首先去到等左好耐無啦啦黎左三碗湯，我地一頭霧水問唔係有頭盤嗎😅？職員話整錯左個湯先，所以又收返果三碗湯。之後等左陣就出個頭盤。頭盤係一粒半生熟帆立貝，卡夫沙拉醬撈水果（本人超級唔鍾意卡夫沙拉醬😖），同埋幾片無汁既菜🌿。我就唔係咁鍾意，菜好乾，我想點帆立貝個汁又太少點唔到，最後乾食左幾片菜。帆立貝可能因為係頭盤，所以是凍的。個水果沙拉我可能自己有偏見，我真係覺得好難食呀D卡夫沙拉醬😩。
個湯唔係好熱可能係因為之前整錯左先所以黎到只係暖暖地。不過我覺得幾好味，但偏酸，有2粒細細地既龍蝦肉。不過因為勁肚餓，等左好耐先有野食出所以好快清晒個湯😂！
再來個辣辣海鮮煲，一煲十個人share。其實我以為私房菜每位收費所以份量都係人頭計，但原來呢度除了湯同頭盤之外，全部都係要share。個海鮮煲D野唔夠每個人分，有D分到隻蝦，我就有隻帶子，同埋好鬼辣。哈哈😅
🦀個蟹真係堅正👍🏻！但因為一隻蟹十個人分，我只係食左一隻蟹腳😂。不過真係超入味！勁香！有機會少D人都會想再食多次隻蟹🦀！
再來就係個羊架～ 一來到聞到酥到發癲！好似臭狐味😅！點知食落一D都唔酥架👍🏻！好好味👍🏻👍🏻！不過我地十個人黎得9件。理論後就補返一件比我地喇。
下一樣就係條魚🐟。我食左少少都OK，但聽D朋友講咁整晒左條魚（佢地煮野食好叻架💪🏻）！同埋個魚入面既薯仔全部都係生既😑！吉都吉唔入！廚師應該唔記得煮熟D薯仔先攞去焗，所以全部都生既無可能食到😒。我地食完條魚就叫佢攞D薯仔去整返熟先比我地食。
再來隻燒雞！呢個我地一致認為廚師係唔記得左「業」左先焗，因為隻雞係完全無味既😨！真係「完全無味」架！我忍唔住問有唔汁可以點，無味既雞食落好怪好想搵汁點😂。哈哈！
個芝士焗西蘭花，又係無味既。我本人係超級超級鍾意食芝士🧀，我極度懷疑佢上面果D係忌廉而並非芝士！我完全食唔到有芝士味而D所為既芝士係水流流的，唔似平日的焗芝士質地所以我懷疑究竟是否芝士。西蘭花好明顯煮得未夠，又少少生怪怪地咁🌳。
再來個焗蟹飯🦀！呢個係用返之前隻蟹蓋焗的，勁正👍🏻👍🏻👍🏻！呢個同隻蟹一樣都係好好味！！不過份量唔多，只分到一小碗，哈哈！想再食就要等下次了😅！
個甜品係心太軟+雪糕。十個人黎得8份，我地問仲有2個無得食？職員話我地本來得5個，2個人share一個（但個心太軟好細個架都要share？）。我心諗有無咁孤寒呀？甜品都要2個人share一件，佢話比8個我地係因為賣唔晒送多3個比我地。我地話一係我地加錢你比返我地每人一個啦，佢話賣晒啦！其實我係極度懷疑佢賣左我地本來有個2個所有死撐話送多3個，因為唔係我地問佢都唔講。之後就送返2個雪芭比我地每人都有點品食😂。差D唔記得講, 個心太軟裡面一D都唔流心，D巧克力好傑應該焗耐左少少太熟😥。
下次如果食私房菜我就唔會再考慮呢間喇。除了個蟹同羊架好味外，其他都唔係好得。成晚D野食唔夠分又生薯仔又無味雞。哈哈！不過D姐姐服務唔錯架，好有禮貌又不停同我地吹水😊😊 仲有不停加水，所以成晚應該開左好多支礦泉水。哈哈哈😂😂😂！
