廚十三老壇酸菜魚 (海之戀商場) (已結業)

之前出港島，有經過海之戀商場，睇到個招牌，之前都有聽人講過，今日專登出荃灣，果然冇讓我失望。我地點嘅係雙人份套餐，168可以揀套餐。我地揀左米飯個套餐。服務員端上黎嘅時候我地真係超級震驚！！本身仲以為細細份，會唔會唔飽，結果真係多焦慮左。酸菜魚唔係好辣同埋勁足料，超級大份，粉絲，酸菜，蓮藕，豆腐⋯特別係粉絲，超級多超級好味，吸飽湯汁，湯汁泡飯都好好味。「雨露均霑」其實就係紅糖糍粑。外焦內軟，同埋好糯，外面有黃豆粉，可以沾紅糖醬食。食左好多，唔會膩，食完仲想食，可惜酸菜魚太大份，飽到我地走唔到路，個份量真係可以三個人食飽。佢地服務態度真係超級好！店裡人手不多，但係真係做得好好，上菜速度非常之快。同埋最好嘅係佢哋防疫工作，張枱抹左好多次，快速消毒水抹，同埋食野嘅隔板過一會就攞走抹一次，或用消毒水噴。第一次寫食記，真係因為非常好先會寫，總之係非常之推薦。

食嗰陣時已經講明咗走辣，嚟到都係有辣椒，掂都未掂過同佢講可唔可以換過碗，竟然將啲辣椒攞走就當係另外個waiter係咁咳，都唔知做乜,下次唔幫襯，附近仲有更加好嘅酸菜魚成個態度超級差，同埋酸菜魚冇銅鑼灣嗰間咁好味

諗諗吓好耐冇食過酸菜魚，今日就喺附近搵吓有冇咩未食過嘅酸菜魚餐廳，就搵到呢間新開嘅廚13酸菜魚，咁一定就點左佢哋招牌嘅酸菜魚啦，另外加多個麻辣牛柏葉，同埋我平時都好鍾意食嘅甜品冰粉，接住落嚟講吓佢哋嘅味道先。三樣食物裏邊最滿意係酸菜魚，佢魚肉都算係新鮮，湯底又唔算太過油膩，唯一就係如果擬三百幾$400呢個價錢來講比一般我食開嘅酸菜魚佢係最貴嗰間，但係份量又唔算特別多，感覺性價比唔高。然後到佢哋嘅麻辣牛柏葉， $98加埋一即係$100多啲，但係係好細碟嘅牛柏葉，都係比一般小食嘅價錢來講佢都係偏貴，味道都係屬於適中。最後佢哋嘅甜品冰粉睇圖片都應該睇得出應該係落咗太多糖，太過甜啦，呢個食唔到因為太過甜浪費咗。另外又叫咗一個白飯配魚食，佢哋嘅飯比較淋，不夠粒粒分明。

星期六同朋友午餐一聚，知道海之戀開咗一間食酸菜魚嘅分店，大家決定去試吓，而且荃灣店仲有限定午餐套餐，真係抵好多！我哋決定叫一個二人份酸菜魚套餐仲可以配飯或米絲、包括指定配菜：金茹、豆腐、蓮藕片、粉絲全部都入曬未又酸又辣～仲包兩罐汽水！酸菜魚味道都唔錯不過可以再酸多少少，而且二人份量都好十足！另外我哋仲叫咗兩個小食，老虎椒愛鬆花蛋、正經的鷄被撕，味道、辣度都可以，份量適中啦！服務、環境都令人食得很舒服，可以再來呀！

今天荃灣一日遊，最後去了海之戀的廚十三。先來前菜爽口牛柏葉，牛柏葉都算爽口辣到OK但偏鹹。食串菜魚一定要第一啖先嚟試吓個湯底，屬於偏青湯底，不油膩，酸味夠重，喜歡酸的朋友應該會喜歡，我是叫了正常辣辣到啱啱好。講返湯底配菜有金菇，豆腐，萵筍，蓮藕，鮮腐竹，酸菜，但咁嘅價錢份量實在太少。都到主角”魚 及酸菜” 魚，尚算新鮮,但份量都是偏小，而且好多有骨。酸菜都是用比較好的選材。最後甜品嚟一個紅糖冰粉，好鬼甜。最後買單五百幾蚊，酸菜魚來說性價比就比較低一點。

｛海之戀商場 - 廚十三老壇酸菜魚｝今晚去左海之戀商場搵食，之前經過呢間廚十三老壇酸菜魚一直都想試，今次再經過就入去試吓。星期一晚上冇坐滿，唔駛等位就入得。我地叫左呢個二人餐：小食香酥雞翼，好大份，新鮮炸起好香：主角到了，成張枱咁大份：我地加左一個餸-豆卜，其餘都係本身有既，呢個酸菜魚夠酸，帶香，唔算太辣。兩個人食呢個餐好飽，好彩都食得哂😋埋單三百多元。

Other than the set person pickle fish soup rice or noodle, all other dishes are a rip off! Had the sesame chicken at $98 and it's not even a quarter of a shredded chicken. Half the chicken was chicken skin too. Not worth the money for the amount of food at ok taste. When I mentioned this to the waiter when I paid he pretended not to understand me. So obviously I'm not the first person who has made such a comment.

因為新開的餐廳，附近的也給我試過哂，酸菜魚讓我想起返大陸同朋友一起食過的酸菜魚，所以開業後一定要來試。可能新店開張，送杯麵，回家吃後，麵似粉絲，有點辣，好吃。小份酸菜魚都夠3-4人吃，酸菜唔鹹，魚唔腥，有骨但可接受，可揀辣同唔辣，十分窩心。上上簽是店員推介的，其實冇咩特別，只是吃到辣罷了。雞翼脆口，骨巳處理為單骨，熱辣辣，但欠缺一點特色。油條外脆內軟，份量足夠。店舖環境舒適，坐得舒服，員工勤勞。見有人外帶飲品，感無奈，香港人總是沒想到別人也要糊口，說真的連飲品錢都想唔俾，不如留在家中吃吧！

廚十三酸菜魚終於係荃灣開分店，吾洗出去面食。我特登平日出去食，吾洗排隊。平日會有午市套餐由12點至到下午4點時段，有1人套餐$88或2人套餐$168。可以配飯/米線，仲包埋野飲。酸菜魚入邊仲有配菜（有金菇、豆腐、蓮藕片同粉絲）相當足料，夠晒飽。魚肉夠滑同埋冇咩魚刺，配飯一流，因我今次食2人餐，可以一個揀返一個揀米線，可以試晒兩種唔同食法。我覺得配米線食都幾特別，值得推介👍🏻我仲叫咗個雞腳小食，跟我自己本身好鍾意食雞腳，所以想試下，點知佢地果腳腳令我好失望，又貴又唔好食

近年好多人去食酸菜魚 成為大家飲食文化潮流 , 剛剛前幾日相約朋友到荃灣行街, 收到風近排開了廚十三新店 所以一於行去品嚐一下, 外看裝修好清雅 , 坐位相當舒服, 枱和枱相距合適, 冷氣也充足 對食辣野 好緊要啊當然首先叫了足夠2-3人份量($338)酸菜魚 大大份 d 魚好滑也有相當份量 酸辣味道平均 其中還有筍片, 陳年酸菜等等 伴菜也有不少另外也叫了砵砵雞串 這味菜相信當有趣 , 有雞蛋,雞腎,牛肚,牛栢景台葉,薯仔辣味一流 值得推介给大家玩味十足 傷心涼粉 爽滑口感 是不錯涼伴之選整體食物味道不錯, 具有創新意念, 地方舒適, 服務周到, 大家適逢在荃灣行街, 誠意推介給大家.

係香港好難搵到一間整得好似大陸風味嘅酸菜魚。早2日睇電視見到，又心思思想食，lunch 即去搵黎食下！我嚟嘅時候入枱人數唔多，加上主菜只係得酸菜魚無其他，可能因為咁無咩人，即入得！佢新開張有lunch promotion, 見幾枱人都係叫呢個就試試~~~~~~~~~~~~~~~~~~~~~~🔷酸菜魚中午2人套餐 $168套餐指定左配菜：金菇，豆腐.蓮藕片 配米線/ 白飯我揀左米線，佢放埋入去一齊煮。如果有得揀寛粉就好啦😭首先酸菜，佢話係用發酵左一年嘅芥菜，食落唔太咸，而且爽脆留意食嘅時候好易同泡椒撈亂🙈而鱸魚，都幾多， 每塊都係大塊幼滑，而且又無咩腥味。連我fd 食完都讚d 魚好味！總括： 我地叫左小辣， 一開始食，我仲話無咩辣味唔夠辣，點知越食越辣，仲要食到出汗。辣味好有後勁！ 味道上同大陸嘅太二相比，味道都係差d, 相對無吃濃味同無咁酸，可以話係調節左嘅港版味道。而佢個2人份量都幾足下，食完已經再食唔落其他小食大家下次嚟食可以參考下！ ~~~~~~~~~~~~~~~~~~~~~~~~👅味道 🌕🌕🌕🌘🌑🌻環境 🌕🌕🌕🌗🌑🐋服務 🌕🌕🌕🌗🌑👛抵食 🌕🌕🌕🌗🌑🔄回頭率 60%~~~~~~