老巴剎廚房 (Closed)

老巴剎在灣仔道，小店外貌，但供應的菜式一點也不小。 食呢啲： 醉酒鵝肝 蒜泥白肉 黑白胡椒中蝦 鹹魚煎肉餅 油浸筍殼 黑白胡椒牛脷芯 黑白胡椒羊腩湯 薑汁炒芥蘭 原煲海南雞飯 （半） 雪餅 嘩⋯⋯點解叫咗咁多嘢？我都唔知點解。 醉酒鵝肝，非常醉，建設將啲餅放埋一邊，就咁食好好多。 蒜泥白肉賣相十分好，兩個汁都好味，不過同平時的白肉唔同，呢款似豬頸肉多啲，不過都幾爽口。 胡椒三味，（其實唔係真係三味，但唔知點解叫咗咁多胡椒嘢），不過只有味羊腩湯有濃濃的胡椒味，而且好重薑，超級驅風，亦冇羊羶味，鬼咩，真係好多薑囉。胡椒中蝦，蝦幾新鮮，不過呢個做法唔係用瓦煲焗住有一堆胡椒甕住嗰隻，所以胡椒只係用來調個汁，吊個味；牛脷芯，一般，可以唔叫，日本串燒牛脷好食啲。 鹹魚煎肉餅，一切開就好大陣鹹魚味，好香口，好食。 我覺得最好食係條魚，油浸筍殼，未見過兩斤重的筍殼，老闆娘話係馬來西亞運來，新鮮咁話。老實講，點都係凍鮮啦，條魚好厚肉，炸完出來仲好juice，加埋個豉油汁，真係骨都食埋。 來到名物環節海南雞飯，煲飯好香，好多香茅，不過飯偏硬，而雞方面尚算肥美，但味道平平，都係要靠跟飯嗰幾個汁同黑色豉油。