富華冰室 (葵涌廣場)

營業中

休息中

趁着七一假期😎，提早起身💃🏻，賣甩老公👨🏻‍🦱和亞仔👦🏻，獨自去咗葵芳食個豐富嘅早餐☕️，再開始今日嘅活動👍，餐廳好光猛，服務員都好有禮貌，幫我掃了安心出行和針咭，就帶我到座位（這裏可以選擇和其他客人合併坐，或自己獨坐）我享受獨處嘅時光，當然係選擇獨坐🪑啦！這餐廳經常會排長龍🦖，好彩今日不用排隊，可能假日人們要訓耐d🛏才出動, 晏啲才會多人流我已經來了好幾次，也是我很喜歡的餐廳，我最欣賞佢嘅北海道牛乳炒滑蛋🍳，十分香滑，牛扒野味，配上健康嘅沙律菜，可以提供我充足嘅能量💪🏻，喜歡飲奶茶嘅我，對奶茶都好高既要求，這裏嘅奶茶☕️，茶味濃郁、口感順滑，一試難忘👍

話說今日睇完醫生，經過葵芳，求其搵咗間餐廳入去醫一醫肚，經過富華冰室，見到今日午餐有雞扒飯，於是就入咗去試吓啦。.我就order 左1. 地獄汁雞扒飯 或可配薯菜 💲62 跟餐中/西湯 熱飲唔洗加錢.本身淨係見到係雞扒飯，而佢所形容嘅地獄汁，完全唔知係咩嘅情況之下，於是落單嘅時候問埋落單姐姐，但係佢都唔知係咩嚟嘅（我個刻係一頭？？？？）然後佢又出廚房問，最終原來係燒汁嚟。。.雞扒飯嚟到之後，比想像之中大塊好多，我諗都有200 gram, 相當有份量，外皮感覺煎得鬆脆，但係我本身唔食皮，雞肉幾嫩口，飯巨多，所以感覺上係幾抵食嘅，我返淨係食到一半已經食唔晒。.另外今日嘅中湯係眉豆雞腳湯，啱晒而家呢啲天氣去濕健脾， $62嘅價錢下，我覺得係好合理。

等個沙爹牛肉麵 等左差唔多20分鐘先上 明明叫炒蛋 佢就上煎蛋 永世不再幫襯 比錢買難受仲要另加香腸 佢走黎分開上 都未見過一間餐廳咁搞笑 由得條香腸上台20分鐘凍曬比客食都冇問題

外賣溜單，但係扮炒緊? 假期叫外賣要等我預咗，但係唔會要等一個鐘呀？我只係叫咗兩個小炒。等咗20分鐘怕溜單咁就問姐姐啦，佢話未有，唔緊要，再等等睇睇。半個鐘後平均10分鐘問一次，冇人理既，再問話炒緊，足足1個鐘，火都黎，外賣有折我都唔會再食囉。。。。。。。。。。。。。。。。。。。。。。。。。。。。。。

本區街方，平時堂食已經試過漏單， 員工態度又唔係好，但原來無堂食後外賣更加惡劣。外賣唔跟單號已經慣咗，見單號過咗咁多個 又過咗10分鐘就問下佢，個男伙記已經唔好老脾咁話係要等架啦，再過10分鐘問個女的，點知仲衰，佢瞪大對眼兇我話，外賣唔洗包ar.....我真係呆咗，一個涼瓜排骨飯等20分鐘，問下佢有無漏單姐（因為經常都有漏，堂食都漏過幾次）佢哋竟然兇個客，仲要連同個廚房佬睥9我話外賣係要等架啦。我鬼唔知要等咩，20分鐘唔通都唔可以問下？見我係女仔就識兇我，個個都淨係識兇人，係做正當生意的嗎？

去葵廣好幾次經過地下呢間茶餐廳見有唔少人排隊等位冇做任何功課唔知佢咩嘢出名見到門口有新鮮出爐嘅酥皮蛋撻諗住試吓第一次attempt俾姐姐成功擊退😝😝佢話: 我緊三打蛋撻嘅外賣，pack完先可以招呼你心諗有冇咁多人幫襯呀😣😣第二次再attempt終於成功食到蛋撻新鮮滾熱辣出爐酥皮非常鬆化咬一啖唔使點咀嚼就食完嘅感覺蛋漿未係完全凝固晒幾滑仲好熱又幾好食喎利申我平時鍾意食曲奇皮蛋撻多啲去開葵廣不妨試一試之後仲有一次食左早餐沙嗲牛肉麵幾好食麵質彈牙另外有一個早餐set係跟菠蘿油菠蘿油超級大都幾抵食

我19:08分買外賣 到19唔38分都仲未有得拎但人地遲過我買叫同一樣野仲早過我拎！問又過係咁架～唔跟次序架～～員工又態度差，貼錢買難受！！絕對無下次囉😇想罰企等餐死既就買啦

早餐去食 菠蘿油個包凍嘅塊油凍嘅要點樣融得好食 同服務員講 重反問我想點 我講幫個包加熱一下 又話無微波爐之類嘅嘢加熱 完全冇責任心同素質 想請教下無加熱既工具係點解要賣加熱既食品?因為14蚊就可以亂咁黎?

去到葵廣見到咁多人排隊諗著試下，入到去侍應態度極差，問佢有咩湯唔應，佢用「友善」眼神望過嚟。牛扒真係”well done”，用刀都鋸唔開，大x樂canteen都好食過佢，同紙板無分別。d蒸雞骨肉不能分離，一咬落去全部碎骨。pet free 餐廳有昆蟲，兩烏蠅陪你食飯。請都唔食。

越簡單嘅嘢越難整得好。富華冰室的確係一間超班嘅茶餐廳。出品水準高，吸引到一班街坊經常排長龍光顧😋—————-招牌沙嗲牛肉公仔麵配火腿北海道牛乳炒滑蛋及自家製餐包 $38 肉多，嫩滑大塊，汁濃而香，沙嗲味重。麵雖然不是出前一丁，但爽口彈牙，有過之而無不及。滑蛋餐包乃誠意之作，錦上添花。$38 食個美味傳統嘅港式早餐，像在重新感受昔日美好。不知道此沙嗲牛肉公仔麵有沒有登上沙嗲牛肉關注組呢😂

位於葵廣呢個黃金地段，人流十分之多，無論咩時段都係有勁多人排緊隊🤣 Lunch 趕死🙊好多人都話佢啲燒味好出色🤤我試過真係好出色☺️最鍾意食佢嘅燒肉雞瀨粉😋不過今次🐖🐖要求食菜，咁就試吓嗰啲小菜啦～我哋夜晚去食，排咗20分鐘左右，入邊都幾多位😬所以都唔係等好耐😛🐮 乾炒牛河呢個有意外嘅驚喜🤭勁有鑊氣！牛肉片好嫩滑，唔會有筋！炒得又乾身，唔會油立立👍🏻👍🏻👍🏻 🐖🐖不斷話好味😂😂🥦 海鮮雜菜粉絲煲 配 白飯因應🐖嘅要求，點咗呢一道菜，等咗20分鐘先上菜🤭仲以為佢漏單….我覺得普通咗少少，有帶子、魷魚、蝦仁、魚柳、蟹柳條、西蘭花、椰菜、金菇、粉絲等滾一滾🙈 不適宜送飯…..食到有味精🤭

食物好遲先上菜，員工又叫極唔應人，臨走仲要比整枱個個倒瀉奶茶係客人身上，之後笑一下唔道歉，以後唔幫襯，遇到呢啲情況應該叫佢賠錢，但我當時冇咁做，諗諗下太嬲寫個負評！

今天上班天氣清涼, 最好就是品嘗一個熱辣辣嘅早餐, 經過多次富華冰室, 都很多人排隊, 今天只有兩人排隊,就馬上跟上去, 很快安排了卡位, 早餐選擇有接近十款, 最後點了經典嘅餐蛋麵和熱檸水； 餐廳好快就坐滿了, 侍應動作很快, 等了不消五分鐘己先來了飲品,同時待應跟配了一杯熱水和啡糖給代； 檸檬有四塊 大大增, 先飲一下, 發覺檸檬新鮮 甜酸均衡； 不久之後, 大大碗餐蛋麵來了, 有兩塊厚厚餐肉, 兩隻剛剛好的太陽蛋, 一點青菜, 份量不足, 比起其他茶餐廳, 確實優勝, 湯底有肉骨味道, 加上是熱辣辣的, 享用之後, 感覺相當飽肚和滿足, 再加上熱熱的檸檬水, 今天一份早餐相當美滿.

去食午餐，叫左1. 羅宋湯午餐肉通粉拼菠蘿油（早餐餐牌，供應到12點）2. 咖哩吉列豬扒飯兩個都冇影相，因為本身冇咁得閒所以冇諗住食茶餐廳都寫食評。上面嘅嘢都好食。而且兩個人坐四人卡位都唔會被逼搭檯，就算大圓檯需要搭，都會有膠板响中間。茶餐廳嚟講算係坐得非常舒服。就係因為用餐經驗太好，於是決定買燒味外賣返屋企夜晚食。見到隔離檯點燒鵝四寶飯都係70幾蚊，碟飯成個樣都好靚。咁一個燒鵝拼乳豬例牌理論上應該唔差，收$260都應該容許我有d期待呱。結果返到屋企得咁多多，我驚大家意會唔到個份量我擺隻手板出嚟做對照，得9件燒鵝，8件乳豬。我咁計啦：我個例牌乳豬拼燒鵝$260，我當裡面$130係燒鵝，$130係乳豬。咁$520一隻燒鵝，$820一隻乳豬。咁照比例計你係米都應該唔好呃得我咁緊要，俾番4分1隻燒鵝同6分1只乳豬俾我，我大方d俾你扣起幾舊喇，但係都不至於$260得9件仔燒鵝同8件仔乳豬呱。可能依家d嘢貴我唔知價啦，可能自己蠢走去叫例牌而「例牌」係咁啦下，又可能係自己蠢走去茶餐廳買燒味啦。去茶餐廳，食飯茶餐廳d嘢米算囉，自己多事。

.📍富華冰室📍 #饅頭去葵芳 #饅頭的港味道 #饅頭食麵包雖然而家嘅麵包越嚟越多款式選擇，但唔知有冇人小編同小編一樣，comfort bun依然係最簡單最具童年回憶嘅菠蘿包🥯？------------------------------香滑菠蘿油配紅豆冰 ($25)富華嘅港式麵包一直都係水準之作，尤其係大大個嘅菠蘿油，面層嘅酥皮香甜，好似牛油曲奇咁鬆脆😋，又唔易剝落，唔會食得好論盡；包體亦唔係一壓就扁嘅空氣包，新鮮出爐香軟熱辣辣♨️，再夾多塊又凍又硬嘅牛油喺中間😍，冰火交融，邪惡但我甘心淪陷！！！至於紅豆冰就都算綿密，但個人認為太甜，可能係小編呢半年戒含糖飲品嘅成效，感覺單嗌麵包就可以。------------------------------出爐靚蛋撻 ($7)每當有麵包或者蛋撻出爐，夥伴哥哥姐姐們都會即時人聲廣播🔊，所以小編咁啱都嗌多咗個酥皮蛋撻。佢哋嘅蛋漿係半固體狀態，入口滑溜，蛋奶香亦足夠🥚， 外皮唔會過硬，其實只要係新鮮出爐都唔會難食得去邊，真係要挑剔嘅就係覺得佢嘅嘅酥皮唔夠酥化，少咗種層次分明嘅口感。------------------------------整體評分：8.