牛角日本燒肉專門店 (銅鑼灣)

最近韓國燒肉開到四週圍都係, 開始淡忘曬日本燒肉, 今日經開銅鑼灣, 去宜家買野, 同女朋友諗食咩好呢? 一望出面見到牛角個招牌, 好有一種係你啦既感覺!

上到去門口, 見到唔洗等位, 心諗前幾年一位難求既牛角而家好似回左塘咁! 真係熱潮就係一切!

叫左個特上和牛盛合: 明顯特上既雪花較多！入口就有融化既感覺，因為油脂較多，口感非常鬆軟，牛味也較濃, 最好味是特上和牛牛肋骨肉, 雪花超多, 就算燒熟D, 入口都係超鬆軟, 而且還很香口

壺漬牛肋肉，可能之前已經食得太濃味，食唔出壺漬係咩味，但因壺內有少量既洋蔥，散發住陣陣既蔥味！肉質較普通牛肋肉硬身，不過相對厚身, 要燒耐少少, 啖啖肉, 有咬口

燒牛舌, 很大塊, 薄薄的, 每邊燒10秒已經可以食了! 爽口, 加少少葸花同檸汁一齊食, 口感更豐富

另外點了一個月子牛角飯, 係一碗日本米淋上日式甜醬油再加上紫菜，再加上一隻温泉蛋, 如果就咁食一碗月子牛角飯，其實唔需要任何餸都可以好好食, 但用來送牛肉當然更一流! 男人都係要飯要肉!

瀛川日本料理 (銅鑼灣)

成班麻甩毒L打完波有咩好做? 當然係補充體力吹水講波經! 由維園行過黎銅記食返個宵夜, 人生一樂也, 係地下見派傳單人頭費加埋一二百蚊有找的放題, 二話不說就上左黎, 人唔算太多可能平日, 個經理好識做俾左間獨立房我地!點個最細既落單, 我地成班就走左去廁所洗返個靚臉, 出到黎唔好講笑, 巳經成枱都係野食, 做到野!! 基本上佢餐牌上所有可以點既都俾我地點灑, 應該無漏單, 我地大口大口吸入, 佢地就不停收野再上菜!
我記得刺身係唔錯, 好新鮮, 無雪味, 三文魚肥厚甜, 吞拿魚入口即溶, 赤貝爽口, 甜蝦雖然細隻但彈牙, 係希靈魚爭D, 好粉!

天婦羅都不錯, 炸粉不多, 不太油, 係蝦本身細隻, 唔太多肉食, 炸蠔唔腥, 外脆內滑, 配埋個豬扒醬, 香口惹味, 雞軟骨都好香口, 羊架厚肉多汁;

一口牛都好重牛味, 入口即溶, 不過切得太細, 如果大粒D, 口感應該更好! 燒蝦很香不會乾身, 啖啖肉! 牛肉鍋好足料, 豆腐嫩滑, 肥牛好滑, 甜鼓油湯底不會甜, 重點係夠熱, 配飯一流! 芝士年糕，年糕好軟身，包住溶左的芝士，好食! 得閒都要豪一豪, 男人不是只有豆腐火腩飯的浪漫, 都可以過一個豪情夜!

首爾石鍋燒 (旺角)

星期六晚同朋友見到尼間餐廳， 見到幾唔錯咁，而且干凈企理，於是入去試下。

裡面的確幾有格調。我叫左個石頭鍋牛肉飯同埋海鮮炒年糕，有小菜免費送，係Ｄ魚仔同埋泡菜。

石頭鍋牛肉飯，上菜時好熱，味道唔錯，配料幾新鮮，裝醬料個器皿好得意。撈下撈下，好過癮，除左牛柳粒，里面仲有好多配菜，有紅蘿卜，白蘿卜，粟米，冬菇，菜。里面有飯焦，好香，我覺得唔錯。

海鮮炒年糕$48，有青口，蝦，同埋日本餐廳成日出現紅色一圈一圈個D，我唔知叫咩名。海鮮好新鮮，唔會腥，年糕軟綿綿，里面有D彈牙，好過癮，D汁少少辣，韓式燒牛肋骨，呢個配生菜同蒜片一齊食，個朋友話吾錯。同

埋個海鮮豆腐鍋: 個湯底好正, 有少少辣, 好足料, 有埋粉絲底, 仲配埋個白飯添, 份量都唔少, 值得推介, !!

真系唔錯。論裝修，服務，食物，價錢，我覺得系女人街黎講我覺得系水準之上，一定會再黎過
 

低調高手大街小食 (筲箕灣)

咁尋日...咁岩打算入石澳沙灘，但係因為要等埋個frd，唯有去左行筲箕灣，睇下有咩好食下。醫下個肚仔之餘，順便等下朋友咁囉。

行左去筲箕灣東大街個頭，遠距離眼見有一度，排哂隊咁。八卦既我，咪好自然咁行去睇下，點知原本係賣雞旦仔既。咁我都抱住試試下既心態，點知佢ｄ雞旦仔幾好味，咁我都叫左一底雞旦仔同一底格仔餅，同我個frd開心share。先唔講雞旦仔，我個人比較鍾意格仔餅，佢個格仔餅做得唔錯，又香而且做到外脆內軟，同埋醬汁都岩岩好。另外佢可能因為太多人買既關係，佢係即叫即整，等大約１０分鐘左右就食得，等無所謂，因為咁樣岩岩整，夠哂熱，好正 。

事後問番朋友先知，原來呢間鋪頭都幾出名，同埋我都真係覺得幾唔錯。真係幾值得推介比大家。

好時沙嗲 (尖沙咀)

而家係香港, 想食好味d既野多數過百元, 除非食茶餐廳! 但係朋友上星期帶我黎依度食飯, 4個人食到飽灑竟然每人唔洗80蚊, 仲要好好味, 而且尖沙咀地段, 真係講都無人信!!

依度除左食到沙嗲, 最令人驚喜係食到馬來西亞肉骨茶!! 前年去過檳城飲過後就一路念念不忘肉骨茶的藥材香味, 回港一路都沒有再嚐過, 今次無心插柳竟然可以俾我懷念下, 實在太好了, 依度既肉骨茶都好足料, 一樣有好香既藥材味, 肉都好好味, 好稔身, 可惜沒有跟上油炸鬼, 始終覺得欠了一點點。 仲有一個荷葉包雞都好好味, 好特別, 每一件打開既雞都好似個三角形, 沒有皮但出奇地滑同惹味, 唔知點整但我想係必食! 其他沙嗲串味道都好惹味, 唔乾身仲有好多沙嗲汁包住啖啖肉, 啱灑我地成班暴龍!! 唯一係呢度設有時限, 1.5個鐘要還枱, 仲要人齊先入座, 不過以依個價錢, 我覺得都好合理, 我會再回來品嚐的!!