影片
減完肥之後我又多番quota四周圍搜尋美食😛前幾日阿哥話佢喺元朗食咗一間新開仲試業緊嘅小店，話佢炒飯好正就介紹俾我，點知我一食真係返唔到轉頭，仲一連幫襯咗佢幾次，要知道我呢啲澱粉質怪最鍾意嘅就係食炒飯餃子呢啲食物，我鍾意食炒飯嘅程度係一日三餐食炒飯都唔厭，我仲有加入咗炒飯關注組添㗎🤣.呢間新開嘅小店叫做尋味潤餅，新到OpenRice我見佢呢兩日先啱啱有，呢個月佢仲做緊試業，招牌嘅紅紙都仲未搣落嚟，我見佢個名雖叫做潤餅，以為佢係食台灣嘢㗎啦，點知佢原來廣東炒飯炒粉麵呢啲先係佢嘅招牌菜，潤餅都暫時未有，而且佢係主要做外賣Takeaway，位於元朗世宙入面一個小舖位，所以小店細細非常唔起眼，不過我就見到佢門口已經好多人幫襯，果次我就聽阿哥講完去買佢嘅炒飯嚟試下啦，點知我一試真係不得了！😍.其實佢嘅食物真係唔多主要得幾款嘅炒粉飯，分別係家常炒飯，鹹魚雞粒炒飯，揚州炒飯同埋家常炒米粉，另外佢仲有一啲炆鵝或者炆豬肉嘅飯，不過我就主要試左佢啲炒粉飯，之後有機會再試佢嘅炆鵝同炆豬肉。.我第一次係試佢嘅一款叫家常炒飯，一打開個飯盒已經俾個份量嚇親，$42即叫即炒嘅炒飯竟然裝爆一個飯盒，勁大盒！而且佢做好細心喺飯盒上面整個窿透一透氣，因為佢即刻炒好真係好熱好够鑊氣，佢嘅家常炒飯嘅材料油肉片，餐肉，紅蘿蔔，蛋，蔥花，材料雖然簡單但師傅好有技巧咁炒到啲炒飯粒粒分明，而且唔會太乾身，仲好有鑊氣好香，材料嘅比例亦都好平均咁分佈係成個炒飯，令到每一口都有炒飯之餘又食到唔同嘅材料，而且呢個家常炒飯仲有少少辣味，我估係佢哋自己屋企嘅口味，我覺得非常之惹味，如唔食得辣可以同佢哋講走辣。不過真係好耐冇食過咁有鑊氣同炒得咁好嘅炒飯，而且重點係只係賣$42😱即叫即炒喎，仲要咁大盒咁好食喎，性價比同個美味指數都非常之高！👍👍👍😍所以果次我幫襯完咗之後一直念念不忘😋.所以之後仲陸續去食咗佢幾次，我再點咗佢嘅家鄉炒米粉，鹹魚雞粒炒飯同埋揚州炒飯，基本上已經試晒佢嘅炒粉飯麵類，因為佢試業階段但係都會擔心佢嘅水準會唔會係好飄忽同埋時好時壞，答案係，每一次都可以保持水準！👍👍👍😍.家常炒米粉（$42）同家常炒飯嘅材料係一樣，只係變咗做炒米粉但一樣咁好味😋而且同炒飯一樣佢嘅炒米粉非常之乾爽而且配料十足，而且唔會好油同埋我鍾意佢有少少辣好開胃食唔停！.佢個鹹魚雞粒炒飯先真係不得之了！雖然比起一般嘅炒粉麵飯貴幾蚊，佢要$48，不過以佢嘅足料份量同埋即叫即炒來都係抵，其實佢係炒緊嘅時候我已經聞到個抽油煙機幾將啲鹹魚香抽出嚟已香到爆！係嗰隻梅香鹹魚嘅鹹香味道，返到屋企打開見到，我覺得佢簡直可以係叫做黃金鹹魚雞粒炒飯，因為雞蛋花包住每一粒嘅炒飯，仲有佢嘅雞粒非常之嫩滑而份量亦都好多，真係每一啖都有鹹魚，雞粒，蔥花，雞蛋嘅香味，口感好豐富好咸香開胃，令人忍唔住一口接一口，食完我決定將佢嘅鹹魚雞粒炒飯放喺第一位！真係要返去encore再encore👍👍👍😋.揚州炒飯亦都係唔錯嘅選擇配料方面有蝦，叉燒，雞蛋，蔥花，紅蘿蔔粒同埋粟米粒，唔好以為佢買$42材料就俾得好少，叉燒粒同埋蝦嘅份量都唔少㗎，佢嘅揚州炒飯我覺得色水方面有別於一般嘅揚州炒飯，顏色有啲深，可能係佢哋家常上嘅做法，不過都冇影響因為味道依然係非常之好！.我見佢好似係一家3口經營的家庭式小店，前台會有個叔叔好親切咁落單，跟住後面廚房個年輕人一收到order就會即刻炒飯，真係俾你見到佢即叫即炒，而且都算快，視乎多唔多人喺度排緊，我幫襯呢幾次每次大概10分鐘左右我就攞到外賣。.整體來講我覺得佢哋嘅炒粉飯麵無論色香味分量同埋性價比方面都非常之好，冇得輸！👍所以下次我經開元朗都一定會去買返幾個炒飯外賣返屋企慢慢食😋.而家我見到佢試業階段都已經唔少人幫襯，希望佢日後正式開業就算好多客人幫襯水準都唔好下降啦，唔係嘅話我就食唔到好食嘅炒飯㗎啦🥲.店名：尋味 地址：元朗安寧路38號世宙商場地下34號舖
繼續閱讀