彪記牛丸麵家 (已結業)

週末慕名去彪記試食，其實對此店都抱住好大期望，因為見咁多人排隊，營業時間又咁刁，當然係好野先至咁樣啦。兩人點了一碗淨牛腩，同埋一碗雙丸(牛丸同魚蛋) 麵。因為正鋪太多人，所以被安排至鄰鋪用膳，落單時，條友塊面都幾黑，我都有諗過之前有無掙佢錢，不過都無緊要，因為咁既環境，預左唔係食服務，雖然無漏單，但等食物都等左好耐。食物到，先講碟牛腩，估唔到碟牛腩可以咁「鞋」同咁「韌」，要同佢鬥意志同鬥力量，如果同老人家去，小心佢副假牙甩埋出黎。食到後尾至發覺好多人叫「邊腩」，估計落單時需表明要邊一部份的腩。第一次去，知鬼咩…….. 。之後雙丸麵都黎埋。牛丸算係特別，因為自製關係，口感同味道與其它牛丸唔同，但本人並不特別欣賞，至於魚蛋方面，真係差到不得了，非筆墨可以形容，好腥好腥，又粉，絕對談不上彈牙，一食就知用好唔新鮮既魚打造而成，麵粉比例奇高，正式衰到無人有，最後兩人夾埋都只係食左一粒。其實咁差，我建議佢地唔好賣魚蛋仲好啦，免得遺禍人間。其實我都仲有想再試一次佢地D「邊腩」，但老友堅決反對，唯有遲多七年五載先再去啦!!

入有機農場餵蚊後，餓得要命，就搭順風車返市區，剛好路過這裡，就同同事來食碗腩河。到步剛好時12:30，閘半開，亦有一段人龍，果然是老字號，「排」場十足。甫入店已經要搶閘霸位，慢半分鐘都要等位，都咪話唔誇張，要了腩丸河，腩是半肥腩，炆得好腍，牛味十足，雖未到九記的級數，但識食的朋友，一定會認同這裡的牛腩，吃完大半個鐘，那分牛味還留在喉頭不散，確是真材實料。是牛肉清湯，略甜，唔錯，當然層次感唔及九記強，個人覺得比安利的好些少。至於牛丸，肉味唔錯，不過幾腍下，愛濃濃肉味的話，這粒是不錯之選。埋單聽到有人叫「淨鞭」，而且不只一次，趕著開工沒時間打聽這鞭的下落。　

大多唔憂做唧老牌餐廳麵店都有幾個特點,迫,糟,串.呢間野就有晒呢幾樣野,唔係太遲起身唔知去邊度食都唔係好想入去,10多人圍埋張細枱不在話下,仲要隔離擺左個污糟水桶,亞姐一擺d污糟碗落去就彈晒d水上來,差D整到我條呢快時污糟晒. 邊牛腩我以前食過,ok,牛雜都值得一食,因為真係好入味,不過佢個湯底真係唔得,仲話自己係清湯腩出名,普通牛腩唔好食,好鞋.挑牙都挑死..... 如果招呼同環境好D........20元碗都值得食.

彪記約十二點半開,最正既食物個人認為係邊腩若想食邊腩請於下午一點半之前去到,先有得食唔係多數都會賣晒,再遲d可能肥腩都無得食=0=d湯好鹹係真既,太多人,太逼.

it's just so-so......d food overall 好咸... 1) 牛肚河, d 牛肚無牛肚味, 不過D 湯, 麵好SALTY 2) 淨牛丸: 呢個又OK 好味wor! 但都係咸啦! NOT OK!不過好手打FEEL, 口感好得! 唔錯!~

20050716 4.30pm男友有公事到元朗, 我去接佢放工, 順手入去遊一陣. 橫掂好日都唔入元朗.一路無食過勝利牛丸本來都想試, 男友話覺得勝利唔好食, 有檔叫彪記仲正. 位置響B仔涼粉附近. 不過講到明係勁up dup 果o的等我有個心理準備.2人吃-* 淨牛丸($30/10粒) - 如果你係buy 勝利果的彈牙牛丸, 咁呢度就唔會係你expect o既o野啦, 牛丸係淨牛肉人手打成, 唔算彈但係好有肉味, 明顯係乜都無溝. 外賣要o黎打邊爐我諗會幾正. 湯底則不提也罷.* 可樂($7) x 2 - 呢度係無支裝, 請留意.環境同衛生都比較差, service也唔多掂, 勁黑面, 亦正如男友所言勁大牌唔休做. 另注意, 人流也十分雜, 好多古惑型男子打躉, suggest 外賣拎走.埋單$30. OK 啦.

間中都會來買外賣，因為堂食太多人，個人最喜歡吃這裡的牛根，而牛腩必須要肥腩才好吃，牛什味道亦不錯，但通常一早賣哂，想食就請早！

元朗區咁出名?原來不外如是.叫左牛腩同魚旦.一試湯底,唉,又咸又重味精,搞到個湯底咁, 不如一個清湯仲好啦.d面有好重鹼水味,一試牛腩.OH Shit!又硬,又唔入味,肥既得一兩舊,其他好似牛肉乾,仲整到d牛腩一片片咁,一下唔留神仲以為自己食牛扒面.咁既牛腩點解出名?一定出名在佢夠咬口.細細品嚐一定可以咬一個鐘都唔化.試完咁強勁既牛腩面,再試魚旦!一開始試魚片,一入口,味精味重到食唔到咁制,雖然魚片魚旦加味精係好少事,間間粉面檔都係咁做,但係佢都唔洗咁重本加咁多架,係到扮有味,不知所謂.再試魚旦,呢粒魚旦好野喇,一食就知佢一定有落魚肉去打既!因為好大陣魚腥味!魚腥加味精!極品!食物講完,再講下d服務:侍應好似失聰既,叫講食講三次都聽唔到,d餐具又唔乾淨,間鋪機又唔乾淨,個個侍應大搖大擺咁,好似唔休做,辣椒油又垃圾.整體而言呢間食店真係無械可擊,佢既存在跟本係作為人美滿生活既一種調劑,偶爾污染一下腸胃.本人由衷勸告,切勿自尋煩惱,以免後悔終生!最後講講個價錢,該碗垃圾食物價值16大元,雙併同價,淨送30,油菜10元,飲品7元.

丸腩米+ 粉腸+ 紅豆冰100分，超正，個個星期六都去!!

超好味，全香港至好味o既牛丸可以係呢度搵到，點解佢會叫彪記，皆因有位彪叔叔，佢好nice o架，佢每日開七至八個鐘，唔憂做，大家可以一試~~~~~~~~~

雖然呢度以牛丸為店名，但卻以牛腩較好食同出名，仲要係越肥越好食，怕食肥可以忘記呢度。肥腩好香牛油味，同九記的有得揮。唔知係唔係牛腩做得好都有一個共通點，就係「串」，九記係咁，呢度又係咁。日日十二點至開工，賣到七點半就收工；至好食的半肥腩永遠手快有手慢無，我第一次5點幾來就已經要吃清湯廋腩；伙記永遠效率十足又無咩招呼；16蚊一碗，價錢比同區的略貴，但一分錢一分貨，下次入開元朗都會來吃的。

元朗牛什專家都應該係佢啦卦.營業時間只限12:00pm-19:00pm,等位既人多到要排出門口.情形有如d人排(元氣)一樣.湯底掂,牛腩腍,牛什爽,牛丸彈.個個都要食一碗起兩碗止.什麼嘉麗園,勝利呀,都要行埋一邊.門口泊車仲要搞到triple park.大家可想而知佢既"牛魔力"係幾咁強勁.入開元朗既朋友不訪試下,食完仲可以去對面街間"泛后"食埋甜品.Prefect!不過呢間始終係粉麵舖座位會係狹窄小小.之但係有美食當前,狹窄小小又如何.