MX (竹園廣場) (已結業)

細佬好鍾意食海南雞飯，每次佢叫買海南雞飯，等都順手要多個，吾洗專登諗要食d咩可能地點比較近，叫姐姐落去買都好快番尼，佢1盒海南雞配青瓜，1盒飯，1盒湯，海南雞記真係無骨既，吾似出邊有d海南雞有骨既，不過佢比既部位好隨機，有時好食有時無咁好食😥，飯係油飯，不過都係偏大碗食唔曬，可以留番半碗同屋企人share或者留番做下1餐，青瓜我就唔食，留番比屋企人食，我最鍾意係碗湯，次次都一樣，有舊肉食下，幾好味👍🏻

平日都係黎食早午餐，未試過斬料。見上次買盤菜回贈佐張十蚊現金卷，咪落去斬料囉，一百幾蚊減十蚊其實一d都唔平，富臨做緊四八折仲抵好多，但懶得行。比完錢去拎啦，見佢掛佐三隻燒鴨，兩隻都差差地，🤦🏼‍♀️得一隻叫過得去，咪叫佢斬料果隻囉，其實個斬料師父冇問題，咁不嬲斬料都係咁咖啦，先到先揀（應係話邊度都係）但個入袋呀姐話唔比揀，要佢揀，佢就叫個斬料師父斬隻最差ge. 😠呀媽當然係唔肯啦，咁咪退錢囉，平十蚊好多咩，仲係貴過人😒，仲要一百幾蚊要佢指隻最差ge，成隻燒鴨差ge話點食呀，都係丟ge姐。咁個呀姐都話唔比退都唔比揀😡😡😡😡仲要脅話要揀就唔可以斬，我媽咪當然寧願唔斬啦，個斬料師父都睇唔過眼諗住幫手斬埋，之後個姐姐唔比佢斬，咁咪算囉，自己又唔係唔識斬，好過一百幾蚊買份垃圾返去丟。可能係我同媽咪做佐幾十年人都孤陋寡聞，第一次斬料唔比揀，第一次斬料話唔比斬😕。間美心可能係個姐姐開ge，咁強力將d賣剩ge唔新鮮ge野迫人要佐佢，真係「敬業」。唔知黎d叫唔叫强買强賣呢？🤥🤔叫人比佐錢唔比退，要人被迫要埋佢賣唔去ge垃圾。比錢買難受，又唔係平，不了，美心，特別係樓下黎間，應該唔單止斬料，以後都唔洗食lu

早排陪屋企人食晚飯，點知中晒伏。.個砂鍋雲吞雞雖然雞肉同埋蔬菜嘅份量都幾多，但個湯底食落去得鹹味，一啲層次都冇，唔係咁啱餸飯。.好彩啲雞肉食落去口感算係滑。撇除湯底太鹹，整體來講係快餐店算係好健康。

閒時都會幫襯美心。今日就食左肥牛煱。肥牛煱只係得兩塊半失望，最多反而係豬皮有五塊，其餘就係兩棒疑似墨魚滑，兩粒牛丸，兩粒魚角，三塊餐肉，兩塊腐皮，兩塊南瓜同粟米，幾條生菜，烏冬就只得半個。整體覺得，半個烏冬比一個小朋友食都唔夠，肥牛又真心麻麻，個人亦唔好那些墨魚滑，所以感覺唔太扺食，唯有食配菜。

放完個長假返嚟，小秘書好多嘢都要慢慢pick up，不過都好想趕返屋企同屋企人食餐飯傾吓近況😉 因為唔知自己幾點鐘可以放工，所以出門口嘅時候都同媽咪講唔好預我食飯。不過我手腳都幾快嘅，最終七點前都可以返到工🙏🏻 話就話多個人多雙筷啫，媽咪見到臨時多個人食飯，一定又緊張起嚟😅 所以我返屋企之前，先去 #美心MX 買 #半隻豉油雞 加料，咁就唔使媽咪做多嘢啦💪🏻好多時喺 #美心MX 買嘅 #燒味 肉質都比較霉，不過冇得揀之中都好過冇。不過今次隻豉油雞又唔錯喎，師傅調味得好入味，肉質都比較新鮮。連平時有彈無讚嘅媽咪都話唔錯呀😅

今次食左個雞扒稻庭烏冬雞扒有四舊 唔算話好多 同埋雞扒係偏鞋既之後有啲粟米粒 幾舊菇仔 正正常常最驚喜係竟然有兩粒甜薯仔甜薯係真係幾甜 不過就浸到淋哂 一夾就散不過個烏冬份量算ok多 係滑身既 （個人prefer彈牙多啲）個湯有少少醬油味 但都算幾清 啱我呢啲非重口味人士

每逢早餐不想吃太飽的時候，都會選擇美心快餐，因為選擇多，可以加米粉通粉或包， 五香肉丁米味道很濃，米粉軟硬到剛好，美心奶茶要一讚，茶味很濃 ，甜度適中，若果鍾意少甜嘅可以另外上糖水，隨意加。好鐘意飲佢凍奶茶等候時間很快，就算很多人都不用等太久，每逢下午茶早餐嘅選擇，另外仲有早餐嘅炸魚柳都好好味，平時下午茶鍾意叫西多士雞翼，碗仔翅都好好食，入面好多料，加埋醋食一流👍👍👍。晚餐之前食個肉醬意粉都唔錯。

喱期朝朝茶記，口淡淡。碰巧路經黃大仙中心嘅美嬸快餐廳推出了「和牛早餐」，齋見到個名都幾吸睛 㗎！巧似巧高檔咁 吖嘛！貪慕虛榮的我便決定一試。和牛$33一個餐？(轉凍飲加$3)不好奇才怪！底蘊是...先談談服務和環境吧！因為這些也是留客的關鍵性條件。今天週日客人可不少呢！此店地方又細如豆膶，可能比茶記更細。來到收銀處(有兩台收銀)，已有一條合併的小隊魚貫地排着。不旋踵，一位大叔一個馬步從一旁切入並爬頭，而那位收銀姐姐立馬照serve如儀(事後我責問姐姐怎麼不管那廝亂插隊？！)。的確，市面有不少這樣的收銀員，人家「隊埋」來便服務人家，你們循規蹈矩排隊的就繼續排隊吧！於是，用膳的心情打了些折扣。繼而，這兒環境擠逼、侷促和嘈雜也是問題。Eg.「呯呯呯！」服務員嬸嬸就在緊貼我的隔鄰大力地也大叠地堆叠餐盤。我知我知，這兒生意興隆 嘛！想幽靜，往高級餐廳 嘛！幹啥小題大做？好吧！來談談重點... 和牛，原來是一小塊的漢堡扒，而且味如嚼蠟。大抵，份量只要夠細，便可當下變身高級食材，物以罕為貴嘛！結論... 茶記強多了！

今日買外賣去個朋友屋企食， 通常下午茶時間我都鍾意去啲連鎖快餐店買買咗個燒鴨瀨粉跟熱飲番到屋企打開個面真係有啲o咗嘴。。。要嚟裝鴨同菜嗰個兜已經佔咗個碗接近一半咁高，瀨粉嘅份量超級少，雖然話係下午茶，都唔駛少到咁過份吧。。。(但鴨既份量都唔係多)瀨粉味道正常，湯底就係典型味精味湯底，好彩唔算好重味菜心唔會煮得太稔係爽口嘅鴨既皮燒得偏乾身好“鞋”，有舊鴨塊皮偏幾肥， 其他正常有朋友話美心mx係咁多連鎖快餐店之中質素佢覺得最好，不過我就覺得一般了，失望。。

天氣凍冰冰, 真係好想打邊爐.難得屋企唔煮飯,就去屋企附近醫肚.見到美心呢個藥膳醉雞火鍋真係好吸引.呢個鍋好多料,加多份肉,一定夠2個女仔食.鍋底係藥膳湯. D雞有用酒調味過.落埋去湯底,感覺好補.雞件係新鮮嘅,菜都係好好食, 比較之下個蝦就一般般,D肉有少少實.其他都唔錯,呢個價錢會吸引再來食,~~

食太多吉野家, 試下美心, 叫左佢個醉雞鍋, 69蚊原來好多料架, 除左有一碟醉雞, 仲有墨魚滑, 魚肉, 魚片頭, 2隻蝦, 蟹柳,  豆腐泡, 2款菜同烏冬, 突然覺得呢度仲抵食過吉野!湯底叫左沙爹, 以為得個香字, 點知佢又真係有D辣, 反而係無咩沙爹香, 不過都OK醉雞有5,6舊, 都啖啖肉, 不過酒味可能煮太耐, 無哂了原隻蝦都幾有誠意, 但蝦唔算甜。墨魚滑有驚喜, 入面仲有蟹籽, 又易熟又好味! 其他配料都正正常常LA

快餐店食過最高質火鍋🍲MaximsMX出左3個各有特色嘅火鍋🥘鮮氣逼人海鮮火鍋 🍶酒不醉人醉雞火鍋 🐮牛氣沖天肥牛火鍋又想食海鮮又想食牛🤔所以叫左鮮氣逼人海鮮火鍋 $75個火鍋有超多料：帶子、🦐、蝦滑、牛肉（超多！）、菜（超級多！）一個人食到好飽🤰🏻湯底都好有特色：皮蛋芫茜、花雕雞同沙嗲😋今次試左花雕雞，好重藥材味同啲配料好夾👍🏻值得一試👍🏻👍🏻

天氣開始轉凍最啱就係打邊爐！ 求方便就去咗快餐店到一人一鍋， 美心海鮮鍋$75,都唔算平，有麻辣，藥膳同 芫茜皮蛋三款湯底選擇。我揀左藥膳湯底， 一打開蓋一大浸藥材味傳出來！ 有好多杞子同埋唔知乜嘢藥材， 之後一路食每樣嘢都好濃沃嘅藥材味，我有啲後悔…藥材海鮮好怪，而且真係太濃味……海鮮煱有一大隻扇貝，墨魚滑，一條蟹棒同兩隻蝦，一樣都有肥牛，生菜， 油麥菜同烏冬。蝦唔太新鮮，有少少霉…扇貝幾好，夠爽口…鮮味食唔到（俾湯底味蓋過了），墨魚滑夠爽口彈牙！值得推介烏冬質素不錯，至少唔會煮得耐就糊哂。另外可惜係火鍋係冇包飲品，加汽水要多$9...唔係好抵。

今日返工，提早咗去咗黃大仙食早餐 ，附近嘅餐廳都唔算好多，所以最後就決定咗去美心嗰度食早餐 。早餐種類其實同平時差唔多，但係就見到一個3.6蛋白片再加一個三文治同嘢飲，價錢都是$28蚊都幾抵食，所以今次就叫咗呢個 。好多地方都未執所以找個乾淨位比較難，拿到上手原來你心目中份量仲多添，三文治係用保鮮紙包住入，麥片同埋火腿嘅份量都好足， 而麥片都好大碗，味道偏淡，如果係想健康嘅人士就好好 ，我就覺偏淡，咖啡 味道一般 ，都算濃但係苦澀味都比較重。 這裏冷氣比較小，因為沒有門口關係所以都比較熱， 但係要這個價錢嚟講都已經算幾好。

美心嘅炸雞肶可為小秘書嘅童年回憶🐬 小時候爸爸、媽媽都鍾意帶我同細佬去山頂行吓、影吓相，之後我哋一家就會沿住山路行落去中環食下午茶☕️ 而最令我有記憶嘅就係美心嘅一杯冰凍可樂+炸野肶，全家人你一口我一口咁分享咗個餐，而家想起都好溫馨琴日我去再次幫襯美心，買咗個「炸雞肶、咖哩三寶」套餐。其實$34仲有折扣，仲包埋杯「荔枝梳打」真係好超值。但係口味就硬係無咗當年嘅味道，無咁香、無咁脆、無咁有人情味🤨 不過要讚吓嘅反而係杯「荔枝梳打」，唔太甜、再加埋啲椰果，我好鍾意！