三元粥品專家

營業中

休息中

2月2日, 喺馬交玩完一日兼睇埋個水舞間, 知道酒店有間粥店, 出名即叫即製生滾肉丸粥, 夜媽媽當宵夜食就一流!::: 著名豬肉丸粥 ::: $22本來想要試下加蛋版本, 但因為原來加蛋版本只限大碗肉丸粥, 怕食唔晒唯有要個簡單肉丸粥試下師傅手勢先啦! 落完order師傅就喺門口個open kitchen度開始快手滾起粥底, 再加肉丸滾多兩滾, 熱辣辣嘅肉丸粥就咁完成喇. 粥底綿滑有米香, 一碗細嘅豬肉丸粥都已經有6粒肉丸, 肉丸調味唔多, 食得到豬肉嘅鮮甜~ 成碗粥都係無乜調味, 只嘗到食材嘅新鮮原味. 食得濃味嘅人可能會覺得太淡口, 好似呀比咁就要將d肉丸點豉油食喇. 不過夜晚凍冰冰食碗熱辣辣嘅粥保暖真係無得彈~::: 三元及第粥 ::: $22粥底夠綿唔再多講, 食得出原汁原味最抵讃~ 清甜得嚟冇味精, 完全用d料去煲起個粥, 豬潤豬腸咁夜都仲幾鮮, 豬潤爽口易咬, 豬腸挑走晒d肥膏, 爽滑煙韌但都好易咬得開~ 睇呢度個格局都應該係老字號家庭式作業, 所以呢度嘅食物亦都帶有濃厚家庭氣息~ 食物味道清淡, 但勝在用料夠新鮮, 即叫即做. 粥品夠清淡, 當食宵夜啱啱好~