激安燒肉工房 X 大眾燒肉酒場 (筲箕灣)

24/11/2020

同朋友相約去西灣河嘅‘激安燒肉工房’，有訂位，但係比訂位時間早咗到，都要等咗一陣先比到位（咁都比原定訂左時間係早入咗嘅）

細細個爐自己燒，坐低已經有幾格豉油（仲有蒜蓉）、另外都有燒烤鹽、 胡椒鹽 俾你係燒緊嘅時候落。

叫咗～
九宮格燒牛盛盒（$288）: 分別有九款牛，每款大約有兩至三塊，最靚就當然係’淺色嗰啲‘、另外深色嗰啲係有醃過嘅，好林。大致上啲牛肉嘅味道幾好，不過唔算十分濃味，所以有幾款都要點啲鹽食。
美國頂級prime 肉眼 （$88）: 有兩塊好薄嘅肉眼，同朋友一人一塊，有少少油分，爽呀。
（蒜蓉）象拔蚌 （$28）：感覺上好細隻 ，朋友話‘un’咗d .
（蒜蓉）活元貝（$28）：好大隻，洗得好乾淨，燒完都幾鮮甜。
鹽味雞翼 （$38）：有5隻，中間預先剪開 ，方便燒。雖然話係鹽味，不過都要自己落大量嘅胡椒鹽先覺得有味。
紫菜月見飯 （$28）：有蛋有紫菜有肉汁嘅飯，好味，配上牛肉仲好味。（但係份量可以再多啲嘅😏）
Sapporo 啤酒 （$48）（而家買一送一）燒肉配啤酒，爽呀。

有加一服務費，落單用手機scan QR code, 只收現金。服務都幾好，職員都好有禮貌，收碟收得好快。地點唔算好難搵，但係同西灣河地鐵站都有d 距離. 缺點係抽氣統麻麻地，食完成身都係燒烤味。同埋我覺得個爐嘅火唔係好大 （但係冇得調教大細的），因為我哋咁薄嘅牛，其實燒幾秒已經（應該）轉啡色，但係因為啲火唔係好猛，所以都有少少需時。可能係因為店主驚啲人用太大火，會好容易燒燶掛。

點鍋 (旺角)

11/11/2020

6人限聚，所以5人的我們可以聚會了，為9月及10月生日之友慶生。

友人選咗‘劣食之塔’兆萬中心3/F的‘點鍋’（黃店）打邊爐，$288 任食2小時。（而家做緊七折優惠）

我哋選擇食埋雞煲 （半隻雞$88/一隻雞$168），我哋叫咗半隻雞⋯⋯⋯ 但係其實份量好少，斬件之後都冇乜肉食。

之後我哋打邊爐叫咗芫荽湯底 （本身如果食雞煲之後打邊爐，要加$20先可以有另外嘅湯底打邊爐，如果唔係就直接加水落去個雞煲度🤪🤪）

任食嘅嘢就用pad 去落單⋯⋯ 嘢飲出邊拎⋯
一坐低會送一碟牛肉、海鮮拼盤（蝦、蜆、帶子，魚塊）⋯⋯⋯
食物來講就唔特別出色，都係啲普通貨色，款式亦都唔算多。真係唯一唯一最驚喜嘅就係鹹蛋黃魚皮 ，佢真係新鮮炸㗎，仲比好大碟。

服務都唔錯 （店舖有雇用殘障人士👍🏻）、但係座位就有少少迫，食物質素就真係好一般。最後埋單五個人$1318⋯⋯我相信呢個價錢旺角有其他選擇。

鯛魚魚湯專門店 (鰂魚涌)

27/10/2020

最近比IG foodie(s) 洗版，龍蝦好似好吸引，所以去試一試。

龍蝦比想像中細，影相就會大隻啲，但係啲肉都比較少。都有啲膏，還可以吧。魚湯好清甜，但係龍蝦對啲湯係冇幫助嘅🤣🤣 扁烏冬幾好食。

另外叫咗唐揚炸雞，一碟有7嚿咁多。炸雞比想像中好食，上碟食到尾都熱辣辣的，炸粉夠薄。

對我來說試一次就夠了，吾係好令人‘回頭’。

Amour Cafe (佐敦)

19/10/2020

放學去朋友介紹嘅佐敦小店食晚飯，其實嗰個位置我哋成日都經過，但係一直冇留意佢一間食店😂係一間好細嘅店、好似茶餐廳、門面好似雜貨鋪⋯⋯但居然係食西餐嘅。

我同友人都要咗 ‘米蘭豬扒配奶油蘑菇意粉’⋯⋯米蘭豬扒即係炸豬扒⋯⋯打到塊豬扒好薄好大塊⋯⋯果然幾好味。奶油蘑菇汁好好食，好creamy, 意粉份量都幾多。
雜菜湯係用杯上嘅，真係第一次見🤣🤣 不過個湯就麻麻哋。
甜品可以揀芝士餅或吉士蛋。我選了吉士蛋⋯⋯好滑😋

八屋 (旺角)

18/9/2020

Cafe hachiko

叫咗：
Carbonara: 好味嘅carbonara, 都比較正宗， 唔係死落cream , 真係用返蛋汁做過base 👏👏👏👏👏
芝麻雞翼：味道幾好，不過唔夠乾身。
Blue lemonade: (作為一個唔飲咖啡亦都唔飲綠茶/抺茶嘅人係少啲選擇嘅🙈，但係人哋好似係出名咖啡，真係唔好意思）好啱打卡用， 好靚但係同時亦都好飲。

環境：連吧枱位total 大約18個位，我一個人星期五嘅3:50pm去到都要等20分鐘，所以最好訂坐。位置係坐得舒服。staff 好好人，有禮貌。