影片
營業時間
今日營業
10:30 - 00:00
星期一至日
10:30 - 00:00
以上資料只供參考, 請與餐廳確認詳情
食家推介
今次路過土瓜灣搵食，人生路不熟之際上OpenRice睇有咩好食，但係啱食嗰啲都實在有啲遠，最後自己行吓行吓去咗呢間粉麵檔，冇期望之際入去求其食。點知一行入去，已經聽到阿姐喺電話接外賣，喺度講魚麵😳即刻睇吓個餐牌真係有魚麵食。粉麵檔一定要食嘅就係牛筋🤤自己覺得牛筋整得好食，其他嘢食都唔會差得去邊🤭 見到佢呢間有墨魚鬚即刻唔使諗就決定到。最終叫咗個「牛筋墨魚鬚魚麵要腩汁多蔥」🤤好快已經嚟咗，牛筋唔係一條條，係一條再斜切上，墨魚鬚得1條，另外4件係墨魚頭，反而我自己勁鍾意食墨魚頭😍😍又爽口又有軟骨🤩🤩跟住原來佢嘅魚麵係魚蛋切條😂 又幾特別喎，即係成碗魚蛋條😆，啱晒我呢啲唔鍾意食飯/麵嘅人😂個湯底加咗腩汁清清地唔會太鹹，正👍🏻
繼續閱讀
少去土瓜灣，經過都無咩餐廳選擇，結果揀左間粉麵店，裝飾偏舊式，以為會好食，結果伏伏地叫左牛腩+魚片頭麵$37+$6，魚片頭加$6得2舊，味道同口感都很差，係實滴滴既口感，吾彈牙。麵份量好少，食完都吾夠飽加$9有凍飲，檸檬茶正常發揮仲叫左魚旦河多腩汁，河粉份量叫ok，但河粉質地吾滑，較麵粉口感，多左腩汁都無腩汁味、好清，落辣椒油又吾辣，得個咸字，真心伏到呢加$9有通菜，腐乳味道吾濃😪最後唯一讚既係炸魚皮，$13一份，份量少，真好脆好食，係要讚總結吾會再比機會食，價錢適中、但食物質素好普通，吾好食
繼續閱讀
我係土瓜灣返工，都係喺附近食晏，呢間係我一星期裡面都會去食兩至三次。今日食晏叫咗個牛腩魚麵跟餐菜芯，一開始係碟菜芯嚟先，但份量係比平時少（得四條，鋪得一層，平時係兩層有六至七條）。我即刻講咗句，"嘩 咁少嘅"。一個阿姐就講跟餐係咁少，我話我食開都知無咁少，我都係嚟比錢食野消費。之後我再同疑似老闆娘講話今日碟菜咁少嘅？佢話可能淥淋咗所以細碟咗。聽完呢句我即刻慶咗，不過之後無出過聲。我照食完，比錢，走人。唔係食啲咩貴價野食，但收咗錢都要對得住良心過得到人，各位小心。
繼續閱讀
今次係食呢個墨魚酥加雲吞麵另外加薑檸樂 。因為周邊都冇呢啲舖頭，所以變咗佢比較多人，佢仲要營業到夜晚12點 。 雖然嘢食係正常 ，但係有個女樓面唔單止對價錢唔熟悉要望住餐牌嚟寫，並冇解釋清楚跟餐嘅嘢飲唔包薑檸樂，而係要另外再俾$18(唔係熱飲補錢) 唔係話唔肯俾錢，而係佢講冇清楚仲喺度狡辯，仲要鬧人 ，收銀亦都冇幫拖 。 所以冇下次 。呢間嘢獨市唔係大晒，你真係唔好怪人哋點解啲人唔出街食嘢。 希望佢唔會多謝街坊多年支持而加快執笠。 🙏😇
繼續閱讀
下午坐車出土瓜灣，落山道巴士站落車，距離約會時間仲有半個鐘，又未食嘢，夠時間食個快餐，望兩望，裝兩裝，食碗粉麵肯定最快手，點知畀我搵到嘅間驚喜嘢。一坐低，店員即刻過嚟問我食啲乜？大佬呀！我第一次嚟幫襯，鬼知你有咩食咩？於是同佢講話等陣先，佢行開咗。我迅速打開餐牌，入面好鬼多選擇，但好彩第一時間吸引我嘅係大大隻字「魚麵」，再望下細項，吸引我嘅字係「鮮墨魚鬚」，正在猶疑之際，個店員又走埋嚟問我食啲乜，前後我諗兩分鐘都無，講真咁嘅態度真係好趕客，你又唔係澳牛，間舖又只得5成滿左右，何必咁趕住落單呢？佢既然咁趕，我亦無謂心多，一於叫鮮墨魚鬚魚麵，見到佢個餐牌有話加錢可以有我至愛之一嘅魚皮，咁就加埋落去啦！魚皮先到，弊！韌口。再過幾分鐘，魚麵終於到，原本想叫杯飲品，但飲咗一啖湯之後，取消呢個打算，事後亦證明我呢個決定係正確，因為我係成碗湯飲哂，之後一直唔口渴。手機食完到我食，我先將魚皮放落湯度浸腍，咬一啖墨魚鬚，個鮮味即時出到嚟，雖然係硬咗少少，但鮮味真係沒法擋，魚麵就無乜驚喜，但唔會太差，可以啦！而魚皮浸腍後，唔會太難食，埋單$46，應該會有下次嘅，雖然個店員催命鬼嘅態度真係好唔掂。
繼續閱讀