強記大排檔

Open Now

Now Closed

Item: 強記大排檔
Rating: 2
Author: 奧志雷

3.5

56 Reviews

Taste

Decor

Service

Hygiene

Value

811

Sheung Shui

$51-100

Hong Kong Style Dai Pai Dong

奧志雷

Level4

Read full review

步入大廳煙霧瀰漫，您班刁民依度熟食市場嚴禁吸煙架！攻鬼住我食野，依家您地食飯定食煙呀，可惡﹗獨獨晚餐洗咩驚呀，最怕無飯開啫，我都經常食自己架啦﹗發現有位阿叔明顯只自己一個，侍應嬸嬸問幾多位，阿叔眼神閃爍稱兩位，但不過朋友可能不到喎，嬸嬸面容已表示知道阿叔吹水中，最後只見叔叔孤單一人完成晚飯。

專登逃拳返黎想食麻辣火鍋，居然只做冬季，唔係四季架咩？咁您地就收埋個火鍋牌去啦，又無寫只做冬季，浪費我寶貴 quota 與時間。埋單發現好多美少女 cashier，很青春喎！初戀呀，點捨得走啊﹗

菜牌寫著咸菜煮魚，到底什麼魚先得架？我滿心歡喜幻想會係咸菜豆卜煮大眼雞，但嬸嬸表示其實只不過係咸菜門鱔球，勁失望呢。阿強百無之夜，無蟶子、無大眼雞、無瀨尿蝦、無凍蟹、等等等等，玉媚怨言多多。

侍應大哥我想加個豉椒炒蜆講左三次，您拿住張咭都十問九唔應，目無表情發晒呆！您係咪唔識字？唔識廣東話？還是聾啞呢？最後打手勢叫嬸嬸過黎跟，堅持半粒聲都不出，您係型既﹗

見張手寫單依然寫住無得供應的菜色，並未劃去。我地只不過問問您有無取消，短髮瘦嬸您何解要瘋癲地一輪嘴掃過黎呢？激動高聲嚷埋著，埋單緊係要 check 單啦，如果無食過梗係要出聲啦﹗

我夠知咯，依家問您有無取消乍，態道如此囂張無禮﹗我倆火都黎，您收隊食您既滷味啦！難得食餐飯撐檯腳免得烚氣，話夠知您，放過您﹗各職員服務態度完全不同，天堂與地獄，參差得大上大落，激死我！

辣油煮花螺，玉媚是否真的要那麼燥嗎？我想要白灼花螺啫，無需大聲叫嚷花螺梗係食辣酒架啦！搞到我情緒都有點火起，抑壓著不爆出來。其實想食什麼直接出聲便可以，無需大呼小叫。自己喉嚨痛唔舒服，仲要食辣螺要食炸蝦。

吱吱喳喳滾住連煲送到，白煙飄飄氣氛十足。必食辣酒煮花螺，果然秘製名不虛傳！不得了的辣湯秘方，酒香突出，散發酒甜味而不嗆，湯汁濃郁香口郁，淨飲刺激震撼，如果有個烏冬撈撈必定興奮不已！辣味夾雜多種香料味菜十分豐富不單調，越食越想食，鼓舞食慾停不了！螺肉軟腍極其入味，香辣惹味大大隻，螺身滑彈可口，螺尾綿綿甘香。挑定一堆螺肉，淋上辣酒汁撈飯，大啖大啖掃入口，震奮味蕾，舔晒嘴。

墨魚併掌翼，墨魚先脆後嚥韌，鮮甜墨魚味撞上滷水更是美味。掌翼細細隻無咩肉食，皮滑肉嫩，滷水香濃，啜啜下過過口癮。無白灼東風螺，無白灼蝦，無鵝片，慘慘。

沙嗲金菇粉絲雞球煲，豆敏不吃牛，轉轉雞亦未尚不可。沙嗲醬未溶，有點馬虎。極濃沙嗲甜味，幸好帶辣給點安慰。雞球質地滑嘟嘟腍劈劈，鬆得過份，無雞味亦無味道。粉絲索盡中辣沙嗲汁，綿綿滑滑比雞更好味。

豉椒炒花蛤，只不過是豉椒汁兜花蛤吧！完全無鑊氣，奄奄一息，了無生氣。汆出備用，微暖撈汁上檯，勁老過熟，幸好未到膠韌情況。鮮味蜆味已流失，不是耐心生炒來的作品。

滷水鵝例牌，比平常等得耐，望穿秋水。終於見到遠處有位綣頭髮婆婆盛著滷水鵝走近，心諗係我架喇，即時滿心歡喜，有野食梗係開心啦！婆婆慢慢將滷水鵝、辣椒油、白醋放下，隨即臉帶笑容話要等耐少少架，約 5 分鐘左右啦。師傅溫柔地慢慢斬慢慢切可以保留勁多肉汁，更加好食架，多謝晒您幫襯，您慢慢食啦。無緊要呢，我唔趕時間。傳菜婆婆熱情有禮，笑容親切，好 warm 啊。

鵝肉竟然熱辣辣，用滷水拖得透切，能夠食到熱辣辣滷水鵝真的少之又少呀 ﹗只有當年係英國舅父餐館打工時偷食剛炆好出爐既滷水鵝先有乍 ﹗鵝件略肥，但不油不膩，爽彈的鵝皮跟脂肪非常有咬口，鵝肉滑溜多肉汁，滷水味濃郁甜美，香料味出眾，堅得喎 ﹗

白醋同辣油都可以慳返，原汁原味已贏晒喇 ﹗比鵝片好食百倍，嫩滑彈牙百倍呢 ﹗我較喜歡食連骨鵝件，鵝味特別香濃，損下骨頭更過癮。不過點醋食更好，更加開胃，越食越肚餓，可以食得多添 ﹗墊底用上炸過的豆腐卜，非常新奇喎 ﹗完全無油益味，而且更能索汁，外層更加嚥韌，捲上大量桂林味辣油非常惹味呢 ﹗

滷水鵝片韮菜底，叔叔真好，無大豆芽都替我豆腐轉菜底，仲加左十幾廿粒至愛烚花生。滷水味清淡而含蓄，清清地香香地甜甜地，陣陣溫柔暖意，浸白醋同吃，開胃美味可口滿意。首幾片有點鞋硬，其他雖未算嫩滑，無渣合格。最好食係沉底髀肉，彈滑嫩嫩，鵝味醇厚，狀態極佳好好味。鵝片捲韮菜首次的嚐試，創新研發，滷水清香、韮菜爽甜、鵝肉鮮嫩，三合一風味獨特。

南北杏紅蘿蔔豬骨西洋菜湯，足料滿瀉！絕對無味精非常住家湯，好有家庭味道。清爽香醇，大大碗都被我飲剩少少。嬸嬸其實我要一細湯碗例湯，成窩上真係睇得起我地呢，十分飽飽啊。

韮菜豬紅，異常抵食 $48 蚊勁大兜，吃不消啊！遠處已傳來湯汁飄出誘人氣味，似層識的香氣。忍不住立即淺嚐兩三口濃湯，熱燙的溫度好正。滷水味夾著各種香料，甜美可口，堅好飲呢﹗有點大圍生昌的影子，不過生昌的更濃更辣。

豬紅實在太大舊，可能想較容易保持嫩滑，係正常既兩倍，進擊的豬紅！豬血味突出，巨大所以不能夠完全入味，質地滑嘟嘟，多水爆汁，滾上辣椒油惹味更是滋味。韮菜爽嫩無渣，雖然甜味薄弱，都滿意的。大大舊大大兜豬紅，超級多韮菜，全力以赴嘗試殲滅掉，最後真係食唔晒啊﹗

胡椒咸菜豬肚湯，淡淡的胡椒、淡淡的咸菜，咸味比胡辣味強勁，咸菜湯水清清味蕾。豬肚絲腍腍的，不苦澀十分正常，平凡無特別。

黃金海中蝦，鑊氣旺盛，感受到的壓迫感。咸蛋黃包得海蝦均勻乾爽沒有任何遺漏，師傅超好功力！炸得透徹脆卜卜，除蝦頭外，殼連肉可以齊齊趙，蝦味更濃更甜，沒有半點浪費！蛋黃味濃郁，咸味出眾，脆殼香口，蝦肉爽彈多汁，何其高質。

蟹肉扒西蘭花，涼浸浸的西蘭花，被暖暖的西施蟹肉芡蓋著，但幫助不大，吸收不到溫暖呢！凍凍爽脆水味濃的西蘭花，菜甜味微弱，滾上大量芡汁添點咸味。找不到半點蟹肉亦食不到蟹味啊，已經溶化了？還是幼到睇唔到呢？都係給我豆瓣醬吧！

豉油皇炒鵝腸，新鮮出爐輕煙飄飄。生老抽兜炒均勻，色靚香噴噴，大大注夾著鵝腸連大豆芽塞得嘴仔脹卜卜，趙到索索聲真的異常興奮！生抽香甜味美擁著脆脆鵝腸，大豆芽不停爆汁爽爽的，翻滾打得火熱互相交錯，襯到絕呀！

蒜蓉炒白菜仔，帶著鑊氣熱辣辣啜入口，燙住趙特別美味，充滿菜甜味，襯埋大量蒜蓉辛辣可口。雖然有一兩棵大大抽偏硬帶澀，其他全部鮮爽多汁。一心想食啫啫芥蘭煲，黑仔無芥蘭，得菜芯、通菜、涼瓜、白菜仔、莧菜。

火腩大白鱔煲，有鱔食？雙眼立即發晒光，即叫！爆香蒜子火腩氣味芳香比無，唾涎欲滴！白鱔薄切，欠肥美欠鱔脂，口感及味道跟厚切都差一大截呢！連骨白鱔片走油略炸，鱔皮脆脆黏膠索汁大好，白肉爽滑散發濃厚鱔甜味道。作為綠葉既火腩有點失色，乾鞋咸有齊，淨食免強下嚥，送飯應該蠻可愛。兩大磚豆腐怪怪的，估計必定唔夠熱啦。一咬外暖暖，裡面只有微溫，幸好皮夠香口，肉夠豆味。最出色兩條大菜芯，爽嫩多汁鮮甜霸道。

梅子蒸排骨，份量多到嚇親寶寶咯。新鮮出爐香味四溢，酸酸的氣味來襲，食慾大增立即行動。泛濫厚厚梅子醬完全淹沒排骨，比多幾秒的忍耐，讓梅子醬跟排骨撈得均勻，香氣更出更吸引！爽彈有嚼勁的排骨，肉多骨少，愛不釋手，酸味強烈開胃，撈飯首選。

啫啫雞煲，噴住煙出場，吱吱聲還未平息，索一索香氣吸引，陶醉不已。爽嫩豬膶不乾硬，甜而味濃，越食越想食！兩舊髀兩舊胸兩隻雞全翼斬件，硬係覺得翼太多，總好過某食肆全部雞背脊既。醬汁芬芳，甜美帶著味菜香氣，雞皮香而肉滑，損損骨頭都食得津津有味。淑琪已食得飽飽非常滿足，餘下的唯有全部讓我處理吧，無問題。

肉碎蠔仔粥全走，熱騰騰香噴噴端上，不是太多飯，有點湯水飲下真好。薑絲冬菜搭大量肉碎，肥豬肉比例也不少，格外香口甘甜，咬落爽彈，肉香肉甜充滿湯汁之內。蠔仔肥美大大粒，連湯連粥送到口中，一趙爆開！蠔汁鮮甜香醇，加埋胡椒粉的辛辣更是可口開胃，要食多幾碗添呀﹗

水煮田雞，程現火紅的顏色，眼觀似乎好辣，大力一索，舒筋活骼，聞得出香辣兼備，麻香得宜。撩來撩去彷似大海撈針，細細隻田雞已被分屍碎上，感覺份量不足兩隻，實在太少喇麻。

腍腍滑滑的肉質，欠結實彈性呢，新鮮度有點質疑。大豆芽就真的非常十分好很多咯，大注大注不停塞入口，食極都仲有！爽爽脆脆掛著兇湧深紅辣油，食到我嘴仔都油淋淋啊﹗溫柔的辣加微弱的麻，香料味較突出，豐富味美。粗粗的紅薯粉嗎？第一次見，好似雞絲粉皮喎。粉粉吸收麻辣辣油辣湯透徹，麻香出眾，味道濃縮昇華，正到爆呀﹗立即啜多幾條先，滑嘟嘟、嚥韌韌、震彈彈，連湯齊飲不停了，刺激大愛。

椒鹽豬排，極重口味，蒜味濃加咸味濃。趙落乾硬的質感，不過不失唔難食，如果給個喼汁酸咪咪就會舒服點啦。最後都食剩兩三舊咯，罪過罪過。心裡想著很奇怪，感覺硬有點格格不入，不是中菜又不是打冷，朋友仔想點這道菜，您鍾意就好，無緊要。

蒜蓉開邊蝦，粉絲為此道菜精髓，索盡蝦汁豉油蒜蓉，可口無限津津有味。最衰剪到短短碎碎，不能一氣呵成大啖啜，唔夠暢快囉！蝦肉過熟嚥韌，鮮味十足搭惹味蒜蓉又不失蝦甜味。

口水雞，彈滑薄薄雞皮黏著甘香鳳脂，油香不膩。髀肉幼嫩滑嘟嘟，胸肉軟腍綿綿，咬多兩啖，沒什麼的雞甜味，不過口水汁輕輕的辣，香料味豐富突出甜甜的，滾上濃濃秘汁都食得下架喎。

多款菜色都實在非常濃味，來罐可樂解解去先得。叔叔話冰粒唔適合飲用，不過可樂已夠凍喇。那我照飲，不加冰無所謂。其實我厭可樂太甜所以要加冰，唔夠凍就少少闗係啦。

強記大排檔 Open Now Now Closed

強記大排檔

Open Now

Now Closed