大快活 (淘大商場3期)

營業中

休息中

中午喺淘大商場大快活試咗個 $45 嘅雙餸百搭碗飯，老實講，以呢個價錢嚟講都算交足功課啦～🍱 今次我揀咗魚香肉絲茄子飯同煎蛋免治牛肉飯，係兩碗迷你size，配埋烚菜，剛剛好飽，最啱月尾糧尾嘅朋友🥲。魚香肉絲茄子有少少汁，撈飯一流，鹹香味重，但唔會過鹹，茄子炆得軟腍又入味🍆。至於煎蛋免治牛肉嗰碗就簡單實在，牛肉碎唔會太肥膩，煎蛋半熟加分，撈埋一齊都幾啖啖肉🍳。烚菜冇驚喜但都算有誠意，起碼唔係凍冰冰😅。成套餐唔算話好精緻，不過以快餐標準嚟講都算穩陣，最重要係性價比高，加上出餐快，啱晒打工仔午餐快快食完快快返工⏱️。唔係驚喜路線，但係會考慮再食那種～

大快活推出嘅「食得夠GYM香煎雞胸紅米飯」對於做開gym或者注重飲食營養嘅朋友嚟講，真係一個非常貼心又實用嘅選擇。雞胸煎得外香內嫩，唔會過乾，配上黑椒汁更加惹味開胃，整體口感同味道都令人滿意。紅米飯健康又有飽肚感，比白飯更有口感層次，整體配搭夠晒平衡。最吸引我嘅係佢餐牌上寫明有足足49克蛋白質，對於每日計緊營養攝取嘅人來講非常實用。更餐附送一杯無糖綠茶，清清地解膩又冇負擔，配搭得啱啱好。用大快活App落單仲可以有9折優惠，性價比高得嚟又方便快捷，真係運動完一流之選。無論係堂食定外賣都一樣咁方便，推介比一眾健身人士或者追求健康飲食嘅朋友試下！

今日返工到4點先有得食晏，諗住午餐唔嗌外賣返公司食，留喺度堂食，輕鬆一下，點知原是好多公公婆婆系到坐系到過日神，搞到食嘢想坐都冇得坐，所以下次堂食都要諗清楚！而食物質素都系一段正常，稱不上好吃！！

呢間連鎖式茶記最適合係冇乜特別嘅一日幫襯。平時都會食開多士，貪佢可以加煉奶花生醬果Jam。不過呢排減緊carbs，又見佢有得轉粉果就即管試下佢有幾爆汁。覺得「驚喜」餐呢個menu 係正面嘅，起碼係連鎖menu 入面會有d 嘢個個禮拜都會轉一次，百無聊賴中算有d 新意嘅。講返粒粉果，用個膠兜裝住嘅工廠製style，甚有連鎖店嘅感覺，切開係有d 汁流出嚟嘅，大部份都係油。可以一試嘅，不過冇乜想返兜嘅感覺。其他嘢都係連鎖式嘅正常，不過都係啱啱先知個雞扒汁唔一定要燒汁可以轉黑椒汁，開心嘅。

其實之前一直都好鍾意食大快活早餐，覺得幾好食，於是今日就再去買外賣返屋企嘆。佢雖然都幾遠，但我都係抱住好期待嘅心情去買早餐。。。點知。。。返到屋企一打開發現個魚柳嘅顏色已經不似預期，食落係凍凍地，仲要好硬個炒蛋係熟到硬晒，蘿蔔糕都淡而無味，見到佢嘅顏色，應該都煎完有一段長時間，凍冰冰同硬的。一朝早就sad了，以前佢嘅質素好似冇咁差，或者可能堂食會比較好啲

以為煲仔飯無得外賣，而家連煲仔飯都可以連煲外賣窩蛋土魷雞粒銀魚冬菜肉餅煲仔飯 （原煲）$55加$6就可以連埋煲外賣，完整還就退返$6，係大快活網買外賣自取有9折，尼個價錢抵都爛。煲應該重用過，有裂痕。份量好多，兩個人share都得。肉餅好腍，食落似午餐肉味，得好少雞粒，有少少飯焦，底啲飯有少少燶。雞胸紅米飯飯量好多，雞胸好大塊，得好少菜。雞胸有微微煎過，唔係好鞋好乾，菜有啲鹹，蘑菇汁好食，攞黎撈飯唔錯。

其實早幾年我寫過大快活一篇負評，但由於佢曾經選用杜汶澤代言，所以我再次去食飯。食大快活就一定要食佢嘅下午茶餐，因為又抵又夠飽。佢個燒雞皮脆肉嫰，食過返尋味，個厚多士如果可以比多包煉奶就好啦。

近日有網民話大快活早餐離哂大譜咁抵，放假見得閒就落左黎食星期六日淘大依間大快活都幾多人，好彩都比我搭到位。之前網民講好大個餐係吉列豬扒加雪菜肉絲米線再加方包嘅，總共38蚊。因為我今日又唔係好肚餓，所以就叫咗個雞扒炒蛋多士餐, 盛惠34蚊。如果肚餓嫌唔夠嘅話，可以+$7.5換麥皮或者米粉等等嘅食物。以前嗰啲牛奶麥皮係有糖嘅，而家就特登寫咗無糖，可能係因為要迎合而家嘅健康潮流。大快活個炒蛋夠大份又好食！ 雞扒唔算細份但偏薄，個汁一般，下次我會叫走汁。多士有烘底，奶茶正常。總括黎講ok!

下午茶時間走入大快活,雞脾沒貨,要等15分鐘,唯有轉吃煎蛋午餐肉公仔麵加燒雞翼套餐配一杯熱飲$35吃得飽而已,味道一般餐肉幾乎像沒煎過,沒有脆感,反而隻蛋煎得好,蛋黃部份全生,好嫩滑奶茶也夠濃味,雞翼烤得太彈了,只有一點點蜜糖味道

做Gym前想醫醫個肚，近近地大快活，唔想食太飽order:黑椒豬扒炒意粉配 蜜汁燒雞脾加 $3 升級紅豆冰意粉黑椒味好重，加埋配菜有辣椒絲，洋葱，葱， 食落辣辣地幾野味， 蜜汁燒雞脾外表睇落ok(燒到金黃色), 食落都好入味， 唯一挑剔係太熟， 最後要讚下：$3升級紅豆冰 , 連鎖快餐店keep到水準

每次嚟九龍灣做gym都一定會食嘅紅米雞胸飯 呢一間大快活嘅位置非常便利而且好近我嘅占房 雞胸飯係健身人士必備嘅食物 價錢係$45亦都合理唔太貴講返嘢食先 通常我食呢個飯都會走汁然之後自己再叫一個茄汁 因為好多時佢哋個汁都會比較素 唔太啱我口味 個飯一共有三樣嘢 第一樣就係紅米飯 第二樣就係蔬菜 第三樣就係雞胸 紅米飯唔會太濕/太乾係恰到好處 蔬菜都有蘿蔔娃娃菜都可以接受唔會太難食 呢個飯最出色嘅係當然係雞胸 佢係採用慢煮同慢煎嘅做法 令到雞胸可以鎖住肉汁而且中間唔太乾又唔熱氣 比起我平時係屋企煎雞胸更加好食 營養又可以補充足夠嘅碳水化合物同埋足夠嘅蛋白質 岩曬做Gym人士啦！

難得今日外出工作不用返公司，當然去嘆個靚靚早餐，再去gym gym gym, 每次來到大快活都會見到好多捧場客，多數人都會叫健康早餐(燕麥粥配多士配雞蛋), 我今日叫咗：雪菜肉絲湯米(不過不失) 配 厚多士(微暖) 配 雙太陽蛋(o農邊), 加凍奶茶(連鎖集團凍奶茶keep到水準，抵讚)

屋企冇飯食既時候，一個人去得邊？做完個靚gym 當然去埋附近既大快活据返個靚排啦。叫左個鐵板餐，有雞有牛，開正我果範。仲有碗香噴噴既粟米汁飯，勁大食既我今餐都差啲食唔晒。原來阿活都做到一百分嫁。 100 ：）

好耐冇咁早起身出街食早餐啦，今日黎到位於九龍灣淘大既大快活試下距既早餐系列。餐廳佔地面積頗大，人流都幾多。落單時要排隊，再到出餐區拎餐。今次點做個滑蛋雞扒餐，配英式多士，仲可以配一杯野飲，都係只需$32.5。先講下滑蛋，我會撒上一些胡椒粉，味道超正。雞扒睇起身好似好細一塊，但食落都OK飽ga！煎得好香好入味。多士就可以加上煉奶或者花生醬，視乎個人口味。早餐點少得一杯熱好立克，為早晨添上完美的一筆。下次再點滑蛋吉列豬扒先，睇起身都非常唔錯。

行過大快活，有點餓，適達晚市，進內看看有什麼熱賣，買了一個吉列厚切豬扒 - 咖哩汁，盛惠45個大洋，一向對快餐沒什麼期望，但驚喜連這連：1）這店有送餐服務 2）當飯送到來，附上一杯暖水，無須特別要求3）豬扒足有一厘米厚，不韌，外皮鬆化4）飯選用了珍珠米，食落有咬口5）咖哩汁略嫌不夠濃總括來說是上上之選