十六號碼頭餐房

嚟到澳門，除咗晚餐有預算之外，早上同午餐都無特別安排，本著有乜食乜的心態去試。因為澤賢記雞蛋仔，我哋嚟到花城，又因為已到午餐時間，我哋就周圍搵食。

喺花城商場繞一圈就會見到好多唔同食店，有外賣店、人頭湧湧店同今次我哋揀嘅呢間位處角落頭的葡式茶餐廳。

門口位已經好有特色，幾個圓拱形橫樑，將澳門街道仍保有的建築特色加入其中，將其澳門味道加強，有加分。不過老實說起初有少少驚，因為我哋入去坐時12:45，店內係完全無其他客人，只有外面有一枱客。不過隨著時間愈近1:00人就愈多，最後全店滿坐😂

我哋叫咗黑豚叉燒蛋包飯同咖哩牛腩出前一丁，兩樣都好好味，本身蛋包飯佢有一個係配乳豬，但當日已售罄，不過個黑豚叉燒絕對有驚喜，係好好食！

而咖哩牛腩出前一丁嘅咖哩都好好食！係好有咖哩味嘅咖哩，真係同港式咖哩有分別的。

至於奶茶嚟講，我個人都係鍾意港式奶茶嗰種茶味重於奶味嘅口味多啲，但係澳門奶茶都好飲，入口都夠順滑。