延苑韓國料理 (已結業)

今天去了賢苑吃了一碗夏日消暑的冷麵,湯的冰粒原來是用牛骨熬的湯之後再雪成冰粒的好得意,老板娘EVA好好人還送我7 仔上次的HELLO KITTY花花襟章呢!EVA說8月18日是她們的一週年記念日,所從由18日開始有Promtion是每次吃完記得取發票因為累積銀碼一百元起就下次可以送你由小食到人蔘雞都有的食物呢!

賢苑的員工態度熱誠～～～飲品同前菜任添～～～同佢地熟０既有時仲會俾ｄ額外驚喜你ｔｉｍ！舖仔細細好有住家式ｆｅｅｌ，長期播韓劇加添韓底氣氛！七小碟前菜日日不同～有比較冷門的菜類～出面唔係好多地方有得試～～！推介大家試一試韓式薄餅～～～餅底３５蚊材料另再加錢～兩個人撐腳份量０岩０岩夠～價錢可以自己控制～～而且薄餅結實口感豐富是高水準的作品！仲有一個「薯仔雞粒飯」都好惹味～全部飯都係用珍珠米煮～～口感一流～～ｄ配料都好足一定令你回味無窮～～

午餐35 元一份美味午飯, 我選了辛辣豬肉飯一盤七款餐前泡菜, 可添加自製豆漿, 菜蜜, 可添加全店Hello Kitty 的裝飾親切的服務態度小店背後的溫馨故事加起來是一間值得推薦的韓式小店.

母親節果日同一個朋友去食，大約八點三左右到，等左十五分鐘先有位…點左個二人餐，雖然前菜、飲品(荳漿，味道水平以下)和飯都可以任添，但成168蚊，仲要加埋一添！在粉嶺區黎講真係超貴！首先有前菜七小碟，唔係太叫得出果d 係咩野黎，味道都算唔錯，食完佢地會幫你換過盤，每個盤的前菜都不盡相同的，我地一共食左三盤~食完前菜都有少少飽既感覺。但係前菜竟然冇泡菜食…跟住黎左個蝦沙津，主要有蝦、一d 唔知咩既瓜類同埋合桃，都幾好味。接住係海鮮湯，碗湯真係名符其實係海鮮湯，都幾足料，有蜆，尤魚，蝦，芽菜…辣辣地好好味！然後有個主菜唔知咩猪肉，味道很濃，辣中帶甜，一流！最後黎左個甜品：湯丸。湯丸本身好好味，而且仲好夠熱，一d 都唔馬虎。p.s. 我地同d 職員講想食泡菜，佢地即刻拎左少少黎俾我地，服務態度好好。不過d 泡菜就冇咩特別，期望之下，唔知係咪因為唔收錢呢@,@~~~

(9 Apr 05)同好朋友行左大半日, 睇過雜誌介紹, 突登來吃晚飯。book 左台, 當然仲要等左陣。鋪頭唔係咁大,而店員是非常熱誠的, 我地初時坐左門口位, 佢地話一陣換過另一張台比我地, 坐得舒服D。上菜時還會介紹一番。前菜可添加。有七小碟, 這天有一碟辣既大豆芽, 其餘都係唔辣既,有:芽菜, 菠菜, 三款不同既魚蛋, 甜薯粒。一心諗住試多d野, 訂左個人參雞湯。來到看到餐牌, 個人參雞湯係四人份量!!? 我地得兩個人, 只好淨食個人參雞湯都夠了。個湯除左有雞一隻之外, 有好多人參、好多蒜溶、仲有唔綿既栗子、紅棗、唔係好多既糯米。個湯都好正! 飲完唔會話"確"喉。有機會都想試下其他野食, 見佢d set 都唔係好貴, $45左右啦...

上星期食過佢地既2人套餐,D 韓式前菜好味呀,泡菜海鮮湯就差左小小,仲有一個韓式煮牛肉,同埋糖水(腐竹蛋?!)..飲品有茶/ 豆漿....$168 似乎貴左小小,都係晚餐抵食D, 岩岩今日食左個泡菜豬肉晚餐..$45 ...好好味呀

家裡都老人家都北上了旅行，又是我和妹妹可以話事，試新口味的時候﹗這次試試附近聽聞地道的韓國菜。七點多到達沒有太多人，只有兩枱客，兩個人吃不了什麼，也不想吃得太貴，所以點了兩個飯餐，一個辣豬肉飯，一個什錦飯。有很七款前菜小碟，但沒有kimchi，所以再order一個我最喜愛的kimchi，味道酸了一點，淨食太酸，拌飯食就比較好。辣豬飯味道不錯，醬汁很濃，很惹味。而什錦飯則一般，很乾。最後還有糖水，雖然說是韓國自家製甜品，但說穿了是腐竹白果鷄蛋加西米糖水，可能我不太清楚什麼是韓國甜品。看了之前的食評，相信又要再擇日試試其他的美食。說也奇怪，昨晚一晚在不同地方遇上了三個舊同學，可能是提醒我又是時候「組織飯聚」了﹗

前幾天三人行，叫了一個套餐，加了一個炸拼盤，首先上的是小吃，大約八至十款，之後有韓式沙律、辣海鮮湯、石頭飯，甜品。事頭婆十分好人，小吃添了三次，又介紹每種食品....那裡很多人輪侯，最好早D去。

呢間韓食店真係唔錯﹐特別推介個人參雞鍋﹐用糯米灌入雞內再煲﹐食完暖笠笠﹐足夠3-4人份量。不過夏天時冷氣就要搞搞﹐坐二人位會俾冷氣風口吹疆。

呢間韓食鋪頭以前o係投注站對面, 而家終於都搬左去一間大d既鋪頭喇. 可喜可賀!由韓國人主理, 主打食品有韓式牛肉飯, 泡菜豬肉飯, 同埋水晶粉. 三款都唔錯, 可以一試!每日仲有指定套餐, 可能因為人手唔夠先要咁做, 唔食套餐/牛肉飯/豬肉飯/水晶粉就無乜選擇. 希望第日多d野食啦.老闆好好客, 佢成日提住佢個韓國人弟婦架!