牛陣HANARE Platinum Label (銅鑼灣)

長輩勁有肥肥家族心，每每覓到好西都會第一時間請家人一同品評，入冬前最新就發現咗銅鑼灣有間抵玩和牛放題專門店「牛陣HANARE Platinum Label」。店子位於世貿中心十一樓，雖則樓底唔算高，但勝在用餐大堂開揚清爽，空氣夠流通。環境光鮮企理，散座間又有足夠嘅活動空間。散發出和風嘅裝潢不失時尚。正門及室內某啲角落仲流露出襌味。八人派對被安排入座其中一間廂房內。餐桌上擺有齊備嘅自用及公用餐具、調味料及日本蛋蛋。據悉，開瓶費設於$100/枝標準裝紅、白、汽、清酒及$200/枝大瓶裝，屬良心價。同Uncle食飯飲酒酒，只有一個飲法，就係杯杯都要勝，故為公平起見，每人都會備有自己嘅酒酌，明顯輸酒量唔輸陣！無限時嘅和牛放題餐牌共有兩頁。特上套餐包有無限添加汽水、前菜、主菜、副菜、甜品，價格取決於所選之主菜項目，全枱必須點同一款；另加$59/位更可升級玩埋啤酒放題！主菜分壽喜燒及涮涮鍋兩款，當中鹿兒島野崎牛可選特撰（$629/位）或赤身肉（$529/位）；如果唔想食前菜、甜品同飲汽水的話，則可選平啲嘅上級日本黑毛牛（$429/位）或澳洲長期穀飼牛（$329/位）。杯杯勝Uncle極之好客，早就點好特撰鹿兒島野崎牛壽喜燒套餐（$629/位），原來點咗依款主菜時係可以追加埋其他牛肉款式、和豬同和雞片嘅，相當豐富！追加食物只需填紙仔，環保啲可以直接同場內嘅服務生落單。應建議一開波先試勻五款刺身，當中個人最愛爽潤嘅油甘魚及肥美嘅三文魚；哥哥則鍾情鮮嫩嘅帶子及潤滑嘅甜蝦。廚房仲好有心思地砌出靚靚拼盤，放題餐廳對擺盤絕不馬虎！薄衣天婦羅頭輪同樣四種點哂，意外地，層天婦羅炸漿極之鬆化香脆，而且真如餸名般薄衣，唔會食到成口油。長長嘅蝦蝦爽彈鮮甜；大大隻冬菇芳香厚潤；南瓜都好清甜。三色小鉢料理屬輕盈之選，細細件蟹膏豆腐好軟嫩；龍蝦沙律伴配青瓜片都唔會好溜；個人會推介酸酸爽爽嘅檸檬汁漬海蜇作間場小食，可一解和牛嘅油脂。如相所示，特撰鹿兒島野崎牛嘅紅白雲石紋理分明，粉嫩吸睛！第一隻金碟連埋牛牛嘅肥膏磚塊上枱，好等燒煮牛肉時唔會黐底。或許見座上客大多為高鹷長者，駐場嘅文仔哥哥竟然主動示範燒煮頭輪。和牛件質感柔軟，沾上甜甜嘅壽喜燒汁再浸入蛋黃醬（小肥太快勝得太多杯，所以唔記得咗影）即為靚肉添上香滑，加口熱辣辣嘅白飯更覺暖胃滿足！節令野菜拼盤款式都唔少，全部都好新鮮清爽。因真心覺得和牛放題美味抵食，XO仔之後仲約咗班食肉獸酒鬼試埋個「極」涮涮鍋！用紙鍋清湯烚熟和牛，配料換上麻醬及柚子醋，感覺幼滑嘅靚肉清啲同冇咁溜，結果食多好多碟！甜品共有四款可選，除咗大路嘅雪糕之外，日本卷蛋蛋糕鬆軟香滑。紅豆抹茶凍則柔韌清甜。銅鑼灣和牛放題專門店「牛陣HANARE Platinum Label」通爽衛生，服務生親切周到，任食和牛鮮美高質，壽喜燒或涮涮鍋都一樣咁！前菜、小食、配菜等選擇多，且可口味佳，仲要唔限時喎，七百蚊有找絕對抵玩，值得支持！

瀧 (中環)

外國公司作風新派，就連春茗地點都一反傳統地揀咗間天婦羅專門店「瀧」，全因晚市推出嘅六八折剛好符合預算！佔用面積全層嘅日本餐廳光鮮企理，正門身後為師傅個大舞台。多人派對包哂圍繞著開放式廚房嘅高櫈吧位，食物煮好即可享用，夠哂熱辣辣！吧位身後有條海龍升天，繪出「瀧」字，霸氣十足！晚市餐牌上共有兩個選擇，其一為指定套餐「瀧」（$1,380/位），其二為可與廚師商討自定內容嘅「雅」（$980/位起）。主人家早已訂好菜單，埋位只需揀靚杯飲清酒。每位席上擺有自用餐具及濕紙巾。細心睇多兩睇，發現筷子原來係某日本木匠曾經講過最好揸嘅五角形款式，店主似乎有啲料到喎！等待天婦羅時，先有清脆嘅枝豆送酒。前菜中嘅萵筍蟹肉清甜爽嫩，三文魚籽於口腔內爆裂，即有提鮮之效。四式頭盤應建議由左邊嘅水雲杯起，逆時針方向食。勁酸嘅水雲醒神開胃；以味噌自家醃製嘅芝士可以話係另一類嘅重口味，好芝士嘅人就勁啱；節令嘅螢光魷魚好爽脆；橙碟上嘅海膽豆腐則芳香幼滑，最合個人心意。呈奶白色嘅鯛魚湯鮮濃甜美，暖胃非常。進入天婦羅環節，Barry師傅先介紹配點嘅四款調味，下圖左起分別為天然鹽、咖哩鹽、檸檬汁、蘿蔔蓉。打響頭炮一貫傳統地由靚蝦開場！天婦羅炸漿酥化巧薄，修長嘅蝦身爽脆彈牙，簡單點上白色嘅天然鹽已能吊出鮮甜。旁邊嘅炸蝦頭卜卜脆兼冇渣，沾上咖哩鹽後好似變咗卡樂B嘅咖哩味薯片咁，送酒佳品也！魚王大讚天婦羅𩶘魚仔皮脆肉扎實，魚味仲好鮮。炸至半生熟嘅天婦羅帆立貝上枱前已一開為二，外脆內軟嫩，加點白鹽最能保持其鮮甜。半條骨都冇嘅天婦羅沙錐魚嘅魚味冇𩶘魚仔咁濃，賓客中竟然有人話食完唔知食緊魚喎，絕對有飲醉之嫌！彎彎嘅天婦羅瀨尿蝦實淨有彈性，而且好鮮甜。小肥一向對魚興趣不大，反而覺得連殼炸嘅天然大蜆有特色！據悉，師傅預先將蜆肉切成粒粒，混入冬菇碎及芡汁後焗製一輪後方才成隻喺滾油炸出，乜都唔洗點就咁就食得。意外地，經雙重焗炸過嘅大蜆爽潤多汁，鮮濃滋味得很！全晚之最必選壓軸戲肉紫蘇海膽三文治，喺廚房嘅燈光下尤其橙艷奪目！「三文治」底面兩片紫蘇葉天婦羅酥化輕盈，芳香尤甚，一口咬落去，當中澎湃嘅海膽餡心即溢滿口腔，舌上交織出香脆、鮮甜、嫩滑，成功掀起高潮！食完多道天婦羅後，每人面前即有一碗好似茶碗蒸嘅京都豆腐。滑如蛋蛋嘅豆腐擺盤精美，真係冇諗過豆腐面塊透明啫喱乃紅菜頭汁所造，頂面嘅粟米方磚清甜爽脆，組合清麗脫俗，十分可口。單尾食事可選雜菜蝦餅飯、蕎麥麵、烏冬，其中最多人揀食飯飯。XO仔就點咗個清新啲嘅蕎麥麵。甜品環節共有兩道，第一款鹿兒島安納芋師傅其實一早已經開始炸，上碟時更提點層皮都食得！紫皮黃肉嘅安納芋相當軟熟，黏上伴配嘅拔蘭地同糖後，當中嘅甜味迅即被燃點起黎，軟化咗嘅表皮亦甜美非常，吃畢一啲渣都冇，堅掂！作結嘅水信玄餅晶瑩滑溜，撈入伴配嘅沖繩黑糖及紅豆粉足以添上微甜與芬芳。樓上天婦羅店「瀧」環境時尚潔亮，室內抽氣充沛，服務生溫婉友善，天婦羅菜式用材新鮮，而且唔係咁油膩，晚市之六八折優惠直令性價比提升不少，值得一試！

錦汶館 (跑馬地)

出入跑馬地時早就留意到奕蔭街上有新店「錦汶館」裝修，等到初秋終於見到佢開張，不同媒體亦紛紛報導，介紹主廚李灼汶師傅為「廚皇教父」鍾錦師傅嘅得意門生，來頭咁勁喎，大食會梗係要湊湊熱鬧見識吓啦！私房菜現階段只做晚市一輪，由於座位有限，食客必需預先訂座及定好菜單。正如門面展出嘅菜單樣板所示，開瓶費及服務費全免，啱哂酒鬼。店子樓底高高，落地玻璃窗身後有兩張四人及六人枱，據悉有需要時可合拼成一張十人枱。最中央為光亮潔淨嘅開放式廚房，貴客可任意觀摩「刀哥」汶師傅嘅廚藝。（嘻嘻，初相識即俾XO仔八到師傅咁響嘅朵，唔用實在有啲嘥，故仔就留返有心想知嘅人親自訪問刀哥啦！）用餐大堂光線充裕，簡潔企理，就連洗手間都相當衛生。十人派對被安排入座後方私隱度較高嘅位置，不過滿座時雜聲同回音都幾勁，建議可加舖厚厚嘅地毯幫助吸音。室內並無花巧之裝潢，單憑牆邊嘅酒樽及掛牆海報，已可感受到客人及店主均為好酒之人。大肥爸爸用餐當晚先決定睇菜單，竟然一野就發現列出嘅九大簋（$738/位）有齊雞、魚、豬、牛、蝦、蟹、菜、湯、麵，唯獨欠甜品一環。雖然未能成為十全十美，但可令貴客期待回頭品嚐，換個角度黎睇都可以話係缺憾美黎嘅。每位席上都有齊備嘅自用及公用餐具。場內嘅服務生友善落力，長輩應推介試咗個特色牛蒡茶，嗜酒嘅細佬少呷茶，只可以話茶品個牛蒡味好濃囉。溫泉蛋蔥油涼拌蟶子皇：打頭陣嘅頭盤好似西餐咁講求擺盤，每人一碟。預先切成細細條嘅蟶子皇鮮甜爽脆，拌上蔥油尤其醒胃；散發出天然咸香嘅冰菜脆嫩清爽；羮上嘅溫泉蛋柔潤香濃、溏心又富彈性，三個主角各具特色。特色八小碟：等咗大半個鐘，第二道八小碟終於一次過上，當中除咗冷盤，部份菜式理應襯熱食，不過等到相機食完再分哂俾十人後，食物都已經凍哂。小弟愚見，如果啲小碟續樣煮好即上，客人可一邊送酒，一邊享用，保持熱度又減少冷場，絕對係一舉兩得！特色八小碟之芝麻蝦多士：八款小碟中，個人最欣賞層次分明、香脆鬆化嘅芝麻蝦多士。特色八小碟之話梅小凍茄：凍食嘅前菜其實一早已經可以上枱，蕃茄仔酸酸甜甜，清新開胃。特色八小碟之一哥燒雲腿：意外地，賣相不甚吸引嘅雲腿片毫不油膩，亦不乾嚡，香甜脆身，送酒絕配！特色八小碟之金沙炸魚皮：平心而論，炸魚皮質感脆薄，唯一唔係好食得出有金沙咸蛋黃嘅成份。特色八小碟之鹽燒沙尖魚：此餸原本被小肥叮走咗，幸好刀哥唔覺意加返上去，因為席上嘅魚王魚后大讚魚魚燒得勁香口，仲即場表演「食魚唔𦧲骨」，魚骨直頭脆到可以吞埋落肚！特色八小碟之煎焗墨魚角：細細粒嘅墨魚角爽彈易入口。特色八小碟之雞蛋焗蠔仔砵：十人對蠔仔砵嘅評價有啲不一，正當蕃薯uncle覺得為極品時，XO仔就覺得砵中嘅蠔仔唔夠肥嘟嘟，美人姐姐雖然覺得菜式美味，但卻誤以為食緊焗魚腸。。。特色八小碟之脆皮牛坑腩：埋位時明明睇住刀哥為牛坑腩塗上秘醬後串起去燒，點知入口嗰刻牛腩卻只屬和暖，唔得脆皮，而且偏乾同嚡，估計同自己花時間影相及分餸後排到最尾先食所致嘅反效果。特色八小碟之鮑魚汁炆雞腳：鮑汁雞腳軟腍入味，吮腳趾經驗豐富嘅長輩一食就話係新鮮貨色，而並非平時飲茶嗰啲急凍雞腳，真係識貨架噃！羊肚菌姬松茸燉竹絲雞湯：一人一盅嘅雞湯清甜足料，羊肚菌同姬松茸芳香嫩脆，但係咁大碗湯湯對酒鬼黎講可能太多水，幾個人都飲剩。招牌花雕蒸海紅蟹：十人有兩隻嘅花雕蒸蟹醇香甜美，蟹肉幼嫩軟滑，精華汁液留埋黎煮單尾，善用資源靚料。薑蔥蒸鹽鮮馬友魚：十人用餐同樣有兩條蒸魚。刀哥講解魚魚別號「半日鮮」，全因佢朝早新鮮買咗返黎即用鹽餡咗半日，用餐前先用薑蔥蒸。馬友極之鮮甜嫩滑，魚油溫潤，淨睇以下兩幅食前、食後對比照應該都知佢咩料啦！蝦米醬粉絲炒花蛤皇：花蛤鮮爽惹味，蝦米醬份量適中，粉絲炒得好乾身又夠爽，簡單可口。芝麻焗貴妃鮮雞：雞雞連雜上，証明用新鮮雞整，肝腎唔夠五秒即全部消失，即秒殺咁受歡迎！貴妃雞芳香尤甚，皮下脂肪唔多，黑肉同白肉一樣咁鮮嫩柔潤，愛食雞皮嘅小肥只係略嫌皮上嘅芝麻份量過多，蓋過咗雞皮原有嘅滑溜感。鮮茄金湯浸豆苗：豆苗本身爽嫩帶脆，黏上含蛋花嘅金湯成功為嫩菜添上香滑。蟹汁撈烏冬：粗粗嘅烏冬麵條肥潤Q彈滑溜，沾滿鮮濃甜美嘅花雕蒸蟹精華，明明食緊菜菜時個個都話飽，但三兩吓手勢就清碟，美味程度不言而喻！跑馬地新店「錦汶館」環境光鮮衛生，店員落力好客，三代同堂家庭式作業絕對同心！為確保食物質素，掌舵人刀哥專注每天只做一輪晚餐，態度誠懇認真，七百多元嘅九道菜餐單用材新鮮，菜式豐富美味，貨真價實，確真做到令顧客有賓至如歸嘅感覺！

香江花月 (銅鑼灣)

成為咗Lee Gardens Club會員後，發現多間餐廳都有九折優惠，週三晚收早，所以就好即興咁約咗三五知己試試其中一間「香江花月」。聽到餐廳名， XO仔即聯想到「香江花月夜」嘅梅姐，冇諗到餐廳大堂會選用哥哥嘅畫報裝飾正門前方嘅升降機大堂。佔用面積全層嘅火鍋店寬廣開揚，用餐大堂光線充裕，弧形嘅散座又真係幾似電視劇中嘅舞廳格局喎。最中央位置為自助混醬區，兩邊高高嘅圓柱桶均為豉油，混唔混都會收$25/位。每位席上擺有齊備嘅自用及公用餐具，感覺都好衛生。埋位每人先送一杯清新怡神嘅洋甘菊茶，細杯仔底隱約露出條肥嘟嘟嘅錦鯉，相當盞鬼！飲品牌只有一頁。爛飲鬼結果開咗兩枝紅酒。眼見六人用餐要分兩個煲，所以就應推介其中一邊點咗個包一款鮮味頭盤、火鍋湯底及時令海鮮拼盤嘅「鍋心暖意」套餐（優惠價$2,188；原價$2,988）。另從火鍋紙上多個項目加選配料。（厚本彩圖餐牌太多頁，小肥嗰日懶冇影到。）不過就冇試到啲摩登點心同甜品。鍋心暖意套餐之澳洲龍蝦刺身（原隻）：套餐嘅頭盤揀咗鮮甜爽脆嘅澳龍刺身，如果怕生的話可以灼一灼先食。個殼仲可以浸埋入去滾，令湯底更為鮮濃。鍋心暖意套餐之白湯人參鍋（原價$228）：奶白色嘅人參雞湯底其實都幾甜，不過個藥材味都幾重吓，最正係入面滑嘟嘟嘅鴨血。日本牛乳玫瑰鍋（$168）：同樣呈奶白色嘅玫瑰鍋底反而得個靚字，浮面朵玫瑰花原來係用日本牛乳冰製而成，滾湯時會慢慢溶，下面托底件木瓜就要用人手整爛。湯底係就係好滑，不過唔係好飲得出有玫瑰香，用木瓜味牛奶打邊爐始終有啲怪怪地。鍋心暖意套餐之時令海鮮拼盤：如相所示，拼盤內含爽彈嘅蝦蝦、鮮脆嘅鮑魚仔、幼嫩嘅帶子同甜美嘅花蛤，共四款海鮮，每款最少有四隻。香江拼 – 手切肥牛、牛柳粒、安格斯肥牛、牛小腿、牛白肉、牛心頂、黑柏葉、牛脷（$798）：顏值最高嘅牛肉拼盤每款分成小碟，有啲仲兩、三碟咁圍住個火鍋邊，唔洗標籤注明都睇得出牛牛嘅部位。中間有個窿嘅擺盤設計可善用餐桌嘅位置，邊食仲可以人手轉，個個都夾得到。切得夠薄身嘅手切肥牛同安格斯肥牛都好軟熟，牛柳粒最有嚼勁，個人最欣賞爽潤香甜嘅牛白肉，唯一唔係好識點煮個黑柏葉，烚極都好似好韌咁。花滿園（$238）：豬羊雙拼用架上，高雅嘅雙層賣相一樣好慳位，上格半肥瘦嘅豬肉片柔潤帶爽。下層嘅羊肉睇落都好薄，不過自己怕羊肉羶所以冇試到。蓮藕片（$38）：意外地，白雪雪嘅蓮藕片清爽脆巧。生根（$28）：脹卜卜嘅生根都好新鮮。娃娃菜（$48）：娃娃菜葉多夠清甜，最啱細佬口味！一口鮮蝦滑（$78）：蝦滑爽甜彈牙，必吃推介！鮮冬菇（$28）：肥嘟嘟嘅冬菇清香可口。碧綠萵筍（$48）：平時都幾鍾意食萵筍，不過唔知係咪唔啱季節呢，盤中嘅萵筍塊好似苦苦地。黃沙豬潤（$58）：厚肉嘅黃沙潤煮前已富光澤，煮熟咗後亦爽潤柔滑。姬松茸野菌餃（$88）、冬菇薺菜餃（$88）、自家製韭菜餃（$68）：「香江花月」幾款餃餃全部都包得好工整，餃皮厚薄適中，不過食落，用菇菌作餡嗰兩款嘅味道偏淡，反而最平嘅韭菜餃最爽嫩惹味。銅鑼灣火鍋店「香江花月」通爽闊落，服務生好客友善，廚房用材優質，菜式大多美觀味佳，睇得出各方面都花過心思設計，好迎合現今愛打卡嘅世代！懷舊嘅裝潢配上時尚嘅火鍋湯底同配料，橫跨時代嘅主題有啲似劇集中嘅穿越時空咁，置身其中都幾過癮。

Nikutoieba Matsuda (中環)

近日接二連三見到不同媒體介紹奈良名店「肉といえば松田」（Nikutoieba Matsuda）於香港首設海外分店，為食兵團當然係要打鐵襯熱，盡快一試啦！第一次以短訊查詢時知悉店子只開晚市一輪，七人訂座要等到2024年先有位，正當大家仍在失望之際，隔咗幾日突然收到餐廳訊息，告知因應熱烈需求，老闆決定節慶期間於選定日期加開午市，嘻嘻，和牛割烹宴彷彿係天賜為食寶寶們嘅聖誕禮物。位於中環歌賦街上嘅日本過江龍黑白灰色嘅地舖只示出形似識別忍者派系嘅徽標，門面低調中帶著神秘。正門上方嘅黑色布簾及室內以木為主嘅間隔自然地流露出和風味。可容納上十一人嘅用餐大堂光線充裕，通爽潔亮，且空間感足。沒有花巧之裝潢，圍繞住師傅大舞台嘅每一位賓客都可專心觀賞Hitoshi-san嘅割烹廚藝表演。顧名思義，「割」為切割、「烹」為烹調，亦即邊切邊煮。現階段，午餐及晚餐均提供同一款十四道菜和牛廚師發辦料理（$1,280/位），訂座後必先預繳不設退還嘅訂金（$500/位）以確認留位。午餐準中午十二時開始，全場同一步伐，絕不會為遲到或早退嘅食客拖慢或加速；冇錯，遲到冇得補，早走唔會減價。週末大解放，酒鬼們當然係要歡樂暢飲啦！單點飲品項目共有兩頁。事前已問清楚開瓶費分兩種，720ml裝或以下為$400/樽、720ml以上則為$800/樽。聽到好客嘅Shirley妹妹詳盡推介，為食七子唔洗多諗，即選定性價比最高嘅Full Pairing午餐食酒配搭，$380/位可享食前酒、日本酒、白酒、紅酒，合共四杯酒酒。揀好飲品後，主廚先展出和牛主材並為其作出簡介。第一盤中，上方長長嘅為澳洲和牛牛脷，下方三件則為源自日本宮崎嘅後腰蓋柳肉、西冷及牛柳。下圖左手邊嗰盤為牛脷，右手邊為外橫隔膜。嘻嘻，小肥一向好多野想知，兼且唔會怕醜去問，結果八到主廚未夠三十歲，十五歲已經入咗行，故有「天才廚師」之稱號！席上只擺有一雙筷子，因為所有菜式都已調好味。三小時嘅和牛盛宴迅即由甘甜清爽嘅有汽餐前酒＜雁木スパークリング 純米発砲にごり生原酒＞揭開序幕。蘑菇濃湯：頭盤一小杯芳香柔滑嘅蘑菇濃湯，濃縮得黎份量剛好唔會溜。宮崎和牛主角隆重登場前，妹妹先呈上每年只生產六萬枝嘅日本清酒＜楯野川純米大吟釀急流＞。和牛他他（壽司）：如相所示，師傅細心地將鮮紅鮮黃嘅和牛及醃蘿蔔剁碎，切割步驟絕無假手於人，用紫菜加入醋米包製出卷物後就續一以心連心嘅方式直接傳遞予貴客手中，感覺尤其溫馨親切！和牛他他蘿蔔卷集鮮甜脆嫩於一身，實滋味無窮！炙燒和牛柳拌洋蔥、紫蘇葉：接著嘅燒牛柳件建議撈勻哂拌配嘅生洋蔥絲、紫蘇葉碎及蓮藕脆片黎食。外層輕輕燒炙過嘅和牛柳厚潤有嚼口，小砵中其實都有成四、五件，黏上秘汁再夾埋配料食落去，酸甜清爽中帶出芬芳，越食越開胃。山椒子燒和牛赤身配意大利黑醋燒秋茄子：外表粉潤嘅燒和牛赤身肉質更為柔軟，而且肉汁豐腴，墊底嘅黑醋燒茄子意外地一啲都唔油。準備換上澳洲和牛代表一刻，妹妹亦斟出法國白酒＜2021 Château Le Grand Verdus Sauvignon Blanc Sémillon＞。炭燒和牛牛舌（鹽味）：閃出油光嘅澳洲和牛牛脷鬆爽富彈性，簡單塗上山葵吊出清新嘅辣勁，可口又提神。炭燒和牛外橫隔膜（韓式醬汁）：牛牛嘅外橫隔膜又稱之為外裙肉，應建議用生菜包起用手拎住黎食，生菜和牛卷微辣惹味，爽潤多汁，個個食到嗦嗦聲，爽呀！自家製和牛生火腿蔬菜沙律：唔知師傅係咪食過四川名產「燈影牛肉」而得到靈感呢？！以臀肉刨出嘅和牛火腿比紙張更巧薄輕盈，放入口即慢慢溶化於舌上；沙律含醋量極高，所以食落好酸，相信係用作分解多道和牛嘅油脂。燉和牛配馬鈴薯蓉：小肥略嫌深啡色嘅燉和牛濃咸得黎帶點兒苦澀，或許係因絲毫不覺有爽嘅成份吧，身旁嘅長輩一再提出超腍嘅口感完全唔似牛脷。師傅好似聽得明大家抱有疑惑咁，急忙地攞出牛脷真身以指出燉牛脷嘅準確部位。時令水果配馬斯邦尼芝士豆腐蓉：進入重頭戲之前，先有節令嘅日本士多啤梨混芝士豆腐蓉為味蕾洗滌一番。吉列和牛菲力三文治：不知不覺已經進入直路，輪到選配最後一杯南非紅酒＜2018 Windmeul Kelder Cellar Cabernet Sauvignon Merlot＞嘅招牌和牛三文治出場。底面兩片暖手嘅多士外脆內軟，中間兩、三成熟左右嘅吉列菲力香脆鬆厚，沾上他他秘醬之外仲夾入切碎咗嘅奈良漬（ならづけ），為和牛三文治添上爽潤惹味，食過包你返尋味！壓軸上陣嘅和牛西冷分開兩個煮法，講到明係壓軸喎，煮前當然係要先哂一哂冷啦！和牛西冷洋蔥涮涮鍋：第一件用芳香嘅清湯涮熟，可以食得出西冷本身嘅肉質如何柔軟纖潤，絲毫不膩口。和牛西冷時令蘑菇壽喜燒配白飯：望住師傅將大大片和牛喺壽喜燒汁中浸一浸、拖一拖，甜甜嘅香氣迅即飄進鼻腔。上枱時，大大塊和牛正於碗中享受緊蛋黃浴！第一啖咬落去西冷件時，最突出嘅就係蛋黃醬嘅柔順感，直令靚肉變得更加細緻嫩滑！第二啖將啲精華撈埋落碗白飯到食，飽滿嘅飯粒都頓覺肥潤甜美得多，滑溜得黎仲好暖胃。溫素麵：單尾共有三款可選，覺得食夠肉嘅客人都會揀清清地嘅溫素麵。和牛咖哩：相反地，如果個胃仲有位，而又仲可以加重口味，不妨選擇被譽為日本「國民食物」嘅咖哩飯，混入咗和牛嘅咖哩飯甘香濃郁，十分飽肚。和牛時雨煮飯：想輕巧地食多少少飯呢，細細碗和牛時雨煮飯就最恰當。飯面嘅牛肉薄片夠味得黎唔會好似咖哩飯咁多汁，頂面嘅生薑絲又可以消消滯，話咁快兩、三啖就食哂。自家製安納芋Gelato：結尾一球清涼嘅安納芋雪糕微甜得黎個味道好天然，加咗兩片安納芋脆片點綴令口感更有層次，吃畢腸胃好舒適。飯後仲要由師傅親自送上熱毛巾，盡顯誠意！喺日本出名為預約困難店之一嘅「肉といえば松田」近日於香港開設第一間海外分店，同個名一樣夠哂話題性。中環新店環境簡潔樸實，高雅大方，座位闊落舒適，服務生誠懇體貼，十四道菜和牛割烹廚師發辦饗宴用材新鮮，半帶傳統半帶新穎嘅和牛菜式高質味佳，$1,280/位亦相當合理。據悉，除咗兩道招牌和牛他他壽司及吉列和牛菲力三文治之外，餐牌其他十二道菜都會定期更新換畫，務求貴客再次光臨時可保持新鮮感，絕對值得去見識一吓！