品及甜品。另外值得一讚嘅係呢度嘅年輕待應服務有禮，殷勤主動。

明太子蛋包意粉
意粉上面鋪上咗圓潤飽滿嘅黃色日本滑蛋，賣相吸引，充滿厚度嘅滑蛋呈半熟狀態，用刀在中間輕輕一𠝹，蛋液立即喺兩邊攤開，令人食指大動，滑蛋口感嫩滑，意粉口感煙韌掛汁，忌廉汁柔滑creamy ，同滑蛋味道幾夾。

牛肉芝士漢堡
漢堡包夠挺身，外層烘得輕脆，內裡鬆軟有彈性，並帶有微甜嘅牛油香。牛肉漢堡扒口感扎實爽彈，保留住肉汁，中間夾住半溶嘅車打芝士、新鮮生菜同埋蕃茄。旁邊有爽脆沙律，此外薯條即炸夠熱，夠香脆。

南蠻炸雞
炸雞嘅份量好多，炸雞用上鹹酸味集於一身嘅南蠻醬，再點上甜甜地嘅他他醬嚟食，特別開胃，炸雞外皮有酥脆口感，肉質嫩滑有肉汁。另外配上旁邊清爽新鮮嘅椰菜絲，可以中和炸物嘅油膩感。

日式布甸
布甸賣相吸引，用咗高身銀色布丁杯盛載，係傳統昭和甜品嘅招牌外觀，布甸上有忌廉同埋士多啤梨作為點綴，士多啤梨清甜，布甸蛋香濃厚，口感滑嫩，微苦嘅焦糖配上布甸嘅甜味好夾。

草莓沙冰
草莓沙冰用上昭和復古玻璃杯，賣相少女心爆棚，沙冰上面嘅士多啤梨清甜，配上綿滑忌廉，入口順滑，另外沙冰飲落好透心涼。

櫻花梳打
適逢喫茶店嘅櫻花祭，所以推出以櫻花為主題嘅飲品，櫻花杯幾搶眼，表面有櫻花形狀嘅朱古力作點綴，底部嘅櫻花帶少少咸味，配上甜甜哋嘅梳打，味道幾清新。

樂天皇朝 (旺角)

最近想食中餐，今日再次品嚐樂天皇朝嘅滬菜，去咗位於旺角雅蘭中心分店，夠晒方便就腳。中菜館中式格調同設計，近門口嘅旁邊位置同其他分店一樣，有個半開放式廚房，可以見到一班師傅包緊小籠包，證明小籠包係時刻新鮮製作，貨如輪轉。另外座位闊落，適合一家大細去及朋友去聚餐。上菜之前，待應會先上壺普洱茶，同埋花生栗子作為前菜，花生同栗子都炆得幾淋同入味。

李白醉雞
滬菜嘅涼盤菜式出色，所以點咗個李白醉雞，雞皮外表光滑，醉雞啖啖肉，口感嫩滑，肉質有彈性，雞皮同肉嘅中間有啫喱狀嘅膠原蛋白，而雞肉滲透住陣陣花雕酒香味，酒味香醇順滑，酒濃度調校得啱啱好，好高質。

揚州炒飯
揚州炒飯呈現金黃色澤，飯粒粒粒分明，蛋白蛋黃夾雜喺米粒之間，入口軟嫩，蛋香味十足，上面鮮蝦味道鮮美，口感彈牙，配上叉燒火腿，咸咸香香，味道豐富，加上翠綠嘅青蔥同埋菜作點綴，口感爽脆，食到碟底炒飯都唔會覺得油膩，幾健康。

蒜香排骨豬骨湯拉麵
拉麵用上白色上海幼麵，麵質爽口彈牙，湯底用咗樂天皇朝特製嘅招牌豬骨湯，口感濃稠，含豐富嘅蛋白質同骨膠原。蒜香排骨切成長形嚟炸，啖啖肉，排骨蒜香味十足，好惹味。

刀切小饅頭（炸）
炸饅頭外表炸至金黃色，點煉奶食一流，味道甜甜地，面層炸得香脆，口感唔錯。

無邊 (北角)

Weekend 去咗北角，想喺果頭食個brunch，揀咗北角旺中帶靜和富中心附近嘅無邊，食物多元化，餐廳環境以白色為主調，望落簡潔明亮，好舒服。

8oz 紐西蘭香煎肉眼牛.沙律.薯條
肉眼扒生熟度適中，肉質嫩滑多汁，咬落嘅口感軟淋，牛肉味濃郁，外層煎至燶邊入味，此外上枱前已切好一塊塊，方便進食，可望到肉內呈現粉紅色，呢塊扒煎得啱啱好。另外配菜有香脆嘅粗薯條同埋新鮮爽脆嘅沙律菜。

Sunny Burger
今次嚟到想食Burger，揀咗呢個太陽雞堡，名字好符合上面煎得好靚嘅太陽蛋，好吸睛，雞堡嘅份量好大個，包經過烘過微熱，上面芝麻粒幾香口 ，太陽蛋切開後流心，Burger 裏面嘅雞扒炸過，皮脆肉嫩有肉汁，咬落啖啖肉好滿足，配合沙律醬同埋蛋汁夠惹味，生菜爽脆 ，個set亦配有香脆可口嘅粗薯條。

Iced Oreo Chocolate
作為Oreo同朱古力控一定要嗌呢杯邪惡嘅Iced Oreo Chocolate，上面cream加埋Oreo好澎湃飽滿，飲品朱古力味濃郁，而且唔會太甜。

綠薄荷.柚子梳打特飲
梳打特飲嘅燈泡賣相好吸睛，最近天氣開始轉熱，飲返杯梳打特飲好透心涼，柚子嘅味道酸酸甜甜，好開胃，而且柚子有潤肺作用。

雙魚座咖啡館 (旺角)

旺角最近開咗一間比較少有，裝修風格法式復古風嘅coffee shop，以白色為主調，窗邊用上lace 布簾，環境充滿少女心，杯碟都好優雅，日頭同晚上去有兩種截然不同嘅氛圍，呢度打卡位同埋食物嘅水準都唔錯，另外餐廳Staff仲好友善殷勤，值得一讚。

厚切頂級肉眼牛扒-配蝦串及薯菜
點咗肉眼牛扒5成熟，肉眼好厚切，前層煎至煎香，切開後中間呈現粉紅色，肉味油香平衡，肉質較有咬口而唔韌，厚切亦好有口感，而且肉眼扒鎖住咗豐富嘅肉汁，配上當日嘅紅酒嚟食真係好夾。此外配上三隻口感彈牙嘅蝦同埋薯蓉及沙律，材料豐富。



麻辣蒜香小龍蝦扁意粉
幾特別嘅fusion 意粉，普通龍蝦扁意粉相信大家食得多，中西合璧嘅麻辣小龍蝦扁意粉就比較小見。扁意粉口感煙韌彈牙，炒得乾身，每條都掛滿咗麻辣汁，先麻後辣好惹味，麻辣之餘仲帶有蒜香味，味道豐富，一試難忘，另外小龍蝦份量好多，食到最後都仲有好多小龍蝦。

玫瑰單骨雞翼
走少女路線嘅玫瑰雞翼，雞翼灑上玫瑰花瓣，雞翼表面用上自家調配嘅玫瑰花蜜，口味微甜，香脆肉嫩，食到一陣清新玫瑰花香，會係少女們鍾意嘅味道。

龍蝦湯
龍蝦湯味道有好濃郁嘅龍蝦味，入口順滑，仲食到粒粒嘅龍蝦肉，真材實料，係好高質嘅一碗龍蝦湯。

鹹蛋黃單骨雞翼
點咗餐廳幾出名嘅小食鹹蛋黃雞翼，外皮炸得金黃香脆，外層充滿鹹蛋黃醬，味道鹹香， 內裏仲好Juicy，係令人上癮嘅小食。

🍸 Espresso Martini
Espresso Martini 外型上面有三顆咖啡豆作為裝飾，漂浮喺呢杯咖啡雞尾酒泡沫嘅上方，幾精緻。Espresso濃香，再加上好醇嘅Vodka，唔會太刺激，味道有苦、甜、酸三個味覺，但幾容易入口，口感滑順。

🍷 House Red Wine
餐廳自家精選嘅紅酒，配上在場嘅格調嘅環境同音樂，飲杯紅酒的確幾有氛圍。今次嘅紅酒酒體較重，帶有濃郁果味，好配合今日嘅主菜頂級肉眼牛扒。

LOF10 Bistro (灣仔)

今次喺灣仔想搵個舒適嘅環境下午茶，所以再次嚟到呢間辦館Lof10 Bistro，環境夠chill ，旺中帶靜，呢度裝潢用咗英式風格，有古典深綠色作為主調嘅大酒櫃，燈光柔和，甚有格調，喺度可以享受一個寧靜嘅下午，另外餐廳嘅服務幾好，食物方面亦唔錯。

Egg Benedict
煙三文魚帶有煙熏香，班尼迪蛋嘅英式鬆餅口感煙韌，上面流心蛋非常流心，令到整個鬆餅沾有蛋香，食落非常惹味，層次豐富。旁邊配有新鮮爽脆嘅沙律，好健康。

All Day Breakfast
全日早餐材料豐富，有德國白肉腸、茄汁豆、火腿、炒蛋、薯餅、粟米同埋沙律菜，份量都幾多，食完之後大滿足。炒蛋嫩滑，薯餅口感香脆，沙律菜清新配埋醋食幾開胃，另外蕃茄仔味道爽脆清甜。

意式黑椒牛肉班尼尼配薯餅
Panini上枱嘅時候熱辣辣，外層烘得香脆，意式黑椒牛肉味道鹹鹹地好惹味，中間有半溶芝士和鮮蕃茄夾喺panini入邊，令到味道豐富啲，芝士味香濃，加埋蕃茄嚟食味道好fresh，另外個set配有香脆薯餅。

煙三文魚蛋沙律牛角包配薯餅
牛角包嘅份量幾大份，外層香脆內軟，食落富有牛油香味，中間嘅煙三文魚同埋雞蛋沙律份量好足，好豐富，煙三文魚帶有煙熏香，味道帶有鹹香，蛋沙律夠嫩滑，另外同樣配有即炸嘅薯餅。

雙拼出前一丁公仔麵配牛油吐司
翻查資料辦館一直係出前一丁嘅合作夥伴，所以呢度嘅特別之處，係可以一邊飲咖啡，仲可以一邊食到公仔麵。雙拼嘅材料有午餐肉同埋太陽蛋，午餐肉好厚身，煎得好香口，太陽蛋煎得幾靚，中間係流心嘅，出前一丁麵煮得啱啱好，麵質唔會過淋或過硬，食落好爽口。跟餐仲配有牛油吐司，烘得脆口，搽埋牛油食一流。

Rose Latte
Latte上面有幾片玫瑰花瓣，有時位花，有時用上店舖名辦館作為裝飾，賣相精緻。咖啡入口香濃幼滑，帶有清幽嘅玫瑰芳香，飲落順滑好舒服。

Mocha
朱古力味道香醇濃郁，亦都飲到微微嘅咖啡香味，飲起嚟口感幾滑溜。

凍檸檬茶
凍檸茶賣相唔錯，有大大片嘅檸檬，好足料，味道唔會太甜，甜度啱啱好，最近天氣開始熱熱地，飲杯凍檸茶有種透心涼感覺。