龍廷粵菜廳 (沙田)

季季紅執左後，好耐先有番間酒樓，實在太好了，試問屋企附近冇一間酒樓又成何體統呢？

早兩日試過買外賣叉燒切雞飯，非常好食，啲叉燒係冇得彈，比附近某沽名釣譽嘅 x 燒大王好九條街 (基本上果間嘅叉燒係垃圾)。

今日嚟試下飲茶，啲野等好耐下，好似食法國大餐咁，食完一味消化哂喇，再上第二道菜，不過開張唔夠一星期係咁㗎喇。

叫左點心如圖啦，蝦餃好食，蘿蔔糕賣相核突但都好味喎，百花魚肚個魚肚好耐未食過咁有魚肚味，而家好多酒樓嘅魚肚都係把鬼。不過啲蝦膠仲有冇再少啲。







魷魚鬚味道幾好，但唔夠熱。鯪魚球好味又唔多粉。




服務嚟講呢，普遍員工除咗好似發緊夢咁呢，都冇咩問題嘅。但有一個男經理，好似幾高級，件西裝領有條紅邊嘅。佢自己執緊枱，見到你舉手叫人落單，就好似睇你唔到咁。跟住執完行咗過嚟附近，我再望住佢叫佢，佢都視而不見。

*** 以下同食評無關，大家可以 skip 咗佢。

有時工作上嘅野，唔係話你自己做緊野就關人，你忙緊叫同事跟下都得啫，去好多食肆啲員工都會咁做，何況做到咁高級？仲要後來忙完再叫都係扮盲。

有時真係唔好怪啲青年人叫佢哋 “廢中”。響一間公司做野即係坐埋同一條船，如果個水手因為煮緊飯見到隻船入水都唔理嘅，係咪應該即刻踢佢落海呢？

越男仔 (沙田)

本身呢度都有間金滿X，都係越南野，但非常港式。呢間新野係集團式(雖然金滿X都係集團)，好似特色點，但貴過金滿X一些。今晚路過見到，嘩，仲可以坐街邊食，真係有風味喇，等我得閒試下先。

德興茶餐廳 (沙田)

本來一心想黎食魚旦粉，但見到餐牌貪平（38 蚊）叫左窩蛋牛肉飯食。
大家見到圖片好似麻麻地咁，唔好比佢誤導，佢唔係麻麻地咁簡單，而係難食到嘔。有幾難食？且聽我慢慢道來。
首先，窩蛋牛肉飯有咩特點？係有隻生蛋打落牛肉餅度嘛。咁隻蛋生o既點食呢？靠 D 飯 o既熱力，再搞云隻蛋撈飯，去整到半生熟咁食囉。
難題黎喇，如果個蒸飯本身係凍 o既，咁點食呢？我冇誇張到，個蒸飯唔係唔夠熱咁簡單，而係直情凍o既。我一路搞 D 蛋，一路食，我都冇見到 D 蛋黃或蛋白有凝結過，好恐怖。
最難頂 o既係，個牛肉餅又係生生地咁 o既  feel，本來如果飯夠熱咁係冇問題，半生熟仲正添。但正如頭先所講，飯係凍架嘛，我覺得自己好似食緊生肉咁，真係一路食一路好想嘔。正宗窩蛋嘔飯。

跟住我峽左啖紫菜湯，oh my god，係熱架。尤記得之前有套叫 My 盛 Lady o既劇集，蝦頭整 D 生 o既肉餅比黃子華食，黃子華襯蝦頭行開左就拎 D 熱湯想整番熟 D 落左肚 o既肉餅，我一路睇仲心諗邊有人咁低能架，有用 o既咩？
但我果刻真係頓時萌生呢個念頭，證明左人響絕望時真係咩都會想嘗試去減輕自己 o既痛苦。

食哂盅飯，埋左單，我好內疚，覺得自己係鼓佬定黑仔，冰天雪地，要食自己個 friend, 食又難頂，唔食又死路一條。一路食一路喊，唔知落番雪山之後可以點同阿 Yan 交代？

一粥麵 (沙田)

於 2017 月 12 月 23 日，晚上約 8 點 20 分，我食左呢碟炸兩：

我見到佢嘅第一個印象係，嘩，落咁多豉油，搞到啲炸兩淋哂，一定好難食。
點知一食落去，原來唔係我諗咁簡單。佢嘅淋，唔係因為豉油，因為一咬落去係水汪汪嘅，唔咸，但好多熱水，好似你用毛巾索左好多熱水，跟住你咬落條毛巾度，係咁嘅口感。

我果刻第一反應唔係嬲，係唔相信自己嘅味覺，我竟然又再食多兩舊，結果當然係一樣。
我自問個人想像力都好豐富，但係我都諗唔到佢係點整到咁嘅。做左咁多年人，我唔係未食過難食嘅炸兩，應該話經驗所得，多數炸兩都係難食嘅多，食得都預左。但呢碟野唔係難食咁簡單，如果虎豹別墅有機會重開，我希望佢哋除左原有嘅落油鑊、勾脷筋等場景外，可以加入“食一粥麵濕水炸兩”，以警惕世人切勿浪費食物。
由於食左幾舊，我都費事拎去換啦，就食剩如圖中咁多。但走嗰陣我好有衝動想同啲職員講，問係邊個整呢碟炸兩嘅。我唔係想大興問罪之師，事實上果陣我度火已過。我係真心想問，你做得廚師，你係有你嘅專業知識，你知道浸滿熱水嘅油條係有幾難食，既然係咁，點解你仲要整啲咁嘅野比人食？或者直接啲問，你係咪今日 last day? 但隨著我冇問到而悻悻然咁離開，我知道呢個謎將會伴隨住我一世。

尚素 (觀塘)

簡介：呢間係素食版嘅放題，即係任點任食，限時兩個鐘。以下係佢哋嘅點心紙，可以見到款式並不太多。呢期佢哋做緊黑松露主題。


由於本人鐘意飲湯，所以試個老火湯先，係青紅蘿蔔煲猴頭菇，都幾好味又夠熱。



涼拌苦瓜 - 幾香麻油味，都幾好食，但我同老婆兩個人食唔使比咁多啩？唔好學埋哂寶x 素食啲衰嘢好喎。

唐揚炸雞 - 通常素食扮肉嘅菜式都係把鬼，但呢個估你唔到又幾好食喎，食到停唔到口。


黑松露蒸扇貝 - 完美咁演繹左咩叫金玉其外，敗絮其中，感覺係食緊一塊蒸到好熱嘅擦膠。

蘿蔔香菇羹 - 呢個擺明係伏，相信係人都比佢 fake 左，呢個點睇都唔係世人所理解嘅羹啩？雖然唔跟封面，但其實味道唔錯嘅。


跟住我就口痕想食雪葩，通常甜品都係食飽先食，但正所謂 rules are made to be 仆勤，我食任食就鐘意亂咁叫嘅。

點知一食，不得了，好鬼好食。

本人食任食同大多數香港人一樣，都係當達文西名畫 - 最後晚餐咁食。呢個並無貶義，就好似香港人睇煙花要嘩嘩聲咁睇，唔知就裡嘅人當我哋係港燦。又或者鋤 dee 要隻手助跑向外，大喝一聲咁掟出去先有快感。食浦飛就係要向最短時間內食最多嘅野，咁先好玩。

不過一食到呢個芒果雪葩，我就好似楚漢相爭時嘅楚軍聽到家鄉嘅歌曲咁，完全軍心渙散。本身覺得自己狀態好好，要食盡佢哋嘅菜式應該冇難道，但一食呢個芒果雪葩，我心裡面就響起 George Clooney 嘅名句 - what else? 已經唔想再試其他野了。

當然講係咁講，我嘅理智話比我聽唔可以沉淪落去，好似 TVB 劇入面向雪地就訓著嘅人，我要提住自己你唔可以訓㗎。

春卷 - 雖然犯左炸野嘅大忌 - 唔熱，但味道係非常唔錯。

擔擔麵 - 受過涼拌苦瓜嘅教訓，呢個麵叫佢比少啲，呢度係我分左一半比老婆先影嘅。味道普普通通啦。

麻辣粉絲 - 唔好睇佢賣相核核突突咁，味道係好正嘅，非常惹味。雖然份量都係比好多，但呢次冇投訴，反正佢比得少我都會再點。



紫菜湯水餃 - 好普通，不吃也罷。

食到咁上下我又沉淪喇，今次試下青檸雪葩先，以為做得芒果雪葩個friend 都唔會太差啦，但嘩頂唔順，太酸，天同地嘅分別。

跟住好自然地我又嗌番芒果雪葩喇，我發現青檸雪葩係要等好耐，但芒果雪葩就即叫即有，可能太受歡迎喇。整定好多向度。

不過呼籲大家食還食，唔好太任性。我總共就食左食四杯芒果雪葩，搞到個肚唔係好舒服，可能太寒涼。