大力水手炸雞 (已結業)

星期日去左送機,係冇食過野既情況下黎左呢度食野,事關我等唔到要出返出面食食左個一人餐,講真,$39,算係貴個餐有兩隻炸雞,我揀左唔辣,薯蓉,同埋牛油鬆餅,三樣野我都覺得好好食.薯蓉個汁有d肉碎,同埋比較有質感,較杰身.牛油鬆餅都唔錯,如果有jam搽下就perfect喇~最緊要就係雞,好juicy,同埋就算係唔辣d皮都好脆相比之下,我覺得KFC既炸雞比佢差唔少...

上機前開車送姨丈到機場，同行的小表弟妹扭計要食炸薯條，於是到這自助快餐店。點了最普通的「$98 二人餐」（圖示）。以紙盒上，內有炸雞幾件、牛油鬆餅四個、薯條一包、汽水兩中杯。經濃味香料化妝後的雞件，實香口惹味，是香辛味，而非雞肉味！牛油鬆餅，即Buttermilk biscuit，類似KFC 那款：粉糰奶精脂肪的製成品。薯條份量略嫌僅兩人食用。但那炸薯條的萬年油，似乎要隔隔佢，或者加入些少新血。以前好鐘意食呢類快餐，年紀大了，開始抗拒。另：那牛油鬆餅小孩子吃得津津有味！

下晝吃完飛機下午茶餐,話飽又唔係,出境後買番個鬆餅返屋企做晚餐,到counter時又突然想吃件炸雞,最後2樣都買。鬆餅一如以往味道,香香牛油味+咸咸地餅身,好吃。炸雞出乎意料地大件,表面炸粉比較硬身,要小心吃至唔會吃損口=p 見到盒底張紙一點油跡都無,感覺上比KFC無咁油膩,味道都係炸雞味,不過不失!自己呢排鐘意吃雞胸,呢件雞胸肉都ok,唔太孩口,相信即場吃會更加好。今次店員弟弟態度一般,無之前店員妹妹咁好態度,但相比呢幾日係上海個D對顧客視而不見既服務態度,呢位弟弟已經算係唔錯。

去完BURGER KING，即刻轉頭走過去睇下仲有咩食！點知番薯蓉同薯條，唔理咁多，各要了一客，盛惠$24大元。薯蓉分量勁多，差不多是家鄉雞5倍，淋面的SAUCE味道好濃，比家鄉雞出色，仲有雞蓉同洋蔥碎，令薯蓉多添一分口感；薯條也不錯，但偏辣，未必人人接受得到，我那不吃得辣的男友便是其中之一，害我獨自吃掉整包薯條，超熱氣！

今日入機場接機,順便買番幾個著名鬆餅試試。單買一個$5、六個就$25,梗係買六個哩!拎上手熱辣辣,一路行一路聞到香噴噴餅味,真係口水都流,好後悔點解唔堂食一件先,十個蠢!!返到屋企雖然凍左,但個餅都仍然脆脆地,都好香牛油味,不過鹹既??我印象中鬆餅唔係甜架咩??不過鹹味都幾得意...聽日叮番佢加埋蜜糖食,睇下係唔係另一種風味先。店員妹妹好好禮貌,態度一流,讚!!

到過機場幾次，送機接機都無機會食，經過數次卻被布魯圖撩得心癢癢昨晚送家人搭飛機，因利成便，到這瑟縮於離境大堂中央電梯底的小角落一嚐心願臨行之前看過其他人的食評都認為此雞不太叫好，是故在我堅持食雞的同時也警告同檯的其他人──吾好食吾好賴我～餐牌有8種套餐，我們點一個＄98的大套餐，有8件雞，4個鬆餅，兩大杯汽水，一包薯條，一份沙拉基本上所有食物的樣子跟KFC的差不多，分別是雞──皮比較深色，可能是炸漿的問題，不是翻炸果那種焦黑色，而是好像是雞皮發黑那種，但咬開之後裡邊好正常的白雞肉，為何外皮會如此深色真是百思不得其解。味道方面，跟KFC不辣的雞件相約，少量肉汁/油份，不算難食，但也毫不突出，未知在其原產地是否也如此不濟？鬆餅──比KFC白色一點，質感也鬆軟一點，甚至有點糯糯的，近似KFC初出的鬆餅。薯條──也是黑黑的，外層有黑椒/鹽，惹味但比較硬身，相信是經過翻炸的結果。沙拉──也是類似KFC的菜絲沙拉，味道不得而知。餐牌上還有雞柳/雞堡/蝦堡等選擇，單買一份餐大概是＄3X，總括而言，到此一遊便可，如果換成是BURGER KING，相信會更受歡迎。

幾個月前坐早機，原本想去大家樂食早餐，點知轉左手俾大力水手，朋友又覺得ok 咪試下囉，一睇餐牌，全部祇有套餐，冇散叫，平均四、五十蚊一個早餐，覺得貴，所以諗住同朋友share 一個早餐再加杯熱咖啡，落order，侍應答我一句有凍咖啡冇熱咖啡講晒，問佢冇熱又何來有凍？佢又十下十下咁唔知點答，我見佢個樣好似好難委佢咁，算啦，凍既都殺，過一陣再去欏野食先知原來係罐裝咖啡，所以冇熱，不過亦賣晒喎！朝早七點就賣埋咖啡，你就好生意下啦，成個場得我一檯客我都買唔到，我仲點好意思怪你丫？Ｄ野唔好食，可能我食慣KFC 掛？一早食又炸雞又炸薯條，除左杯汽水外全部熱氣野，再加上原全冇味道，淨靠落鹽同茄汁調味，Ｄ人面口又衰，十問九唔知，下次餓死都唔會再黎！

有朋友介紹大力水手o既鬆餅同炸雞，見評分咁高，上機前一於o黎整個晚餐\，晚上八點幾，場面好冷清，得我一個客，叫o左$48套餐\，有兩件雞，一個鬆餅，薯條同汽水，個鬆餅外微脆內鬆軟，幾得意，香味普通，o個兩件炸雞就出事o刺，又亁又鞋，又無咩香味，(係咪夜o左o黎所以俾o的賣剩庶我食？)食o左半件卜就投降，炸雞o黎講絶對差差差差差過KFC，薯條就加o左調味，鍾意o既話都唔錯，但係即使話機場o的o野係貴o的，呢個餐\都無理由收我48蚊。完全唔理解點解呢間o野可以有咁高評分，以後睇食評都係無謂睇分數，太多Manipulation，都係睇o的靠得住o既人所寫o既食評穩陣。

事先聲明，只是個人口味及意見，米到時俾大力水手炸雞的fans見到，又無理取鬧的來「拿公道」，就無謂了。起飛去公幹前，我吃了水記，去機場會合太座，佢未食野，竟然說要吃這裡的炸雞，說在外國食過好食。咁我只是陪吃，自然沒有抗爭的理由。其實以食物計，呢度同肥佬上校差不多。要了個炸雞漢堡及薯條的combo，又再加了兩個牛油鬆餅。炸雞漢堡同相片所示是有天壤之別，味道就不算好，唯一不錯的是裡面的炸雞，不算太乾亦幾可口；薯條熱，但不脆又不香口，唔掂，比老麥還要差；牛油鬆餅有名你叫，是充滿牛油，幾香，如果配埋香甜的藍莓果醬及香濃咖啡，著實是一個不錯的下午茶。埋單要四十幾蚊，一點也不便宜，非常之不抵食。坦白講，食碗味千拉麵好過。個人而言，是找不到再來幫襯的理由。

睇完d 食評，月頭去韓國玩，當然check in 後完，梗係去大力水手試下啦，但有fd 話晨早留留8點幾要飲茶，是旦佢地啦，我就去左買外賣轉頭搵返佢地，橫掂係佢地樓下之麻~~買完返上去搵返佢地，佢地試完個個都話good~~

去到機場，記得多網友好評，所以幫襯「大力水手」，點知唔小心叫炸雞柳set ($38)，唔係大大件炸雞。個set包：兩個牛油鬆餅(幾好味，不過幾飽滯)；六件炸雞柳(三件辣，另外三件唔辣；細細件，肉質有鞋，辣同唔辣分別唔大)；一包薯條(幾好)；一杯可樂。另外，加$3要紅腰豆飯，個飯好似義大利飯，半生熟，OK啦。我o地兩個人食都好飽，抵食。下次一定唔會攪錯，會試佢炸雞。

上次只係食ｂｉｓｃｕｉｔ～冇食到佢地既招牌貨！今次終於都食倒，真係冇令我失望，大大件而家又脆，裡面又滑！正！服務有笑容

我都响呢度食過呀,d鬆餅同炸雞真係我食過咁多間最好的~!! d雞即使炸完都好滑,鬆餅好鬆化香甜架! 上次去雲南入開機場諗住再食,點知行錯路又趕上機miss咗...唉-_-, 你地記得入開機場要食啦,如果唔係要食KFC的鞋鞋雞了. ^^

哩度既鬆餅雖然叫biscuit~不過口感極似scone~超鬆化,真係好正~鬆餅係plain biscuit另有一包100% 蜜糖~夾埋食真係食過返尋味!

復活節去完旅行返黎, 終於有機會一嘗期待已久既Popeyes! 晚上九時去到, 我地已經可以包場, 叫左兩個3 號餐, (兩件雞+ 薯條+ 鬆餅+ 飲品), 個經理好好人, 我要求多D 上脾, 佢竟然比左三件我, D 雞睇黎唔似岩岩炸起, 但係入到口都仲係好熱好新鮮(如果係KFC 就一早變得油淋淋了), 仲好食過初期既哈迪斯, 薯條係加左特別調味粉炸既, 晌其他同類快餐店係食唔到既, 味道都係一流; 至於個鬆餅, 一入口就有極之濃郁既牛油味, 又夠鬆化, 好得! 黎到呢度, 我仍然可以比大力水手炸雞100 分... 但係好可惜, 美中不足同要扣分既竟然係杯飲品! 我地分別叫左杯可樂同雀檸, 我飲完成杯"雀檸"後, 同行女伴先同我講: "你有無飲錯杯野呀?" 原來我飲果杯係可樂, 但係竟然係完全無氣既! 味道仲唔似可樂... 身為一間出名既美國快餐店, 真係要好好檢討下佢地既汽水質素啊~