果子｜海南雞飯·喇沙摻摻 外賣專門店

營業中

休息中

今日去大角嘴澳海城入貨，因為記得之前朋友介紹富榮花園有間海南雞不錯，價格又平民…於是今日順路去試吓🥰 果子外賣店｜海南雞飯·喇沙摻摻 是一間外賣小店，食物選擇也不少⋯⋯無骨海南雞跟湯$40，份量不少，無骨海南雞件肉質鮮嫩，而且肥瘦適中！$40扺！ 海鮮喇唦摻摻$53，有2隻鮮🦐，4隻蜆，半隻雞蛋，3粒魚蛋，豆卜等…. 湯是另上，所以外賣不怕😜 喇唦湯底濃郁又惹味☺️串燒牛$20有2串，牛肉質不鞋口，醬汁好惹味！

富榮花園有好多食雞嘅鋪頭，當中有一間評分好高嘅外賣小店，我當然要一試究竟啦。招牌已經大大隻寫住 海南雞飯同喇沙摻摻，可見佢地對自己招牌產品信心十足!🐥海南雞飯$40有交易，下午茶仲有平啲，相當抵食。摻摻都好多網站推介。我叫咗🐥無骨海南文昌雞飯，🍜豬扒喇沙摻摻，南乳雞翼2隻同埋雞沙爹2串，埋單都係$137，價錢十分公道。首先當然要試海南雞啦，唔好睇海南雞外表平平無奇，但食落雞肉嫩滑但唔肥膩，已經去骨可以放心大啖享受。雞肉味濃，無論配上薑蓉、醬油、辣醬都唔會被蓋過，反而相得益章。油飯亦有油香咸味，如果粒粒分明會更加好。隨飯奉上雞湯實左太抵了。🍜豬扒喇沙摻摻一開看到赤紅濃湯以為好辣嚇到了。誰知一試入口的不是辣而是濃濃的🦐蝦味和椰香，喇沙加上魚蛋豆卜十分美味。反而擔心的辣道只有微辣，適合我呢啲怕辣嘅人，好辣嘅朋友相信要加辣了。🌶🌶🌶油麵同米粉分隔奉上，食時再加到湯，唔怕太淋，兩者一陰一陽口感層次豐富，掛上喇沙湯不知不覺間已經食完。香茅豬扒味道唔錯，豬扒軟淋而味美。南乳雞翼🍖外層有南乳味，再經過煎香外皮十分脆。沙爹雞串上鋪滿了花生碎，食落醬汁甜加上花生香。🍗性價比非常高的一餐，附近街坊十分幸福，

今日又嚟附近屋苑做嘢，之前食過呢間餐廳嘅海南雞飯，覺得好味道，今次又嚟做野特意試埋佢個喇沙，同樣係好好食！而家疫情犀利，買咗呢間外賣店嘅食物，之後就去附近公園食。之前試過海南雞配油飯再加左串燒：海南雞非常嫩滑，雞皮Q彈有少少啫喱口感，雞肉味濃而且份量十足，無骨又食得方便，油飯比白飯更香口，好好味！ 重點係個價錢真係好抵，讚！$20 加左2串沙嗲牛肉串燒，個沙嗲醬好有驚喜，估佢唔到咁好味，沙嗲同花生醬味互相輝映，絕對係高質素沙嗲醬牛肉唔會鞋口，真係後悔只係叫左2串！今次要左香茅豬扒喇沙摻摻加薯絲蝦，救命，又係勁好味！相比下喇沙更令我難忘，畢竟喇沙唔係咁易整得好味個湯底。 呢到喇沙湯底好有層次，唔會單一，又唔會太辣太咸或太油，仲有跟左豆卜同白魚蛋，正宗得佢呀，真係好鐘意！香茅豬扒醃同煎得香口，又夠大塊啖啖肉，好食！薯絲蝦炸得夠香脆，一絲絲薯絲好有口感，呢餐真係太令人滿意！

以前係太和食過一間星馬菜，印象幾好👍🏻早排問返朋友先知原來果間叫果子，係區內都好出名。😎然後竟然俾我發現九龍區原來都有果子！不過只係得外賣，無堂食。😢今日有機會去大角咀，決定買個外賣返屋企回味一下先😋😋😋係奧海城後面一直行，過咗個巴士總站就到。雖然淨係做外賣，但舖面都唔細。餐牌就無本家咁豐富，不過好食同我想食嘅都有齊😋有飯有小食有飲品都係$54，真係好羨慕附近啲街坊😭學生仲有九折，真係抵到爛啊原來仲有同OpenRice合作，叫咗餐先睇到，唯有留返下次再用🥲認真推薦佢個無骨海南雞！！雞味好清爽，唔會太肥，啖啖肉，真係好好味🤤佢啲雞唔會好肥，厚肉但超級滑！👍🏻👍🏻👍🏻另外仲叫咗個撈麵，原來係撈呢隻油麵，都幾特別👍🏻👍🏻👍🏻仲叫咗個無骨鳳爪，成餐都無骨真係爽😎

夜晚約咗去朋友屋企睇世界盃，順便買飯上去食，搵到呢間果子外賣店。海南雞飯跟雞湯油飯($40): $40有海南雞飯加個醬仲有雞湯送埋真係抵到爛，而且質素都唔差，都夠鮮嫩，飯都唔係hea做，油飯份量都俾足。香煎豬頸肉喇沙摻摻($53): 香煎豬頸肉有6 塊，而且湯底仲有三粒魚蛋同豆卜，喇沙湯底好夠椰香味，而且都好濃郁。摻摻湯麵有油面同粗米粉/線，仲有好多芽菜，好扺食! 粟米墨魚餅($12):墨魚餅比想像中細，食落都正常，點埋佢跟嘅甜辣醬就啱啱好。白雲酸辣鳳爪($16):有六舊，一開個已經聞到酸酸辣辣嘅味，識落好入味，而且洗得乾淨。總結：位置比較偏遠，始終唔係大街，都係做街坊生意，但係咁嘅價錢同份量絕對抵食！見到佢下午茶仲要係$35 ，糧尾首選。🥹

果子無骨海南雞飯 跟油飯 $40附送的冬瓜薏米雞湯，估唔到又幾濃喎！唔淡，唔馬虎，仲有消膩袪濕功效～ 無骨海南雞，肉質嫩，啖啖肉、有口感！ $40好抵食！油飯有雞油香～帆立貝喇沙摻摻 $65有4隻蜆、3件帆立貝、1隻蛋，都幾抵食！喇沙，有味道層次，掛麵，味道偏向白咖哩湯底口味，惹味濃香的中小辣配合少少椰奶香～值得一讚是店家的外賣碗會將湯底和粉麵分隔開，即使住得比較遠都唔怕外賣回程途中粉麵會因吸湯而變淋影響麵質～ 仲唔洗加外賣盒錢添！香煎豬頸肉 $28豬頸肉，入味，煎得香口～有厚度，唔係薄薄一片！而且$28有6-7片，抵食！沙嗲雞串燒 (2串) $20串燒可選 雞/ 牛/ 豬，2串需為同款，不能混搭～雞串燒，肉質嫩，燒得焦香，唔乾身，仍留有肉汁。 沙嗲醬，味道甜甜哋，滿滿粗粒花生碎，花生味濃郁_______________果子｜海南雞飯·喇沙摻摻 外賣專門店 (大角咀)大角咀海庭道16號富榮花園二期4座地下E號舖_______________

突然好想食海南雞 於是去左附近打包🤣呢間鋪頭雖然專做外賣 但地方都幾闊落除咗出名嘅海南雞飯 仲有其他飯可以選擇粉麵有分湯麵同撈麵亦有唔同小食見佢有一人套餐都幾抵食 $54有唒小食主食同野飲野飲方面主要係支裝同罐裝我地落完單好快已經整好出左黎👍🏻海南雞飯有兩款 我地叫左文昌雞😍聽講文昌雞係廣東八大優良雞種之一 食落果然唔錯 超滑👍🏻三個醬汁都好夾另外仲有一碗冬瓜湯仔❤️真材實料喇沙摻摻入面有油麵同米粉 食落口感唔錯 湯底亦好香👍香茅豬扒夠入味 另外仲配埋芽菜 彈牙魚蛋 豆卜 雞蛋 好豐富小食拼盤好抵食 包括南乳雞翼 絲網春卷 香脆吉列蝦 香辣魚餅😍魚餅香菜味好出😍炸物脆得黎唔會好厚皮

雖然今日係weekend 但趕住番去睇世界杯 又吾可以hea 食 見到呢間 海南雞飯同喇沙 comment 唔錯就買番去試下海鮮喇沙 摻摻 湯同麵、海鮮係分開裝拎到番去都吾怕變晒樣 蝦有兩大隻 蜆有4隻 仲有芽菜 、豆卜、 魚蛋 、半隻蛋做配料 一路食都唔會覺得dry 湯底方面 喇沙味做得幾足 但唔會太濃味 我覺得岩岩好 食完係會再想食既 果子海南雞飯 跟雞湯 油飯 招牌野當然要試 海南雞好滑 價錢平 份量多 cp 值好高呀見小食好抵 叫左兩個小食試下白雲酸辣鳳爪 酸酸地 好開胃 沙嗲豬肉串燒 （2串）好惹味 $10 一串黎講 十分抵 仲有下午茶 同一人套餐揀 值得再encore 呀

去完大角咀富榮花園探望朋友，在車站等車時，見到一間外賣小食店專賣星加坡菜、馬來西亞菜， 好耐都冇食這風味的小菜。加上有少少肚餓，不如買啲外賣返屋企食。香煎豬頸肉喇沙摻摻，喇沙湯底超濃郁、超好味，有椰子嘅香味，小小嘅辣味，湯本身已經有好多嘅豆卜、彈牙魚蛋，加埋啲爽口豬頸肉，味道真係非常之夾，而且份量都好大，真係一個人都食唔曬呀！ 無骨海南文昌雞飯，又係一個唔錯嘅選擇，雞皮好爽，雞肉好嫩，食雞時有薑油、甜豉油、辣油一起食，任君選擇。加埋個雞油飯，真是無得頂，這個飯都好大大份，還有個冇味精嘅雞湯，湯好清甜，又冇雞油，真係絕配。一個小食真係要推薦馬鈴薯炸蝦卷 ，佢用啲薯仔條卷住啲蝦嚟咋，食起嚟好香脆，可以點啲泰國醬汁 一起吃，會更加惹味。 加埋個森巴通菜，真係一個完美嘅一餐。

今日路過見到呢間餐廳見到佢啲價錢好抵門口又乾淨企理仲對老人家學生好好會俾個九折就去幫襯下啦飯、麵、小菜、小食、飲品應有盡有放工加餸都係一個唔錯嘅選擇我買左個果子無骨海南雞跟油飯店員話對比起海南文昌雞飯相對會肥啲滑啲食落又真係咁樣 油飯亦好香！湯又唔會太鹹 ，幾okay呀！香煎雞扒喇沙摻摻係油麵加米粉最鍾意油麵加米粉嘅組合口感好好！雞扒份量都好多 放得好整齊煎嘅時間掌握的剛剛好所以都好滑唔會乾唔會鞋湯都幾有椰香入面有跟幾粒魚蛋同豆卜一次過滿足幾個願望！小食方面我叫左個馬鈴薯炸蝦卷同埋白雲酸辣鳳爪炸蝦卷出面好少有好脆好好食蝦味都幾出冇啲麵粉味 幾好幾好至於個白雲酸辣鳳爪係無骨㗎仲有成六件！味道係有融合到（試過有啲係鳳爪冇味 個汁同鳳爪味係分開😅）呢個價錢真係好抵食！經過一定要幫襯！

今日去富榮花園探朋友，午飯時間她留我吃飯，話去樓下買外賣請我食。我們一起去果子外賣店買海南雞飯和喇沙掺摻，朋友話她時常幫襯，因好食又性價比高。我們買了一份無骨海南文昌雞飯跟雞湯，帆立貝喇沙滲滲和兩份小食。無骨海南文昌雞飯($50)份量足，雞皮薄肉鮮嫩有雞味，口感佳，點埋薑蓉，黑醬油和辣醬更滋味。飯可揀油飯或白飯，因為減肥揀了白飯，油飯相信更有風味。可以揀雞髀或雞胸，加$10。湯有冬瓜，不錯。帆立貝喇沙渗渗($65)惹味，湯香濃微辣開胃，米粉加油麵和芽菜吃落有口感，白魚蛋爽脆，豆卜吸滿湯汁好和味，三大隻帆立貝和數隻花甲鮮味，還有半隻熟蛋。沙嗲豬肉串燒($20)好味道，沙嗲醬花生粒香甜，一份兩串。香煎豬頸肉($28)也不錯，入口香，有咬口。此街坊店份量足，抵食好食，兩份夠三個人吃。

我朋友住係旺角富榮花園，佢話係富榮花園二期四座地下E舖嗰間「果子」外賣店主打海南雞同喇沙嘅食物好好食，同埋話價錢好抵，鍾意食嘢嘅我今日專程去買嚟試吓。去到見到舖頭光猛乾淨，餐牌上都有好多種選擇，見到樣樣都好想試，今次買住果子海南雞配油飯跟湯、海鮮喇沙摻摻再叫兩個小食森巴通菜同喇沙豬肉串燒（2串）！果子海南雞配油飯跟湯 海南雞雞味濃郁且肉質嫩滑可口，皮薄爽滑，且已經去骨方便食用，再附上泰式酸辣醬汁、豉油汁、薑蓉汁！油飯夠香且不會覺得油膩恰到好處，至於個湯飲落有冬瓜同雞味，清甜唔會油膩！海鮮喇沙摻摻 湯底有蝦香、椰香、濃濃香料味道入口順滑，超正 材料都好新鮮同豐富，有爽滑魚蛋、豆卜、蜆肉、蝦🦐重有半隻熟雞蛋，米粉不易斷，油麵滑而煙靭，超好食餐廳好細心架將湯同摻摻分開，吾會浸淋啲米粉同油麵！森巴通菜 通菜份量不少，加入森巴醬炒嘅通菜有少少微辣，非常爽脆好有風味沙嗲豬肉串燒 豬肉一啲都吾乾有肉汁，再配上惹味濃郁的沙嗲醬令人回味無窮

到底是誰發明了禮拜日都要返工！！真係好需要放飯食啲好嘢慰勞吓自己同同事兩個人趁老細唔喺度，早啲出去兜個圈睇吓有咩好食，咁啱就行到去富榮花園，見到無論菜式定價錢都好吸引，就呢間啦！事不宜遲落咗order先，我哋揀咗海南雞湯米同咖喱牛坑腩飯，套餐仲配埋小食，咁就揀咗個森巴通菜同白雲酸辣鳳爪禮拜日都有套餐，簡直係佛心餐廳 2:30至6點仲有下午茶，不過就冇配小食～嘢食到手嘅時候覺得好重，返到公司打開一睇，個個同事都忍唔住哇咗聲，太足料了吧！海南雞湯米差唔多成三份一隻雞，牛坑腩至少都有六至七舊，仲要每舊都好大舊仲有個小食，根本一啲都唔少呀！個湯入面仲有三粒魚蛋同豆卜咖喱味道非常香濃，牛坑腩牛味好重但冇騷味，咖喱配牛腩呢個組合簡直冇得輸！海南雞整得非常之嫩滑，見到嗰層膠原蛋白嘅啫喱，就知係好嘢啦！白雲鳳爪都好好食，最驚啲餐廳乸到啲白雲鳳爪軟林林，呢個整到非常之爽口，調味又唔會過酸，而且份量一啲都少呀最後我哋兩個女仔夾多個同事埋嚟先清得曬價錢親民食物有咁大份， CP值咁高嘅餐廳而家真係買少見少，呢間以後要做飯堂呀！

果子外賣店｜海南雞飯·喇沙摻摻 地址: 旺角海庭道16號富榮花園二期4座地下E號舖海鮮喇沙摻摻 🦐🍜$53一飲佢啖湯就飲得出濃濃喇沙椰味味，都幾鮮幾濃郁🤩，再配上BB級嘅辣道。配料有豆卜、牙菜、米粉和油麵等吸收哂湯底精華，口感超豐富，CP值幾好😎😎。果子無骨海南雞飯 (油飯)🐔🍚 $40 唔好睇佢鋪面好似平平無奇唔起眼，但估唔到個海南雞飯都幾有驚喜。雞無骨，好滑好入味☺️。呢個飯底都好香，又唔會好油太濕，少少雞油味而且又幾有咬口，幾好🤪，呢個價錢真係CP值幾高🤘🏻。馬鈴薯炸蝦卷 🦐 $20/ 2件炸蝦卷外酥內軟，一條條馬鈴薯絲包住隻蝦拎去炸，食起來酥酥脆脆😚，多重口感都幾特別，而且又唔會炸到好油，幾好🤪。

只做外賣的餐廳，因為價錢相宜和專門做海南雞，所以試吓，好過幫襯茶餐廳那些不知所謂的海南雞飯 （試過失望過好多次🥲）。無骨海南文昌雞油飯海南文昌雞比普通文昌雞貴$10，店員說文昌雞雞皮脂肪較少，肉質更好。試過之後果然肉質唔錯。雞件數量充足。海南雞飯最緊要有齊3款醬汁，油飯亦都幾香，唔會太肥膩。海鮮喇沙滲滲海鮮喇沙正正常常，湯底夠濃，直接飲一啖湯都可以。海鮮配料正常。絲網春卷&香脆吉列蝦小食每款$12 ，覺得比起東南亞餐廳算平咗唔少，所以叫左兩款小食加送做晚餐。絲網春卷和香脆吉列蝦質素到OK，外賣放咗大半個鐘、返到屋企再用焗爐加熱之後脆卜卜。整體嚟講，餐廳食物乾淨，等候時間唔耐，地點在大街很方便買走返屋企食。知道餐廳租金成本不會有太多轉嫁在食物上，所以我幾鍾意幫襯外賣餐廳，可以用更平的價錢食到更好的食物。