名廚燴

營業中

休息中

上星期五(13-1-2017)去試下這間的午飯.看看菜單,午餐有5個選擇. 叫左個海南雞飯.午餐連湯及一杯飲品都係$36,抵!先來個中湯,味道可以.再來杯奶茶, 以我飲奶茶多年,看看茶的顏色已知道茶味夠濃,奶合適.飲落好飲,好過好多連鎖店的.飯好快到.雞都好多肉,配合甜酸汁,好食好開胃.雞油飯非常好食,軟熟得尼又彈牙,出面真係很少地方食到.品質應泊得住一D專門店添.找數$36,超值啦. 收銀好有禮貌, 仲連聲多謝, 值得一讚!

我在荃灣爵悅庭附近上班,但這邊好食的而價值合理的.相信只有這間餐廳. 上星期五(23-12-2016)去左食午飯.首先看看菜單,12月午餐,每日都有不同的午餐.而且每日午餐有5個選擇. 午餐連湯及一杯飲品,只是$36,甘既價錢,現在好少地方食到.星期五有款叫乞兒雞飯.睇個名很特別就試下.覺得廚師都幾有創意!先來個中湯,味道吾錯.再來杯奶茶, 奶及茶比例合適.好飲.最後乞兒雞飯都好快到.原來係似荷葉飯,打開荷葉, 雞同飯都好足料.好大碟, 雞肉好入味, 非常好食,飯也很特別,很軟熟又很”煙”韌,出面很少地方食到.原來老闆用左最靚既米,真係落重本.雖然只幫趁$36, 收銀都講多謝,仲好好笑容.今時今日仲有呢D服務態度真係絕無緊有.

依家真係好難食到$36一個午餐，呢間名廚燴竟然可以做到，而且味道同質素、服務都好有水準！食個煲仔飯都係$36，雖然D餸小D，但好有飯香味！服務態度都好好，好有禮貌，直得再食！

尋日(26-11-2016 Sat)晏晝,同老公食完大家樂,佢話可以再食啲o野又或者唔再食,既然我o地落荃灣,就落去搵o野食啦,行過古坑道兩間大牌檔,唔多吸引,我突然又記得呢間,於是又行o黎,有開門喇,見到門口有張過三關下午茶餐好似好吸引,於是決定叫呢個.我同老公各揀兩款小食加杯熱好立克,咁就只須$35.00,我o地揀o左半件西多士,咖哩角(三件),春卷(兩件)同牛角包(一個).等o左一段時間,所有o野都到齊,成碟o野食o既顏色都清一色(打麻雀就正),我先食咖哩角,熱騰騰o既,脆口,唔係好辣,味道夠,幾好.味道: 5分春卷,竟然係米網春卷,同樣外面係脆,但餡全部都係豬肉碎冇蝦,奇.味道: 4.8分西多士,唔加蜜糖都已經夠味而且有蛋香,加少少蜜糖味道都多啲.味道: 5分牛角包,呢個唔熱,酥皮唔多亦唔夠酥,失敗o左,但食到牛油香味.味道: 2分最後杯好立克,雖然細杯,但冇落糖都好夠甜,果然俾足料.服務:原以為兩個人只幫趁$35.00o野,收銀唔會講多謝,但竟然會,唔錯.

王子葱油雞飯 午餐價 $36 送中湯及熱飲要拆解葱油雞飯, 首先飯就是軟身白飯, 少了咬口；白切雞欠缺雞味, 味道亦淡縱使已起骨兼滑肉；有大量油及豉油撈飯, 不過豉油味道頗淡；圖中那堆黑色物體就是炸乾葱, 味道焦焦, 質感幼幼硬硬, 幸好還有一堆薑蓉點雞吃。若果說, 這就是名厨作品, 那麽......

又是去茶餐廳開餐的日子，這次走到了爵悅庭的名廚燴，睇評語是幾得的。在午餐牌中挑了乾炒肉片河，看上去芽菜、蔥都有了，就是欠缺了鑊氣。吃幾口，味道淡淡的，必須要自行加辣椒醬去調味。肉片同樣是無厘味道的，最怕就是這樣的出品。凍奶茶反而不錯，夠香滑，卻拉不了太多分數。難道要吃燴的東西才行?

食過好幾次。有時比較油膩，米粉軟滑比較幼身唔錯。好在夠足料。炸菜都幾多下。湯底咸多些少會更好煙肉。煎蛋。多士。。都係一般早餐選擇。。但多士熱而不乾。是值得讚的。如果牛油分佈得再平均點。會更好。朋友的早晨扒餐。。魚柳熱辣辣。。配埋茄汁豆，煎蛋等。夠飽到不得了解Ｅ到地方唔錯。。招呼ＯＫ。上菜快。。

無骨海南雞雞肉與脂肪比例剛剛好,而且連雞翼都去骨 ,十分細心,值得一提這款是鎮店之寶啫啫芥蘭味道香濃冶味豉汁蒸倉魚魚的鮮味由豉汁襯托出,肉質鮮嫩,而且火候恰到好處金獎豆腐黃金磚豆腐外脆內裡軟滑,一入口令人有兩種口感凍檸檬茶茶胆純,入口不澀,冰粒無損茶的味道老闆及伙計親切有禮,誠懇款待,真正讓每位客人感到賓至如歸! I like~!

尋日(6-3-2012 Tue)朝起身返工,男友話佢起到身陪我食早餐,好啦.我問佢去邊o度食?有就o黎因斷租而唔做o既金銀島同呢間.佢揀呢間,好啦.我o地o黎到,o岩o岩有一張卡位,坐低後我同男友都揀$18.00o既早餐,佢要午餐肉公仔麵,飲凍檸茶.我要鮑魚火腿公仔麵,飲凍奶茶.好快,所有o野到齊,我o既鮑魚有三塊,食到有鮑魚味,口感o岩o岩好,公仔麵亦到係.而奶茶就茶味都唔係太濃,OK啦,個餐只係$20.00咋.服務:樓面好有禮,我o地落完單佢講多謝,拎o野到我o地張枱又講多謝,收o野都講多謝.不過我o地走人畀錢,收銀行o左去廚房講電話,樓面叫佢o黎收,個收銀就一句多謝都冇.算吧,樓面同我o地講佢o個份.

..又係星期6....上班前都會比朋友.叫去食早餐...嚟過幾次..質素好..唔似一般茶記咁混亂我要佐.炸菜肉絲米.配煙肉,,煎蛋..轉多士..我鍾意e到個.炸菜肉絲米上面d炸菜肉絲.似係之前有抄過埋過茨汁個一種.有誠意.米粉係軟滑d個種.幼身d...同d炸菜一齊食.正..湯底..唔太咸.食完唔會太口渴....煙肉係厚肉個種..唔會太乾...唔錯...煎蛋就.ok啦..唔會有咩驚喜..多士都唔會好乾.牛油都夠多.但係..如果d牛油平均分佈.會好d..之前試過e到既奶茶..唔係好得..檸檬茶.就最穩陣了....

今(10-11-2011 Thur)朝起身後,男友陪我食早餐,我o地就o黎呢間,o黎到張張枱都有人喇,只剩返最出o個張四人枱,我o地唯有坐呢張.男友要$23.00o既餐肉奄列早餐,有茄汁焗豆同牛油方包,佢要熱奶茶.我就要$20.00o既牛奶炒滑蛋配牛油多士,都係飲熱奶茶.等o左一陣,兩杯奶茶到o黎,我只加1.5茶匙o既糖,飲一啖暖暖o既奶茶,卻只飲到奶羶味,茶味幾乎係冇,比例好唔o岩.之後,男友o既早餐到o黎,原本唔諗住影相,但見到好似幾大份,咁就影啦.我冇問佢覺得佢o既早餐點.等o左都幾耐,我o個份終於到喇,見到多o左一片火腿,就算係咁,都冇理由咁簡單o既早餐,要等咁耐.我先食牛奶炒滑蛋,淡而無味,一啲奶味都冇(奶茶太多奶,牛奶炒滑蛋卻冇奶,唔通廚房諗住佢o地o係我肚o度自己攪埋一齊就可以?)而且蛋唔嫩滑蛋汁亦欠奉,男友都試一試,佢話加啲鹽會好啲.而牛油多士呢?一片比較燶啲,亦已經唔脆,但可幸牛油落得夠,所以味道唔錯.服務:好有禮貌,入到去坐低會同客人講聲早晨,埋單畀錢都講,然後都講句多謝,拜拜.總結: 服務好固然重要,但食物水準都要好,咁至多人真係為好食而讚,應該要多加注意.

今日(31-8-2011 Wed)因為可以比平日晏少少返,咁就同男友食個早餐啦,我話o黎呢間,因為我第一次o黎食早餐,揀錯o左o野.o黎到,我要搵返o個個早餐,就係$22.00o既D餐,鮑魚片火腿絲通粉,有牛油方包,加$2.00要凍檸水,另外可選兩種指定食品,我揀o左炒蛋同芝士腸.男友要$24.00o既健康早餐套餐2,喇沙肥牛湯米線配皇室三文治(雞蛋,咸牛肉),加$2.00要凍檸茶少甜.落完單,o野食好快到o黎,好,先食鮑魚片火腿絲通粉,鮑魚片有三片,通粉好啲偏軟,唔知係咪有落雞粉o既關係,味道有別於其他茶餐廳.而炒蛋呢,唔係有好多蛋汁,芝士腸同牛油方包都冇乜問題啦,而凍檸水有啲甜過龍.我食完返到公司好口喝,係咁飲水.男友o既喇沙肥牛湯米線,同正宗喇沙比當然差一皮,不過都仍有做到基本o既咖哩湯,而雞蛋,咸牛肉三文治呢,雞蛋包住晒咸牛肉,份量適中,男友食得幾飽.服務:幾好,好友善.衛生:原本覺得冇問題,但食食吓唔覺意睇到我o地冇飲過o既兩杯茶,有油浮o係面,負責洗碗o既員工真係要留意吓.

(16-8-2011 Tue)有飯帶,唔想食麵包做lunch,前一日睇返啲食評,記得有呢間,返到公司睇睇呢日有咩o野set lunch先,唔….OK,決定要個$34.00o既C餐,鮮茄洋蔥斑腩飯,要熱奶茶.由於我預鬆o左時間打去,所以當聽電話個女仔話即刻送到時,我即時話唔使咁急,我幾點至食飯,你幾點至送o黎啦.佢就話好,佢大大概幾點幫我入單啦.真係好.不過夠鐘時,我都驚佢唔記得,所以都打電話去提提佢,佢答我出o左o黎.真係唔錯喎.好,奶茶加一包糖攪勻,飲吓先,冇茶味,只有奶味,唔掂喎.味道: 1.3分打開飯盒,賣相唔太差,顏色好靚,試試先,汁o既酸甜味較得幾好,斑腩仍有少少脆,內裡亦夠滑,蕃茄唔酸但就連埋皮,白飯略嫌硬o左少少,不過不失o既.味道: 3.8分其他:打電話o黎叫外賣時,會問我留低電話同姓氏,本來都冇問題o既,因為驚搵唔到就可以call個客,但我會o係o度寫食評,如果被佢o地睇到,check返就知我係邊個,咁就大件事喇.

我們選了香茅咖哩牛肉同蔥爆白切雞小菜,再加白飯2碗,飲品2杯.合共約$150香茅咖哩好香的咖哩汁,送飯一流.蔥爆白切雞是用新鮮雞,肉質好滑.價錢算合理,晚市食飯有例湯,生果送.餐廳裝修相比附近的好簡潔,乾淨,卡位又闊,不過有蚊.老闆同員工態度都很親切.值得讚是有報紙,雜誌提供給客人免費閱讀.希望會再加更多菜式,例如粥,河粉......

有朋自澳洲來，不亦樂乎！9個人去左名廚燴。我揸車的，地方很容易找，就在楊屋道中間，轉入小路就有個露天停車場，$6/小時。入到去，有點似茶餐廳，但勝在地方光猛寬敞。等人時，同老闆傾下，原來開左無耐，老闆曾參加XX廚神爭霸(我唔記得個名！)，贏左，亦喜歡將好野食分享，所以開左間餐廳。齊人，叫餸食飯，先來碗湯，好夠料，無添加！讚！仲要免費供應，讚讚！來碟黑椒牛柳，微辣，牛肉食得出新鮮，唔會咬橡筋咁，很好味，後來再加個蒜香牛柳，同樣出色！黃金蝦，有少少唔夠脆。多寶魚，新鮮，以$75食呢條魚，抵！椒絲腐乳通菜，大碟，夠鍋氣。茶王雞，海南雞，起晒骨，加埋秘制醬汁(問老闆乜野配料，唔肯講)，必食茶王雞。雜菜煲，多菜，女士們話好食，講真，我無食到！No Comment.咕嚕肉，酸甜恰到好處，脆漿做得好，能鎖住肉汁！讚！鮮蝦炒蛋白，OK.蟹蒸飯，隻膏蟹頂晒角，超正！但已經.....飽到要打包！埋單$750今晚無帶相機，無相提供，下次會再來過及影相。再來時會試下早餐，看到門口餐牌寫三寸雞蛋三文治，蠢蠢欲動！