集眾菜館

營業中

休息中

呢間小菜其實食咗一輪都唔記得寫食評依家補返寫。羊腩煲真係非常好食，$498呢個價錢有咁嘅份量同質素算係抵食，跟埋時菜一碟，食到半路中途侍應仲主動幫我哋加咗啲羊腩汁去淥菜，好少遇到咁好嘅服務。佢個羊腩唔肥，同埋炆得好入味，而且亦都唔會好煙韌，入面啲支竹索曬啲羊腩汁好正。訂位嘅時候預訂埋鷓鴣燉湯，四個人每人都飲到兩三碗，睇到碟湯渣就知道呢個燉湯非常之足料，落咗好多雞腳啱曬我，以三百幾蚊嚟講真係好抵。我見呢度好多人飲呢支麥啤所以試咗，又真係幾好飲，好襯過羊腩煲。

態度差，未至於傳聞中既好味。明明晤full仲要要求食客只可以1小45分用餐時，準時到既3人坐3人枱，早到既2人坐6人枱。一個字，名不符實。今時今日既服務態度不敢恭維

好友相聚暢飲一番，咁啱呢間小菜館嘅下酒菜又真係堅好食，下次一定再來。琥珀合核粒粒黐滿芝麻，香脆可口，比花生更好。呢個係川椒豬手，雖然叫川椒，但係唔辣嘅，呢個係冷盤，豬手肉爽脆有彃性，煮得好入味，唔會有臭豬味又唔會有雪藏味，辣椒粒同蔥花散發出陣陣香味，呢個小食一邊食，一邊飲啤酒，好正。呢個仲正，叫做鐵板魚春魚卜，啫啫聲上菜，熱辣辣，出晒煙咁樣，香噴噴，一口咬落個魚卜度外脆內軟，呢個餸好惹味，連D配菜都好香，正。所以成日話好嘅下酒菜真係好緊要，有好食嘅餸先至飲到多D啤酒。

三人行晚餐時間來了這家友人推介之小型粵式小菜館，一坐低先來啤酒三瓶，店員推介德國麥啤，點了，味道不錯，麥味香，無苦澀的味道，外間少見，結果飲了很多。小菜方面，因才三人所以吃不了太多東西，點了兩味，均有著上佳的美味。店員推介我們試炸子雞，味道果然不同凡響，先是隻雞本身很新鮮，很有雞味，薄薄的雞皮炸得脆而不油膩，皮下脂肪亦算少，雞肉亦很嫩滑，至於炸蝦片估計是新鮮炸出來的，沒有一點酒油益味，亦沒有翻炸的隔夜口感。我們見個炸子雞咁精彩，所以特地試埋佢個豉油王炒麵，果然高水準，先是炒得夠乾身，二是豉油平均分怖於麵條上，三是鑊氣十足，真是精彩的一晚。

呢一間位於太子嘅隱世小店真係好掂，食材新鮮之外，大廚嘅廚藝亦相當高。先來個羊腩煲暖一暖先。羊腩嘅肉質軟熟得黎有彈性，皮下脂肪比較少，而且炆得又淋又入晒味，馬蹄同d支竹都吸滿羊腩嘅精華。呢度嘅羊腩煲肉比較多骨頭相對比較少，$49X一煲唔洗比加一茶芥算係好抵食。豉油王鵝腸又係值得一試嘅菜式，d鵝腸好新鮮，食落都幾爽口，d鵝油好香。黃金豆腐粒外脆內軟，豆腐入面好滑。金薯安格斯牛柳粒炸得好香口，d金薯吸埋牛柳粒嘅味真心正。粉絲花蛤煲就係d粉絲仲正過d花蛤，因為d粉絲吸晒花蛤嘅鮮味，佢呢度d花蛤都新鮮大隻嘅。

朋友推介這家吃小炒的中菜館，今晚一行6人，點了很多個菜式，樣樣精彩。最精彩的要算是這道魚米之鄉，選用新鮮海杉斑，很入味，要用上如此大條的魚才有這麼多斑頭腩肉。真的非常大條，以兩味的食法，先是炆斑頭腩，然後第二味是濃味鮮魚湯浸魚片，再有上面放下脆米粒，味道真的不同凡響，驚喜非常。金薯安格斯牛肉粒又是一絕，那金薯其實就是炸脆了的薯仔粒，很是香口。然後再點了一個羊腩煲，味道很好，據說是用新鮮羊烹調的，所以鮮味十足，羊肉很軟熟，沒有一點羶味。

堅正的粵式小菜，book咗七點半都要等一陣先入得，全場爆滿，真係唔book位都唔港洗指意walk in食得到。我哋叫咗4個餸，買四個都好多好食。黃金豆腐粒外層又薄又脆，裡面又軟又滑。脆皮炸大腸脂肪比較少，外層炸得好脆，而且d豬大腸都幾乾身，點甜酸醬，邪惡但好味。川椒豬手嘅豬手唔係炆到淋晒嗰種，而係保留豬手嘅彈性兼一d都唔韌，雖然叫川椒但係只係少少辣，整得好入味。咕嚕肉差唔多枱枱都有叫，真係好食，佢個質感做得好好，炸得黎又食到豬肉嘅軟熟，唔係一味硬或者一味軟。

上次個Friend帶我黎呢間太子小菜館食晚飯，除咗D小菜出色之外，最正係試到佢地嘅支竹羊腩煲，唔洗$500一煲，羊腩比想像之中多，唔會將價就貨，因為衣家出街食飯如果食羊腩煲都唔平，始終D羊肉加貴咗好多，如果見到有D地方有二百幾蚊嘅羊腩，好多時一係就羊腩份量好少，一係D羊腩就肥到無朋友根本食唔到，一係D羊腩就un到癩晒線，所以都唔好浪費金錢，要食就正正經經食一煲合理價錢嘅羊腩煲好過，所以今次食過翻尋味，早幾日打定電話訂定個羊腩煲今晚拎返屋企食。呢度嘅羊腩好入味好新鮮，食落似係新鮮羊腩而唔係急凍嗰D，食材質素好自然味道都好D。

原本已book 枱同朋友食飯、但當天突然收到朋友通知需要入院！所以需要取消飯局、打電話去cancel 時被接電話的破口大罵說退了很多訂枱、不是這時候才cancel 等。但根據資料5點先開始營業、從來沒有接過他們電話confirm Booking、亦沒有WhatsApp function！真的需要這樣嗎

因為我自己本身好鍾意食魚鰾，而呢一間小菜館嘅魚標又做得好出色，所以今晚忽發奇想，嚟一個魚標大比拼，其實都係好無聊咁樣叫兩款唔同煮法嘅魚標睇下邊隻正啲。一號佳麗就係鎮店之寶之一嘅鐵板白胡椒煎魚鰾，佢係用煎焗嘅方式去處理呢個魚標，所以煎到魚標嘅外層少少窿微微脆，蓮藕落去嘅時候仍然保留到魚標嗰種煙煙靭靭嘅口感，用鐵板上就保留到嗰個溫度，特別天氣凍嘅時候會更理想。2號佳麗就係傳統嘅薑蔥魚標，都係鐵板上，呢個魚標就少咗煎焗嗰種嘅脆口，不過佢啲配料就煮得好香，洋蔥紅蔥頭蒜片等等發揮到佢哋應有嘅香味。總結：如果純粹講魚標本身，白胡椒煎嗰款係好食啲嘅，但係如果講整體嚟講，薑蔥魚標係惹味啲嘅。

真係好掛住呢間小菜館嘅咕嚕肉。雖然要百幾蚊一碟，份量亦唔係超級大碟，不過真係食過返尋味。呢度係肉新鮮梅頭肉，加上薄薄一層炸粉，大廚掌握個時間掌握得非常好，先至可以做到外層微微脆口，而入面嘅梅頭肉就啱啱熟，咁先至可以做到外脆內軟嘅口感。另外佢個汁亦調教得好好，個甜酸度剛剛好，而佢嘅酸亦無乸喉嘅感覺。除咗咕嚕肉之外今次仲食咗鐵板白胡椒煎魚卜，呢個餸亦都係非常好食，個煎魚卜嘅質感好正，而且啲白胡椒嘅香味亦非常之出，無得頂。

雖然綠底紅字嘅招牌非常顯眼，但餐廳本身並唔起眼，猶其太子大角咀一帶不乏小菜對餐廳並無過大期望。誰知道餐廳喺口耳相傳地成為一枱難求嘅人氣餐廳，更加係帶嚟意想不到嘅美味。餐廳價錢合理，味道出色，用料充足，食材多元化，唯有環境稍為狹窄，路過附近搵飯食都絕對值得一試。【集眾極品雞】 - $238（半隻）少有地會附上雞雜，雞肉本身多汁嫩滑，咸香味道十足，但個人口味認為略嫌過硬，但味道良好。【鎮店小炒王】 - $158小炒王用上韮菜，走油炸過嘅竽頭絲，菜莆，蝦乾，腰果一齊炒，炒得夠乾身，口感十足，調味恰當，乾爽唔油膩，蝦乾仲帶有淡淡咸鮮，香口惹味。【鐵板薑蔥炒蠔】 - $158選用鐵板而非砂窩令炒蠔食到最尾唔會油價，蠔身大隻且鮮味十足。半煎炸過嘅蠔更加唔掛汁，十分香口惹味。【金沙黃金鮮魷】 - $148中意食香口嘢嘅人去嚫食小菜必食之選，金沙香口炸漿薄身，魷魚爽口，口感香脆輕薄，每舊切得比較大所以食多兩舊會有少少油膩感。綜合推薦度：🌕🌕🌕🌕🌗

今晚好開心，試到一間好好味嘅小菜館，雖然得兩個人叫唔到好多嘢食，但係叫咗兩個餸，兩個餸都做得好出色，攞滿分。其實兩個餸都係睇openrice見啲人推介所以叫嘅，果然無伏。第一個就係呢間小菜館嘅人氣小炒，拔絲菠蘿咕嚕肉，第一眼睇過價錢都真係覺得有啲貴，不過食咗之後就覺得物超所值，出面好難食得到啦呢種質素嘅咕嚕肉，外脆內軟嘅口感冇得彈。第二個餸係白胡椒煎魚卜，咁啱得咁橋又係外脆內軟，白胡椒好香，食嘅時候仲間中會咬到啲白胡椒粒令人覺得好興奮。

朋友介紹呢間小菜館，仲話記住食佢個避風塘瀨尿蝦，今日終於去咗試咗，真係正，因為係D瀨尿蝦已經拆晒肉，食落去啖啖肉，好High。佢D乾蒜都真係爆得幾香，好有避風塘嗰種風味。佢呢度個雞煲翅真係抵食，好似係$108一盅，一人份量，都幾多翅，好足料，雞湯香濃。佢呢度有隻德國麥啤都幾好飲，易入口，唔會苦，麥味都幾香，唔知係唔係食咗咕嚕肉D菠蘿，覺得隻麥啤有D菠蘿香味。聽講呢度嘅咕嚕肉又係必點嘅，網上講係新鮮豬肉加新解菠蘿，叫咗試咗，真係必點，可能係食過最好食嘅咕嚕肉，外層粉漿落咗個甜酸汁之後仍然保持少少脆口，入面舊豬肉(估計係梅頭肉)又真係熟得黎Keep到軟綿綿嘅質地，真係幾好食。

我真係非常欣賞呢間小炒店嘅白胡椒煎魚鰾，佢呢度嘅魚鰾半煎半焗嘅煮法令到魚標本身外脆內軟，講緊嘅外脆唔係好似椒鹽九肚魚炸到卜卜脆嗰種，而係煎到燶燶地，保留到魚標本身煙煙韌韌嘅口感之餘，亦因為嗰少少嘅燶燶地因而等你食嘅時候有嗰種輕微脆口嘅口感。魚標本身係有少少腥味嘅，不過就係佢用咗白胡椒做主要配料，所以就可以完美咁樣闢走咗啲腥味。呢個菜式係用鐵板上菜，保留到個溫度，同時亦可以減少魚腥味，另外芹菜蒜仔呢啲配料亦都因為佢用鐵板上嘅緣故所以份外香。另一樣呢度正嘅嘢就係呢隻德國麥啤，有小麥嘅香味但係又冇苦味，都幾易入口，其他地方好似比較少見啲。