Godiva Chocolatier (創紀之城五期(apm))

營業中

休息中

抹茶軟雪糕HK $50今次係第一次食 GODIVA 嘅雪糕！岀左期間限定嘅「甘醇抹茶巧克力系列」，作為抹茶控嘅我冇理由五試掛！抹茶味幾濃，不過未之於有回甘味。雪糕幾滑，個雪糕筒邊有朱古力碎，雪糕筒幾脆身。今日開始係觀塘 apm 分店開始發售，之後1月22日全港分店開始供應 (只限有雪糕機之分店) 。1月21日之前係觀塘 apm 分店買任何甘醇抹茶巧克力系列軟雪糕或飲品兩杯以上，會有 8 折優惠。

飯後甜品GODIVA的朱古力真係會令人深深愛上呢杯扭紋朱古力軟雪糕 (DARK CHOCOLATE) 真係無得頂!!朱古力味好濃郁, 口感非常滑,朱古力的純度好高, 拎上手亦都好重身. 雪糕筒的外皮好脆, 再加上雪糕筒邊佈滿餅乾碎, 口感一流!!而朱古力牌都係同一質素, 顯得更高貴!真係一分錢一分貨!! 唔會好似坊間咁, 得奶味, 好輕手~下次要試埋朱古力凍飲系列先得!!

平時成日都會經過但就好少會幫襯 因為$50 1枝雪糕對我黎講都幾貴 試過就好了 今晚同fd食完飯之後落黎見到咁多人排隊就知又做優惠了 D雪糕店係冬天成日都會做優惠店員忙碌地準備好多雪糕筒 將啲雪糕筒沾上朱古力醬Buy one get one free 我地3個女仔分左2個雪糕 雪糕質地幼滑 黑朱古力味好濃 甜度岩岩好 唔會甜到漏 雲呢拿味就相對比較普通 不過我都係比較中意twist 一次食晒2隻味不得不提個雪糕筒真係好脆 個朱古力邊香脆可口 好正Dark ChocolateTwist Chocolate

收到朋友報料他們呢幾日軟雪糕買一送一，專登走來試一試，因為平時一杯雪糕＄50實在太貴了買一送一就唔同啦＄25，抵！收到消息嘅梗係唔止我一個人啦，好多人排隊，條龍源源不絕都有人，不過都好快，前面10幾個人都係排左都係幾分鐘雪糕有兩種味道，當然兩個都會試晒喇這杯就是黑朱古力，筒邊Lim上翠翠口感特別好雪糕上還差了一塊他們的朱古力，朱古力梗係好食這個雪糕味10分香濃朱古力，好滑，真係好好味這杯是雙重口味雲呢拿白朱古力配黑朱古力，白朱古力就真係冇咁好食勁濃牛奶味，幾乎係蓋過晒雲呢拿味 ，下次一定唔食這個味

由於本人係會員嘅關係，生日會有禮物係免費贈飲嘅優惠券，所以我們今日去咗觀塘apm嘅「Godiva Chocolatier」去換嚟飲！喺揀緊要邊款嗰陣見到有幾款最新推出嘅，而我們就揀咗傳統嘅牛奶巧克力，呢款差唔多係我們都必叫嘅，因巧克力嘅味道非常濃郁，再加埋軟滑嘅忌廉一齊飲，真係好正呀！至於新推出嘅我們就揀咗杏仁味白巧克力，因杏仁係媽咪最鍾意嘅其中一種味道，一飲第一啖就畀呢股獨特嘅杏仁香味深深吸引著，味道相當清香，而且有好香滑濃郁嘅白巧克力味，而且仲有粒粒嘅白巧克力碎粒，令到口感更加豐富，真係超正呀，所以係我們嘅必飲推介！

小小一間係apple shop旁邊既godiva，人氣都唔低，一路有人去買軟雪糕，就連大男人都拎住支軟雪糕整番張seflie先，店內服務速度唔快，可能係因為佢地擠軟雪糕會追求完美既形態，凍朱古力就追求smooth既口感。早前莉豬散買左袋各種濃度既朱古力片同朋友分享，發覺72%既朱古力最合莉豬口味，偏苦，帶中等可可香，好食得黎又唔會太邪惡，等塊朱古力慢慢溶於口滲出香味，如果可以，嘗試下等多幾分鐘先再飲飲品，盡量更長時間地享受朱古力留係口腔既香味。

想食godiva既朱古力雪糕好耐，朋友都話想試吓， 一於就一人買番一杯嚟食，其實都幾貴成五十幾蚊一杯，咁貴又咁靚， 當然要相機食先啦。其實朱古力味係好濃郁，但係又唔會話好好食，味道好似牛奶樂再濃郁少少嘅版本， 個人認為食一次就夠晒數，唔使花咁多錢食呢個朱古力雪糕。

幾十蚊杯軟雪糕真係覺得有d貴，今日其實都好凍，今次第二次食，行過忽然懷念，記得上次一食完心情大好，就凍凍地都食多次回憶一下，好多人都想知點解一杯軟雪糕可以賣到咁貴？佢雲呢拿味嗰邊好重牛奶味，而朱古力味嗰邊味道非常突出，個雪糕筒仲有啲朱古力脆脆，筒身又相當鬆化！食完其實就會明白點解佢可以賣到咁貴。

今日我們飲完中午茶之後去咗觀塘apm商場，行過「Godiva Chocolatier」就買雪糕嚟食！我們買咗黑巧克力軟雪糕同熱牛奶巧克力！一開始本人就落單話要杯熱牛奶巧克力先，之後再點杯黑巧克力軟雪糕，其中一位女店員嘅服務態度超級差，一直黑口黑面，好似唔知得罪佢啲咩咁，黑巧克力軟雪糕好快就整好，但熱牛奶巧克力就等咗30分鐘先有，喺等咗15分鐘嗰陣，我們問嗰位女店員點解咁耐都未有？佢好晦氣咁答話：「等陣啦！已經整緊畀你啦！」但等吓等吓要30分鐘先至有！如果有好多人排隊等嘅話，我們絕對會體諒，但當時係無其他人客，仲要等咗咁耐杯熱牛奶巧克力係唔熱㗎，仲要味道係相當淡！如果啲嘢係好飲等咁耐都係值得吖，但出嚟結果唔係想像中咁，仲要受氣「添」，所以真係令我們極之失望！

平安夜想食好少少，於是買杯godiva軟雪糕試下，50蚊豪一次啦！有黑朱古力同白朱古力，兩隻試晒緊係食紐紋啦，雖然兩隻味唔算大分別，但係朱古力味好濃！個筒都正，邊邊有朱古力脆脆，幾好食！仲有朱古力godiva牌，呃like一流！

今日下午我們又行開去觀塘apm商場嘅「Godiva Chocolatier」食軟雪糕！我們買咗牛奶巧克力凍飲同黑巧克力軟雪糕！牛奶巧克力凍飲嘅巧克力極之香甜濃郁，飲到入面有一小粒一小粒嘅巧克力，令到口感更加豐富！黑巧克力軟雪糕嘅味道非常香濃，質感超級軟滑，黑巧克力薄片好脆，味道好濃郁！

每一次當這裡有做promotion，弄個甚麼雪糕甜筒買一送一時，那條長龍真的是厲害得嚇人....但據小弟的觀察，就算是平時沒有做優惠的時候，到來買的人還是不少。特別是在如此天氣炎熱的盛暑之下，人流自然仍是絡繹不絕的....不過自己一直覺得這個品牌的水平說實在只是普普通通而已，特別是她的招牌朱古力系列，小弟是一點興趣也沒有....卻不知何解，太太一直好"恨"想喝她們的朱古力特飲及雪糕甜筒。我說一杯或一筒要索價五十大洋，實在是太不值得，太貴了....今天又路過此店，太太再重提舊事，又說難得貪吃的小友不在，可以靜靜地兩個人慢慢嘆云云....在經不起她的要求底下，最後還是買了一杯嚐嚐....只是輕呷了兩口，牛奶朱古力無論在奶香以至朱古力的濃郁度皆不是十分突出只能說是不過不失，最大的賣點於我而言就只有舖面的那一堆㵉上朱古力醬的忌廉。當將這一大pat滑溜的東西與朱古力碎冰搗勻來喝時，滋味才能得以提昇到另一層次....一向愛煞這種食法喝法的太太，就更是對之愛不釋口了....而對此毫不熱衷的我呢，當亦十分樂意讓她去獨享....對我來講，這只是一杯用作解熱的消暑飲品，僅此而已....

呢間店係主打朱古力 以朱古力聞名 好多人都會因為佢哋嘅朱古力而愛上 我今日經過嘅時候就畀佢哋嘅朱古力雪糕吸引住 所以就叫左一個朱古力雪糕 朱古力雪糕上淋上朱古力醬 旁邊插上一個佢哋招牌朱古力 朱古力主要係比利時朱古力 食落口雪糕質地幼滑細膩 而且朱古力味比一般普通朱古力雪糕更加濃烈

今日下午我們去咗觀塘apm商場嘅「Godiva Chocolatier」食軟雪糕！我們買咗黑巧克力軟雪糕同牛奶巧克力凍飲！黑巧克力軟雪糕嘅質感極之軟滑，味道超香濃，黑巧克力薄片好脆，味道相當濃郁！牛奶巧克力凍飲嘅巧克力超級濃郁，好似食緊預備溶化嘅巧克力咁，質感極之香濃軟滑！

提到朱古力甜筒雪糕，好多朋友嘅童年回憶都離唔開雀巢、阿波羅，而我，就係Govdia！自從細細個媽媽攜帶我食過一次，就一試難忘，每次經過都忍唔住要食返杯！今次有朋友送嘅雪糕卷，order 咗最愛嘅朱古力口味，軟滑雪糕，單看賣相已經令人垂涎。雪糕入口香濃朱古力味即時散發，甜而不膩，濃郁口感令人十分振奮！ 而最最最最最令我欲罷不能嘅，當然係有朱古力脆脆嘅甜筒啦！幼滑雪糕加埋個香脆甜筒，簡直大fit！