心心茶餐廳 (已結業)

我經常落旺角飲飲食食，尤其是女人街，貪佢平靚正。這間餐廳新開張一段時間，那天決定上去試試。女人街的食肆多數是小本經營，很少好像這一間咁，可以佔據地面及閣樓兩層。不過，午市要到一點過去才開始多客。一點前基本上你係好大機會座到卡位的。樓面都算光猛，而且店員都算係勤快的。不過，可能個場比較大，始終有時個店員由街頭行到街尾招呼我囉。講返食物，這間可算是標準茶餐廳格局，有早餐﹑常餐﹑午餐﹑炒小菜式等等，尤其是係有中式蒸魚餐的提供，以我心目中最標準的茶記莫過於此。午市餐牌：最平都要 HK$32 ，還要是很一般的煎扒餐。同餐牌的小炒要接近 HK$40 。無計，今次第一次光顧佢，試佢的「特價餐」——蒜茸雞扒腸仔飯套餐。真係最標準的茶記午餐。蒜茸汁好濃厚，飯多到我真係食唔晒，最標準的煎(炸)雪藏雞扒，雞皮焦香而且有一層肥厚脂肪，唯有將雞皮切去，腸仔係正牌BBQ腸仔，我想都係用油炸，夠快嘛。而中式湯又係好標準化的節瓜豬骨湯，幸好飲後沒有感到味精的存在。那杯熱奶茶，用捷榮奶茶杯送上，又係典型茶餐廳感覺，難得是奶茶沖得幾滑，茶香都幾夠。試過一次都感覺不錯，希望價錢上可以做平一點啦。

獨自行喺女大街中突然下雨, 於是就行埋一邊避一下, 見到間新開嘎茶餐廳, 入佐去點佐個 個餸嚟到~外觀都吸引~~飯嘎分量適中,避免浪費! 然後西蘭花分量亦不算少, 以令到成碟飯能達到營養均衡! 而海鮮方面,鮮魷十分有口感~不會太過韌口~而蝦亦十分肥美鮮甜! 價錢也不是太昂貴~好抵食! 同場加影, 甜品就嘎隔離餅舖, 買左个奶撻, 超滑溜又吾過甜

寫事實被指話“食評含嚴重指控”，咁唔寫淨係貼相得唔得？條街好熱，行過呢間心心茶餐廳見唔使等位咪入去食囉，侍應幾有禮貌，話樓上二樓冷氣涼啲，叫我地上樓上坐。上到去，得幾枱客，揀左個卡位坐。叫左兩個午餐，有餐湯同餐飲，凍飲加三，成個餐三十幾蚊，一般價位。一個中湯一個西湯，ok。凍檸檬茶兩杯，一杯走甜，一杯少冰，但無分別囉。蝦醬豆蔔蒸腩仔，鹹+油……飯，食左兩啖發覺有異物，同侍應講完後高速收走，換左碗新嘅，但係飯都係同一個煲架啦，完全無哂食欲。茸蓉汁豬扒魚柳意粉，意粉硬身，魚柳幾香口，豬扒淋得黎幾入味，本來覺得ok，不過見完碗飯後就唔想食。另一個侍應走過黎收野，同佢講完碗飯事件後cancel左個餐唔收錢，仲say sorry，比第一個侍應態度好多了，對此餐廳改觀。雖然係咁，一條旺角女人街有幾十間茶記，我都係無下次了。

第一次到這兒早餐， 是日叫了個心水至愛 -- 沙牛通， 餐蛋，餐包 加 凍奶茶。整份早餐上枱賣相不俗，沙牛通內還加上生菜，色澤健康程度加一 ，味道上通粉整得偏淋，牛肉okay好味、淋，但可能係雪牛，肉質偏紫紅色，感覺不太好。 餐包微暖但牛油平均在內塗滿，不錯；午餐肉煎得香脆，而旦不是太陽旦，略為失色多少。 最后嘆返口凍奶茶，口感一般，沒有濃濃的茶和奶的香味、滑口，普通吧 ... 而價錢廿幾元可接受呢

食開女人街, 終於又有新茶記試。 十五分鐘前經過都未爆, 轉個頭返黎就要企一陣, 等位期間仲聽到隔離面包舖有位妹妹好落力甘sell大包, 新鮮出爐的確係香D(又或肚餓原固).返正題, 因lunch time有限, 即叫午市套餐, 一個小菜配飯,中湯,熱飲先至 $36. 好快就黎盅湯,一D都吾例水,所以連相都吾記得影。 小菜既分量跟出面D例牌差吾多, 同个同事 share 食都够有特!! 碗飯更食吾哂, 件咕咾肉算炒得幾好,個汁較開胃,酸酸甜甜的調味算吾錯. 同事碟雞亦够嫩滑!!