林記點心

Open Now

Now Closed

今朝一早俾人捉咗去街市樓上嘅熟食中心飲早茶，都幾迫人幾多人幫襯，等咗一陣先有位，仲要搭枱，不過啲點心味道又真係唔錯嘅，同埋價錢平。叉燒包一碟有兩個，都幾大個，入邊啲餡都OK，都有啲叉燒肉絲喺度。蒸牛肉腸粉好滑，係咁多款點心之中最有驚喜嘅一款。燒賣就麻麻哋，好似鹹咗少少。蝦餃好食，皮夠薄，入面粒蝦仁都算幾新鮮。雞扎入邊有蟹柳都幾搞笑，整體味道唔錯嘅，舊芋頭唔夠粉。走嘅時候先至見到原來茶錢有分公茶同埋名茶，公茶$4位，名茶$6位。