Pho Hoi An (已結業)

星期六, 下午兩點幾到，成間嘢其實未滿，門口無人，等咗一陣，行入少少問話要兩位，即刻有個帶眼鏡肥女人侍應，粗聲粗氣叫我喺出面等，好啦終於入座，叫嘢食成10分鐘都冇人理，一味叫等等，隔離左右都有幾台食客等叫嘢食，終於有人理，又係個肥侍應，黑口黑臉，好似全世界得罪佢，問多幾句套餐包咩，又一臉唔耐煩咁。要了一個會安車頭河轉檬粉，落單時都提咗佢兩次，唔係河粉，來到竟然係河粉，叫佢轉返，又係黑口黑臉。服務差，咁食物好食都是但啦，但再等15分鐘，終於食到，一入口個湯已經淡而無味，牛腩咬唔爛，套餐跟碟菜仔，咁樣收98蚊，配上咁嘅服務，總結，呢間嘢真係永無下次。

下午看完電影，近近地，在商場搵食，揀了這間Pho Hoi An 會安越南食下午茶餐。看看下午茶餐牌，都幾多選擇，湯河、飯都有，由五十幾蚊到百幾蚊都有，都算係中上價下午茶。生牛肉湯河，越南野最基本的食物，看看好唔好食先。大王叫這個生牛肉牛丸湯河拼小食春卷，送杯飲品，$60。湯河拌上香葉辣辣盤，賣相都不錯。試個重點先——湯，因為所有湯麵湯河的主角，湯唔好味，完。渴了一口，我覺得一般；加埋香葉青檸，都是一樣，無補充了。生牛肉和牛丸ok，可是沒有了靈魂。小食春卷，都只是一般。

週末一家大小到尖沙咀行街街，午膳時間隨意挑選了一間餐廳午膳。「會安」開業於 ISQUARE 的食肆樓層，供應越式菜餚。每份風味假日午餐除主食外，另跟上小食一客及飲品一杯。小編淺嚐了一件「香煎魚餅」，口感不及預期般彈牙，除了香茅風味外，亦隱透出一份辣意，屬香口前菜。「咖哩豬扒飯」屬細周生至愛，味濃輕辣亦正合他的心意。豬扒平實無乜特別。「香脆牛油雞翼撈檬」內含三隻大大的雞翼，尤其經過炸煮後，外觀更為飽滿，食感脆香。撈檬面上放滿蘿蔔絲、菜絲、洋蔥絲等配料，配撘酸汁凍食醒胃可口，亦能平衡炸雞翼的膩意。 初嘗「會安」越菜，評價普通未見驚喜。飯後一小時，口渴感覺漸現，飯菜的「師傅」看來不少吧！

港鐵尖沙咀H出口直達國際廣場，食肆很多，多國菜都搵到。 事前冇做功課，反正間間都未試過，公眾假期懶懶地搵間唔駛排隊，惦行直入就坐底叫野。講環境算唔錯，坐得舒舒服服，服務就真係麻麻地。香茅豬扒飯，豬扒夠熱夠脆，唔嚡口又唔會醃到太稔，有香茅味，最基本口味的都做到了，再加了一少撮醃酸蘿蔔，視覺和味覺再升了一個層次。越式拼盤有別於過往吃的，上枱的賣相比menu 上的相片更精美，越式春卷相當香脆，牛肉燒得過硬了，中間的越式雞絲沙律挺多的，清新的口味把味蕾打開了，胃口大開。 扎肉只有2半圓小片! 米紙卷和春卷其實也只有一条切開2半。咖喱牛筋腩+蒜蓉多士牛筋牛腩炇得好稔滑，只可惜咖喱係冇咖喱應有的味道。 蒜蓉多士跟餐要加錢，唔夠蒜蓉唔夠脆。

今日路經isquare, 見到間越南野，諗住一試，點知失望而回。當時吸引我入去既係menu上的香茅煮蜆，因為之前係越南食過，回味無窮，點知今次係香港食，蜆無越南當地既大已經算啦，話晒呢度係香港，但個香茅味完全唔足夠，好失望，成兜蜆，10隻裡面有一半得殼，完全無肉。另外叫左個雞絲喇沙湯粉，啲粉太淋，一夾就碎，個湯又唔辣，明明menu上有個辣椒icon。仲有個砵酒燴牛肉，雖然舊牛肉都唔錯，都幾香，但個汁就太水，裝落個法包到，個包出到黎已經浸到漲晒，毫無口感。

平日下晝響尖沙咀商場食肆黎講，空間開揚，坐得舒服唔逼夾，有下午茶餐都算環境整體都算乾淨，先黎清熱茶一杯，有窗口位，就光猛d，望下街景！下午茶套餐有小食揀，牛湯蘿蔔、春卷、肉串，鳯爪酸辣味剛好，唔會好辣，鳳爪爽身，配料入味！配料夠多（洋蔥、芽菜、蔥花），湯底夠清！主餐揀左札肉雞絲湯河，粉麵都可以轉檬粉、米粉...札肉大約4片，咸咸地肉味！跟餐飲一杯！平日下午茶時段都唔算好多人，如果約朋友輕鬆靜靜食個tea都唔錯，星期六日下晝餐牌價$都有唔同的！

湯晚餐選食越南菜這間首次光顧，太太點了個尊貴一人套餐（蟹肉鮮蝦蕃茄扎肉湯檬）我自己點了個(香茅牛肉飯)，湯檬先到二人吃在湯怎也找不着一隻蟹腳，問服務員是否送錯，對方回答是蟹肉在湯粉中，兩口子又找結果又不見有蟹肉，再問服務員又是另一個說法是用蟹來煲湯所以沒有蟹肉，已是滿肚疑問❓！先是食飽再說，🦐肉難食再試個所謂蟹湯......唉！只有魚露味道....想是廚房有些微失準，香茅牛肉上枱帶有希望食一口牛肉，味道是發水牛肉太難食，比起芽X味道一個天堂一個地獄不吃也罷。買個麵包食算。

琴日Lunch Time時間黎左呢間位於尖沙咀-iSQUARE 3樓既越南餐廳食飯✨其實今次已經係第三次黎，但上兩次都係食晚餐🥣有成24個餐選擇，仲配有8個小食(自選1款)和1個餐飲我今次簡左香茅豬扒飯配上湯時蔬&熱檸水🐷香茅豬扒飯($75)豬扒都幾大塊，完全充滿香茅味道😍，肉質好滑，如果可以去埋骨會更好😊個飯仲有配埋小小酸蘿蔔絲，油蔥同乾蔥碎，令成個飯食落都好香好好味😋🌿上湯時蔬菜都有小驚喜，今次個菜係小唐菜，個湯竟然係用佢地湯粉既上湯，仲可以當湯飲，唔會太油👍🏻🍋熱檸水小小既一杯，但都有成3片檸檬🙂餐廳午飯時間都幾多人，但好在佢座位都幾多，上餐速度都幾快，全部野食都好夠熱😝

又是有事辦的中午時段，辦完了事，已經12時多，肚子很餓，身處i-square ，看見這家餐廳，價錢不貴，大約$80一個午市套餐，於是貪方便走入去試試👻生牛肉河：牛肉質素一般，湯底味道較淡，河粉有點鞋口😅越南春卷：單看照片也大約知道是怎樣吧！春卷皮軟身，一點也不香脆，材料普通，春卷大小是我最討厭的！只是比拇指大少少😖😖😖，完全沒有誠意，連點春卷的魚露也沒有提供，這家越南餐廳真是一點都不正宗😹😹😹

行街行到餓就隨意去左呢間越南餐廳，如十分的話我都會比6.5分，當然同其他我食過更好食既越南餐冇得比，當日食左二人餐$288，都其實幾抵食，又有三個頭盆及二個主菜，不過佢有樣野唔好係，主菜都未上，就即刻出左兩個湯面，湯底非常唔夠熱，食面大忌湯底點可以唔夠熱。至於佢個木瓜沙律係咁多樣野最好，個炒青菜就係正常菜囉，咁小食拼盆既春卷係凍既，越南粉既肉都ok ger，不過都係嗰句，肚餓嗰陣時食應該唔會太過挑剔既。

今晚我們喺尖沙咀附近做完嘢之後去咗早前喺isquare食過覺得好正嘅「Pho Hoi An」食晚飯！我們叫咗鮮蝦豬肉米紙卷外層嘅米紙卷質感好煙煙韌韌，入面包著有幾隻爽甜彈牙嘅蝦、清新嘅薄荷葉、爽脆嘅紅蘿蔔絲同彈牙嘅檬粉等等等等⋯⋯食落層次感相當豐富，再沾上越式嘅「冧」汁一齊食，真係好正呀！美國頂級生牛肉湯粉同招牌牛肉雜錦湯粉「生牛肉、牛展、牛腩片、牛柏葉、牛筋，牛丸」嘅湯底味道好鮮甜香濃，牛肉嘅肉質好鬆軟，牛𦟌嘅肉質都算軟腍，牛筋嘅質感都幾爽滑，而且都幾入味，牛丸亦好爽口彈牙，至於牛腩嘅肉質就有啲硬質！蟹肉鮮蝦蕃茄扎肉湯檬粉一開始睇到個名有蟹肉同蝦，以為湯底嘅味道會好鮮甜，點知飲第一啖就覺得好腥，而且一啲鮮味都無，蟹肉嘅肉質好鬆散，味道係淡而無味，至於蝦肉都幾彈牙！

小弟平時真係好小寫食評，但今次真係忍唔到手。事源收左工同老婆買左飛睇戲，個衰婆話想食越南野，又咁啱見到咩入去試下囉。。。點知。。。叫左個二人餐，上左個大蝦青木瓜沙律都冇咩特別，點知唔洗一分鐘，我個招牌牛河到埋，即刻wa一聲，洗唔洗咁趕啊⋯⋯我仲有小食拼盤都未到喎⋯⋯等多5分鐘小食拼盤一上真係火都嚟，油都未秘好就俾客，有冇搞錯！？真係趕客。。。未算。。。燒牛撈朦仲離譜，直情係茶餐廳嘅沙爹牛肉走沙爹再炸咁，你老闆一咬成口油兼冇味，我個招牌牛河。。。廢事講。。。總之成餐食垃圾咁感覺。我明白租貴要turn over快，但重點係態度，尤其係廚師對食物嘅態度，細節嘅要求，呢間我一啲都睇唔到，所以相都廢事影。。。火難下

如果喜歡越式湯粉，千奇是唔好抱太大期望會好食，呢間越式餐廳完全不入流，只係一般$20碗魚蛋粉嘅質素。經過門口其實好香湯味，以為都好似唔太差，不過見openrice食評都有d猶豫，一於挑戰下。週末晚上唔洗等位唔洗搭枱，坐得幾舒服，環境唔太嘈，可惜waiter態度唔多友善，嗌極都無人肯落單，見到都扮睇唔到。例牌叫一碗生牛湯濛，印象中5-60蚊幾抵下，香料另上。湯底係好香好濃但竟然係無味，濛粉一般，無乜驚喜，不過咁嘅價錢是旦啦。收茶介仲要加一服務費，幾大都飲多幾杯茶唔好蝕！

由於今日大球場有大型賽事舉行，爹哋同幾個阿叔去咗睇波，而Oppa亦有工事要做，所以今晚祇得我同媽兩個，我們去咗尖沙咀iSquare行吓，之後揀咗媽咪其中一樣最鍾意食嘅越南餐「Pho Hoi An」食晚飯！我們叫咗個優惠二人套餐：鮮蝦青木瓜沙律嘅蝦肉好爽甜彈牙，但因切咗開邊，所以口感就「掙咗啲啲」，而青木瓜係切成絲，質感好青甜爽脆，味道酸酸甜甜，非常醒胃！會安小食拼盤：越南春卷嘅賣相雖然唔係太靚，但炸得相當鬆脆香口！香煎魚餅嘅質感好爽口彈牙，但就感覺油膩咗啲！沙嗲豬肉串燒嘅肉質好鬆軟，沙嗲醬汁嘅味道好惹味濃郁！上湯浸時蔬嘅時蔬係唐生菜，質感都幾爽脆，但上湯嘅味道就相當淡！招牌牛肉雜錦湯粉除咗有招牌牛肉之外，仲有牛𦟌、牛丸、牛筋同牛柏葉等等等等⋯⋯超足料豐富，湯底嘅味道好鮮甜濃郁，而河粉嘅粉質亦好軟滑！燒牛肉撈檬粉嘅牛肉燒得好芳香惹味，肉質好嫩滑，而檬粉嘅麵質好爽口彈牙，再加埋酸酸甜甜嘅「冧」汁一齊食，真係超正呀！

Pho Hoi An 劣評都唔少，既然經過，咪試下有幾劣。餐廳地方裝修典雅，加上有窗口景，感覺舒服，食過下午茶之後，覺得食物嘅質素普普通通，以價錢論價錢，加埋地方同服務去評論，雖然有瑕疵，但我仍然覺得值OK評分。呢度嘅下午茶包括河粉或飯加一個小食再加一杯飲品。生牛肉河粉牛肉有牛肉味，湯底過得去，侍應另外端上金不換，青檸和紅椒作調味，窩心👍🏻, 呢啲配料的確增進成碗河粉嘅味道，至於河粉本身質地雖然唔算彈牙但都唔錯。雞絲扎肉湯檬普普通通，無乜特別，加入金不換，青檸和紅椒作調味就好好多。越式小春卷炸得太燶，而且餡料較濕，令春卷皮唔夠脆，不過味道尚可。咖啡唔算好熱，咖啡味香濃，可是咖啡是帶酸味味一種，個人覺得麻麻，喜歡帶酸味咖啡嘅人會覺得幾好飲。奶茶好夠熱但茶味唔夠，唔合格。