蠔滋味美食坊 (已結業)

街頭小食買少見少，當年係大坑渠隔離既臭豆腐已經遇唔到啦！好彩而家係蠔滋味可以再遇到，抽風系統做得好好，唔會有油煙味。十多間食店一齊開鑊都唔會煙霧灕漫。講番臭豆腐，一見到一定唔會放過啦！份量比之前食開的大。外脆內軟加上甜醬，更加惹味。姐姐勁好禮貌。再買咗豬扒包，無骨豬扒夠軟滑，味道唔會太鹹。配上新鮮生菜減去油膩感。再買多杯朱古力四重奏，特濃的朱古力夠香滑，再加上 Oreo 碎令到味道更濃。可惜片皮鴨卷未開試唔到。…查看更多

好難得元朗有香蕉煎餅！！！星期日特登放假去搵下路，叫左個煎餅同一杯泰式奶茶。係泰國的味道呀！❤️好值得表揚的老闆，對人好客氣，個餅好多香蕉同埋好好食，加埋朱古力醬同煉奶😍廿五蚊我覺得抵食，作為一間小店佢一個人打理真係唔易。見到成間鋪其實唔多人，隔離花甲粉都冇人，個場少少冷清。希望可以多啲宣傳，唔好令依種小店消失，係平民的美食！另外就係奶茶，對比銅鑼灣果間冇咁死甜，細細杯加埋個樽仔好得意，雖然相對係貴少少，但個樽幾好用，拎左返屋企入濕碎野😂如果第時有大杯就好啦，一定會買，可以拎住一路飲一路行街。👍👍👍👍👍加油！…查看更多

上網見到有香蕉煎餅就去試下！好彩夜晚唔多人，一叫就企係到望住老闆整！係個盒到拎一個小粉團出黎差，一邊煎一邊將香蕉包係粉團入面。然後再落牛油煎，整到個皮啡色，睇落都覺得好好味！煎完老闆好唔孤寒咁係咁比好多煉奶同朱古力醬！熱辣辣咁咬入口，好香既香蕉味，同d醬好夾呀！真係好好味，希望多d人幫襯！長做長有！…查看更多

今晚諗咗好耐晚餐食乜好，突然之間醒起一間俾元朗人不停吹奏但係即將結業嘅「軟飯王」，主打椒鹽豬扒飯，落單後要等20-25分鐘，盛惠45蚊。喺附近徘徊咗一陣，返到入去剛好炒到我個飯，眼見老闆炒飯炒得金黃，米飯炒到粒粒分明，而且又足料，可見到佢嘅功架係幾咁厲害！豬扒就先炸後炒，椒鹽味好重，攞飯盒時，隔住個盒都聞得到陣香味！言談間老闆講出佢嘅辛酸，雖然好多人幫襯，好多人讚佢，但係由於有半份糧都要交俾業主，於是決定唔再做落去，實在可惜。希望老闆可以搵到個良心業主，等佢延續呢個軟飯王夢！…查看更多

又係一個星期一次嘅約會啦雖然唔近我屋企，不過遠都要去買盒外賣炒飯食，因為實在太好味！今次買左盒椒鹽豬扒炒河同爆辣豬柳炒飯，未打開飯盒都已經聞到勁香嘅炒野味！一打開盒炒河粉，多到就黎滿瀉啦！椒鹽豬扒照樣有4、5舊，至於炒河就夠鑊氣，不過就淡左啲啲，可以咸少少會更好，配料足夠，有好多芽菜同韭黃。而爆辣豬柳炒飯一樣鑊氣十足，照舊咁好味呢！炒飯一樣炒得出色，非常乾身唔會覺得油膩，我成盒都食晒呢！不過好可惜佢做埋五月就唔再做喇…查看更多