蘭芳園

營業中

休息中

同朋友係中環搵食，本身想去勝香園，點知公眾假期佢冇開，又走反過黎呢邊食，不過唔係去老店，去左新店試下老店冇既野叫左黑椒牛扒撈丁，奶醬多，凍ＭＴ；撈丁原來係好唔夾黑椒汁，味道怪怪，有Ｄ後悔叫左呢個，因為我都係覺得黑椒襯ＰＡＳＴＡ好點，而且牛扒有Ｄ老，難趙；奶醬多，一樣水準，正；凍ＭＴ，仍然ＫＥＥＰ住香濃，真係好好飲既凍ＭＴ新店好似比起舊店仲要迫，不過ＷＡＩＴＥＲ既服務叫ＯＫＡＹ，可接受！下次試下其他

三月二十日上午陪女友去上環睇牙，睇完之後行左黎呢度食。本身唔係於中環返工，所以唔多黎，咁黎得當然要食下呢度D好味既野食，見呢度幾出名所以黎食結果都幾失望，叫了兩個撈丁餐食＄38+＄38，芝麻咩牛冧肉撈丁，一個係心多多撈丁，一杯凍奶茶一杯凍檸茶.....先要讚讚個凍奶茶，的確很香很滑但其餘的我覺得幾麻麻，撈丁不見得有幾好食，平時肚餓食野都會覺得特別好食，但係我餓左成個一午去食都唔覺得好食，自己係屋企煮都好食過佢本來個餐廿幾蚊加上幾好飲既奶茶可以拉返個ok，但係個餐三十幾蚊而得咁既水準既撈丁同埋坐得咁唔舒服就真係要比個喊樣喇

今日同友人約左去掃街，首先約左十一點響上環等 第一站首先係歌賦街，可惜勝香園及九記牛腩都因公眾假期而休息，唯有立即轉去結志街的蘭芳園(老店)點了叉燒汁豬泵兜撈丁、芝麻牛肉汁牛冧肉撈丁、咖央西多士、馳名豬扒包、三杯熱奶茶，共$113豬泵兜係指豬頸肉，配上酸酸甜甜，幾開胃，但我更欣賞芝麻牛肉汁牛冧肉撈丁，好好味，咖央西多士也很正，豬扒包個人認為比澳門的更好，反而奶茶飲唔出有咩過人之處!

蘭芳園，又再來了！今次要了奶醬多，凍奶茶，這個ＭＡＴＣＨ係我最愛！麵包軟身，烘完好好吃，加上奶醬這個配搭，錯不了；奶茶，今次苦了點，冇咁甜，唔係咁鍾意喜歡來這裡，除了價錢比較便宜之外，還有那份親切的感覺，去得多文華，都要黎下呢Ｄ地道鋪頭，ＤＵＮ反個人平均Ｄ

上星期到上環辦證件..午餐時想起蘭芳園…便由上環走到中環…可想而知蘭芳園的吸引力依舊非常多人…一張四人圓枱卻坐了七人…要了金牌豬排包餐…火腿um列…D蛋幾滑…沒什麼特別~~金牌豬排包…真的金牌…比澳門那家出名豬排包有過之而無不及…很脆的包底…豬排,蕃茄,沙津組合一流奶茶又香又滑…依舊一流

又吃外賣，沒有什麼選擇，就要了個金牌豬扒包。老實說，這個包賣相幾不濟，上面幾個手指痕還隱約可見，足見功力深厚。包是微暖的，及格。豬扒是給化學品醃得極腍滑的貨色，炸過的，喜不喜歡就視乎你對疏化粉豬扒的感覺如何，我幾介意的。加上沙律汁，不見得有特色，也不算很難吃，但冠以「金牌」之名，有點不明所以。奶茶仍不錯，但仍未喝過「茶冰」，還是如傳說般神秘。埋單好似係22蚊，對這裡始終未有改觀。

mar 5, 08,友人同我嚟食lunch,叫咗 :1) 午餐i) 火腿蛋奄列-ok,正常品ii) 厚奶醬多(+$2)-外小脆,麵包軟熟,不錯iii) 叉燒公仔麵(+$2)-試咗友人1口,公仔麵唔喺丁記,但有淡淡嘅芝麻香,叉燒亦腍,不俗iv) 凍檸茶2) 金牌豬扒包-個皮好似”焊”燶咗少少,所以脆得嚟有少少硬身-因有沙律醬汁,所以帶d酸酸哋-塊豬扒正常3) 凍檸水- 估唔到佢個午市咁多人,排晒隊,好似唔洗$$$$咁,真誇張- 我成日經過呢頭但都喺第1次嚟食嘢

早排為食同事提意星期六OT放工後去一趟蘭芳園, 因為平日lunch hour經過太多人喇, 同埋時間唔許可, 星期六就大把時間喇~去到都要等一陣, 今次係我第一次去食, 試左雞扒撈丁及珈映西多, 個撈丁我覺得好好味, 唔係因為塊雞扒整得好味, 而係佢加入左薑蔥去撈, 好香, 不過可能唔鐘意食薑蔥既人就覺得唔好味囉! 而個西多, 唔使加糖醬都夠甜, 不過係油左少少, 味道唔齋舊店太多人, 舖頭入面太迫, 衛生情況麻麻地, 可能個個都太忙, 都唔得閒去清潔

在中環上班的我, 每趟經過蘭芳園, 都很想試一下並馳名的奶茶. 可惜平日中午, 蘭芳園前的人龍都令我卻步.這天是星期六下午, 與老公吃過勝香園蕃茄通, 決心要到蘭芳園喝奶茶. 新店沒營業. 沒關係, 反正希望試舊店. 為什麼? 就是那經典的檔口, 已足以吸人我.人不算多, 要了一杯凍奶茶外賣(HK$15). 30秒就已經ready! 好快！期待已久的奶茶！茶味與奶味分明, 好味！可惜是, 原來舊店只用普通冰, 沒有新店的茶冰. 若不是第一時間品嚐, 那一定變淡. 嚴格來說, 是非常有水準之作, 並非浪得虛名. 但個人認為, 灣仔金鳳的無冰奶茶更勝一籌, 比蘭芳園的更滑, 更有奶香, 而且價錢仲平HK$3 (即HK$12)！

我上年去過食一次明明話過我唔會再去..點知之前同男朋友行下行下..親o岩下午茶時間...雙腳唔聽洗拉埋男朋友入去...唉...唔食由至可..一食...真係..好不堪..個餐又貴..個雞扒撈丁d雞扒鞋過公廁d廁紙..男朋友嘴挑有不滿係正常..但我都算係正正常常就食得落架啦..呢個雞扒撈丁連我都覺得自己會整得好食過佢..唔知d人係欣賞佢超鞋雞扒..還是d蔥油...我諗唔會係o個個兩個幾ge出前一丁掛..咁ge價錢勝香園平過佢抵食過佢仲有feel過佢！

見到咁多好評,第一次同朋友黎食..都預左要等位，都等左十分鐘先有位座，之後有個阿叔埋黎落order，我點左三樣野，唔知點解三樣都會錯，我點了奶茶冰冰，就來了熱奶茶，叫西多就來了多士，叫雞扒撈丁就來了唔知咩撈丁，都知點做野，這位阿叔真係很超級! 好在d奶茶又真係幾好味，西多都唔錯，其他d阿姐又同我猛咁同我say sorry，咁先舒服番D。仲有呀，走O個時見到個阿叔將D通粉倒到成地都係，嚇到我拿拿淋埋單走人。下次......下次都唔使......

二人午飯時間在中環搵食，最後朋友介紹揀左蘭芳園落腳，排左一陣隊好快就輪到我地。我點左個心思思撈丁同咸檸七，而朋友就點左個豬扒丁同熱奶茶。麵底沒吃錯應是普通的大光麵，但配埋野味的雞翼、五香肉丁和蛋好好味，朋友的豬扒加埋D蔥油又係好香好開胃。要讚的平時不喝奶茶的我，試了朋友一口愛上了，沒飲過咁香咁清的奶茶，喝完口內還有一陣香味，值得一試呀！

食完越南0野, 愈0黎愈口渴, 0黎飲杯0野解解渴... 上星期飲了杯麻麻0地好飲的凍奶茶, 今次都係乖乖0地飲返熱的; 另加個咖央西多士(下午茶餐$23) 試試.熱奶茶如常地又香又滑, 我覺得係全香港最好飲的絲襪奶茶, 不可不試!咖央西多士賣相一般, 西多本身熱辣辣, 唔會好油, 都幾難唔好食; 金黃色的咖央一pat pat 的, 幾甜0下, 有幾濃的斑蘭味及淡淡的椰味, 唔錯.叫做試過咁啦, 不過肯定0既係, 今日之後, 再0黎相信只會飲熱奶茶了.

侍應態度差撈丁冇特別, 完全唔知點解佢可以拎黎做招牌, 咁都30幾蚊真係幾貴!咖央西多第一次有d新鮮感奶茶唔係特別好飲

又聽又寫又諗地過了3 個鐘, 2:00pm 落到中環又餓又頭痛, 0拿0拿臨入0黎叫個蔥油雞扒撈丁($36), 加個凍奶茶(加$2).凍奶茶先0黎, 依然奶味茶味50:50, 味道絕對無問題, 不過d 冰比上次更多(上次已經好多了!), 唯有飲得快d, 等佢無得沖得太淡, 睇0黎以後即使天氣好熱, 都係要叫熱奶茶先得了!因為有次0係隔0黎(新店) 食的心多多撈丁太唔好食, 一心諗住0黎舊店呢邊會好食d, 但原來係錯0既-- 蔥油雞扒撈丁賣相一樣求其, 雖然係招牌0野, 但雞扒好鹹, 好乾又幾硬, 蔥油落得太少, 唔係好撈得晒d 出前一丁, 認真唔得; 好在出前一丁叫做幾爽口.環境都係咁, 懷舊又幾迫夾; 招呼就無特別.埋單$38, 上次覺得肉赤, 今次都唔例外... 縱使係咁, 我相信我仍然會再0黎, 因為食了咁多次都依然未試過佢的咖央西多@_@ 唔知到時試過之後會點呢? 如果唔好食的話, 仲會0黎飲奶茶嗎?我都唔知.