錦麗 (已結業)

肥姑姐飲食推介 - 香茅咖喱豬扒飯 + 越南甘蔗蝦1）環境衛生今日幫襯屋企樓下的錦麗，東港城嘅錦麗比較細，只可以坐到約30人，設有吧枱，卡位及二人枱，依間分店比較適合一啲食完就走嘅客，唔太適合一大班朋友聚會。15-20分鐘為平均翻枱時間。2）食物質素主菜-香茅咖喱豬扒飯今日終於試左一路都好想食的香茅加喱豬扒飯。首先要講一講嘅就係佢個香茅咖喱汁，椰汁味不重但香料味好足，初時食嗰陣唔覺得辣，但係食落慢慢就有一陣微微的餘辣由喉嚨出返嚟，呢種馬來西亞風味嘅咖喱一向都係我最鍾意食嘅，而今次仲要只係微辣，真係好啱我嘅胃口。另外要講一講嘅就係今次嘅炸豬扒，真係又厚又大件，仲要係高質素嘅貨色，每份香茅咖喱豬扒飯嘅豬扒都係即點即炸，所以一想到枱係熱辣辣炸卜卜，真係好正。非常推介大家嚟錦麗試吓依一個香茅咖喱豬扒飯！！小食-越南甘蔗蝦跟餐嘅小食係兩件越南甘蔗蝦，其實就係蝦膠包左係甘蔗上面再炸，呢個甘蔗蝦真係真材實料蝦膠非常彈牙，唔油膩脆卜卜好好食，真係好想食多兩件甘蔗我有時仲會食埋條甘蔗(因為超甜)。3）價格HK$96 (加左HK$8轉菠蘿梳打特飲)（晚餐價HK$88，包一個主菜，一杯嘢飲，同埋一個小食）（

好耐冇幫襯錦麗，剛好趕得及下午茶時間光顧。點了香茅豬扒撈檬粉，同越南生牛肉河粉。生牛肉河粉因為是下午茶，份量比平常的細碗，也少了平時額外的香草同芽菜杯，不過湯底依然十分香濃。但估唔到香茅豬扒撈檬粉的分量同平常一樣咁大份。我平身好鐘意食青檸辣椒魚露汁，錦麗的撈檬粉除咗加有多花生碎仲有加咗少少肉鬆，豬扒有加有蔥油，令到本身冇味嘅檬粉十分好味😋。跟餐除咗咖啡茶外亦有薏米水等，更可以加錢轉三色冰等，而且薏米同三色冰的紅豆珍多的分量也幾乎有半杯咁多。另外再叫多咗個大蝦米紙卷都算唔差，只是普普通通，冇咩特別。

今日我想食個簡單嘅lunch ，諗起呢間越南河粉一直都想試吓我叫左個生熟牛肉河加一杯凍甘蔗汁。店舖唔算大，坐位就要坐得親密啲，不過基本上防疫措施都做足嘅。生熟牛肉粉~熟牛肉夠厚兼鮮美，而生牛肉薄薄給滾湯一焯就成半生熟，啱晒想食兩種不同口感嘅至於湯底就夠鮮甜，飲完都冇口渴，証明足料熬出嚟並不是味精湯最後飲埋杯清甜凍蔗汁，非常滿足完美

依家想堂食真係要把握時間， 相信好多人都已經將晚餐推前都五點食😒 冇計 唔想食外賣就要睇時間做人。假期去咗東港城。 『錦麗』是我第二次光顧， 小店內籠有啲逼夾， 難怪見到地下果層裝修可能會搬。錦麗生熟牛肉小粉$45粉嘅份量真係好少好少～ 屋企人兩三啖就食完了。 而且牛肉湯唔夠熱。。有兩塊牛腩和生牛肉片， 湯底清甜唔算好鹹， 冇太大驚喜。扎肉香濃雞湯金邊粉這碗份量反而正常， 主要係雞湯底， 扎肉好重黑椒味。凍甘蔗汁味道清甜， 可惜冰塊太多， 寧願不加冰細杯一點 更好。

天氣凍的時候，最鍾意就係去食返碗熱辣辣嘅越南生牛河🤤行過錦麗就忍唔住入去食返個下午茶先,叫了下午茶餐生牛肉粉+薏米水$45湯底好味，薄牛肉片3 片還可以，河粉好滑。不過略嫌細碗咗啲😅

行完街同老公食個Tea，天氣凍冰冰就決定食個湯麵啦。下午茶餐牌都好多元化，小食，橯檬，河粉都有咖。。仲包一杯餐飲錦麗生牛肉小粉下午茶餐份量細啲，所以就叫小粉😂個湯底真係好好飲，清而濃，牛肉味好濃郁！河粉唔會好碎，一條條好qq，唔會一夾就碎哂。不過牛肉就過熟，河粉送到嚟已經唔係生啦。但真係要讚個湯，我飲哂成碗湯香茅豬扒撈檬豬扒真係即點即炸！送到過嚟熱辣辣，咬入口有肉汁，香茅味成塊豬扒都食到，唔會得表面，肉入面都有香茅味！撈檬有紅蘿蔔絲，青瓜絲，花生碎加個酸酸汁。好食😬青蔗汁幾青甜，好飲。飲品仲有好多種可以選擇，薏米水，玫瑰龍蝦茶等等餐廳環境算正常，不過地下應該有客人倒瀉野又無處理，所以黏笠笠。員工態度就正常一般啦。下午茶唔洗收加一

叫外賣，叫親魚餅金邊粉都會俾成魚丸，已經第三次啦，唔該真係可唔可以睇清楚少少，之前都同自己講可能太忙一時搞錯，依加夜市都淨係外賣啦都重係搞錯，如果唔係一而再再而三咁我都懶得走上黎寫評，俾錯第二樣都算，問題個魚丸真係好難食，係唯一一味我接受唔到嘅，完全無彈性唔知食緊咩真心唔岩胃口，等於只可以齋食個麵，我無理由要次次揭開個外賣蓋望下裡面係咩黎咁唔衛生下話？你地第二次搞錯時我已經當場係揭蓋話你地知架啦，真心唔該改善下啦

要到東港城一田買餸， 順路同媽咪到錦麗吃午餐， 之前都有到過這間店， 感覺質數沒有其他的分店好， 但今次改進了好多， 無論服務質素和食品上都進步了不少。 兩個午餐有錦麗生牛肉粉$68、 香茅豬扒撈檬$68、 追加越式小食～ 錦麗大蝦扎肉米紙卷$18、 自家意米水、越式滴滴咖啡$8。錦麗生牛肉粉～ 湯底夠熱， 生牛肉非常嫩滑，好味！香茅豬扒撈檬～ 豬扒好大塊， 口感鬆化又惹味帶有肉汁， 撈檬甜甜酸酸特別開胃。錦麗大蝦扎肉米紙卷～ 晶瑩通透的米紙卷， 裏面有大蝦、扎肉和蔬菜絲，清清地又健康。越式滴滴咖啡～今次比較上次好飲得多，味道亦較濃厚。自家意米水～有微微的薑味，清新好飲，健脾清熱。今次再次到東港城的錦麗竟然有驚喜，食物質素做得比之前好得多。

1. 落單時職員態度不耐煩，結果落錯單。2. Poster明明寫包特飲，收銀話冇，要指比佢睇先俾返我。3. 粉不夠熟，個心是硬的，好似食擦膠咁。4. 職員pack袋時，將2份餐的所有外賣盒同紙杯疊埋一齊就算，綁埋一袋就俾客拎走，冇紙托冇托底，結果一拎起幾個盒係袋內東歪西倒，相信狼狽，包裝完全不考慮客人實際情況。5. 特飲的紙杯蓋沒有合上，結合上述不良pack袋技術，成杯飲品基本上是冇左。6. Poster寫的「外賣價」其實不包外賣盒，一個不為意就每個餐被加多幾蚊。6. 以上食物質素及服務態度，還要近百元一個牛肉河外賣套餐，十分唔值。7. 個粉份量極少，細食都唔夠食8. 外賣已pack好放出來但職員唔叫號碼，我有我等，個粉就係枱面等，等左好耐出聲問，職員先唔耐煩咁話已放在枱

難得同朋友出嚟食飯試咗大家都好鍾意食嘅越南菜今次係第一次食錦麗一直都聽聞佢哋嘅牛肉河粉好好食呢個係朋友識嘅撈檬試咗淡檬汁 覺得有d太酸我就麻麻地因為裝咗佢哋嘅會員計劃所以免費送咗牛油雞翼覺得雞翼唔夠脆 而且牛油唔夠香☹️食落好肥膩 唔會自己俾錢叫🙈覺得佢嘅牛肉可真係好好食生牛肉就正正常常 但熟牛肉煮得好淋 勁入味最特別嘅係個牛丸平時冇乜特別鍾意食牛丸但呢個超Juicy 咬落去即刻爆曬肉汁🤣🤣大推介❤️❤️❤️

錦麗水準一直都維持得好好，尤其特別鍾意食錦麗嘅牛丸，差不多每一次來錦麗都必食牛丸河粉，牛味超級濃味，又彈牙。佢嘅錦麗牛丸粉 $66，湯底好清又無味精。芽菜係肥仔嗰隻，唔係幼長嗰隻，咬落比較爽。另河粉係滑嘅。雖然價錢唔算平，但無論係去邊間分店，味道都係一樣。

見到錦麗做買一送一就試下，橫掂好耐冇食，呢個優惠只係做豬扒金邊粉同下午茶既生牛河，因為牛河比較細碗所以我叫左豬扒金邊粉，豬扒味道還可以，但金邊粉就比較硬，好似未煮熟，而個雞湯就十分普通，冇乜特別，如果想試就唔好抱有其望

今日落去食個下午茶，因週年慶典，買一送一。食左豬扒粿條同生牛肉湯河。牛河是必食同最穩陣架選擇，而豬扒粿條，豬扒不錯，但粿條偏硬，下次唔會再食。不過約要食越南河粉，我都會選擇錦麗，湯底真的很不錯👍🏻。

曾經在越南胡志明市到訪過錦麗，給我的感覺很地道，PHO好好吃！來到香港，餐廳裝潢說明香港錦麗走較高檔次路線，已開設了好幾間分店，的確頗受港人歡迎！今次下午茶時段來到，有買一送一優惠，還要排隊等入座呢！大概15分鐘，終於可以來一試港版的PHO。生牛肉粉（小）跟飲品凍薏米水湯底的確幾清甜，生牛肉亦有鮮味。可能是優惠價格，份量真的小，一個人吃兩碗才夠！如果係原價的話，就唔太抵食喇。薏米水有加薑汁，比較特別，個人幾鐘意👍

話說見到錦麗做緊下午茶生牛肉河買一送一，仲要包野飲既大優惠，的確夠平，完全吸引我貪平性格!生牛肉河牛肉夠牛味，河粉應該扣左底，但都夠食有餘，湯底正正常常，無甚特別，咁既價位仲要包一杯野飲，無野好投訴。蒜蓉牛油雞翼越南菜點可以唔提蒜蓉牛油雞翼，雞翼係生炸，而且火候剛剛好，皮夠脆肉夠嫩但敗筆係啲蒜蓉，近乎生蒜，我倒希望無啲所謂牛油同蒜蓉會更好點解叫錦麗人生，無他，因為在短短20分鐘時間內，有人食一碗帶一碗走，有2個人各叫2碗即4碗，有人成碗辣椒，有兩夫妻嘈交，人生百態，有趣有趣