Oliva (已結業)

早已放棄了的「彩虹仙子」苟延殘喘一段時間後終於收檔，取而代之的是意大利風格的「Oliva」，應該是荃灣/元朗和大埔都有分店那間。收工偶然行過門口見裝修得幾靚，看看餐牌起碼成舊水落樓，怕且無乜機會午餐來幫襯。過了一排，同事說午市只需37元，而且閒日無加一，咁真係要試下。生意好午間12:30後不接受訂位，只好早點竄出去等位，都要等幾張檯。埋位，檯上已放了一籃麵包和黑醋，點餐後才試吧，包是夠鬆軟但不熱，免費的就由它吧。點了3個餐，分別是香草忌廉汁鮮魷闊麵、豬脾配露絲瑪莉汁和羊脾配磨菇紅酒汁(上錯了肉眼扒)。香草忌廉汁很濃，夠哂creamy，魷魚亦算新鮮；豬脾就麻麻地，可能個汁不合口味，豬脾本身夠腍，很輕易就骨肉分離，易於處理；最後係上錯了的肉眼扒，烤得表面微焦，內裡肉汁豐富，加上磨菇有咬勁，3款以這個最好。上埋餐飲埋單，凍飲都唔使加錢；雖然平均消費比同區食肆稍高，但與客源相近的「馬德里」、「椰林閣」和「牛車水」，同様價錢當然選這間。