和順記 (電氣道) (已結業)

大過塊面的炸雞脾王—和順記雞脾皇天后出名多野食，不過雲遊大思同朋友行左一圈，都諗唔到有乜想食。見到間間舖都無乜人幫襯，感覺好奇怪。因為雲遊大思有個宗旨，無人食的舖到，一係好難食，一係好鬼貴。基於呢個宗旨，所以好多舖頭揀唔落手。係絕望之制，見到貌似頹食的雞脾皇餐牌，於是係無乜期望之下就入去試下啦。原來呢間係有心人舖頭，加分加分。見到個個都叫生炸雞脾皇，咁雲遊大思都叫一個試下。一上枱，即同店員大叫：「哇，大過我塊面呀，好浮跨。」真係唔係講笑，真係好大隻，大到２個人都食唔晒。馳名雞脾皇出名大大塊神級雞脾皇，皮脆香口而不過份油膩，內裡雞肉嫩身，好味，係高水平嘅炸脾。隻脾真係大過我塊面，２個人都食唔啱。煎雞扒強沙嗲撈烏冬雞扒煎得好香口，好有肉汁，我覺得好食過雞脾皇。撈烏冬的沙嗲汁都幾好味，唔太辣，不過加左雲遊大思唔鐘意的孜然，所以扣少少分。咖喱牛扒煎蛋飯咖喱汁OK，但牛扒就扣少少分，因為好重鬆用粉醃過的質感。地址：天后電氣道39號地舖整體評分：７分整體環境簡約潔淨，雞脾皇大隻有驚喜。雲遊大思列為屬「可考慮回頭級別」。#cloudtourmaster #hkfoodies #hkig #hkfoo

和順記生炸雞髀🍗出名好味，好多人都知道。今次我哋去天后試吓佢其他嘅菜式：芥末雞扒煎蛋鈑$56（包一杯熱飲）有兩大塊雞扒，一隻煎蛋和少少青菜🥬，雞扒煎得香脆，肉質鮮嫩多汁，現煎太陽蛋🍳配上熱熱辣辣香噴噴嘅白飯再沾一點自家製錢豉油，實在令人回味！黑椒牛扒煎蛋飯$56.（包一杯熱飲）中式黑汁香香辣辣不搶喉，有種懐舊feel, 兩大塊牛扒味道其實不差，但一下子就被雞扒比下去了。以$58套餐，無論份量丶味道也是超班！難怪這麼多人。

喺油麻地食過一次生炸雞髀真係有一試難忘嘅感覺隻雞髀大過手掌，真係超滿足！今日咁岩經過開天后，見開咗分店，一於排隊食下～～同油麻地舊舖感覺好唔同新店好光猛，乾淨闊落睇餐牌感覺係多咗選擇樣樣都好吸引見隔離枱嘅雞髀真係好吸引，忍唔住今次都要再食～同事就order咗避風塘炒豬扒飯～～應該Lunch time時間，坐咗一陣就有得食喇～近攝～～大大隻雞髀，好有氣勢生炸雞髀皇煎蛋飯 $58 (包熱飲，凍飲+$3)老實講，今次隻雞髀無咗喺油麻地食嘅大，有少少遜色咗，味道有分別，比較淡味同無咁脆，但雞髀肉係幾滑，都算幾好味嘅～～避風塘炒豬扒飯 $56 (包熱飲，凍飲+$3)驚喜嘅係個豬扒，色香味都有～避風塘嘅調味好多時都會死咸，但呢個就無呢個問題，豬扒爽口唔靭，配埋炸蒜同蔥夠曬香口～～餸飯一流～所以真係好驚喜～～整體嚟講，喺銅鑼灣天后區嚟講，價錢同味道都算不錯，有機會會再返嚟食～～

呢間雞脾係油麻地好出名 咁啱經過天后就有鋪雞脾癮走左去食😂生炸雞脾配薯條🍗🍟雞髀真係用脆卜卜黎形容 好似食緊薯片嗰種脆 佢本身都有醃過 又唔會太過鹹 仲要啖啖都係肉 食到停唔到口 薯條同樣都炸得幾脆 食完生多幾粒暗瘡都係值得嘅😜咖哩豬扒蛋飯🍛咖哩就真係好一般 偏向葡汁咁既味道 椰汁味偏重 完全冇咖喱香同辣 咖哩嚟講真係少少失望 豬扒就正正常常冇雞脾咁好食咁脆口整體嚟講 食雞髀已經好夠 其他可以唔使試 推薦程度 🍁🍁🍁🍁🍂

油麻地有一間出名食雞髀嘅茶餐廳，好耐之前已經喺唔同嘅媒體聽過佢嘅報道。不過一直都未有機會去試，估唔到佢竟然開咗喺天后呢邊，食完個晏晝覺得唔算太飽，咁啱已經開始咗下午茶時間，所以就去試咗呢間雞髀啦，喺下午茶餐度揀咗特大滷水雞髀，由於佢係特大滷水雞髀嘅關係所以佢就冇薯條或者沙律嘅配搭啦。雞髀上枱熱辣辣，問我開就聞到香濃嘅滷水汁，就算雞髀咁大隻都好佢啲肉都係非常之嫩同埋滷得非常之入味，食完之後就完全唔覺得出奇點解佢係一間咁出名嘅舖頭啦

食過幾次，依然回味，冇得彈，我會再次再次幫襯的，鋪面雖小，但實力十足，我記得第一次去食的時候，就是食巴蜀雞脾飯，好好味，第二次再去時，老闆介紹我試下龍躉飯，真的也不錯，大前前天再去老闆又介紹我，試下黑松露牛柳飯，食完，真的好好味，要讚

見佢開完一間又一間，今日專登來試吓佢咩料. 餐廳環境尚算ok,感覺舒服嘅，但就無咩特色…..坐低後唔使點諗當然係招牌菜啦 「雞髀皇雞蛋飯」. 我老婆就點左龍躉魚….碟飯來到隻髀就真係好大！大到我懷疑係火雞髀…我問侍應邊度來隻髀咁q大，佢話係美國最大的雞髀再砌開攤開所以更大～！食落去個皮係好脆，但估唔到啲肉都好juicy好入味，掂！堅係好食…..但係原來係可以加其他汁，咖喱汁，黑椒汁等！個侍應落單時又唔講..呢下要扣少少分！ 之後個到個龍躉，本人對魚就麻麻地…但我老婆就話好正…咁個味道係唔差嘅. 仲有個凍奶茶…係ok嘅. 埋單$130⋯⋯人均$65. 天后區呢個味道，呢個價錢我絕對可以接受. 讚！一定再去試其他野….

位於天后嘅「和順記」，原來有個朵叫「油麻地神級雞髀皇」😮既然係咁，點都要試下呢間嘅雞髀🍗。▫️生炸雞髀王煎蛋飯 (HKD58) - +$10轉烏冬所以炸雞髀同烏冬係分開上嘅。雞髀用特製韓式醃肉方法醃製數小時，效果係令肉質變得更加嫩滑。我哋覺得味道真係唔錯，雞髀肉唔會因為經過高溫油炸後而變乾。一隻炸雞髀嘅size真係有手掌咁大，外皮炸到金黃色，賣相同味道一樣攞晒滿分。另一份炸豬扒我哋覺得水準麻麻，如果下次再去都係叫番食炸雞髀好喇。價錢定價比較進取，加上店員嘅服務態度麻麻，以咁嘅格局及價錢真係好難令到我想再去幫襯。

話說早幾日上網睇人介紹炸雞髀一心想揾間黎食做晚餐，行經天后見呢間大大隻字寫住生炸雞髀王就入去試下，叫左個炸雞髀到煎蛋飯，黎到雞髀係好大隻有味嘅，再試埋個飯停左一停，明明有豉油但唔咸唔甜如果閉上眼食係完全同食白飯一樣，一啖雞髀一啖飯好膩，成個飯好寡好乾，$60幾蚊真心唔值轉辛辣麵要加$10， 俾$7-80唔食唔覺損失。另外我媽叫左個藥善豬潤麵食，個湯求其到放幾粒杞子就話係丁點藥材味都冇，豬膶好大件仲要厚切，一咬開流血水🩸其餘果三件都係咁同個男員工講，答都冇答拎左碗麵入廚房以為換過俾我地，點知轉個頭原來係拎左個幾件豬畀潤再煮都算啦，！個麵由熱變室温豬潤再切開黎睇一樣滲血水！成碗冇食到，埋單時同店員講豬潤都係生冇食到太厚煮兩次都唔熟，佢只係「哦」一聲望都唔望你！食唔食自己諗

聽講油麻地有一間食雞脾出名嘅茶餐廳，叫「和順記」，我想去試好耐㗎喇今日過嚟天后有啲嘢整，經過北角電氣道，見到個名咁熟口面嘅！原來係和順記分店咁緣份唔係唔入嚟試吓嗎下午茶餐大約$28至$45左右，想食雞髀嘅話可以有幾個選擇。分別係生炸雞髀或者滷水雞髀，另外仲可以選擇配唔配薯條或者要唔要超大隻嘅雞脾皇！我今日唔算好肚餓，就冇要到薯條啦。揀咗$45嘅生炸雞髀皇餐，跟餐要咗杯熱檸水。上枱嘅時候心底真係嘩一聲！超！級！大！隻！ 炸得皮好脆，肉質稍微醃過，仲係好Juicy真係令人食唔停口啊！我自己食炸雞最鍾意加茄汁，特別好味

伏，簡直係中晒伏！店鋪外大大隻字，圖文並茂推介嘅 “藥膳豬潤麵”，望圖睇落幾吸引，又係招牌菜之一，我就不虞有詐入去堂食。等咗一陣，麵嚟到，我望一望碗入面，哇，你地班捧餐嘅係盲嘅？入面啲豬潤仲流緊血架喎！咁都捧嚟俾我食？我食慣越南嘢，以為好似越南生牛肉河咁，要用湯浸熟啲肉，於是，我嘗試篤啲豬潤入湯中浸熟，兼切開啲豬潤做細粒啲，希望浸得熟。十分鐘後，我放棄我呢個諗法了，因為啲豬潤一直流緊血，幾乎舊舊都浸緊血水同我碗出前一丁撈埋一齊（噁心）。我叫侍應過嚟，「幫手加一加熱碗麵吖，我啲豬潤仲流緊血！」個侍應拎返入廚房，居然係用微波爐叮我碗麵。3分鐘後，我檢查吓啲豬潤，啲顏色變灰咗，不過有一兩舊，仲流緊血.....最後，成碗藥膳豬潤麵，我只係食咗一舊冇流血嘅豬潤。其他豬潤我係夾晒出嚟碗外，放棄了。到有個戴眼鏡嘅中年女侍應收碗，我同佢講，「你地啲豬潤，叮完都仲流緊血！我冇辦法食！我夾晒出嚟冇食！！」佢聞言後，只係答我：「哦」亦係呢個原因，嬲到我要寫今次差評！一句道歉都冇。餐廳負責人，你知唔知，進食未熟嘅豬肝會得戊型肝炎？點解你餐廳食物水準咁低？客戶服務水準亦咁離譜？For 大家 informatio

今日同朋友食中午飯，叫咗個麻辣雞 ，都冇乜嘢好講，擺設就靚，食落 就完全不同味不是麻辣味，又蓋咗啲雞味連雪藏味都冇埋，麻辣又唔係麻辣 辣椒又唔係辣椒，我都唔知點樣講，完全冇嘢講一句講晒真係 你哋自己試啦

今日又來都係天后有美食街之稱電器道既和順記👍🏻👍🏻平時黎親和順記都係食炸雞髀🍗，見過餐牌上有呢個避風塘炒豬扒都已經心諗有日要來食，今日終於有呢個機會啦❗️❗️❗️避風塘炒豬扒飯 $56避風塘炒豬扒：避風塘風味十足，又唔會太辣，炒蒜又炒得好香口，好好食😋豬扒又大塊夠Juicy，連埋避風塘風味簡直一流👍🏻👍🏻👍🏻👍🏻👍🏻整體來講幾好食幾特別， 係你食王牌炸髀以外嘅好選擇😋😋

開頭和順記喺天后開分店嗰陣，幫襯過一次已經俾佢嘅神級炸脾深深吸引。嗰次食炸脾感覺良好，因為第一次食到炸脾係外脆內嫩兼爆汁，算係我暫時食過最好食嘅炸脾。今次再度幫襯，當然炸脾雞蛋飯必定叫，再新試多一個芥末牛柳黑松露蛋飯。前者個炸脾炸過咗火，因為整體無乜肉汁，無咁嫩滑，個脆皮就依然keep到。後者係意外地好食，個牛柳好嫩，配埋芥末汁又幾惹味。而黑松露蛋又真係食到有黑松露味，因為好多時喺出面食都未必食到有味。PS. 差唔多食飽嘅時候，餐廳負責人問我哋啲食物質素時，我哋都有表達炸脾炸得太過嘅問題，負責人即時叫廚房再炸過一隻俾我哋試味。本身真係飽到上心口，負責人嘅熱情款待只好接受。今次呢隻就真係食返第一次嘅感覺，又爆汁又外脆內嫩，大滿足。好想俾返個credit 呢間餐廳，因為呢個跟進action你會睇得出佢哋係有心想提供最好嘅食物俾食客，所以會再繼續幫襯。

巴蜀雞脾皇煎蛋飯 改即食麵 連熱飲 $65係好好食，但以茶餐廳嚟講原本雞脾蛋飯$60已經好貴，改即食麵加$5，改辛拉麵加$10會唔會太過份？比較我去得幾多嘅北角祥發，嗰度嘅瑞士雞脾都好出色，全日供應嘅瑞士餐好抵仲有超多 options，如瑞士雞脾 + 火腿奄列 + 櫻花蝦濃湯炭燒豬頸肉即食麵 連熱飲賣 $48我以後都係去番祥發.