友聯發燒臘飯店

食完燒雞，又食埋甜品，尾站斬料今晚做餸。點解專登嚟呢度斬料？因為前排睇谷導嘅「消失的味道」，其中有一集講金錢雞（回想最後食呢味嘢已經係廿幾年喺旺角食過，但間燒臘舖亦已經執咗N年了）。另外節目中亦介紹另一款懷舊菜：鴨腳札，於是記低有機會搵日去買嚟回憶一吓。既然去開紅磡，當然順道去買啦。金錢雞（$98/斤），買咗一份；鴨腳札（$98/斤），買咗兩札，接近兩斤，總共$190。金錢雞，有冰肉（2件）、叉燒（2件）、鵝肝（1個）。冰肉，即係肥膏，爽口，但只可淺嚐一小口。叉燒，瘦叉，乾身。鵝肝，一大個，粉嫩軟滑。鴨腳札，比想像中大舊，份量比一個成年男子嘅拳頭還要大。材料有數條鵝腸札住鴨腳（1隻）、叉燒（4件）、燒排骨/燒腩肉（1件）、燒鴨（2件）、燒雞（2件）、鵝肝（1個）、火腿（1件）、芋頭（2舊）。老實講，味道全部都係一種味，就係蜜汁叉燒嘅味，裡面啲材料嘅質素都極之普通，係個鵝肝OK啲，同金錢雞嗰件一樣，粉嫩軟滑。食完今次，之後會唔會再（想）食？機會應該低啲嘞。因為呢類食品，味道及口感真係唔算好食，況且年紀再大啲的話，接受呢味嘢（膽固醇）嘅能力又再低啲。兒時回憶的味道，有時候保留在記憶中不失為一個好嘅選擇。…查看更多

網上聽人講好好味，專登出紅磡斬料加餸，點知伏伏伏到爆！又咸又酸餿… 咁都可以做生意！？真係掉錢落鹹水海 🤢🤢🤢價錢又唔平，食落去又唔健康，慎買！一路食 一大半都係掉落垃圾桶，酸臭味屋企幾個人都食到，唔係一個人個口壞啦，希望今晚唔會肚屙啦⋯⋯…查看更多

話說本編尋找迷失香港惜日的味道.上集講到嚟咗紅磡區橫街窄巷去尋找失去的美食.上次去了（新川美食）食紅薯粉.食完薯粉.繼續我的尋找惜日的旅程.足知在同一條街.但要行前一個街口在紅寶石戲院那一邊發現一間燒臘舖.舖頭門前掛住幾個大大發亮嘅大燈泡.門口並不顯眼.但我就比佢掛著一串一串嘅美食吸引住.首先係（燒鵝肝）好大串.紅噹噹.上面流著啲蜜糖漿向下流.再望真啲隔離又係掛咗兩串.夾雜啲燒味唔同部位.當中有啲係叉燒肥膏部位.邊皮有少少燒焦.一層一層咁串起.又係紅噹噹.啲蜜糖汁慢慢向下流.下面有個叉燒盆承托接住.後來先發現個牌寫住（金錢雞）.原來隔離又掛咗一大串好巨型嘅用鵝腸包紥嘅物體.好似酒樓嗰啲雞紥咁嘅款.不過佢係燒烤.用料唔同.一隻成隻手掌咁大.好誇張.嗰個牌寫住（燒鴨腳紥）.原來我今日要搵嘅嘢就係佢哋就係燒味燒味三寶（昔日窮等人家嘅美食.係用啲燒味頭頭尾尾串燒或包紥成嘅美食）依家已經變成世間美食.三寶之一.一啲都唔平㗎.已經賣到$118元 1斤.喺上菜.唔係周圍都可以食到.所以出嚟尋找昔日香港人嘅味道.就係咁解！🚶🏻‍♂️👉📌友聯發燒臘飯店 (紅磡)紅磡寶其利街2號地舖…查看更多

黃埔開咗兩三間什麼燒鵝專門店，但我暗病太多唔敢食燒鵝，只係想食碟肥叉油雞飯.大家樂大快活D蔥蓉又唔多掂，於是行咗去友聯.第一次去友聯堂食，聽聞質素一般，家人幫襯過話唔多掂，於是平常心去幫襯.一行入餐廳，眼見最少三張枱面未清場，好明顯人手不足.點咗肥叉油雞飯走翼，多色.首先蔥蓉偏鹹，已經大大扣分，另外，我係話過要多色。但真係過多囉，多到好似放湯！係，係我問題…...油雞皮滑肉嫩，而且份量足無偷工減料，滿意！肥叉唔知點講，首先名付其實絕對係肥叉，而且超肥添，應該燒得唔夠耐，令肥肉部位唔夠香，雖然同樣係肥叉，但唔係我中意嘅口感。單睇門面，以為係一間高質燒味店，可惜失望而回。…查看更多

第一次食呢個懷舊菜鴨腳紥同金錢雞好興奮，去到門口見到一串串嘅燒味已經好開心，店員話賣完就冇，所以即刻叫左先，跟住見到乳豬超靚又叫左個例牌，再叫左一兩個小菜，質素不錯。最緊要係今時今日啲食店間間都唔夠人做嘢，莫講話服務，對住你仲黑口黑面。但呢間嘅店員很親切，主動同你介紹菜式及份量。令我地食得好開心及滿意。我地4個人本來想叫一份鴨腳紥＄118 同一份金錢雞＄118，但店員提提醒我地份量大，我地接受左佢嘅意見雙併＄148，4人啱啱好。…查看更多