洪記麵家 (翠怡商場)

營業中

休息中

食過一次牛筋撈粗麵好正，好多牛筋，粗麵都好多好足料，菜心好新鮮我選擇咗蠔油，環景中規中舉，感覺其他嘢應該都唔差，有機會會試埋佢嘅魚蛋牛丸水餃雲吞，平民食堂！食完可以去碼頭吹吹風！

牛三寶飯（$60）包熱飲一杯，牛三寶有牛筋、牛肚、牛腩。・牛筋，有三條，入味，口感膠膠哋，夠腍得嚟又有啲𡁻口。・牛肚，係金錢肚，有五片，同樣入味，爽口彈牙。・牛腩，有三舊，偏瘦無咩肥膏，所以食落有啲嚡，但好在唔痴牙。滷水汁夠味，唔太咸。

#搞串個pantry又嚟到#青衣 啦❤️！！今次唔想堂食，就叫咗外賣，間舖頭係啲街坊屋苑商場入面🛍️，係一間粉麵店🍜，無乜油膩煎炸嘢食，清清淡淡👍🏻。呢間麵店平日閒日都唔會話爆滿，而外賣嘅速度都好快。🏃🏻💨雖然話係麵店，但係今次就好百厭🐒咁嗌咗個淨雲吞(外賣$36)😂✌🏻，試唔到佢啲粉麵有幾厲害🫣。成碗淨雲吞🥟總共有7粒，比起叫雲吞麵嘅雲呑份量多，但係如果好肚餓🤤嗰陣食就未必夠飽喇，因為始終無咗粉麵主食。而每隻雲吞都好飽滿，蝦肉🦐同豬肉🐽比例各佔一半，保證啖啖都食到彈牙蝦肉！最特別嘅係隨餐附送嘅自家辣椒油🌶️，一打開就聞到一陣非常濃郁嘅魚介味🎏，類似日式沾麵嗰種濃郁嘅香味。強烈建議大家將辣椒油嘅渣加入本身冇乜味嘅湯度一齊食。😋🥳

返工成日都係食呢間，今次終於記得寫食評每次都係叫牛腩飯加熱奶茶，盛惠$51外賣返到公司大約10分鐘開出黎都仲係熱辣辣既牛腩睇落偏瘦有塊根喺底，食落軟淋，又唔會痴到d牙都係，味道亦好適中，唔會太重味精感覺，份量有6-8舊都算合理而牛腩下面係生菜底，吸晒牛腩湯既精華，非常入味👍🏻👍🏻👍🏻連平時小食呢d配菜既我都會食晒而個湯汁撈飯真係岩岩好，每次都會清得乾乾淨淨最後杯奶茶就中規中矩，茶味唔係特別濃，但都算幾滑

【葵青區】【洪記麵家】去青衣運動場睇波，港超聯今屆中遊份子實力相近，場面非常好睇。連一向嘅魚腩部隊港會都踢出超水準，甚至擊敗過勁旅東方。最重要嘅係，港超聯係屬於香港嘅聯賽，我哋香港自己人都唔去支持嘅話，搵邊個嚟支持呢？不過由於工作關係，我都冇可能場場出現，有時間就到場支持咁啦。個人好喜歡晉峰嘅西班牙籍教練艾斯達維嘅風格，盡量都會去睇嘅。而晉峰嘅主場就係青衣運動場，亦都促使咗我今次入埋青衣食嘢，之前其實都係咁嘅。今次嚟到翠怡商場，呢啲屋苑商場唔大，不過點都有啲非大集團小店。呢頭最出名係外圍間太興，因為有海景。但係我唔係為呢樣，就入商場裡面食。嚟到呢間麵店就先食 $51 嘅「崩砂腩牛雜河粉」，唔差喎啲腩，幾好食。但係啲牛雜就普通啲，而且偏少，每樣得一塊，牛肚多少少咁解。相比之下，啲崩砂腩就正好多，順滑又重牛味嘛。想寫多少少嘢嘅我，叫多碗 $43 嘅「淨五寶」，淨食唔配麵就食得晒嘅，我當呢樣嘢係港式關東煮嘛，仲好食啦。咁佢有墨魚丸一粒，魚皮餃、魚片頭、貢丸、魚蛋各兩件，即係九件嘢，加生菜墊底。前兩者幾好食嘅，其他就相對平庸，整體唔錯啦。飲「凍檸茶」走甜用咗 $8 都係合理，成餐用咗 $102

午餐，想食牛腩。呢間麵家開左響翠怡都接近兩年，做死左隔離間車仔麵，捱過左疫情，都算唔簡單。點左碗牛腩餛吞河。牛腩都蚊得幾入味，不過好韌，要用力咬同咬好耐都吞到落肚，雖然味道唔錯，不過口感真係扣好多分。個餛吞就唔錯，加8蚊雙拼有兩粒，而且幾大粒，算係良心價。入面有一隻蝦仔，一d葉得剛剛好的豬肉，味道真心係唔錯，👍🏻！至於個河粉份量都足，作為lunch夠包，而且唔會索曬水，幾有咬感。總括黎講係中規中矩。跟餐被咖啡就係茶餐廳的正常味道，可惜我叫左少甜，都係覺得好甜，扣曬分。最後附上餐牌給大家參考。

搬遷離開翠怡那麼久，這天回去才發現原來多咗一間牛腩牛雜粉麵店😧這是10多年來，青衣碼頭這邊都缺少的牛腩牛雜粉麵。於是試一試牛腩墨魚丸米線，米線份量都相當之多，即使用透明器皿分開裝，米線也偏向軟林；牛腩份量非常多，雖然中間都有些皮，不過還是偏瘦，很難不會吃到痴牙。不過以30多元單拼來說，這個份量的牛腩，都已經算是大件抵食，大概8至10嚿，只有兩嚿肥瘦均勻，其他都是偏瘦；墨魚丸更加離譜，加了$8轉做雙拼，只有兩粒墨魚丸，好像太昂貴了吧。不過以它牛腩的份量，也還是可以接受， $44叫做有個雙拼米線，即使不包括飲品，可能都會平過下面生活知味或是太興吧。

過年幾日食得太豐富，今日想食清啲，所以去洪記麵家食碗粉麵。餐牌上大部份粉麵都係每碗$35,我叫了牛筋米同埋加$6嘅熱檸水。牛筋嫩滑又腍，夠味又不會太咸。米粉大大碗好夠食。

肥仔食粉麵偏愛食牛什，因為第一次食嘅餐廳，牛雜伏極有個譜，幾個餸，總有一兩樣唔會太差嘅。咁講返今次食嘅呢碗牛雜河啦，先講下個面底，河粉啦我覺得就唔能夠太厚同埋呢要玩，咁先至好味嘅，呢方面呢佢只能夠算係一般。至於湯底方面呢，唔酸濃郁亦都唔太香，所以唔落辣椒油呢就唔算太夠味喇。咁就要睇吓佢嘅辣椒油啦，都算香而且呢夠辣嘅，就為呢間餐廳呢加返少少分。最後呢就係送嘅方面啦，牛肚就偏多，其他腸阿肺呀膀呀每樣一舊啦， 講真食落去呢腸就唔算肥，而其他各樣都係普通啦，唔能夠話好出色只係不過不失咁。如果食個嘅話呢碗麵都算合格嘅。

青衣區好少嘢食 所以成日落街都係求其買碗譚仔今次試咗呢一間㓋記麵家覺得佢優勝嘅地方淨係在於佢價錢夠平😵‍💫首先講佢牛腩。味道係唔差嘅，但係質地非常之老，食落口會痴牙。魚蛋未試過，可能下次試吓。但係最嚴重嘅係湯底，我每次都要自己再落好多嘅辣椒油同埋豉油先夠味🥺希望餐廳可以改善下湯底嘅味道！但係可以一讚嘅係 佢可以打電話叫定外賣先！同埋11點前叫有嘢飲送～😙😙😙😙

今日中午無食lunch, 落樓下翠怡商場，洪記麵家試吓，之前都想試一直都未有機會，今日機會來了.入到捨甫頭光猛乾淨企埋.無乜人因已經是四點幾，今日叫咗牛什面，西生菜，凍杏霜.。 碗面size 適中，首先試吓湯底美味.然後爽脆牛什，牛什入味，牛肚爽口我平時唔食腸，都破格試下食一次，非常軟香，一點也不會肥，講到麺底就爽滑彈牙，真係值得一試，最後西生菜都非常可口，感謝主賜給我一歺美味的午餐。我下次一定會再來幫襯，試吓其他美食我

鳳城水餃大隻又足料（$35）一碗有5隻，唔計算皮嘅部份，個餡差唔多有半包紙巾咁大仲有幾條生菜送，宜家好少有一碗麵或餃子送幾條生菜嘅麵檔檯面仲有紙巾，好難得連熱飲埋單$41

終於有間新粉麵店開張，價錢和份量當然同荃灣無得比。在此開餐荒島上，有新店又過得去，已經非常萬幸。外賣餐盒將湯料和河粉分隔，回到家食落口時，真有點像堂食的感覺。河粉份量正常，口感也算滑，又無黏在一起。韭菜餃也有韭菜味，只是份量只有三粒。當早餐或下午茶還可以，正餐連女士也可能覺得不夠飽。湯就清淡了一點，老人家飲了也不會怕油膩和超標😅。早餐時段（早上7時至11時）送餐飲一杯，雖然是即沖飲品，但杏霜也不是水汪汪，飲得出有杏仁味。如果它們想長做下去，首先要改善上湯，最好落點大地魚粉。其次，餃子類份量最少也要有四粒。