百里香 (已易手) 新餐廳

而家無帶飯，午餐日日出去食，梗係要搵啲好食又抵食既餐廳啦！今日又嚟熟食中心覓食，時常路過門口見到宣傳易拉架，多國菜式整集，有排試～店内環境乾淨，平實企理。諗住上去燒雞，竟然賣晒⋯⋯失望望住前面張枱三個女仔一人一份燒雞，仲要清晒無食淨，葡萄⋯⋯午餐$40-$45，有餐湯、蒜蓉包同罐裝汽水，抵！最後揀咗B餐，但牛肉換咗牛尾！先嚟湯同包～甘筍甜粟米湯聽到甜粟米，以為係甜的，原來係鹹的，偏濃味，似意大利菜湯既味道。蒜蓉包脆又香～英式啤酒燴牛尾配什菜飯第一次食牛尾～好大嚿！雖然有骨，但都幾多肉，肉炆得入味又夠淋，個啤酒汁味道與紅酒汁相似。肉有啲筋，咬落去feel到骨膠原，黏黏的；炆得淋，一啲都不會痴牙不過什菜就小啲，而青豆係數得到，得兩粒，哈哈～估唔到幾好食，仲要$43全餐，都真係買小見小。最後事頭婆(應該係，除非唔係)仲話兩點三後減$5！哇！收到！識做！有驚喜，抵食！好味！老闆/店員有禮，已經拎左電話下次要留定燒雞！#食物味道比起裝潢更為重要#喜愛小店#感受到句多謝係真心㗎！

上星期同個同事在觀塘附近做嘢行經熟食市場中心有人派傅單話新開張餐廳xxxx一望個餐牌，有燒雞，紅洒燴牛尾⋯⋯仲有幾樣但記唔起咩名個同事同意下，即刻上去一試好在有人帶路，很快到左1 F坐低，叫左1 份燒雞，一份牛尾原來個餐包埋湯黑松露咩咩忌廉湯-味道不俗，不似茶餐廳咁結身，黑松露味雖然不是很重，但也算滑反而個蒜蓉包就沒得頂了，一望個顏色，金黃色同埋很香的蒜蓉味，即刻放入湯，一啖湯，一啖蒜蓉包，爽呀。主角出場了，我叫的燒雞比我想像大隻，很香的BBQ 燒烤味，雞外邊有少少蕉，但內裏卻很Juicy, 唔會over cook 仲配埋署角。不知是否新開張關係，送埋罐汽水埋單45 我朋友叫左牛尾餐，埋單43 佢也話味道很好，入味又唔穌，是跟飯略嫌不夠大看出小店用心製作，值得一讚很不錯的小店，下次行經觀塘會再來。