伯樂餐廳小廚

在這裏附近找吃的地方多，但是這裏的早餐真的值得推介。這次試吃了另一款早餐，以烤豬仔包或厚多士為賣點的。我這次選了厚多士，多士抹上牛油，浸入多士之中香濃牛油味帶點咸味，厚多士又焗得外脆內軟，無論口感或味道都很吸引。配上司華力腸及沙律，這裏的沙律味道很好，份量十足又飽肚，配上一杯熱飲菜蜜，早上便可以享受一個豐富的早餐。…查看更多

伯樂係我呢個大圍友的tea time之選。不過唔係住名城或田心，一定好少留意到佢。普通茶餐廳格局，環境麻麻，係嘢食份量足兼抵食，加分。依家食個茶餐都唔平，難得佢真係良心價....以大圍嚟講，奶茶算最好飲。比起漢年金城，茶味奶味平衡，茶底滑，水準唔飄忽。Tea time當然要叫多個堂食: 鮮茄香草汁餐。厚多士真係有番咁上下厚，加牛油烘底，yummy。其他司華力腸，蛋，蕃茄一般，份量搭救。額外一提呢度老闆真係好好人，上次2點幾去食，叫左個午餐干炒肉絲面，點知佢提我已經夠鐘，可以叫下午茶干炒牛河，慳番7蚊。我自問假如自己係老闆，就唔會咁有良心....like!…查看更多

其實我家就在附近，但一直都無到現場幫趁，只有試過外賣椒鹽鮮魷，可能焗住返屋企，所以覺得一般啦:)終於有機會同多少少家人一齊去堂食(其實係街食先啱...因為有小狗)金沙狗肚魚：有新意，材料亦新鮮...good百花涼瓜煎蛋：有創意，但涼瓜唔夠多，扣分:)魚香茄子、薑蔥魚腩：材料新鮮，味道唔錯架:)沙拉豬排：好味道....因為俾d細既食晒，我只有食波羅...:(整體食材都新鮮，款式有新意，唔錯唔錯唔錯 可以繼續試菜囉…查看更多

現實不同拍戲及漫畫故事般天馬行空，任你手藝再好，單憑一碟腿蛋飯、餐蛋飯及叉蛋飯等，要令進食者黯然消魂及感哭流涕的感覺，看來有點不設實際及困難，除非肚餓到瀕臨死亡邊緣，又另作別論。不過話說回來，偶時來上一碟，味道倒來得不錯，論物資層面來說，香港人始終屬於豐富的一群，甚麼珍饈百味，小炒大菜是未曾試過，有時吃得太豐富也會有食厭吃膩的一天，間中來一些簡單的食物配搭，宏觀來說，絕對不是壞事。今次選了沙田田心街樓下的伯樂茶餐廳，晚市來的是海鮮小菜，午市則可來得精簡一點，約廿八元的一碟飯餐，已包例湯和餐飲，當然凍飲的話，自不然要加多三元，例湯是普通的紅蘿蔔煲豬骨，勝在湯味足夠，也沒察覺下了重味精，另外凍檸茶的檸片的數量還算不少，紅茶夠濃亦來得凍身。有別於豬仔嘜的出品，今次這兩片「貴價食材」，是採用凍肉店的圓身漢堡扒狀，類似越市的Cold Cut，雖然不算太厚，煎得還算香口，配上兩隻荷包蛋，弄得兩邊也是焦邊，中間流出來的蛋黃，用來送飯本為不錯，可惜飯底不算太多之餘，也不夠熱，大大影響整碟飯的味道。價錢雖不算貴，論這碟飯的發揮出來的「完全境界」，只能達到七成而已。…查看更多

一個放埋左一邊幾個月嘅食評, 遲遲都未寫得出, 皆因師傅早期忙到顛, 時至今日終於可以重見天日; 雖然隔左咁耐, 但師傅對當時嘅地方, 食物同埋食友就一d都冇唔記得, 因為當日師傅係得到開飯網大名鼎鼎嘅食家 “間中掛單 --- 子陵”嘅邀請, 目的在於一齊品嚐美食, 至於交流心得, 師傅真係愧不敢當!揀好日子後, 就由食家 “間中掛單 --- 子陵”揸莊, 而食家 “間中掛單 --- 子陵”就揀左大圍區, 對於師傅黎講大圍區就如去到外國一樣, 當一出火車站後, 師傅就如一隻迷途小羔羊咁, 幸得食家 “間中掛單 --- 子陵”帶路, 於是師傅只好一直死跟! 食家 “間中掛單 --- 子陵”一早已經揀定呢間食店, 去到食店唔算太多人, 而伙計就安排坐喺街邊! 坐底後就由食家 “間中掛單 --- 子陵”發板, 於是就揀左冰鎮拼盤, 臘味炒芥蘭, 蝦醬蒸腩肉同埋煎黃鱲倉, 落完單當然唔少得柯打番支大啤啦! 邊飲啤酒, 邊吹住水, 又邊等食物, 如是者吹左半粒鐘都仲未有得食, 於是唯有催下當局, 而當時第一支大啤已經吹完, 唯有再吹多支啦; 師傅當時心諗莫非呢招係食店嘅秘技, 特登唔比你食住等你飲多兩枝啤酒先, 賺多兩支啤酒錢? 點解師傅會用 “特登”呢兩個字呢? 皆因根據師傅嘅非正式統計, 等左至少四十五分鐘, 第一道菜才登場, 登場的並非甚麼複雜的食物, 而是冰鎮拼盤, 到底冰鎮拼盤點解要等咁耐呢? 師傅就不得而知, 但用陰謀論套在呢個秘技上亦不為過! 好, 先講下個冰鎮拼盤, 有鱔片, 生腸, 鮑片同埋涼瓜四味, 四揀一先, 師傅第一口當然係揀生腸, 生腸做得非常爽口, 入口感覺新鮮, 仲有帶少少辣, 都幾惹味; 不過硬要同肥姐比較, 始終都係差少少, 肥姐嘅大生腸係有搶住食嘅感覺, 而呢間食店的就冇, 不過整體已經做得非常出色; 再試鱔片, 鱔片新鮮入口爽甜, 不過就帶少少腥, 如果能除去腥味相信會更加吸引; 至於鮑片味道鮮甜, 爽口中帶少少煙韌, 感覺都唔錯; 最後到師傅唔食的涼瓜了, 師傅唔食涼瓜全因為唔捱得苦, 但為了試得清楚, 師傅就豁出去夾了一件, 最後入口發覺除了苦之外, 就係非常苦, 其他的味道全都沒有了!接住黎的是臘味炒芥蘭, 呢碟野份量都幾多, 炒起來都幾香; 先講下芥蘭, 芥蘭炒得爽口但絕對唔硬身, 入口用鬆軟呢兩個字黎形容就最能表達師傅嘅感受, 而臘味有臘腸, 潤腸和臘肉三味, 臘腸略嫌硬身, 絕對唔係師傅杯茶; 潤腸相對地較腍和較香, 有惹起食慾嘅功效; 最後臘肉就比較油身, 不過呢三樣野撈埋芥蘭黎炒著實係恰到好處, 色香味樣樣齊, 食略嫌油膩, 整體水準算不俗!另一道菜係蝦醬腩肉蒸茄子, 先講下腩肉, 腩肉係屬於半肥瘦的, 入口就十分爽口, 配上蝦醬味道香濃搶口, 坦白講真係幾惹味, 有少少停唔倒, 不過師傅就略嫌太咸, 如果能夠調稀番少少, 感覺應該更佳; 而腩肉底下仲有茄子, 茄子蒸得夠腍, 而且非常入味, 更重要一點係茄子好鮮甜, 整道菜的水準堪稱出色, 用黎送飯真的不錯, 食家 “間中掛單 --- 子陵”果然冇介紹錯!最後係煎黃鱲倉, 煎黃鱲倉已經係眾道菜最遲登場的, 仲要三催四請至有得食, 點知竟然仲要攪錯, 明明落單要煎, 點知就黎左蒸, 煎同蒸嘅發音唔係真係咁似呀? 再講黃鱲倉師傅始終覺得煎係好味過蒸好多, 但米已成炊就唯有接受現實! 煎黃鱲倉變左豉汁蒸黃鱲倉, 上面嘅魚身尚算蒸得滑身, 但反過另一邊就變得鞋身, 有少少顧前唔顧後的感覺, 加上魚身帶微腥, 呢個位真係扣唔少分呀, 落錯單仲要有咁嘅水準, 真係錯冇錯著! 總括黎講食物水準屬於中中地, 不過不失, 絕對未到非吃不可, 而服務尚算殷勤有禮, 價錢亦算合理, 四道菜兩支大啤加一個白飯,埋單每人百二元正, 抵食角度就一般啦! 能夠結識到食家 “間中掛單 --- 子陵”著實係師傅榮幸, 並希望食家不要為當晚飯局而耿耿於懷, 還望不久將來能再黎一次 “紙鷂(子姚)飯局”! 笑臉就真係難以一比, 再黎機會亦不大, 皆因師傅都好少去大圍嘛! …查看更多