45
6
3
港鐵銅鑼灣站 F1 出口, 步行約4分鐘 繼續閱讀
電話號碼
31051252
98560166 (WhatsApp)
營業時間
今日營業
12:00 - 22:30
星期一至五
12:00 - 22:30
星期六至日
11:30 - 22:30
*外賣最後訂單時間: 21:00
付款方式
Visa Master AlipayHK 支付寶 現金 八達通 AE 銀聯 Apple Pay BoC Pay 微信支付 PayMe
座位數目
150
其他資料
酒精飲品
自帶酒水
切餅費
加一服務費
以上資料只供參考, 請與餐廳確認詳情
食評 (61)
等級7 2024-01-18
1910 瀏覽
為食兵團近日發現利園三期地牢原來有間中菜館「淂記」,某網購平台會員可專享晚市七折優惠,閒日黃昏四點至八點仲有歡樂酒酒飲,收工可以直落唔洗轉場,蕃薯uncle吹雞即有十人附和,私人飲食助理當然係立即登記做會員啦!經商場內嘅正門進入餐廳,食客必先行落多級樓梯。小肥會建議大家從新寧道入口搭𨋢落去,安全方便得多。「淂記」室內面積堅大,除咗私人廂房之外,用餐大堂都分好幾區,洋式嘅裝潢及合拼式餐枱似係咖啡廳多啲。酒鬼們五點鐘先喺高半層嘅酒吧區暢飲歡樂頭輪。主飲品牌共有九頁。人多最抵就係點選指定樽裝紅酒或白酒,因為打完八折仲送兩客酒吧歡聚小食。小食最平都要$68/客,即係慳多百幾蚊㗎!脆脆薯條($68):粗粗肥肥嘅薯條新鮮炸出,外脆內腍。椒鹽魷魚鬚($68):小食層炸皮就好香脆,無奈魷魚鬚本身偏韌,牙力唔夠的話唔好亂咁試。乾煸豬大腸($68):食落麻多過辣嘅豬大腸仍有少少餲味,個人並不推介。晚市散點餐牌共有十頁之多,中英對照,並附插彩圖,簡單易明。茶位費$20/位;前菜$22/碟。每個位都有齊備嘅自用餐具。馬蘭頭百頁千卷($80):以百頁包捲住嘅馬蘭頭清新爽嫩,一口一件極易入口,完全唔會食得好遴迍。香芒沙律蝦球($198):唔知係蝦球層炸漿過厚定係黏上嘅沙律醬汁過多呢,蝦隻偏腍同濕,毫不爽彈,敗筆係個芒果味好似芒果布甸粉開出黎咁假,堅食唔過!烤北京填鴨($230/半隻;$450/隻):請留意,鴨鴨只有一吃,原隻叫的話個鴨殼係可以包走嘅,環保人仕可自備大盒,唔係就要收外賣盒或外賣袋錢。北京填鴨皮脆肥膏少,鴨肉柔軟香潤,招牌菜差不多枱枱都有點。十一人其實點咗一隻鴨,但因長枱難夾餸,Apple妹妹就細心安排咗廚房分兩盤上,下圖為半隻嘅份量。雪花日本松葉炸蟹鉗($78/位):脹卜卜嘅炸蟹鉗個蝦膠爽脆富彈性,真係打得好靚,無奈入面隻蟹鉗未為最鮮嫩,有少少似雪藏貨,不過$78再有七折真係冇得投訴。冶味蘿蔔糕蟹($380):席上嘅隱世廚神狠批菜式要用辣醬黎炒全因蟹蟹毫無鮮味,師傅應該係想個辣味可以遮蓋到,拌配嘅蘿蔔糕仲好黐口,完全唔掂檔!珍珠川椒雞($118):舖面嘅川椒葉芳香清脆,可惜啲雞肉出哂事!兩碟雞肉加埋都唔係好見到有雞皮嘅蹤影,黑肉白肉嘅肉質同樣乾嚡,老人家直頭想退貨。威士忌東坡肉($198):火焰上陣嘅東坡肉夠哂熱辣辣,溶喺口嘅五花腩肉腍滑非常,食落又唔會覺得好油膩,唯一冇人食得出有任何威士忌味。淮揚雞火煮乾絲($168):大家對雞火煮乾絲嘅意見不一,有人讚個湯夠清,亦有人話唔夠雞味,睇價錢做人嘅XO仔就嫌雞絲份量偏少,唔知個餸係咪貴在啲火腿絲呢?!嫩雞煨麵($78):好少見到嫩雞煨麵有咁多湯,因為通常隻碗冇咁大,啲麵又索哂啲湯。要讚嘅係碗中嘅麵條軟腍得黎完全冇糊埋一團或者係發到過脹,不過個湯底有少少苦,入面嘅菜粒同雞肉好似少咗啲。灌湯小籠包($88/六隻):小籠包皮薄餡軟嫩,而且都好夠湯汁。一客有六隻,中間一點紅嗰隻用上紅菜頭汁醃紅咗層皮,據悉係設計者想令賣相突出啲嘅手法而已。高力豆沙香蕉($68/五件):甜品熱力欠奉,相信因為個蛋白打得唔夠鬆,所以食落好似麵包咁實,加上餡心嘅香蕉量少,大人細路都話唔合格!楊枝甘露雪糕($38/位):正宗地選配芒果雪糕嘅楊枝甘露不單香甜滑溜,仲要係少少酸味都冇,大肥爸爸大讚此乃整頓晚餐之最,必吃也!銅鑼灣名牌商場新店「淂記」面積寬廣,環境企理,服務生誠懇好客。餐廳所提供嘅菜式集合咗不同種類嘅中菜,當中仲混入咗不少新潮元素,質素的確甚為參差,不過平均每人四百幾蚊由歡樂時光開始飲,仲包埋晚飯喎,價位好難有太高嘅要求囉,睇得出點解要用七折吸客嘅,所以結論係一試無妨嘅OK評,希望廚房團隊可以俾多少少心機作出改善。 繼續閱讀
等級6 2024-03-02
945 瀏覽
冬至大過年。雖然去年下半年疫情已經差不多完結,但始終只是解鎖沒有多久,部份香港人仍然有所顧忌;今年才是正正式式解除疫情陰影的第一個冬至,市面很多餐廳一早已經 full booking。實在始料不及,訂枱遲了;沒有太多選擇的情況下,揀了京滬菜餐廳【淂記】。室內裝修風格介乎傳統中菜館及新派西式中餐廳之間,用色沈實、低調、高雅;雖然並非精雕細琢,但也不是傳統中式酒樓的土氣光猛鮮明,感覺相當良好。不過,餐枱之間的空間就略為侷促;幸好,所有客人都相對斯文,談話聲音唔高,否則,可能會有點嘈吵。雖然係冬至,竟然可以選擇單點餐牌!外出食飯,尤其中菜,一向不太喜歡揀套餐,通常單點。其一,套餐價錢未必真的便宜很多,但就全部指定菜式,未必樣樣喜歡。其二,主餐牌單點可以選擇特別鍾愛的菜式。本來當晚也想從主餐牌全部單點,但四人套餐的菜式竟然相當合心水,更難得逐位上菜的菜式可以按人頭追加!決定揀選冬至節日套餐(4位)($1480),另外再從主餐牌追加特色菜餚。差不多所有香港中式酒樓必有的餐前小吃,意義其實有點似加一服務費以外的額外小費。稍為高級的酒樓的餐前小吃就會特別一點,並非普通的脆花生或者酸蕎頭。【淂記】的餐前小吃($22 / 碟)係切粒豆卜及小黃瓜,算係有點特色;味道中規中矩,一般而已,本來以為收這個價錢會好味一點。頭盤涼菜三小碟:陳年紹興醉雞、麻香青瓜拌海蜇頭、香煎素腐方 醉雞酒香味道幾好,但雞肉就浸到有少少粗嚡。香煎素腐方夠香口。最好食係海蜇頭,非常非常爽脆;配搭新奇的麻香口味,有新意,值得一試。烤北京填鴨(半隻) 採用皮肉分開片出嘅風格。皮脆肥膏少(估計上枱前廚師將多餘肥膏皮走)、鴨肉就略嫌未夠柔軟多汁。由於皮肉分片,感覺上份量偏少。唔算係最好吃嘅北京填鴨,但就係中上水準。另外,填鴨只有一吃;如果點原隻填鴨嘅話,可以將鴨殼打包取走。肯定有客人只點半隻填鴨,又或者不取走原隻鴨殼。廚師絕不浪費剩餘物資,就炮製了上湯花膠雲吞鴨湯。長枱很難舀湯,侍應分開一碗碗上。每碗湯都有一小塊花膠、一隻上海雲吞及一棵小棠菜。花膠當然唔會係靚貨,但都算有膠質、亦有少少咬口,不過就炆得未夠軟。奶白色嘅湯底就很好味,有濃淡適中嘅鴨香;比起傳統嘅上海雲吞雞湯更好味。雪花日本松葉炸蟹鉗脹卜卜、又炸夠金黃,只嫌表面的麵包糠黏得未夠緊緻,稍為影響了賣相;不過,選用松葉蟹鉗就非常聰明,窄長外形及長身蟹鉗腳尖,對菜式賣相有很大幫助。蝦膠打得很好,爽口彈牙;中心的松葉蟹鉗雖然有鮮味,但未夠甜。原來單點只需要 $78 / 位,那就好肯定松葉蟹鉗只係日本百貨公司超市都有得賣嘅一盒盒雪藏貨;但只要這個價錢,味道又相當好,好難有不滿。玫瑰鱈魚,另外追加了兩件($88 / 位)。鱈魚魚味稍淡,優點在於有油香及細嫰滑溜肉質。初時見到鮮橙紅色的外表,實在有點嚇人,原來只不過是味道稍稍帶甜的醬汁。燒汁和牛柳粒選用澳洲和牛,配搭爽口的沙葛用帶甜日式燒汁爆炒。澳洲和牛的紅肉比例雖然已經較(日本純血和牛)高,但始終有相對(本地黃牛肉)較多的脂肪,用中式爆炒方法烹調總覺得未能帶出油香之餘,反而多了一層油包著牛柳粒,不太好吃。個人口味始終較喜歡中式爆炒用本地黃牛肉,和牛還是應該配合韓燒或日式燒肉。避風塘龍蝦($388)選用加拿大龍蝦,少少麻、少少辣度,適合大部份香港人口味。龍蝦肉一貫爽口、彈牙、鮮甜,配合港式避風塘口味,同避風塘炒辣蟹有異曲同工之妙,優勝在沒有食蟹般麻煩。正!梅菜炒菜心($118)切走菜葉、搣走菜莢,只留下菜遠,清甜冇渣。配搭鹹香的梅菜本來很理想;但甜梅菜太甜,欠缺鹹香風味,亦太腍身,缺少了梅菜芯的爽口。灌湯小籠包(6隻)($88)賣相一般,外皮略偏厚;豬肉餡料亦太多,反而湯汁太少。好吃的小籠包不需要太多餡料,好味的湯汁更重要;偏偏調味一般,湯汁未夠好味。中間一隻紅色皮的小籠包味道沒有分別,相信只是將外皮染色,搞掂小花臣。套餐菜式蟹粉小籠包有同樣情況:豬肉餡料太大嚿,湯汁比例太少。吃得出有少許蟹粉鮮味,但蟹黃份量唔夠多,未夠香。估唔到套餐都會有蛋白杏仁茶。雖然這碗糖水等了20多分鐘才送上,但都算等得有價值;杏仁磨得幼滑,香氣濃郁,甜度適中。餐廳雖然面積唔算太大,但也不算細小。不過,整晚只見到四位侍應,並已經包括餐廳經理;根本未有足夠人手服務所有客人。甚至廚房也有點混亂,上菜次序完全亂來。竟然係炒菜最快,之後就係湯,然後就係小籠包;頭盤涼菜竟然在中段才出現、之後才陸續端上其他主菜。最後的甜品竟然等了20多分鐘才送上 ⋯⋯ 整體服務水平有很大的改善空間。埋單時問侍應,才知道原來又係「美心集團」旗下!出品質素唔算特別出色,勝在平平穩穩、不會有令客人失望之處 ⋯⋯ 果然係大型餐飲集團水準,夠穩陣。 繼續閱讀
(以上食評乃用戶個人意見 , 並不代表OpenRice之觀點。)
等級1 2024-04-07
444 瀏覽
不如唔好再介紹呢間野啦服務差別對待到一個點啲waiter 叫極都叫唔到叫菜毎樣野要重覆幾次先mark 到短短兩個鐘內打爛野2次餐廳佈置真心唔明點解收銀係正中央都算 我哋都有早兩日book 枱安排我地坐正收銀前面個張Waiter 企係個收銀枱到咳??入面大把位 留比啲遊客/外國人坐食物你問我隻鴨就真係對得住佢個價錢既但唔係真係令你好驚艷其他食物都正正常常但試左個黑松露炒帶子啲帶子係”鞋”既 上菜速度慢價錢用app 有七折 折後價錢尚算合理 3個人加埋千一 但係唔夠飽 繼續閱讀
(以上食評乃用戶個人意見 , 並不代表OpenRice之觀點。)
等級4 2024-03-26
481 瀏覽
今日準時放工,可以和屋企人食晚飯。這間店裝修時尚,充滿現代感,加上昏黃燈光和節奏音樂,一點也不像吃烤鴨的地方。二人套餐$298/1位紫甘藍雞絲拉皮拼紅蜇頭這雞絲粉皮真好吃,雞絲軟嫩,配上青瓜絲,麻醬味道濃厚、味道甘香,口感滑溜,加上滑滑嘅粉皮,好味道。紅蜇頭爽口柔軟,味道清爽。乾燒波士頓龍蝦半隻這波士頓龍蝦份量十足,啖啖肉,彈牙又鮮美,加上紅燒汁的甜酸蒜香,-點也不辣,惹味可口,正!烤北京填鴨半隻北京填鴨已經去肥,鴨皮又薄又脆,鴨肉柔軟,加上甜醬、香蔥、青瓜和砂糖等,豐富的味道,好吃!上湯蒜片油麥菜油麥菜爽口清新,加上充滿蒜味嘅上湯,味道鮮美,這道菜素而不寡。牛肉餡餅這隻牛肉餡餅餡餅皮十分酥香,完全不油膩,牛肉餡料爆汁,超級juicy, 加上淡淡嘅芫荽香,熱乎乎的,真好吃!蛋白杏仁茶杏仁茶好香滑,奶白杏香的滋味,還有滑溜旦白,輕甜健怡口味,十分滋潤。 繼續閱讀
(以上食評乃用戶個人意見 , 並不代表OpenRice之觀點。)