喜滿樓菜館

營業中

休息中

今日得閒睇番手機D相，好耐冇寫食評，呢間土瓜灣店純係直覺揀，主要係西鐵延長線可以不用轉車可達😃先講鋪面，真係唔起眼，似快餐廳。叫咗惹味欖角骨，來到見是用腩排，肉不乾也不太咸，五個人很快掃清。再來是焗魚腸，一般都是重胡椒，這個屬清淡不腥也𠕇果皮香，不過我稍愛重蛋香的。叫了清炒豆苗，可以。反而砵酒焗蠔有些失望，酒香稍遜甜味太重，上桌時也不夠熱，還是喜愛用錫紙包著上桌才𠝹開的吃法😋。見旁邊叫招牌芝麻雞也叫了半隻，可以，不過除多了芝麻也沒怎樣味道突出，下次試叫燒雞。因為不好飯，叫了個豉油王炒面，這個好吃可以encore👍🏼👍🏼埋單時用開飯訂座有9折，總的來说，不錯。

老闆對食物有要求，所以帶得我地去食嘢嘅地方，都好有水準，呢間菜館係煎炸高手，所有煎炸嘢都係好好食👍👍👍😋😋招牌芝麻雞，賣相特別，好食。👍蟶子王好惹味👍黃金涼瓜，鍾意黃金野一定要試👍👍， 椒鹽九肚魚👍👍，椒鹽鮮魷，蜜鱔👍👍👍👍都好好食，好食嘅嘢不能盡錄，炸野一流，鍾意煎炸嘢嘅可以去試吓！👍👍👍菠蘿咕嚕肉👍👍，因為一行十人，所以喜滿小炒王都叫左兩碟👍👍臘味飯堅好食😋

今次係第二次去土瓜灣喜滿樓食晚飯，食物味道同出品依然咁好，款式更多了。首選係食芝麻雞同冰鎮南非鮑魚，冰鎮鮑魚食落透心凉唔熱氣，冰凍鮑魚沾上鮑魚汁好鮮味。我哋叫好多道菜包括: 冰鎮南非活鮑、懷舊梅子荔芋鴨、黃金蝦、梅菜炒菜心、薑蔥日本蠔煲、芝麻雞、黑松露蛋白炒飯、黑椒茄子牛柳，全部菜都好食，食到個個都滿意。最特別係個黑松露蛋白炒飯，炒到粒粒分明唔油膩，黑松露味唔過濃。來了兩次, 越來越多客人，下次要早些訂檯才有位了。

以前一家人成日去山林道太湖食晚飯，最愛食佢地嘅芝麻雞同焗魚腸。雖然太湖已結業好耐，仍然好回味那種味道。朋友推介去土瓜灣喜滿樓食飯，喜出望外呢度都有芝麻雞同焗魚腸。焗魚腸限量供應，好彩仲有一份留比我哋食。我哋分別叫芝麻雞、古法焗魚腸、雞油炒豆苗、椒鹽白飯魚、水煮東星斑、臘味炒飯。整體味道出品好、價餞合理，值得推介。招牌芝麻雞係招牌菜，皮香脆肉鮮嫩，原來雞都可以黏上芝麻，再黏上芝麻醬有入口即溶的味道。古法焗魚腸味道一流沒有腥味，仲有陣陣果皮香。最驚喜係個臘味炒飯炒得乾身香口，仲以為食緊生炒糯米飯。好難比較味道，但呢度絕無去錯。

鑊氣十足嘅傳統粵式中菜館！餐廳門面平凡唔顯眼，但估唔到啲嘢食有驚喜😳主打香港地道懷舊菜式，同時又有多款創意新派撚手小菜例如古法焗魚腸、梅子荔芋鴨、黑松露蝦多士等等，某啲菜式需要提早預訂先可以食到Menu睇到花多眼亂，但好在有張美食熱賣排行榜可以跟住嗌🤣呢度所有小菜由午市就開始供應，包白飯同老火湯，老火湯足料濃郁冇落味精，白飯仲可以任裝而家星期一至四午市同晚市小菜(海鮮及預訂菜式除外) 都有9折優惠，更加抵食！-👍🏻芝麻雞 $188/半隻呢度招牌必食嘅傳統菜式！可以做到成隻雞都沾滿密密麻麻嘅芝麻仲要唔甩，真係好考功夫花時間火喉亦控制得好好，雞皮薄身香脆，雞肉咬落仍然鮮嫩多汁，完全做到皮脆肉嫩口感，雞味濃郁同時又食到芝麻香，超正！配上日式芝麻醬，不過雞肉本身已經有鹹香，就咁食都好好食雖然密集恐懼症人士表示有啲驚，但真係值得一試味道：9/10性價比：7/10-👍🏻蜜椒薯角牛柳粒 $88近年大排檔必嗌菜式，但呢度比較特別，連牛柳都有脆漿包住，表面炸到微微脆牛柳食到牛味，肉質軟嫩有彈性，冇筋唔會太韌/拿到腍沾上蜜糖，甜甜地又有黑椒味，好好食！薯角亦炸到外脆內軟，大小適中，加上甜甜地嘅蜜糖脆皮，冇

同啲朋友相約晚飯，嚟到喜滿樓，點知⋯⋯第一次嚟，亦係最後一次！冇驚喜之餘，仲要食到一肚火！環境一般，普通茶記咁，已經點左唔少餸，但係每過15分鐘，就會有侍應問要唔要加餸，如果真係唔夠嘅話我哋會加，問題係唔需要，已經夠晒食，多次表示唔需要再加餸喇，仲要問完又問，真系認真煩！係覺得我哋點嘅餸太少，定係想趕客走呢？而且啲食物出品好一般，啲價錢又貴，服務態度又唔好，咩好嘅心情都畀佢掃晒興，絕對唔會再有下一次幫襯！

//䬻行飯// 天氣不似預期，但要走總要飛👋🏿身邊同事要移民啦，臨走總要懷緬下港式茶記小炒風味🥹係我中學Canteen 就有試過芝麻雞，相當出名，估唔到香港有餐廳做😎🥑芝麻雞$188/半隻❗️推薦❗️對於我黎講無特別驚喜，因為以前試過。其實皮係幾脆，配上芝麻香，雞醃製過好有味😉🥑風沙脆鱔球$158 ❗️推薦❗️有啲似係避風塘風味，有好微微既辣，炸粉超級薄脆，帶皮白鱔啖啖肉，爽口彈牙，非常新鮮👍🥑椒鹽鮮魷$108算係正常發揮，炸粉超級薄脆。🥑花甲蒸水蛋❗️推薦❗️火候啱啱好，水蛋超級嫩滑，唔好以為好少花甲，好多沉係底，真係好足料！花甲都好新鮮😛🥑乾炒牛河 唔油膩既炒牛河，入味有鍋氣🥑蒜蓉炒豆苗$98正常水準，無特別驚艷🍁整體🍁🥑性價比：7/10🥑美味：7/10🥑環境：6/10🥑回頭：7/10🥑人均：$200-300📍 喜滿樓菜館 (土瓜灣)土瓜灣安徽街2號地舖🧡𝑳𝒊𝒌𝒆 & 𝒇𝒐𝒍𝒍𝒐𝒘 𝒎𝒚 𝑰𝑮 @annasan.cat

我哋呢個六人組合已經一段時間冇見了！朋友一向識飲識食，相約土瓜灣呢間風味小館，真係冇介紹錯！無見一排，趁機會分別公佈咗三個好消息，哈哈！真係可喜可賀！😆🎊🎉* 靚湯和以下海鮮要先預訂：- 杏汁豬肺雞腳湯- 黑椒肉蟹2 只- 豉油王蝦10只- 花甲豉椒炒煎米粉底另外再叫：- 招牌芝麻雞半隻- 椒鹽魷魚- 椒鹽白飯魚奶白色杏汁湯底滑溜滋潤足料又清甜👍大蝦和黑椒大肉蟹都惹味夠鑊氣啖啖肉！！花甲煎米粉底個汁好味到不得了，撈米粉一流！仲有個脆皮芝麻雞又係鹹香惹味冇得輸👍最後都忍唔住嗌多個椒鹽魷魚和白飯魚，一樣好好味，傾偈餸酒真係一流！以上咁多小菜靚湯兼海鮮，每人平均四百鬆啲！咁嘅水準真係要讚👍

前日朋友提議到高山道附近喜滿樓菜館食生日飯，來到這裏果然有料到。看到餐牌，有好多款式的小菜，也有懷舊小菜。我哋點了招牌菜芝麻雞、梅子荔芋鴨、煎墨魚餅，鹹魚茸炒白菜仔、芥末虎蝦球同黃金鮮魷。對於最鍾意食雞鴨鵝嘅我，個芝麻雞同梅子鴨真係有料到，其他地方未食過。雞肉很嫩滑芝麻沾滿全隻雞，雞味適中，又香又脆皮。梅子荔芋鴨係懷舊菜，梅子汁夠酸甜，食落唔會油膩，開胃好味。呢度仲有其他雞選擇，有大漠風沙雞、脆皮炸子雞，下次再嚟試下。

早幾日約埋班老友係我公司附近小店喜滿樓食個晚飯。之前見呢間喜滿樓有咁多人讚，都幫襯下。我地叫了一個炒飯，幾個小菜。黑松露叉燒粒炒飯，炒得粒粒分明，黑松露好香。鮮菠蘿脆皮咕嚕肉，酸酸甜甜好開胃，我最怕太肥咕嚕肉，呢度咕嚕肉肥瘦適中。味菜炒鮮魷，呢個菜炒得好惹味，鮮魷好彈牙。呢度成日推出新菜式，樓面哥哥介紹左一個新菜叫星洲酸辣骨，個醬汁似茄汁加辣，加埋洋蔥好香口惹味，這個新菜才98元大大碟，我一向都鍾意幫襯小店，通常比我滿足的驚喜。

🤤土瓜灣高手小菜🤤-土瓜灣既喱間小菜館，裝修偏街坊，但出品全部都好有鑊氣，絕對用心之作，如果同屋企人食飯啊、同朋友一大班人聚會都好適合！老闆老闆娘都好細心，落單會提醒返份量，如果人多仲有得加大份量，掂！不過去之前記得訂位，因為好多特色野都要預訂先有🤩，加上佢晚市超爆場架！秘製芝麻雞($188)黎食記得要預訂！芝麻雞真係冇係第二到見到過😏，望落雞既外層裹滿白芝麻粒，食落外皮係乾身帶少少脆，但雞肉好嫩有汁，沾埋日式芝麻醬食好特別！原隻菠蘿脆皮咕嚕肉($248/小)有成隻菠蘿做底，賣相係一流，咕嚕肉炸得夠脆，食落有肥有瘦所以好香，加上鮮既菠蘿肉既果香係罐頭冇得比既，都貴得值得😎。鮮花甲蒸滑蛋($162)喱個都係好多人點既餸之一，如果人少啲可以揀例牌，份量會細啲不過價錢就$108抵食☺️。食落花甲味好重，連蛋都充滿曬海鮮味，佢個蒸蛋唔係偏水狀好滑個種，而係好似布甸質地，挺身啲既。蜜椒脆鱔球($148)蜜椒通常都係夾牛柳粒，喱到竟然有得用落鱔球到😂，外層薄薄一層脆皮，食落蜜汁味好重偏甜口，特別但唔算太夾，食返風沙/椒鹽口味應該會更好食😝。

入門前喺門口已經覺得環境麻麻，普通酒家都唔似，真係一間茶餐廳咁，不過已經訂咗檯，就照舊入座，之後安排坐最入，電話都收得好弱，先叫芝麻雞，芝麻係痴得幾均勻，不過鹽就唔係，大半隻無味，一係就好咸。之後畀多次機會，叫咗風沙鱔，呢味就鱔無鱔味，炸咗咩魚都無乜分別，之後就走，唔想再試，，味道普通，咁嘅環境，好多選擇。最終都無畀過9折，原來好多嘢食都係無折，仲有網上訂座係要早一日再打去先計，否則會當你自己取消訂座

呢間係土瓜灣特色手工中菜館，有好多款小炒，睇到餐牌唔知點什麼。樓面哥哥有禮貌客氣介紹幾個招牌熱門菜式。最出色招牌就係芝麻雞，雞皮掛滿芝麻雞，香脆味鮮香口，皮薄肉嫩有肉汁，芝麻香氣十足，送上一碟芝麻醬更加豐富味蕾。深井有燒鵝、沙田有乳鴿、益新有琵琶鴨、呢度有芝麻雞，值得一試。另一個推介蜜椒鱔球鱔球切得夠厚身，炸得好脆口，有一陣薄薄嘅蜜糖面，咬落去後係仍然保持肉汁嘅鱔肉，鱔肉亦十分彈牙，加上微微嘅黑胡椒粒，口感層次豐富，最正係鱔球已去骨，功夫心機出齊。仲叫了其他鑊氣小炒有椒鹽鮮魷用新鮮鮮魷、孜然腰果牛柳粒夠惹味、黃金蝦球、咸魚煎肉餅，唔詳細講了，樣樣都好食，甚有驚喜。

朋友飯聚想去土瓜灣食晚飯，但正式中菜館既餐廳唔多，選擇呢間餐廳有人氣小店既感覺，分開樓下同樓上，樓高兩層樓上有圓檯選擇多。今次一行4人叫左6個菜: 小炒王材料十足最喜歡魷魚鬚同香脆腰果。黑松露炒蝦球黑松露味濃香脆可口 。酥炸生蠔比較香口夠薄皮。風沙雞夠惹味，跟芝麻雞一樣出色必叫，雞面灑上炸蒜粒同原隻辣椒，色香味俱全。黃瓜涼瓜唔會苦，甘香鬆脆，夠哂熱氣。最後叫星洲酸辣骨，個醬汁唔太辣少少酸，醒神開胄反而洋蔥仲好味。整體都滿意，服務及食物都可以。

國慶假期同朋友去土瓜灣喜滿樓食飯，地鐵站附近幾方便。我哋分別叫芝麻雞、芥末沙拉虎蝦、黑松露蝦多士、椒鹽軟殼蟹、上湯鮮墨魚滑浸油麥菜。整體味道出品好，翻食機會大。招牌芝麻雞 - 果然係招牌菜，皮香脆肉鮮嫩，原來雞都可以黏上芝麻，再黏上芝麻醬有入口即溶的味道。芥末沙拉虎蝦 -有食沙律蝦的味道，芥末有少少攻鼻，食落過癮。黑松露蝦多士 - 以為黑松露同蝦膠混在一起，原來係放係上面，裡面仲有原隻鮮蝦。黑松露、蝦膠、鮮蝦肉同多士一齊咬，舌尖大享受。椒鹽軟殻蟹 -香口惹味，大碟有8件，蟹味鮮甜，加上椒鹽好惹味。上湯墨魚滑浸菜心- 墨魚滑吸哂上湯又夠彈牙，用墨魚滑浸菜都幾特別。