英記老街坊 (已結業)

身為辣妺，因為好正嘅辣椒油決定寫第一篇食評😆上星期返娘家黃大仙，經過之前幫襯過嘅粉麵店，原來已轉左手，想食碗麵就入去試吓。 問夥計有乜嘢招牌，佢哋推介雲吞麵，仲話麵係自己面廠做，咁就一於試吓。講真雲吞就真係細粒啲，名符其實「細蓉」，但裏面既材料足，堅有蝦，冇乜豬肉，唔錯唔錯， 而湯底反而欣賞，因為比以前舊舖冇咁鹹，係會想飲多幾啖。而搭枱見到人食鮮豬潤麵，好似好好味，下次有機會想試下。但其實我最想讚嘅係辣椒油！如果鍾意食辣嘅朋友都知道，如果食粉麵唔可以冇辣椒油，估佢唔到喎，呢度嘅辣椒油真係得喎！堅辣！伙記話原來辣椒油係佢地自家製!去比$時，見到Cashier 原來有辣椒油賣，決定買兩樽，孝敬父親同買比自己！

入到去坐底先發現易左手⋯⋯⋯ 不過入黎都係想食碗麵姐就問有咩推介。個阿姐話清湯腩雲吞同豬手都出名，我就揀左叫牛腩雲吞米線，再加包魚皮。碗野黎到見個樣都唔錯，個湯都有清甜味，一食個牛腩就夠淋，雲吞都好爽口。雖然見佢加左1-2蚊價啦，但香港地仲食到30蚊碗清湯腩麵仲想點，下次會叫住呢頭啲朋友試下佢

果日去黃大仙按摩完想搵啲野食，見到門口張牌啲價錢幾抵就入左去。叫左碗清湯腩雲吞麵加紫菜，個麵好爽口無鹼水味（食開麵真係知道呢個真係好緊要）， 牛腩都好夠淋，要讚就係個鮮蝦雲吞，真係有鮮味！大食既我仲叫左炸雞翼呀個雞翼即叫即炸，差啲仲辣親個咀做人真係唔可以太為食呵呵呵呵我見好多男人入黎食清湯腩飯都大大碗！街坊店黎講真係值得再捧場，諗住下次按摩完可以試下個南乳豬手麵，仲有炸豬扒⋯⋯⋯ 坐我隔離果個姐姐仔叫左又係岩岩炸起，但飽得濟真係要等下次

前身係老街坊魚蛋粉，早在2016年開業時已經開始幫襯，手打魚蛋彈牙有魚香，雲吞蝦鮮肥肉少，豬手牛腩牛雜香濃入味，魚皮又脆又香湯底鮮甜，應該係用豬骨同魚煲成，所以一開業已成為我地既飯堂，因為實在太好味，每星期都要去食幾日最近見到易手，已覺得心知不妙，唯有入去試下，坐低後叫返之前老街坊食開既食物，牛雜河，雲吞麵，魚蛋河，魚皮，點知連基本既牛雜都冇，改為叫豬手撈，價錢比之前老街坊平均貴$1-2食物好快到，一上到枱，已經覺得唔對路，湯底已經唔再好似以前咁清，而且味精很重，雲吞裡面既蝦唔新鮮，應該用好多鹽同胡椒粉去遮蓋腥味，魚蛋似街外貨，唔再係前老街坊食到既味道，豬手好嚇人，豬手表面係被一pat pat橙色既汁包住，味道好怪，唔識形容，魚皮最正常，冇乜特別總括係如果唔進步，好難再會成為我地既食堂，因為比較前老街坊，實在相差好遠，希望前老街坊既老闆會再次開業